Read ebira Ireevi 12 Bible Online

Ireevi 12 - ebira bible

Ireevi 12

¹Ẹnẹyịmavara ộ kà a yị Imosiisi ka,

²Ọ̀ kà a yị Anisirẹrị nịnị ka, ọnyẹnẹẹ òo zyẹẹ, dị ọ́ ma ozi ọnọrụ nị, pooro dị ọ̀ mẹ ẹkụhị ịhịmba, ọnịrị ịdọtị ọ vị nị. Vị́ ọ́ rẹ sị mẹ anka èe ré ịsị ụhwẹ anị avọọ nị. Ọnyẹnẹẹ ọnọọ ẹ́ yị nị.

³Ọ kà ịhị ẹgwẹhịnta ọnị ọ́ ma ozi ọnọọ, a vaa jị ọ ụvẹvẹnẹ.

⁴Dị ọnẹẹ ọnọọ vana mẹ ẹkụhị ohurẹẹwụ tụra ẹẹta dị à va nyị ka ọ́ọ nị. Ẹ́ yị vaa nyayịnẹẹ kanyị ịsa ọnịnị ọnyọọnyị à vị̀ ka ọ̀ ngụ ịnị irehi Ohomorihi ẹ̀ yị vị ịjị ẹkụhị ana vọrọ ka ọ̀ mẹ dị ọ̀ nị sị gụ.

⁵Ama àa vị ozi ọnẹẹ ọ́ ma nị, ọsẹ ẹẹva ọ́ vaa vị ọnịrị ịdọtịị vị, anka èe ré ịsị ụhwẹ anị avọọ nị. Dị ọ varẹma mẹ ẹkụhị ẹbẹẹta tụra ịhịnọnyị dị ọ̀ va nị hụụnị ọnị ọ́ va ha nị.

⁶Ịhị ẹkụhị ana a vọrọ ka ọnẹẹ ọnọọ ọ̀ mẹ dị ọ̀ nị ọ̀ọ sị gụ, ọ̀ọ vị ẹkụhị ozi ọnọrụ, ọ̀ọ vị ẹkụhị ozi ọnẹẹ, ọ vaa sị ozi atẹmẹ ịrayị ọnyara vee tu ohirẹsụ irehi Ohomorihi enoze irehi Ohomorihi dị ọ sị mẹ̀ ịsọvọ ana aā rị ịra. Ọ rẹ vaa sị arekuku ọnyara à vị arivadi ọnyara vẹ ọ̀ yị mẹ̀ ịsọvọ ịvị.

⁷Ohirẹsụ Irehi Ohomorihi ọnọọ vaa sị ịsị ịsọvọ ọnẹẹ ọnọnịị yị Ẹnẹyịmavara, dị ọ mẹ avaba ido ana a vaa sị kụ ịdọtị ọnẹẹ ọnọọ kwooze. Ọnẹẹ ọnọọ vaa nị hụụnị ịdọtị anya ọnị ọ́ va ha. Aanị ọnyẹnẹẹ ana ma ozi vaa saasa ọda ọnọnị nị.

⁸Ọnyẹnẹẹ ọnọọ ẹ̀ yị zụ sị ozi atẹmẹ ọnyara vẹ, ọ vaa sị arekuku à vị arivadi ẹẹva, àa sị ọnya mẹ̀ ịsọvọ ana aā rị ịra, dị aa sị ọsa mẹ̀ ịsọvọ ịvị. Ohirẹsụ irehi Ohomorihi vaa mẹ ido ana a vaa sị kụ ịdọtị anịị kwooze, dị ọnẹẹ ọnọọ nị.