Read ebira Ezikẹẹrị 17 Bible Online

Ezikẹẹrị 17 - ebira bible

Ezikẹẹrị 17

¹Ẹkụhị ọnya, Ezikẹẹrị ka Ẹnẹyịmavara ộ kà a yị ọnị ka:

²Ozi-ọza ọnị ọ̀ che ụhịrẹyị ọnọnị yị Anisirẹrị nịnị,

³dị ẹnịnị ẹ̀ yẹ ịsị ọnị Ẹnẹyịmavara Ananyị ụkata hu aa kà a yị ẹnị: Ọ kà ọnị ọ̀ kà a ka, â nyị inomi ọdẹngụ ọnya, ana aā hị́ ọkasịmẹ. Asịsẹ anị ô zoza ẹtẹẹtẹrẹ, Avaka anị ộ banyị ẹtẹẹtẹrẹ, dị ọ gana bamị-bamị aanị nị. Inomi ọnọnị ô hira va ngụ ịnị ataba ana ya ẹkụra ana aā hị́ Ịrẹbanọnị; dị ọ́ dà ịrẹsụ ọchị ana aā hị́ Isida nị.

⁴Ộ sị ịrẹsụ ọchị ọnọọ na ngụ ẹtẹ ana a yaa sẹ ohu, dị ọ sị ọ na jẹẹ ẹkụra osohu nịnị nị.

⁵Dị ọ rẹ sị ọchị ẹnẹ ẹẹ yị vavọọ hụ hụrị ẹtẹ Isirẹrị, dị o ne chire e tụ ẹtẹ ene zoza ẹtẹẹtẹrẹ nị. Ịzọọ vị anaa nyị enyi pooro, ana aa mẹ ka ọchị ọnọọ ọọ hụ.

⁶Ọchị ọnọnị ộ chị́, dị ọ vara ọchị ịvayịnị dị ọ yara ku ẹtẹ nị. Avọọ ịvayịnị ọnọọ aa hụ, dị aa kụ̀rà tụ ẹba vàa ka ọkasịmẹ ọnọnịị na nị, ama dị ẹpa anị aa ngụ ẹtẹ nị. Ọchị ịvayịnị ọnọnị ộ ha avọ ẹtẹẹtẹrẹ, dị ọ nyayịnẹ nyị avị nị.

⁷Â nyị ọkasịmẹ ọdẹngụ ọsa ana avaka anị banyị ẹtẹẹtẹrẹ, dị ọ nyayịnẹ nyị asịsẹ nị. Ẹpa ọchị ịvayịnị ọnọnị aa tana a ka a na beri avị anị. Dị aa tụra eyi ka, ọ vaa mẹ ka ọnị ọ̀ nyị enyi huna ọpa enyi ana ya ịnị ụbazị ịzị ọnị yà aa hụ nị.

⁸Ama ịvayịnị ọnọnị vị ene chire tu ịnị ẹtẹ ozoza, dị ọ́ nyị enyi ẹtẹẹrẹ, ụvị di ò nyị avị, dị ọ̀ tụ́ ẹtụtụ, dị aza ẹ̀ sị ụbanyị yọ.

⁹Ẹnẹyịmavara Ananyị ụkata hu ka, Ezikẹẹrị ọ̀ họ̀ use ka, ịvayịnị ọnọnị wáá vaa yàra, dị ọ̀ va hụ? Aanịka, ọkasịmẹ ịpaapa ọnọnị ẹ̀ yị vee hu ọnịrị ẹpaa hụrị ẹtẹ, dị o che avọ anị, dị avị anị ẹ̀ wọ̀rọ̀ và ha? Ẹ́ yị vaa nyị ka ẹ̀ yị vị aza nyị ụkata, à vị ka ẹ̀ rụrụ, dị è zụ hu ọ hụrị ẹtẹ.

¹⁰Re, ịzẹyịza, â dàa hị́ de, ama, ọ́ọ́ vaa hụ́? Aanịka, ahị ọ̀ọ tụ hụrẹ eyi ọnị ọyị zịị vẹ ve ku ọ, ẹ́ yị vaa wọ̀rọ̀ ọ vàa ha ịzị e chire e tụ?

¹¹Ezikẹẹrị ka Ẹnẹyịmavara ộ kà a yị ọnị ka

¹²Ọnị ọ̀ họ̀ aza ẹnẹnị anaā kụ̀ụ hịrẹ ọza aanị ka, aanịka ẹnịnị ẹ́ yẹ iruvo ụhịrẹyị ọnọnị da? Ọ kà, ọnị ọ̀ kà a yị wa ka, ohinọyị Anibabironi ộ vẹ Ijerusarẹmị, dị ọ vaa za ohinọyị Ijerusarẹmị ọnịrị ọdọvịdị anị nịnị ne hi Ịbabịrọnị nị.

¹³Ộ sị ọza ịnyara hụụnị ẹngụ aza ohinọyị Ijerusarẹmị, dị ọnịrị ọ ka ịrẹyị ẹnẹ ẹ dọ beri ẹngụ tụ nị. Dị ohinọyị Ịbabịrọnị ka ọ̀ hị́ eku ka ọnị vaa saasa ịrẹyị anị pooro nị. Ohinọyị Ịbabịrọnị ộ za aza ọkọọka hụrị Ijerusarẹmị,

¹⁴agụvị a sị ẹkụra ọnọọ kụkụ zụ mẹ ụka; dị ọnị ò re re ka ẹnịnị ẹẹ saasa ịrẹyị ẹnẹ ẹnị dọ beri ẹngụ tụ.

¹⁵Ama ohinọyị Ijuda ộ kụ̀ hịrẹ ohinọyị Ịbabịrọnị, dị ọ́ tụ aza nọ ẹtẹ Ijipiti ka ẹ na dọ umaata ọnịrị isoja tatarata va yị ọnị nị. Ẹnẹyịmavara kà wéé ro ka ọ vaa vị ọ mẹ? Ọ́ọ́ va nyẹngụụ rị ọ? Ẹ yị zụ jịnẹ ịrẹyị ọnị ọ dọ beri, dị a sị ọ rị ụya anị.

¹⁶Ọ kà, àa vị ọnị ọ yị vị̀ Ohomorihi ana yara nị, ohinọyị Ijuda ọnọnị vị ene vee súu tu Ịbabịrọnị agụvị ka ộ jịnẹ eku ọnị ọ hị́ ọnịrị ịrẹyị ọnị ọ dọ beri ohinọyị Ịbabịrọnị tụ ịnị anị, ọza ana sị ọ rị ohinọyị ọ vị ọnọọ nị.

¹⁷Ịjị Anibabironi nịnị ẹẹ kụ́ ịrẹkụ tu ọ, dị e gu ịsa jẹẹ na hịrẹ ọvọ ẹnịnị nị. Ịjị ẹnịnị ẹẹ chị́ ụsị ọ̀ yị wụ̀ aza và ha, ohinọyị Ijipiti ọnịrị isoja anị tatarata ẹ́ yị va zụụ gụ ọ ụvọ.

¹⁸Ọ kà agụvị ka ộ jịnẹ eku ọnị ọ hị́ ọnịrị ịrẹyị ọnị ọ dọ beri, ẹ́ yị vaa ha o.

¹⁹Ẹnẹyịmavara Ananyị ụkata hu ka, àa vị ọnị ọ yị vị̀ Ohomorihi ana yara nị, ọnị vaa sị ụyaa rị ohinọyị Ijuda agụvị ka ộ jịnẹ ịrẹyị ọnị ọ dọ beri, dị ọ sị ịrẹha anị hị́ eku ka ọnị vaa mẹ.

²⁰Ọ kà ọnị vaa và ịrẹpa ozubee zi ọ, dị ọnị sị za a. Ọnị vaa sị ọ nọ Ịbabịrọnị, dị ọnị na sị ụya rị ọ ịzọọ, agụvị ka ẹ́ yị mẹ ịzẹyịza hi ọnị.

²¹Isoja anị ene hu kere-kere vị ana vaa wụ̀ eyi ịrẹkụ, dị â gara ẹnị ana vọ hi ozi. Ịjọnọọ ụ vaa yẹ ka ọnị Ẹnẹyịmavara ọ kà ịrẹyị nị.

²²Ẹnẹyịmavara Ananyị ụkata hu ka, ọnị vaa sị ịrẹsụ ọchị Isida ana gọdọ, dị ọnị da avọ ana sẹsẹ aa tụ̀ ụ vẹ ịnị anị; dị ọnị na hị́ ọ tụ ịrẹsụ ataba ana nẹba.

²³Ọ kà ọnị vaa hị́ ọ tụ ịrẹsụ ataba ana nẹba hu kere-kere ẹtẹ Isirẹrị. Ọ vaa ha avọ, dị ọ tụ ẹtụtụ, dị ọ vara ọchị Isida ọyịza-ọyịza inomi irenyi-irenyi vaa mẹ ịrẹngwẹ tụ ọ, dị ẹ sị ịzọọ mẹ irehi.

²⁴Avaba ọchị ene hi ẹtẹ Isirẹrị vaa yẹ ka ọnị ọ vị Ẹnẹyịmavara nị. Ọnị ọọ̄ dị ọchị ana gọdọ nyẹtẹ, dị ọnị mẹ ka ọchị ene weyi ọọ gọdọ nị. Ọnị ọọ̄ mẹ̀ ka ọchị ohwoohu nịnị ẹ wụ, dị ọnị mẹ ka ọchị ana sị wụ ọ̀ vara ohwoohu nị. Ọ kà ọnị Ẹnẹyịmavara ọ sị ọ ka. Ịsị ọnị ka ọnị vaa mẹ, vị ọnị ọnị vaa yịị mẹ.