Read ebira Ireevi 5 Bible Online

Ireevi 5 - ebira bible

Ireevi 5

¹Ọza ọ̀ọ mẹ̀ ịvị agụvị ka â hị́ ọ ka ọ̀ va dọ ivenu ịnị orere, dị ó yi ka ọnị ẹ́ ị kà ịrẹyị nị, ọza ọnọọ vaa rị ụya anị.

²Ọza òo nyeeyi sị ẹngụ kanyị ịsa ẹnẹ ẹ yị ịnị jị oze ịnị ịrẹyị ahẹkẹ, ọ̀ọ vị oku ịsụpa à vị uye ịnị avị ẹnẹ ẹ̀ yị nị, ọ̀ọ daka vị ka ọza ẹ́ yị yẹ, ọnị ụvọta ẹ́ yị kụkụ nị, ọ́ rẹ sị ịvị rị bẹẹ.

³Ọza òo nyeeyi sị ẹngụ kanyị ịsa ịnị ẹngụ ọza, ịsa tụra ịsa ọnị ọọ vị, dị ọ vị ịsa ẹnẹ ẹ yị nị jị oze ịnị ịrẹyị ahẹkẹ nị, ịjị ọọ yẹ ịsị ọnị mẹ kẹnẹ, ọ sị ịvị rị.

⁴Ọza ọọ na hị́ eku kẹnẹ-kẹnẹ ka ọnị vaa mẹ ịrẹyị ọnyọọnyị, ọọ vị ọyịza ọọ vị odivi, ịjị ọọ maanị yẹ ịsị ọnị mẹ kẹnẹ, ọ sị ịvị rị.

⁵Ụmẹ ọnị ọza ọ̀ọ sị rị ịvị ẹngụ ịrẹyị ẹnẹnị, ọza ọnọọ ọ̀ na dọ irenu anị ka ọnị ọọ maanị mẹ̀ ịvị.

⁶Ọ vaa sị atẹmẹ ọnya avị ẹvụ vaa mẹ̀ ịsọvọ ịvị anịị hi Ẹnẹyịmavara. Ohirẹsụ irehi Ohomorihi vaa sị ịsụpa ọnọọ mẹ̀ ịsọvọ yị ọza ọnọọ, dị a vagu ịvị ọnị ọ mẹ.

⁷Ama ọza ọnọọ ẹ̀ yị zụ sị ozi atẹmẹ à vị ẹvụ, ọ vaa sị arivadi ẹẹva à vị arekuku ẹẹva vaa mẹ̀ ịsọvọ ịvị anịị yị Ẹnẹyịmavara. A vaa sị ọnyara mẹ̀ ịsọvọ ịvị anị, dị a sị ọsa mẹ̀ ịsọvọ ana aa rị ịra.

⁸Ọ vaa kụ wa ve tu ohirẹsụ irehi Ohomorihi, ana vaa vịdịị sị ọnya ịnị inomi ẹnẹẹ ị ọ sị mẹ ịsọvọọ yọ agụvị ịvị anị. Ọ́ vaa jị ọ ọrọkọ nị. Ẹ́ yị vaa tụ̀ ọ ịrẹsụ.

⁹O vee che anya anị ẹnyị sẹ akaakaha ụta ịsọvọ, dị ọ va ana vọ hi iruvo ụta ọnọọ. Ịsọvọ ana a sị vagu ịvị ọsọnị vị nị.

¹⁰Ohirẹsụ irehi Ohomorihi vaa sị ọhụva mẹ̀ ịsọvọ ana a rị ịra anka a mẹ mẹ ọda anị. Aanị ọ mẹ vaa mẹ̀ ịsọvọ agụvị ịvị ọnị ọza ọnọọ mẹ dị a vagu ọ nị.

¹¹Ọza ọnọọ ẹ̀ yị zụ sị arivadi ẹẹva à vị arekuku ẹẹva, ọ vaa sị ayị ọyị kwọ ikirogirami ọnyara vaa mẹ̀ ịsọvọ ịvị anị. Ẹ́ yị vaa sị angwẹ à vị eturare ọnyọọnyị tụ ọ, agụvị ka ịsị ịsọvọ ịvị ọ vị nị.

¹²Ọ vaa sị ayị vee tu ohirẹsụ irehi Ohomorihi, dị ohirẹsụ irehi Ohomorihi ọnọọ ka ayị uvoku ọnyara ana sị zụ ka a raà sị avaba anị va yị Ẹnẹyịmavara, dị ọ rị ọ ịra ịrẹsụ ụta ịsọvọ. Ịsọvọ ana a sịị vagu ịvị ọsọnị vị nị.

¹³Aanị ohirẹsụ irehi Ohomorihi mẹ vaa mẹ̀ ịsọvọ agụvị ịvị ọza ọnọọ, dị à vagu ọ nị. Avaba ayị ọnọọ ana vọ vị ó ohirẹsụ irehi Ohomorihi anka á mẹẹ̄ mẹ̀ ịsọvọ ana a sị ayị mẹ avọọ.

¹⁴Ẹnẹyịmavara ộ kà a yị Imosiisi ka:

¹⁵Ọza oo nyeeyi, dị ẹ yị sị ịsa ana vị Ẹnẹyịmavara va yọ nị, ọ sị ịvị mẹ. Ọza ọnọọ vaa sị ịdẹba à vị ẹvụ ẹnẹ ẹ̀ yị tụ ọkụmị vaa mẹ̀ ịsọvọ ọyị sị ụta varẹma yị Ẹnẹyịmavara. Ịsa a sịị̄ ngọ ịsa ịnị irehi Ohomorihi a vaa sị ngọ ọ, dị a yẹ ọpa ọnị ọ vị nị.

¹⁶O vee si ụta ịsa ana vọrọ ka ọ̀ si vẹ dị ẹ yị sị ọ vẹ avọọ, dị o sí achehi ẹẹhị anị vaka a. Ọ vaa sị ọ vaa yị ohirẹsụ irehi Ohomorihi, dị ohirẹsụ irehi Ohomorihi sị ịsụpa ọnị ọ sị vẹ, mẹ̀ ịsọvọ yị ọ agụvị ịvị anị, dị a vagu ọ.

¹⁷Ọza ọnyọọnyị òo nyeeyi jịnẹ ọda Ẹnẹyịmavara, ọza ọnọọ ọọ mẹ̀ ịvị, ọ vaa rị ụya anị.

¹⁸Ọ vaa sị ịdẹba à vị ẹvụ ẹnẹ ẹ̀ yị tụ ọkụmị vee tu ohirẹsụ irehi Ohomorihi ọyị mẹ̀ ịsọvọ oyi sí ụta varẹma yọ. Ịsa a sịị ngọ ịsa ịnị irehi Ohomorihi a vaa sị ngọ ọ, dị a yẹ ọpa ọnị ọ vị nị. Ohirẹsụ irehi Ohomorihi ọnọọ vaa mẹ̀ ịsọvọ yị ọza ọnọọ agụvị ịvị anị, dị a vagu ọ

¹⁹Ịsọvọ oyi sí ụta varẹma agụvị ịvị ọnị ọ mẹ hi Ẹnẹyịmavara ọ vị nị.