Read ebira Ireevi 27 Bible Online

Ireevi 27 - ebira bible

Ireevi 27

¹Ẹnẹyịmavara ộ kà a yị Imosiisi ka,

²Ọ̀ zụ ọda ẹnẹnị yị Anisirẹrị nịnị. Ọ kà, ọza ọ̀ọ zẹẹ Ẹnẹyịmavara ịzẹzẹ ka ọnị vaa sị ọza vaa yị ọ, dị ọ sị ọza ọnọọ vẹ nị, ọpa ẹkẹhị ene e vee si dị à sị hị́ ọza ọnọọ varẹma yị,

³ọpa ẹkẹhị ọnị ohirẹsụ Irehi Ohomorihi nịnị vaa dọ ịrẹsụ ọnọrụ ana vị ịrayị oohu na ngụ ịrayị ẹbẹẹta vị akahị. Ọpa avọọ aa dọ ịnị irehi Ohomorihi nị.

⁴Àa vị ọnẹẹ yị ọnị, dị ọ vị akata.

⁵Ọza ọnọọ ọ̀ọ vị ọnọrụ ana vị ịrayị ẹẹhị na ngụ ịrayị oohu, Ịnayịra oohu ẹ́ vaa dọ nị. Ọ̀ọ vị ọnẹẹ dị ẹ dọ Ịnayịra ẹẹwụ.

⁶Ọ̀ọ vị ozi ọnọrụ ẹhwị ụhwẹ ọnya na ngụ ịrayị ẹẹhị avọọ, Ịnayịra ẹẹhị á vaa dọ nị. Àa vị ozi ọnẹẹ yọ nị, dị a dọ Ịnayịra ẹẹta ịrẹsụ anị.

⁷Ọza ọnọọ ọvị ọnọrụ ọnị ịrayị anị vị ẹbẹẹta daa vahịrẹ, ẹ́ vaa dọ Ịnayịra ẹwụrẹhị. Ọ̀ọ vị ọnyẹnẹẹ dị ẹ dọ Ịnayịra ẹẹwụ ịrẹsụ anị.

⁸Ọza ana zẹẹ ịzẹzẹ ọnọnị ee ré osiye baaba, dị ẹ̀ yị zụ si ọpa irihi ana a jị tụ ọ nị, ọ vaa sị ọza ana a zẹẹ ịzẹzẹ anị aanị vee tù ohirẹsụ Irehi Ohomorihi, dị ohirẹsụ irehi Ohomorihi jị irihi ọyị pọ̀ tụ ọ yị ọ. Ọpa ụkata ọza ana zẹ ịzẹzẹ ọnọnị ọ́ vaa jị irihi yị ọ ọnị ó vee si nị.

⁹Àa vị ẹngụ ịsụpa ana á dọ ka à sịị mẹ ịsọvọọ yị Ẹnẹyịmavara á vavọọ zẹẹ ịzẹzẹ anị nị, avaba ịsị àa sị va yị Ẹnẹyịmavara vị ana vaa sị tụ irenyii yọ.

¹⁰Ọza ana zẹẹ ịzẹzẹ ọnọnị, é yi vee re oze sị ịsị ọsaa dọ ọ ịrẹsụ. É yi re oze sị ịsị ozoza vara odivi, à vị ka ọ̀ sị odivi va vara ịsị ozoza, ọ̀ọ sị ịsụpa ọnya va vara ọsa, Ẹnẹyịmavara ọ kụkụ vaa nyị ẹnị ẹyịva nị.

¹¹Àa vị ẹngụ ịsụpa ọnị ọza ẹ̀ yị ma sị mẹ̀ ịsọvọ yị Ẹnẹyịmavara ọza zẹẹ ịzẹzẹ anị nị, ọza ọnọọ vaa sị ịsụpa ọnọọ vee tu ohirẹsụ Irehi Ohomorihi.

¹²Ohirẹsụ Irehi Ohomorihi vaa jị irihi tụ ọ, ẹhụ ịsụpa ọnọọ ọ̀ọ mẹmẹ zoza. Ọpa irihi ọnị ọ̀ọ jị tụ ọ, e vee sí nị; ọza ẹ́ yị vaa sẹ̀ ẹ irihi.

¹³Ọza ọnọọ òo si ka ọnị aa hị́ ọ varẹma, o vee sí achehi ẹẹhị irihi ana a jị tụ ọ vaka a.

¹⁴Ọza ọ̀ọ hụrị irehi anịị ụvọ yị Ẹnẹyịmavara kà ọ̀ọ sị, ohirẹsụ irehi Ohomorihi vaa zama a re, ó meme zoza, avị ọ́ meme divi, dị ọ vavọọ jị irihi tụ ọ. Ọpa irihi ọnị ọ̀ọ jị tụ ọ, ọ́ vaa vị nị.

¹⁵Ọza ana vavọọ sị irehi anị yị Ohomorihi òo sì ka ọnị ọ̀ hị́ ọ varẹma, o vee sị achehi ẹẹhị irihi ana á jị tụ ọ vaka a.

¹⁶Ọza ọ̀ọ da ịnị ẹtẹ ọnị ọ nyị yị Ẹnẹyịmavara ọpa ẹkẹhị uhu ana hụ chire tụ ọ a vaa jị irihii tụ ọ nị. Uhu ibaari ikirogirami oohu vị Ịnayịra ẹẹwụ.

¹⁷Àa vị ịrayị ana á sịị̄ va ịsa ịrẹmaa yị aza ana nyị me tu kẹnẹ ọza ọnọọ sị ẹtẹ ọnọọ yị Ẹnẹyịmavara anị, ẹhwịị irihi anị á yị vaa jịị tụ ọ nị.

¹⁸Ama ịrayị ana a sịị̄ va ịsa ịrẹmaa yị aza ana nyị ọ̀ọ sị parahu dị ọ va sị ẹtẹ ọnọọ yị Ẹnẹyịmavara nị, ohirẹsụ irehi Ohomorihi vaa sị eyii mọ ọpa ẹkẹhị anị ịnị ẹhwịị ịrayị ana vọ dị ịrayị ana vana sịị và ịsa ịrẹmaa yị aza ọ̀ re vene tù, dị ọ̀ dà hụụnị irihi ẹtẹ ọnọọ.

¹⁹Ọza ana sị ẹtẹ ọnọọ yị Ẹnẹyịmavara òo sì ka ọnị aa hị́ ọ varẹma, o vee sị achehi ẹẹhị irihi anịị vaka a.

²⁰Ama ọza ọnọnị èe yi sì ka ọnị ọ̀ hị́ ọ varẹma, a vị ka dị ọ́ ná ẹ yị ọza ẹnẹsa nị, e yi kuku vee re oze hị́ ẹtẹ ọnọọ varẹma.

²¹Ama àa vị ụmẹ ana aa và ịsa ịrẹmaa yị aza ana nyị a sị hụrẹ ẹtẹ ọnọọ ụvọ yị Ẹnẹyịmavara nị, ọnị ọ vana kụkụụ nyị pooro nị. E ree si chire ụvọ da. Ohirẹsụ irehi Ohomorihi nịnị ẹ vaa nyị nị.

²²Àa vị ẹtẹ ọnị ọza hị́, dị ahịka ẹ́ yị vị ogu ana hụrẹ ụvọ yị ọ ọ sị yị Ẹnẹyịmavara nị,

²³ohirẹsụ irehi Ohomorihi ọnọọ vee rò o ọpa ịrayị ana vọ dọ ịrayị ana á vana sịị và ịsa ịrẹmaa yị aza ò tù, dị ọ vavọọ jị irihi tụ ọ. Ọza ọnọọ vee sị ọpa irihi ana a jị tụ ọ ịhyọnịhyọnọọ. Ẹnẹyịmavara ọ nyị ẹkẹhị ọnọọ nị.

²⁴Ịhị ịrayị ana a sịị và ịsa ịrẹmaa yị aza òo tu, a vaa và ẹtẹ ọnọọ ịrẹma yị ọza ana nyị obooro, ọnị ọ́ hị́ ọ hụụnị ụvọ anị, ẹ̀yị vavọọ, dị a và a ịrẹma yị ezi anị.

²⁵Avaba irihi ana a vaa jị vị ana vaa saasa ọpa ana a sịị̄ mọ ịsa ịnị irehi Ohomorihi.

²⁶Ozi ịpaapa ịsụpa, ọ̀ọ vị ozi imaaru, ọ̀ọ vị ozi atẹmẹ, vị Ẹ́ẹnẹyịmavara. Ọza ẹ́ yị zụ sị ọ va mẹ̀ ẹ ẹyịza, agụvị ka ọnị ọ vịdị yị nyị nị.

²⁷Àa vị ịsụpa ọnị ọda ẹ̀ yị dọ ka à rị yọ nị, ọza ọnọọ vaa hị́ ọ varẹma ọpa irihi ọnị ohirẹsụ irehi Ohomorihi ọ̀ọ jị tụ ọ, dị o sí achehi ẹẹhị irihi ọnọọ vaka a. Ẹ̀ yị hị́ ọ varẹma, à ná ẹ yị ọza ẹnẹsa ọpa ana aā ná a.

²⁸Ịsa tụra ịsa ọnị ọza ọ̀ọ nyị, dị ọ raa hụrẹ ẹ ụvọ yị Ẹnẹyịmavara bemi-bemi nị, ọ̀ọ vị ọza rẹyịrẹsụ à vị ịsụpa, ọ̀ọ va vị ẹtẹ ana á gà tu ọ, ọza ẹ́ yị kụkụ zụ hị́ ọ varẹma. Avaba ịsa àa vavọọ hụrẹ ụvọ yị Ẹnẹyịmavara, vị aanị saka-saka.

²⁹Àa daka vị ọzarẹyịrẹsụ á vavọọ hụrẹ ụvọ yị Ẹnẹyịmavara kà à wụ̀ ọ nị, ọza ẹ́ yị kụkụ vaa hị́ ọọ varẹma; vị́ a vaa wụ̀ ọ nị.

³⁰Avaba achehi ẹẹwụ ịsa ọnị ẹtẹ ọ̀ọ mẹ vị Ẹ́ẹnẹyịmavara, ọ̀ọ vị akụ, ọ̀ọ va vị ẹtụtụ ọchị.

³¹Ọza òo sì ka ọnị àa hị́ achehi ẹẹwụ anị ọnyọọnyị varẹma, o vee sí ọpa ẹkẹhị anịị varẹma beri achehi ẹẹhị irihi anị ọnọọ vaka a.

³²Avaba achehi ẹẹwụ ịsụpa ineehi vị Ẹ́ẹnẹyịmavara. Àaa za ịsụpa ọnị aza pa ịrịka, avaba anaaa tụ ọ ẹẹwụ vị Ẹ́ẹnẹyịmavara.

³³Ọza ana nyị ẹ́ yị nyayịnẹ mẹ ka ahịka, ịsụpa ana tụ ọkụmị a tọ̀ ọ va mẹ achehi ẹẹwụ nị. Ẹ́ yị nyayịnẹ sị ịsụpa ẹnyị vara ọsa. Ọ̀ọ vavọọ mẹ Ẹnẹyịmavara ọ kụkụ aa nyị ịsụpa ẹyịva ọnọọ nị. Ọza ẹ́ yị kụkụ aa hị́ ịsụpa ọnọọ varẹma.

³⁴Ọda ẹnẹnị Ẹnẹyịmavara sị yị Imosiisi ịrẹsụ ataba Ịsịnayị ka ọ̀ sị yị Anisirẹrị nịnị nị.