Read ebira Imatiwu 13 Bible Online

Imatiwu 13 - ebira bible

Imatiwu 13

¹Ịhị ọnọọ Ijeesu ộ jịnẹ hụụnị eehi, dị ọ na yaayịtẹ ụtọ irehu nị.

²Aza ana wara ne tù ọ, ẹ sị rụrụ baaba; agụvị avọọ dị ọ ngụ ịnị ẹpa ọnya, dị ọ na yaayịtẹ ịzọọ nị. Dị avaba aza ana vọ jẹẹ ụtọ irehu nị.

³Dị ọ sị ụhịrẹyị, dị aa sịị kà ịrẹyị ọrụrụ-ọrụrụ zụ̀ wa nị. Dị ọ ka, “Re, â nyị ọza ịnya aanị ene ne mi ịsa ọyịna.

⁴O mèe mi ọ, dị ihu ẹnyị hụrẹ tụ́ oze nị, dị inomi nịnị wụsẹ vẹ dị ẹ tọ̀ọ́ yọọ rị nị.

⁵Ihu ẹnyị ẹ rẹ hụrẹ tụ́ ịrẹsụ ịda ana nyị ezi chee aanị. Ịjịịjọọ dị ẹ chị, dị ẹ yaa hụ nị, agụvị ka ezi anị ọ yị rụrụ.

⁶Ịjị ọyị aa há, dị ẹ sị vahi nị; ama agụvị ka e yi re aha ha ẹpa ngụ di e sú nị.

⁷Dị ẹnyị rẹ hụrẹ ne ngụ ịnị akakana ikeyi nị. Ịjị ikeyi ẹnẹẹ aa hụ, dị ẹ za wa rị nị.

⁸Ama ihu ẹnyị ẹ rẹ hụrẹ ne ngụ ịnị ẹtẹ ozoza, dị ẹ nyị ẹtụtụ nị; ẹnyị ệ nyị ẹtụtụ ẹchẹhị-ẹchẹhị, ẹnyị ẹbẹẹta-ẹbẹẹta, ẹnyị vị ohurẹẹwụ-ohurẹẹwụ.

⁹Ọza ana àa nyị ụtọ ọyịsị wụ́ ịrẹyị, ọ̀ sị ụtọ pe ẹtẹ!”

¹⁰Dị ezirẹma Ijeesu va họ̀ ọ use ka, “Sị ẹ vẹ dị ụ waa sị ụhịrẹyịị kà ịrẹyịị yị wa?”

¹¹Di o tụ́ wa ohi, dị ọ ka, “Ohomorihi ọ raà mẹ ka wa yẹ nịnị ịrẹyị ịjọva Ada ayị ẹbẹẹba oni iruvo anị nyịnẹ. Ama ọza ẹ yị zẹẹ ka ẹnị ẹ̀ yẹ.

¹²Agụvị ka ọza ana àa nyị ịsa, vị Ohomorihi vaa dàa tụ́ ọọ yọ nị, dị ọ̀ nyị hu avọọ. Ama ọza ẹnẹ ẹ̀ yị nyị, oyichee ọnị ọ̀ọ hyakụ nyị, di a dọ ọ hụrẹ ẹ ụvọ.

¹³Agụvị avọọ, m maa sịị sị ụhịrẹyịị kà ịrẹyịị yị wa nị; agụvị ẹ̀ẹ daka re ẹtẹ pooro, asị ẹ yẹ ịsị eyee re. Ẹ̀ẹ sị ụtọ pe ẹtẹ pooro, dị asị ẹ wụ́, dị asị ẹ rẹ yẹ bẹẹ.

¹⁴Ịnị ịrẹyị ẹnịnị, ịrẹyị ana Ayịsaya ọnịsẹ kà, ọ sị sẹ. Ọ kà, ‘Ụ vaa sị ụtọọ pe ẹtẹ nịnị pooro, dị ụ waa wụ́ ịrẹyị nịnị, ama wẹ yị vaa yẹ ịsị ụ waa wụ́ nịnị. U vee re ẹtẹ nịnị, ama wẹ yị vaa yẹ ịsị u wee re nịnị.

¹⁵Agụvị ka ụmatẹsị yà ịnị ayị aza ẹnẹnị. Ẹnịnị ẹ raà sị ịsa kú ụtọ ẹnịnị, di e re kú eyi ẹnịnị oku nị. Agụvị ka ẹ̀ yị vị avọọ, ẹ va sị eyi ẹnịnị re ẹtẹ, dị ẹ sị ụtọ ẹnịnị wụ́ ịrẹyị, dị ẹ sị yẹ ịnị ayị ẹnịnị, ịjọnọọ dị ẹ sị và ká Ohomorihi vẹ, dị Ohomorihi sị wa mẹ ụkụ.’

¹⁶Ama ẹwụ nịnị ộ da jẹ, agụvị ka eyi awụ nịnị ee re ẹtẹ, ụtọ awụ nịnị raa wụ́ ịrẹyị.

¹⁷Ịzẹyịza mị kà wụ nịnị nị, ọnịsẹ ọrụrụ-ọrụrụ nịnị ọnịrị ọnịrẹyịzẹyịza nịnị ê sì ka eni è re ịsị u wee re nịnị aanị, ama eyi re e. E re sì ka ẹnị ẹ̀ wụ́ ịrẹyị ọnị ụ waa wụ́ nịnị aanị, ama ẹ yị wụ́ ọọ.”

¹⁸“Wụ́ iruvo ụhịrẹyị ọza ene mi ịsa ọyịna nịnị!

¹⁹Ọza ọ̀ọ wụ́ ịrẹyị ịjọva Ohomorihi dị ọ̀ yị yẹ ịsị ọ wụ́ nị, di Echu vẹ, dị ọ va sị ịsa enee mi tụ́ ịnị ayị hụụ ịzọọ. Ọza ọnọọ vị ana yà anka ihu enee mi tụ́ ụtọ oze avọọ.

²⁰Ọza ana dọ ihu ọnọọ tụ́ ịnị ẹtẹ ịda yị: ịjị aza ẹnẹẹ wụ́ ịrẹyị ọnọọ, dị ẹ wụsẹ sị ịrajẹ dọ ọ nị.

²¹Ama agụvị ka ịrẹyị ọnọọ oyi re aha ha ẹpa ngụ ịnị ayị ẹnịnị, ệ sị tụ́ ịnị ayị chee. Ịjị ịdamụ ọnịrị ayamịkụ vẹ agụvị ịrẹyị ọnọọ, dị ẹ wụsẹ sị varẹma nị.

²²Ọza ana rẹ dọ ihu ọnọọ tụ́ ịnị akakana ikeyi, ọ vị ọza ana wụ́ ịrẹyị ọnọọ di ariro ẹhẹ ọnọnị ọnịrị evene ẹkẹhị ọnịrị ụbanyị za ịrẹyị ọnọọ rị nị, agụvị avọọ ẹyị nyị ẹtụtụ.

²³Ọza ana dọ ihu ọnọọ tụ́ ịnị ẹtẹ ozoza, ọ vị ọza ana wụ́ ịrẹyị ọnọọ, dị ọ yẹ ịsị ọ vị nị. Dị ọ raa nyị ẹtụtụ nị, ẹnyị ệ nyị ẹtụtụ ẹchẹhị-ẹchẹhị, ẹnyị ẹbẹẹta-ẹbẹẹta, ẹnyị ohurẹẹwụ-ohurẹẹwụ.”

²⁴Ijeesu o re che ụhịrẹyị ọnya yị wa; ọ ka, “Oze ana Ada ayị ẹbẹẹba aa zịị mẹ ịjọva vị ana sị mẹẹ anka ọnọrụ ọnya aanị, ana sị ihu ozoza, dị ọ na tụ́ ọ tụ́ ịnị aarẹ nị.

²⁵Ama ịnị ịrahụ ẹkụhị ọnya, ịjị aza sị sụ̀, ọnịvị anị ộ vẹ, o ve chire ebe hi ịnị akụ ẹnẹẹ, o si hu aa na.

²⁶Ịjị akụ aa chị, dị ẹyaa hụ, dị avị edivi ẹnẹẹ ẹnị rẹ chị bẹẹ nị.

²⁷Dị ezi ahụ adarehi ọnọọ vẹ, dị ẹ kà a yọ ka: ‘Ọga, aanị ka ẹ yị vị ihu ozoza ụ tụ́ ịnị aarẹ awụ? Ene ve chire avị edivi hi ọọ?’

²⁸Dị adarehi ọnọọ kà a yị wa ka: Ọnịvị anị ọ maanị va mẹ nị. Dị ezi ahụ ẹnẹẹ ka: ‘Ụ wáá ka ye ne hu wa và ha nị?’

²⁹Dị adarehi ọnọọ ka: ‘Eyiye,’ agụvị ka Ịjị u wèee hu ebe ẹnẹẹ nịnị, we zụ hu akụ vaka wa.

³⁰Navọ wa, è duduu hụ ne tù ụmẹ anaa sịị̄ mẹ̀ ẹ! Ụmẹ anaa sịị̄ mẹ̀ ẹ òo si tù, dị mị kà a yị aza ana aa mẹ̀ ẹ ka: ‘Vịdị hu ebe ẹnẹẹ nịnị, dị ụ wa sụ́ wa hi ẹtẹ, dị à kụ́ wa na và hi ịnị ịra! Dị ụ wa mẹ akụ amị nịnị, dụ wa kụ́ ọ hi ịnị ụhwọ!’ ”

³¹Ijeesu o re che ụhịrẹyị ọsa yị wa, ọ ka, “Ịjọva Ada ayị ẹbẹẹba vị ana sị mẹẹ anka ihu oweyi ọnya kiiki aanị ọnị ọza ịnya sị, di o ne chiree tụ́ ịnị aarẹ anị.

³²Ọnị ọ weyi hu keekere ịnị avaba ihu nị. Ịjị ọ̀ọ sị chị, dị ọ sị hụ nị, ọnị ọ banyị hu kere-kere ịnị avaba avị ịsẹpẹ nị. Dị ọ vara ọchị, di inomi nịnị vẹ, dị ẹ mẹ ịrẹngwẹ hi ịnị avọ anị.”

³³Ijeesu o re che ụhịrẹyị ọsa yị wa, ọ ka, “Ịjọva Ada ayị ẹbẹẹba vị ana sị mẹẹ òwù avọọ. Ọnẹẹ ọnya ộ sị ọ, ô si hura ayị ọyịkwọ ịchacha ọnya, dị ọ kụkụ si oo wù gwẹtẹ nị.”

³⁴Avaba ịsa ẹnẹnị Íjeesu kà yị ọkọnị aza ịnị ụhịrẹyị nị. Ẹ yị nyị ịsị ọ kà yị wa ẹnẹ ẹ̀ yị vị ịnị oze ụhịrẹyị.

³⁵Ộ maanị mẹ, agụvị ịrẹyị ọnị ọnịsẹ vịdị kà, ọ̀ zụ sẹ ka, “Màa kà ịrẹyị yị wa, ụhịrẹyị mị vaa sị kà a nị. Mị vaa kà a yị wa ịsa ana tẹ yị aza, a mẹ̀ hụrẹ mẹ ẹhẹ.”

³⁶Ijeesu ka aza ẹnẹẹ ẹ̀ẹ na, dị ọnị ngụ ini eehi nị. Dị ezirẹma anị ka a vẹ, dị ẹ ka, “Kà iruvo ụhịrẹyị ebe enee chire tụ́ ịnị aarẹ zụ̀ yị.”

³⁷Dị Ijeesu tụ́ ohi, dị ọ kà a yị wa ka, “Ọza ene chire ihu ozoza vị ana jẹẹ yị Ozi ọza onigirima.

³⁸Ẹhẹ ọ vị aarẹ ọnọọ nị. Ihu ozoza ọ vị ezi oni Ohomorihi aa mẹ ịjọva tụra nị. Ebe ẹnẹẹ ẹnị vị ezi Echu nị.

³⁹Ọnịvị ọnọọ ene ne chire ebe ẹnẹẹ ọ vị echu nị. Ụmẹ anaa sịị̄ mẹẹ ọ vị ụmẹ ọdịrẹma ẹhẹ nị. Aza ana vaa mẹ wa ọ vị anggẹẹrị nịnị nị.

⁴⁰Anka a mẹ̀ sụ́ ebe ẹnẹẹ, dị a rị wa ịra, avọọ ọ́dịrẹma ẹhẹ ọnọnị mẹ̀ vaa yà nị.

⁴¹Ẹmị Ozi ọza onigirima vaa tụ́ anggẹẹrị amị nịnị jịnẹ, dị ẹ tọ̀ọ́ avaba ịsa anaā mẹ ka ọza ọ̀ mẹ ịvịị ọnịrị avaba aza ana vọ anaā mẹ̀ ịsa edivi hụụnị aza oni Ohomorihi aa mẹ ịjọvaa tụra.

⁴²Dị ẹ kụ́ wa na và hi ịnị ịra ọbanyị. Dị ẹ yà ịzọọ, dị ẹyaa jị òrèrè, dị ẹ rẹ yaa rị anyị.

⁴³Dị ọnịzẹyịza nịnị ẹnị aa zẹtẹ anka ọyị avọọ ịzị Ohomorihi Ada ẹnịnị yà aa mẹ ịjọva. Ọza ana àa nyị ụtọ ọyịsị wụ́ ịrẹyị, ọ̀ sị ụtọ pe ẹtẹ!”

⁴⁴“Oze ana Ada ayị ẹbẹẹba aa zịị mẹ ịjọva vị ana sị mẹẹ anka ịsa akàaka anaa sị tẹ ịnị aarẹ. Â nyị ọza ẹnẹsa ene ne re e, dị ọ wụsẹ sị ịsa kú ọ nị. Ịnẹ anị ô hine pooro, dị ọ na, dị ọ na ná avaba ịsa ọnọọ nyị, dị ọ sị va hị́ ẹtẹ ọnọọ nị.”

⁴⁵“Oze ana ada ayị ẹbẹẹba aa zịị mẹ ịjọva vị ana rẹ sị mẹẹ anka osohu ene ee sì uweyi.

⁴⁶O mè ve re ana katarihi ẹnẹmẹhị, dị ọ na ná avaba ịsa ọnị ọ nyị, dị ọ sị va hị́ ọ nị.”

⁴⁷“Oze ana Ada ayị ẹbẹẹba aa zị mẹ ịjọva vị ana rẹ sị mẹẹ anka ọha enee ne ngụ ini irehu, dị ọ za ivovo irenyi-irenyi avọọ.

⁴⁸Ịjị o si hí, di o tura a vẹ ụtọ irehu, dị ọ yaayịtẹ, dị aa tọ̀ọ́ yọ nị. Dị ọ kụ́ ozoza anị và hi ịnị ẹnya, dị ọ kụ́ odivi anị và ha nị.

⁴⁹Avọọ ọ mẹ̀ vaa yà ịnị ụmẹ ọdịrẹma ẹhẹ nị: Anggẹẹrị nịnị vaa jịnẹ naa kụ́ aza edivi hụụnị aza ọyịza,

⁵⁰dị ọ kụ́ wa và hi ịnị ịra ọbanyị. Dị e hi ịzọọ, dị ẹyaa jị òrèrè, dị ẹ rẹ yaa rị anyị.”

⁵¹Dị Ijeesu họ̀ wa use ka, “Ịrẹyị ẹnẹnị ô ye wu nịnị?” Dị ẹnịnị ka hịịn nị.

⁵²Dị Ijeesu rẹ kà a yị wa ka, “Avaba ọzwọzọda ana àa raà sị ịrẹyị ịjọva Ada ayị ẹbẹẹba zụ̀, vị ana sị mẹẹ anka adarehi ana nyẹngụ kụ́ ịsa ọwọọwa ọnịrị ọkụkụ hụụnị ụhwọ anị vẹ.”

⁵³Íjeesu mẹ̀ sị ịrẹyị ẹnẹnị kà ta, dị ọ hụụ ịzọọ nị.

⁵⁴Dị ọ va ngụ ịnị ẹkụra anị, dị aa zụ̀ wa ịsa ini irehi ahẹkẹ Aniju ẹnịnị, ana ahịka ô hí wa irenu. Dị ẹ ka, “Ho! Ịzị ọ maanị ne re ịrẹyọyẹ hụrẹ? Wee re ụkọrọ ohyozirenu anị?

⁵⁵Aanị ka ẹ yị vị ozi ikahunta ọnọọ yị? Áa vị Imeri ọ vị ọnyị anị? Aanị ka ẹ yị vị Ijemiisi ọnịrị Ijosẹẹhụ beri Ịsayịmọnị ne beri Ijudasi ọ vị ẹyịnyara anị?

⁵⁶Aa vị ẹyịrị ẹyịnyara anị anẹẹ e dudu ra ịzẹnị? Ịzị o ve ne re avaba ẹsẹnị hụrẹ?”

⁵⁷Dị ẹnịnị aa kụ́ ayị anị nị. Ama dị Ijeesu kà a yị wa ka, “Ọnịsẹ ọ mā nyị ụbanyị ịnị ẹkụra anị ọnịrị éehi anị, ẹ̀ yị vị aha ọsa.”

⁵⁸Ọ yị mẹ̀ ụkọrọ ohyozirenu baaba ịzọọ, agụvị ka ẹnịnị ẹ yị dọ ọ wụ́.