Read ebira Imatiwu 12 Bible Online

Imatiwu 12 - ebira bible

Imatiwu 12

¹Ịhị ọnọọ, ịnị ẹkụhị ụhwọtụ ọnya, dị Ijeesu aa parahu ịnị aarẹ ọnya aanị anaa kụ́ akụ tụ́ nị. Ụngwẹ aa kụ̀ ezirẹma anị; agụvị avọọ dị ẹyaa jị ịrẹsụ akụ, dị ẹyaa rị ọọ nị.

²Ịjị Anihwarisi nịnị vavọọ re e, dị ẹ kà a yị Ijeesu ka, “Re! Wée re ézirẹma awụ màa mẹ̀ ịsa ọnị ọda ọ̀yị zẹẹ ka à mẹ ịnị ẹkụhị ụhwọtụ!”

³Dị Ijeesu kà a yị wa ka, “Aanịka wẹẹ̀ yị kà ịsa oni Idevidi mẹ? Ịjị ụngwẹ aa kụ̀ Idevidi ọnịrị aza anị, dị è yi re ịsa rị,

⁴dị ọ ngụ ini irehi ahẹkẹ Aniju na nị, dị ọ rị Ịbụrẹẹdị anaa sị yị Ohomorihi nị. Anka ọ́da mẹ̀ kà a, ẹ yị yaanị vọrọ ka ọnị aza anị ẹ̀ rị ẹngụ Ịbụrẹẹdị ọnọọ, ẹ̀ yị vị ohirẹsụ irehi Ohomorihi nịnị kẹnẹ.

⁵À vị wẹ yị kà a ịnị ọda oni Imosiisi mẹ nịnị ka ịnị ẹkụhị ụhwọtụ ohirẹsụ irehi Ohomorihiī mẹ̀ ụkọrọ ini irehi Ohomorihi, ama dị ẹ yị rị ịvị?

⁶Dị maa kà a wụ nịnị ka â nyị ọza ịzẹnị aanị ene huna irehi Ohomorihi.

⁷Wàa yaanị yẹ iruvo ịrẹyị ọnọnị nịnị ka: ‘Me yi sì ịsọvọ ẹ̀ yị vị ayamva’, wẹ yị yaanị aa jị ịvịị yị ọza ẹnẹ ẹ̀ yị rị ịvị nịnị,

⁸agụvị ka ẹmị Ozi ọza onigirima ọ vị ọga ẹkụhị ụhwọtụ nị.”

⁹Dị Ijeesu hụụ ịzọọ, dị ọ nọ ini irehi Ohomorihi ẹnịnị nị.

¹⁰Â nyị ọza ịnya aanị ana yà ịzọọ ene sú ụvọ. A rẹ nyị aza ẹnyị ịzọọ ene ee sì ka ẹnị ẹ̀ sị ịrẹyị za Ijeesu, dị ẹ họ̀ ọ ka, “Ọda ayị ọ́ọ́ zẹẹ ka à mẹ ọza ụkụ ịnị ẹkụhị ụhwọtụ?”

¹¹Dị Ijeesu họ̀ wa use ka, “Àa nyị ọza awụ nịnị ana nyị atẹmẹ ọnya, dị ọ hụrẹ ne ngụ ịkangga ịnị ẹkụhị ụhwọtụ yọ? Aanịka wẹ yị vaa sị ọọ jịnẹẹ tụ́ ẹhẹ nịnị?

¹²Ọza ọnịrị atẹmẹ, ene huna ọsa? Agụvị avọọ, ọda ayị ộ zẹẹ ka à gụ ọza ụvọ ịnị ẹkụhị ụhwọtụ.”

¹³Ịjọnọọ dị ọ kà a yị ọnọrụ ọnọọ ka, “Tana ụvọ awụ!” Dị ọ tanaa, dị ụvọ anị ta, dị ọ rẹ sị yà anka ọsa nị.

¹⁴Dị Anihwarisi nịnị hụụ ịzọọ, dị ẹ na aa gẹ eyi, ẹ́nị mẹmẹ vaa wụ̀ Ijeesu nị.

¹⁵Íjeesu mẹ̀ sị yẹ, dị ọ hụụ ịzọọ nị. Dị aza ọrụrụ-ọrụrụ dụ ọ aa na nị. Dị ọ mẹ avaba ọnịkụ nịnị ụkụ nị.

¹⁶Di o hú wa ụvọ ka asị ẹ kà ịrẹyị anị zụ̀ aza nị,

¹⁷agụvị ịrẹyị ana Ayịsaya ọnịsẹ kà, ọ̀ zụ sẹ. Ọ kà Ohomorihi ka:

¹⁸“Ọnịtụ amị ọnị mị nyị yị. Mée sì ịrẹyị anị, ayị amị ô hine tù ọ. Mị vaa mẹ ka Ụhwẹ Ọnịnị amị ọ̀ dọ avaba ayị anị. Ọ vaa naa nọọ yị anẹhẹ ka mị vaa mẹ̀ ọkarẹyị yị wa.

¹⁹Ọ yị vaa nyị ahankata, o yi vee nowu, ọ yị rẹ vaa kụ́ ịrẹka ini orere.

²⁰Ọ yị vaa dà ịkẹ ana àa dà gẹnẹ. Ozotupa oni owu anị ee mi, oyi vee mi ọọ. Ọyị vaa tụ́ ụhwọ́ pooro di ò re ka ịzẹyịza ộ nyị ẹbẹẹba.

²¹Avaba anẹhẹ vị ana vaa sị eyii tụra a.”

²²Dị aza ẹnyị aanị sị ọza ịnya aanị vẹ ịdị Ijeesu nị. Ọza ọnọọ vị ana nyị ụhwẹ echu ene gu ọ eyi ọnịrị irenu. Ijeesu ộ mẹ̀ ọnọrụ ọnọọ ụkụ, dị ọ kụkụ aa kà ịrẹyị, di o ree re ẹtẹ nị.

²³O si hí avaba ọkọnị aza ẹnẹẹ irenu, dị ẹ ka, “Ẹwáá ka ozi Idevidi ọnọọ yị?”

²⁴Ịjị Anihwarisi nịnị sị wụ́, dị ẹ ka, “Ụkata Ịbẹẹrịzẹbụ, ọga ụhwẹ echu nịnị ọ́nọrụ ọnọnị aa sịị dụ ụhwẹ echuu jịnẹ nị.”

²⁵Ijeesu ộ yẹ ịsị eyee ro, dị ọ kà a yị wa ka, “Ẹkụra ohinọyị ọ̀ọ sị gà hi ẹẹva, dị ẹ và eyi kà ẹngụ nị, vi o si vu ẹtẹ avọọ nị. Àa rẹ nyị ẹkụra, àa vị irehi ana gà hi, dị ẹ và eyi kà ẹngụ nị, ẹ yị zụ kwẹẹtẹ.

²⁶Echu àaa dụ echuu jịnẹ, ọnọọ vị ka echu ọ sị gà hi ẹẹva, e sị eyi và kà ẹngụ; ị́jọva anị mẹmẹ kụkụ nyẹngụ jẹẹ?

²⁷Àa vị ụkata Ịbẹẹrịzẹbụ, m maa sịị dụ ụhwẹ echuu jịnẹ nị, ẹnẹ sị ụkata yị ezi ewu nịnị ẹnẹ ẹnị raa sịị dụ ụhwẹ echuu jịnẹ? Ezi ewu nịnị ụvọta ẹ vaa kà a nị.

²⁸Ama àa vị Ụhwẹ Ọnịnị Ohomorihi, m maa sịị dụ ụhwẹ echuu jịnẹ nị, ọnọọ ộ sị zụ̀ ka ịjọva Ohomorihi ọ sị gụrị ẹwụ nịnị.

²⁹Ẹ yị nyị ọza ana nyẹngụ ngụ ini eehi adarehi ana nyị ụkata dị ọ̀ na kụ́ ọọ ẹnya; ẹ̀ yị vị o vịdị sì oze dị ọ̀ za adarehi ọnọọ dị ọ̀ sụ́ ọ, ịjọnọọ ọgọnị di o ve re oze kụ́ ọ ẹnya irehi.

³⁰Ọza ẹnẹ ẹ̀ yị yà beri emi, vị aa bàrà mị nị. Ọza ene è yi pe mi kụ́ ịsa gụ, vị aa garaa ha nị.

³¹Agụvị avọọ dị ma kà a wụ nịnị, ịvị tụra ịvị ọnịrị ụhụ ọnị ọza ọ̀ọ kụ̀ Ohomorihi, a vaa vagu ọọ ịnị anị. Ama ọza ana àa kụ̀ Ụhwẹ Ọnịnị ụhụ, ọza ọyị vaa vagu ọọ.

³²Ọza tụra ọza ana àa kà ịrẹyị odivi hi ẹmị Ozi ọza onigirima, a vaa vagu ọọ ịnị anị. Ama ọza ana àa kà ịrẹyị odivi hi Ụhwẹ Ọnịnị, ọza ọyị vaa vagu ọọ ịnị ẹhẹ ọnọnị ọnịrị ịnị ẹhẹ ana aa vẹ.”

³³“Wàa ka wa nyị ẹtụtụ ozoza, ụ hị́ ọchị ozoza! Ama wàa hị́ ọchị ọnị ụkụ za, ẹtụtụ odivi ụ waa há nị. Ẹtụtụ ọchị a sịị yẹ ẹ nị.

³⁴Ẹwụ nịnị ezi ibe, wẹ yị nyẹngụ kà ịrẹyị ozoza nịnị, agụvị ka ọza odivi ụ vị nịnị nị. Ịsa ene hi ịnị ayị ọza, írenu anịị̄ kà a jịnẹẹ vẹ nị.

³⁵Ịsa ọyịza ana yà ịnị ayị ọza ọyịza, ọọ̄ mẹ̀ ka ọọ mẹ̀ ebira ozoza nị. Ịsa odivi ana yà ịnị ayị ọza odivi, ọọ̄ mẹ̀ ka ọọ mẹ̀ ebira odivi nị.

³⁶Ama dị ma kà a wụ nịnị, avaba ịrẹyị kẹnẹ-kẹnẹ ọnị ọza ọ̀ọ kà, ọ vaa hụ agụvị avọọ kụ́ irenu anị ịnị ẹkụhị ọkarẹyị.

³⁷Ịrẹyị awụ a vaa sị jị ịhị yị wụ nị, ọnị a rẹ vaa sị jị ịvị yị wụ nị.”

³⁸Ịjọnọọ dị ọzwọzọda ẹnyị ọnịrị Anihwarisi nịnị ka, “Ọga, yee sì ka wa sị apọtẹrẹwa zụ̀ yị.”

³⁹Ama Ijeesu ô tụ́ ohi, dị ọ ka, “Aza edivi ọnịrị ọsẹrẹka nịnị eē sì apọtẹrẹwa nị. Ẹ yị nyị apọtẹrẹwa ana vaa sị zụ̀ wa, ẹ̀ yị vị apọtẹrẹwa Ijona ana vị ọnịsẹ.

⁴⁰Íjona mẹ̀ yà ịnịnẹ ivovo ọbanyị ọnọọ mẹ ọọdụ ẹẹta ọnịrị ịrahụ ẹẹta, avọọ Ózi ọza onigirima mẹ̀ rẹ vaa mẹ ọọ dụ ẹẹta ọnịrị ịrahụ ẹẹta ịnịnẹ ẹtẹ nị.

⁴¹Ịnị ẹkụhị ọkarẹyị, Anininivẹ vaa kwẹẹtẹ, dị ẹ jị ịvị yị anụmẹ ọnọnị; Íjona mẹ̀ kà ịrẹyị Ohomorihi yị aza ẹnẹẹ, ée ro ịnẹ varẹma hụụnị ebira odivi ẹnịnị. Di u we re ka ọza ene ve huna Ijona, ọ yà ịzẹnị aanị nị.

⁴²Ịnị ẹkụhị ọkarẹyị, ohinọyị ọnẹẹ ana ra éyi ụvẹtẹ vaa kwẹẹtẹ, dị aa tụ́ anụmẹ ọnọnị ohuvọ. Ọnẹẹ ọnọọ ộ hụrẹ ụtọ ẹhẹ vẹ ka ọnị ọ̀ va wụ́ ịrẹyị ịrẹyọyẹ Isoromọnị. Di u we re ka ọza ene ve huna Isoromọnị, ọ yà ịzẹnị aanị nị.”

⁴³“Ụhwẹ echu ọ̀ọ jịnẹ hụụnị ẹngụ ọza, dị aa ngụ ịnị ẹtẹ ọyịwụụ zị, di ee sì ịzị a vọrọ ka ọ̀ yà tụ́ ụhwọ́, Ò yi re aha,

⁴⁴dị ọ ka: ‘Maa varẹma nọ ini eehi amị ọnị mị hụrẹ.’ Ọ̀ọ vẹ, di o ve tù ka ọ sị vị osusu, a si oo hì, a sị avaba anị tenyi nị,

⁴⁵dị ọ varẹma, dị ọ na kụ́ ụhwẹ echu ịhịmba ọsa ana hyakụ divi hu ọnị nyẹmba, dị ẹ vẹ, dị ẹ va ra ịzọọ. Dị ọdịrẹma ọza ọnọọ kuku si divi huna ọ mẹẹ̄ vịdịị yà. Avọọ ọ mẹ̀ vaa yàa yị anụmẹ odivi ọnọnị nị.”

⁴⁶Íjeesu màa yịị kà ịrẹyịị yị ọkọnị aza ẹnẹẹ, dị ọnyị anị ọnịrị ẹyịnyara anị vẹ, dị ẹ jẹẹ ẹhẹ nị. Eyee sì ka eni è pe e kà ịrẹyị.

⁴⁷Dị ọza ịnya kà a yọ ka, “Re, ọnyị awụ ọnịrị ẹyịnyara awụ jẹẹ ẹhẹ, eyee sì ka eni è pe wu kà ịrẹyị.”

⁴⁸Dị Ijeesu tụ́ ọza ọnọọ ohi, dị ọ ka, “Ẹnẹ vị ọnyị amị, ẹnẹ rẹ vị ẹyịnyara amị?”

⁴⁹Dị ọ tana ụvọ hi ezirẹma anị dị ọ ka, “Re, ọnyị amị ọnịrị ẹyịnyara amị yị.

⁵⁰Ọza ana àa mẹ̀ ịsa ana Ada amị ẹbẹẹba sì, ọnị ọ vị ọyịnyara amị ọnịrị onyeyiza amị beri ọnyị amị nị.”