Read ebira Ireevi 13 Bible Online

Ireevi 13 - ebira bible

Ireevi 13

¹Ẹnẹyịmavara ộ kà a yị Imosiisi ọnịrị Eerọnị ka,

²Ikenebe ọ̀ọ jị ọza, à vị dị ịtahụ tụra a nị, ọ̀ọ va vị ka ẹngụ anị hụ́, ana ahịka ka ọ zụ vara ụkụ odivi tụ ọ ụpẹngụ nị, à sị ọza ọnọọ ne tu Eerọnị à vị evere anị ana vị ohirẹsụ irehi Ohomorihi.

³Ohirẹsụ irehi Ohomorihi ọnọọ vaa zama ịtahụ ọnọọ re; ẹyị ana ya ịpa ịtahụ ọnọọ ọ̀ọ sị vara ọvwọọvụ, dị ịtahụ ọnọọ sị nyịnẹ hu ọchẹngụ anị ana vọ nị, ụkụ ọbanyị ọ vị avọọ nị, ohirẹsụ irehi Ohomorihi ọnọọ vaa kà a ka ọza ọnọọ ẹ́ yị kụkụ nị.

⁴Ama ịtahụ ana tụra tụ ọ ẹngụ ọ̀ọ vị ọvwọọvụ, dị ẹ̀ yị nyịnẹ huni ụpẹngụ anị ana vọ nị, dị ẹyị ana ya ịzọọ ẹ̀ yị rẹ vara ọvwọọvụ nị, ohirẹsụ irehi Ohomorihi ọnọọ vee gù oze hi ọza ọnị ụkụ ọnọnị za aanị mẹ ẹkụhị ịhịmba tụ ọ.

⁵Ịhị ẹ tụ ọ ẹkụhị ịhịmba, ohirẹsụ irehi Ohomorihi rẹ vaa zama a re, òo re ka ịtahụ ọnọọ ẹ́ yị dà gẹ ụpẹngụ anị ana vọ, ọ rẹ vee gù oze hi ọọ mẹ ẹkụhị ịhịmba tụ ọ.

⁶Ịhị ẹ tụ ọ ẹkụhị ịhịmba anị, ohirẹsụ irehi Ohomorihi rẹ vaa zama a re, ịtahụ ọnọọ àa vị, dị ẹ̀ yị dà gẹ ụpẹngụ ana vọ nị, ohirẹsụ irehi Ohomorihi ọnọọ vaa kà a ka ọza ọnọọ ọ́ọ nị. Ịtahụ kẹnẹ ịtahụ anị vị nị, ọ va naa nyịna ịta anị, dị ọnị ụvọta nị.

⁷Ama ịtahụ ọnọọ ọ̀ọ vana naa garaa hi ẹngụ ịrẹma ọnị ohirẹsụ irehi Ohomorihi raa zama a re dị ọ́ kà a ộ nị, ọza ọnọọ ọ̀ varẹma ve tu ohirẹsụ irehi Ohomorihi.

⁸Ohirẹsụ irehi Ohomorihi vaa zama a re, àa vị ịtahụ ọnọọ sị yara hi ẹngụ nị, dị ọ kà a ka ọza ọnị ụkụ ọnọnị za ẹ́ yị kụkụ nị, ụkụ ọbanyị ọ za a nị.

⁹Ụkụ ọbanyị ọ̀ọ za ọza, à sị ọza ọnọọ ne tu ohirẹsụ irehi Ohomorihi.

¹⁰Ọ vaa zama a re, àa nyị ịtahụ ọvwọọvụ hi ịnị ụpẹngụ anị ana sị ngụ enyi, dị ẹ́ mẹ ka ẹyị ene hi ịzọọ ẹ̀ vara ọvwọọvụ nị,

¹¹Ụkụ ọbanyị ẹnẹ ẹ̀ yị zụ ta ọ vị ọnọọ nị, ohirẹsụ irehi Ohomorihi vaa kà a ka ọza ọnị ụkụ ọnọnị za aanị ẹ́ yị nị. O vee gù oze hi ọ agụvị ka ẹ́ yị nị.

¹²Ụkụ ọbanyị ọnọnị ọ̀ọ chaka ku ọza ẹngụ hụụnị ịrẹsụ na ngụ ịpẹtahụ,

¹³Ohirẹsụ irehi Ohomorihi vaa zama ọza ọnọọ re, àa vị ọchẹngụ anị kẹnẹ ọ́ za nị, ọ vaa kà a ka ọza ọnọọ ọ́ọ nị. Avaba ụpẹngụ anị àa vwẹtẹ, ọza ọnọọ ọ́ọ nị.

¹⁴Ama ọba ọnị o tu dị ikenebe si nyima aa vẹ ịnị ẹngụ anị, ọza ọnọọ ẹ́ yị kụkụ nị.

¹⁵Ohirẹsụ irehi Ohomorihi vaa zama ikenebe ọnọọ re, dị ọọ kà a ka ọza ọnọọ ẹ́ yị nị, agụvị ka ụkụ ọbanyị ọ za a nị.

¹⁶Ama ikenebe ọnọọ ọ̀ọ varẹma vị́, dị aa vwẹtẹ nị, ọza ọnọọ vaa varẹma nee tu ohirẹsụ irehi Ohomorihi,

¹⁷Ọ vaa zama a re, ikenebe anị ọ̀ọ sị vara ọvwọọvụ, ohirẹsụ irehi Ohomorihi vaa kà a ka ọza ọnị ụkụ ọnọnị za aanị ọ́ọ nị. Vị́ ọza ọnọọ ọ́ọ nị avọọ nị.

¹⁸Ịtahụ ọ̀ọ tụra ọza ọnyọọnyị dị ọ sị vị nị,

¹⁹Ịzị ịtahụ ọnọọ vịdị ya ọ̀ọ vana tụra, di ee vi vaa hùra ọvwọọvụ nị, ọ̀ sị ọ va zụ ohirẹsụ irehi Ohomorihi.

²⁰Ọ vaa zama a re, ịtahụ ọnọọ ọ̀ọ nyịnẹ huni ụpẹngụ anị ana vọ, dị ẹyị ana ya ịzọọ sị vara ọvwọọvụ nị, ohirẹsụ irehi Ohomorihi vaa kà a ka ọza ọnọọ ẹ́ yị kụkụ nị, ụkụ ọbanyị ọ zaa ana da tụ ẹhẹ ịnị ịtahụ ọnọọ avọọ nị.

²¹Ama ohirẹsụ irehi Ohomorihi ọ̀ọ zama a re, dị ẹyị ana ya ịzọọ ẹ̀ yị vị ọvwọọvụ, dị ịtahụ ọnọọ ẹ̀ yị rẹ nyịnẹ huni ụpẹngụ anị ana avọ, ama dị o si nyima aa vị nị, ohirẹsụ irehi Ohomorihi vee gù oze hi ọ mẹ ẹkụhị ịhịmba.

²²Ịtahụ ọnọọ ọ̀ọ yara hi ọ ụpẹngụ, ohirẹsụ irehi Ohomorihi vaa kà a ka ọza ọnọọ ẹ́ yị kụkụ nị; vị́ ụkụ za a avọọ nị.

²³Ama àa vị ka aha ọnya ịtahụ ọnọọ ya, dị ẹ̀ yị yara nị, apa ịtahụ kẹnẹ ọ vị nị ohirẹsụ irehi Ohomorihi vaa kà a ka ọza ọnọọ ọọ nị.

²⁴Ẹngụ ọza ọọ rị ịra, dị ikenebe anị vị ọvwọọvụ, à vị ovivi vahụra ọvwọọvụ nị,

²⁵Ohirẹsụ irehi Ohomorihi vaa zama a re, ẹyị ana ya ịzọọ ọ̀ọ sị vara ọvwọọvụ, dị ikenebe ọnọọ sị mẹẹ ka ọọ nyịnẹ huni ụpẹngụ anị nị, ụkụ ọbanyị ọ vị ọnọọ nị. Ọ sị da tụ ẹhẹ ịzị ẹngụ ọza ọnọọ rị ịra, ohirẹsụ irehi Ohomorihi vaa kà a ka ọza ọnọọ ọ yị kụkụ nị; ụkụ ọbanyị ọ vị ọnọọ nị.

²⁶Ama ohirẹsụ irehi Ohomorihi ọ̀ọ zama a re, dị ẹyị ana ya ịpa ịtahụ ọnọọ ẹ̀ yị vị ọvwọọvụ, dị ịtahụ anị ẹ̀ yị rẹ nyịnẹ huni ụpẹngụ anị ana vọ, ama dị ó sị nyima aa vị́ nị, o vee gù oze hi ọza ọnị ụkụ ọnọọ za aanị ẹkụhị ịhịmba.

²⁷Ịhị ẹ tụ ọ ẹkụhị ịhịmba, ohirẹsụ irehi Ohomorihi rẹ vaa zama a re; àa vị ịtahụ ọnọọ aa yaraa hi ọ ẹngụ nị, ohirẹsụ irehi Ohomorihi vaa kà a ka ọza ọnọọ ẹ́ yị kụkụ nị. Ụkụ ọbanyị ọ vị ọnọọ nị.

²⁸Ama ịtahụ ọnọọ ọ̀ọ ya aha ọnya, dị ẹ̀ yị gara hi ọ ẹngụ, ama dị aa vị́ nị; ịtahụ kẹnẹ ọ tụra a tụ ịzị ẹ vịdị rị ịra nị, ohirẹsụ irehi Ohomorihi vaa kà a ka ọ́ọ nị. Apịtahụ ịzị ẹ vịdị rị ịra yọ nị.

²⁹Ọza ọ̀ọ nyị ịtahụ tụ ịnị ịrẹsụ à vị ịnị ịrẹwa, ọ̀ọ vị ọnọrụ, ọ̀ọ vị ọnẹẹ,

³⁰Ohirẹsụ irehi Ohomorihi vaa zama re; ịtahụ ọnọọ ọ̀ọ nyịnẹ huni ụpẹngụ anị ana vọ, dị ẹyị ẹnyị gegege eweyi-eweyi hi ịnị anị nị, ụkụ ẹngụhụ ọ za a ịrẹsụ à vị ịrẹwa avọọ nị, ohirẹsụ irehi Ohomorihi vaa kà a ka ọza ọnọọ ọ́ yị kụkụ nị.

³¹Ohirẹsụ irehi Ohomorihi ọ̀ọ zama ụkụ ẹngụhụ ọnọọ re, dị ẹ̀ yị nyịnẹ huni ụpẹngụ anị ana kara a, dị ẹ̀ yị rẹ nyị ẹyị ojooji ịnị anị nị, ohirẹsụ irehi Ohomorihi vee gù oze hi ọza ọnị ụkụ ọnọnị za aanị, ẹkụhị ịhịmba.

³²Ịhị ẹ tụ ọ ẹkụhị ịhịmba, ohirẹsụ irehi Ohomorihi rẹ vaa zama ụkụ ọnọọ re, ẹngụhụ anị ọnọnị ẹ̀ yị gara hị́ ọ ẹngụ, dị ẹ̀ yị rẹ nyị ẹyị ẹnyị gegege ịnị anị nị, ịtahụ ọnọọ ẹ̀ yị nyịnẹ huni ụpẹngụ anị ana kara a,

³³Ọza ọnị ẹngụ aa zị aanị vaa kụ́ avaba ịrẹsụ anị ọnịrị ịrẹwa; dị ohirẹsụ irehi Ohomorihi gù oze hi ọ ẹkụhị ịhịmba tụ ọ.

³⁴Ịhị ẹ tụ ọ ẹkụhị ịhịmba, ohirẹsụ irehi Ohomorihi rẹ vaa zama ẹngụhụ ọnọọ re, ẹ̀ yị gara hi ọza ọnọnị ẹngụ, dị ẹ̀ yị rẹ nyịnẹ huni ụpẹngụ anị ana kara a nị, ohirẹsụ irehi Ohomorihi vaa kà a yọ ka ọ́ọ nị. Ọza ọnị ẹngụ aa zị aanị vanaa nyịna ịta anị, dị ọnị ụvọta nị.

³⁵Ama ẹngụhụ ọnọnị ọ̀ọ vana gara hi ọ ẹngụ ịrẹma ana a sị ọ ka ka ọ́ọ nị,

³⁶Ohirẹsụ irehi Ohomorihi vaa zama a re, Ẹngụhụ ọnọnị ọ̀ọ sị gara hi ọ ẹngụ, ẹ́ yị kụkụ nyị ka ohirẹsụ irehi Ohomorihi ò nee si ẹyị ẹnyị gegege, vị ọza ọnọọ ẹ̀ yị kụkụ nị avọọ nị.

³⁷Ama ịnị eyi anị, ọ̀ọ zama ẹngụhụ ọnọnị re, dị o ree nyị ẹyị ojooji nị, vị ẹngụhụ ọnọọ sị vị́ avọọ nị, ohirẹsụ irehi Ohomorihi vaa kà a ka ọza ọnọnị ọọ nị.

³⁸Ụpẹngụ ọza àa dàa vwẹtẹ, ọ̀ọ vị ọnọrụ ọ̀ọ vị ọnẹẹ,

³⁹Ohirẹsụ irehi Ohomorihi vaa zama a re; àa vị ịzị aa dàa vwẹtẹ ịnị ẹngụ aanị aa vwẹtẹ cheeche nị, vị ẹngụ anị che apa kẹnẹ nị, ọza ọnọọ ọ́ọ nị.

⁴⁰Ẹyị ịnị akakana ịrẹsụ ọza òo hu ha, ọ́ raa nyị ọmarị, ama, ọza ọnọọ ọọ nị.

⁴¹Àa vị ẹyị ọvịdị ịrẹsụ ọza o hu ha nị, ọmarị ọvịdị ịrẹsụ ọ́ nyị avọọ nị, ama ọza ọnọọ ọọ nị.

⁴²Ama àa nyị ịtahụ ịnị ọmarị a vị ịnị ọvịdị ịrẹsụ ọza ana dàa ví vahura ọvwọọvụ ịnị ịrẹsụ ọza, ụkụ ọbanyị aa dàa tụ́ ẹhẹ ịzọọ avọọ nị.

⁴³Ohirẹsụ irehi Ohomorihi vaa zama a re. Ịtahụ ana tụra a ọmarị aanị, èe ví vaa hùra ọvwọọvụ, anka ụkụ ọbanyị òo rere aa sị ẹngụụ zụ ịnị ọchẹngụ ọza avọọ,

⁴⁴Vị́ ụkụ ọbanyị za a avọọ nị, ẹ́ yị kụkụ nị. Aa nyị ka ohirẹsụ irehi Ohomorihi ọ̀ kà a yọ ka agụvị ụkụ ana ya ịnị ịrẹsụ anị aanị, ẹ́ yị kụkụ nị.

⁴⁵Ọza ọnị ụkụ ọbanyị ọnọọ za vị ana vaa kụ ẹnya ana nàa hi ẹngụ, dị a sị o che ẹyị anị. Ọ̀ và ịsa ku irenu dị oo nowu ka ọnị ẹ́ yị nị o, ọnị ẹ́ yị nị o.

⁴⁶Ịrẹma ọnị ụkụ ọnọọ yị yàrị ọ, ọ́ yị vaa nị, agụvị ka ẹ́ yị nị, ọ́ vaa hụụ ịzị aza ana vọ ra hi, dị ọyịnyara na ra aha ọsa nị.

⁴⁷Ịta ọ̀ọ chị́ uru, ọ̀ọ vị ịta ana a sị ẹyị atẹmẹ hi, ọ̀ọ va vị ịta ana a sị òwù hí.

⁴⁸Ịpa ọnị ọ̀ọ vị ịnị ịta ana a sị ẹyị atẹmẹ, à vị òwù hí, à vị ịzị ọ̀ọ vị ịnị ịtụmpaha à vị ịsị a sị ịtụmpaha mẹ kẹnẹ,

⁴⁹Uru ana chị́ tụ ịnị awuru aanị, ọ̀ọ vị ẹrẹẹrẹ, ọ̀ọ vị ovivi, uru anaā gara zịịzị ọ́ vị nị. À sị ọ na zụ̀ ohirẹsụ irehi Ohomorihi.

⁵⁰Ohirẹsụ irehi Ohomorihi vaa zama a re, dị o gù oze hi ịsị uru ọnọọ chị́ hi aanị, ẹkụhị ịhịmba.

⁵¹Ịhị ẹ tụ ọ ẹkụhị ịhịmba, ọ vaa zama uru ọnọọ re. Ọ̀ọ gara hi avaba awuru ọnọọ, vị́ awuru ọnọọ ẹ̀ yị kụkụ nị avọọ nị.

⁵²Ohirẹsụ irehi Ohomorihi vaa rị achị ana sị òwù hí ịra, agụvị ka uru anaa gara zịịzị ọ chị́ hi ịnị anị nị. Vị́ a vọrọ ka à rị ọ ịra nị.

⁵³Ama ọ̀ọ zama a re ịnị ịhị ẹ tụ ọ ẹkụhị ịhịmba, dị ọ re ka uru ọnọọ ẹ́ yị chị́ hi aha ana vọ ịnị ịsa ọnọọ nị,

⁵⁴Ohirẹsụ irehi Ohomorihi ọnọọ vaa mẹ ọda ka, gù oze hi ọ ẹkụhị ịhịmba tụ ọ.

⁵⁵Ohirẹsụ irehi Ohomorihi vaa varẹma zama ịsa ana chị̄ uru aanịị re ịrẹma ana a raa nyịna a. Enyi uru ana chị hi ọ aanị ẹ̀ yị vara, ọ̀ọ daka vị ka uru ọnọọ ẹ́ yị gara hi ọ zịịzị, ịsa ọnọọ ẹ́ yị kụkụ nị, ụ vaa rị ọ ịra nị; ọ̀ọ vị ọvịdị anị uru ọnọọ chị́ hi nị, ọ̀ọ va vị ịrẹma anị.

⁵⁶Ama ohirẹsụ irehi Ohomorihi ọ̀ọ zama a, dị o ré ka uru ọnọọ o si nyima aa hụụnị anị ịrẹma ana a sị ọ nyịna nị, ịpa ọnị uru ọnọọ ya avọọ kẹnẹ, ọ́ vaa nàa hụụnị awuru ọnọọ à vị hụụnị ịsa a sị ịtụmpaha mẹ aanị nị.

⁵⁷Uru ọnọọ ọ̀ọ varẹma sị ẹngụ zụ, vị́ o si nyima aa varẹma gara zịịzị hi ịsa ọnọọ avọọ nị ọza ana nyị ọ̀ rị ọ ịra.

⁵⁸Ọ̀ọ nyị ịsa ọnọọ, dị ịpa ọnọọ hụụnị anị nị, ọ rẹ vaa varẹma tenyi ọ nyịna, dị ọ̀ va nị.

⁵⁹Ọsọnị ọ vị ọda ịta ana chị uru nị, ọ̀ọ vị ịta ana a sị ẹyị atẹmẹ à vị òwù hí, ọ̀ọ va vị ịsa ana a sị ịtụmpaha mẹ. Aanị á mẹmẹ vaa yẹ ọ̀ọ rụra mẹ ido à vị ẹ̀ yị rụra mẹ̀ ẹ nị.