Read ebira Imatiwu 18 Bible Online

Imatiwu 18 - ebira bible

Imatiwu 18

¹Ụmẹ ọnọọ gẹdẹ-gẹdẹ di ezirẹma Ijeesu kà vẹ, dị ẹ ka, “Ẹnẹ hu keekere ịzị Ohomorihi yà aa mẹ ịjọva?”

²Ijeesu ộ hị́ ozi ọnya, dị ọ sị ọọ jẹẹ ịnị akakana ẹnịnị nị,

³dị ọ ka, “Ịzẹyịza m maa kà a wụ nịnị, ẹ̀ yị vị ụ vara ebira awụ nịnị dị ụ wa yà anka ozweyi avọọ, wẹ yị vaa ngụ ịzị Ada ayị ẹbẹẹba yà aa mẹ ịjọva nịnị vụrụ-vụrụ.

⁴Agụvị avọọ, ọza ana àa kà ẹngụ anị chí anka ozi ọnọnị, ọza ọnọọ o hu keekere ịzị Ada ayị ẹbẹẹba yà aa mẹ ịjọva nị.

⁵Ọza ana àa dọ ẹngụ ozweyi ọnọnị pe ẹngụ agụvị ịrẹha amị, ẹmị ọ rẹ dọ pe ẹngụ avọọ nị.”

⁶“Ọza ana àa mẹ ka ọnya ini ezi eweyi ana dọ mị wụ́ aanị, ka ọ̀ mẹ ịvị, ọ yaanị dahi hu yọ ka à sị ịrẹtọkwayị ọbanyị, di è kuru ọ gẹ ẹ ọrọkọ, di è ne e ngụ òkū ana nyịnẹ, dị ọ mụnẹ ẹ.

⁷Anẹhẹ ẹ sị dà agụvị ịsị ẹẹ̄ mẹ ọzaa mẹ ịvị. Ẹ yị zụ nyị ka ịsị ẹẹ̄ mẹ ọzaa mẹ ịvị, ọyị vẹ; ama ọza ana àa kụ́ ịsa ẹnẹẹ vẹ, ọ sị dà.

⁸Agụvị avọọ, àa vị ụvọ awụ, à vị ahụ awụ ọ mẹ ka wa mẹ ịvị nị, jị wa ne ta! Ộ dahi ka wa vị ọjavụ dị ụ wa yàra pooro, hu ka wa nyị ụvọ ẹyịva, àa vị ahụ ẹyịva, ama di è ne wu ngụ ịnị ịra ene è yi mē mi pooro.

⁹Àa vị eyi awụ ọ mẹ ka wa mẹ ịvị nị, tụ̀ ọọ ne ta! Ộ dahi ka wa nyị eyi ọnya dị ụ wa yàra pooro, hu ka wa nyị eyi ẹyịva, di è ne wu ngụ ini ẹkụra.”

¹⁰“Asị ụ zẹẹ ka wa sị eyi oweyi re ezi eweyi ẹnẹnị! Dị ma kà a wụ nịnị ka anggẹẹrị ẹnịnị ẹbẹẹba vị eneē re eyi Ada amị ẹbẹẹba.

¹¹(Ẹmị Ozi ọza onigirima vị ana vẹ ka ma va dọ aza ene vú há.)

¹²Si u ro ịnị ịrẹyị ọnọnị nịnị? Ọza ọ̀ọ nyị atẹmẹ ẹchẹhị, dị ọnya ịnị ẹnịnị nyeeyi nị, wéé ro ka ọyị vaa navọ ọ jị ọnya ha ịnị ẹchẹhị ana vọ hi ẹtẹ, di ò nee sì ene nyeeyi aanịị ngụ ịnị ataba zịịzị?

¹³Òo si oo re, ịzẹyịza m maa kà a wụ nị, ọ vaa jẹ ịrajẹ anịị huna ọ jị ọnya ha ịnị ẹchẹhị ana vọ ene è yi nyeeyi.

¹⁴Avọọ gẹdẹ-gẹdẹ Áda awụ nịnị ẹbẹẹba ò yi mè sì ka ọnya ini ezi eweyi ẹnẹnị è vu ẹtẹ nị.”

¹⁵“Ọhụva awụ ọ̀ọ mẹ wụ́ ịrẹyị odivi, na dị ọ̀ vị ẹwụrị ọ anava, dị ụ wa họ̀ ọ. Ọ̀ọ wụ́ ịrẹyị awụ, wa raà sị ọọ varẹma vị ọnọhụva awụ.

¹⁶Ama ọ̀ yị wụ́ ịrẹyị awụ, dị ụ sị ọza ịnya, àa vị aza ẹnị ẹẹva tụra ẹngụ; agụvị ka ịrẹyị onivenu ẹẹva, à vị ẹẹta a sịị̄ sị ahụ ịrẹyịị hi ẹtẹ nị.

¹⁷Òo yi, dị ọ̀ yị wụ́ ẹ́ẹnịnị nị, dị ụ kà a yị anịragụ Ohomorihi. Ama òo yi yi, dị ọ̀ yị wụ́ áanịragụ nị, dị ụ kụkụ za a anka anarịmadọwụ ọnịrị ọza odivi avọọ.

¹⁸Ịzẹyịza m maa kà a wụ nị, ịsị ụ wàa sụ́ nịnị ịnị ẹhẹ, a rẹ vaa sụ́ ọọ ẹ́bẹẹba. Ịsị ụ wàa ngwa nịnị ịnị ẹhẹ, a rẹ vaa ngwa a ẹ́bẹẹba.

¹⁹Dị ma rẹ kà a yị wụ nịnị ka: Aza ẹnị ẹẹva ịnị ẹngụ awụ nịnị ẹ̀ẹ sị ayị vị ọnya ịnị ẹhẹ ịnị ịsa ene èeyee họ̀ use, Ada amị ana yà ẹbẹẹba vị ana aa mẹ̀ ẹ yị wa.

²⁰Agụvị ka ịzị aza ẹnị ẹẹva, àa vị ẹẹta kụ́ ẹngụ gụ ịnị ịrẹha amị, mị vaa yà ịnị akakana ẹnịnị.”

²¹Dị Ipita ve tù Ijeesu, dị ọ họ̀ ọ use ka, “Ananyị yị, ụ́pẹ yà ọnọhụva amị vaa mẹ mị ịrẹyị, dị ma yịị vagu ọọ? Ụpẹ ịhịmba wáá yọ?”

²²Dị Ijeesu kà a yọ ka, “Mẹ yị kà a wụ ka ụpẹ ịhịmba, ama ụpẹ ẹtarẹwụ oze ịhịmba.

²³Oze ana Ada ayị ẹbẹẹba aa zịị mẹ ịjọva vị ana sị mẹẹ anka ịsị ohinọyị ọnya aanị mẹ. Ẹkụhị ọnya ohinọyị ọnọọ ee sì ka ọnị ọ̀ yẹ ẹkẹhị ọnị ọnị sị yị ezi ahụ anị.

²⁴O mè nyima kẹnẹ, â sị ọnụta ọnya anị ngụ eehi ve tù ọọ ana rị ọọ ụta akàaka.

²⁵Ò yi mè zụ sí ọọ, dị ọga anị mẹ ọda ka à ná ọnịrị ose anị beri ozi anị ọnịrị avaba ịsa ọnị ọ̀ọ nyị, di è si sí ụta nị.

²⁶Dị ozi ahụ ọnọọ va ku ẹtẹ, dị aa dá ịpẹ, dị ọ ka: ‘Ọga, aarịhịnị nyị isuuru yị mị, ka mi vee sí avaba anịị yị wụ.’

²⁷Dị ayị anị aa vá ọga anị, dị ọ hụrẹ ẹ ụvọ, dị ọ vagu ọọ ịnị ụta anị nị.

²⁸Ịjị ozi ahụ ọnọọ gẹdẹ-gẹdẹ sị jịnẹ dị aa na, di oni re ne tù ozi ahụ ọsa ana rị ọọ ụta chee aanị kẹnẹ nị. Dị ọ sị ụvọ hi ọọ ọrọkọ, dị ọ ka: ‘Wẹ̀ yị sị ẹkẹhị amịị mị ajịnị, wẹ yị hụụ ịzẹnị.’

²⁹Dị ozi ahụ ọnọọ ọnị rẹ và ku ẹtẹ, dị aa dá ịpẹẹ yọ, dị ọ ka: ‘Aarịhịnị nyị isuuru yị mị, ka mi vee sí avaba anịị yị wụ.’

³⁰Ama ọ yị dọ. Dị ọ sị ọọ na tụ́ ịnị ẹngwa ka ọ̀ yà ịzọọ pooro di ò sí ụta anị nị.

³¹Ịjị ozi ahụ ana vọ re ịsị ọ mẹ, ộ zị wa ẹngụ, dị ẹ na kà a yị ọga ẹnịnị avaba ịsị ẹ mẹ nị.

³²Ịjọnọọ dị ọga anị va hị́ ọọ, dị ọ kà a yọ ka: ‘Ẹwụ ozi ahụ odivi ọnọnị, mâ vagu wu ịnị avaba ụta awụ ọnị ụ rị mị agụvị ka wâ dá ịpẹ mị.

³³Ho! Ẹwụ ẹ yị rẹ nyẹngụ vayị ọnọhụva awụ, anka m mẹ̀ vayị awụụ?’

³⁴Ayị ọga anị aa dà ọva, dị ọ sị ọọ yị aza anaā sịị ụyaa rị ọza ka àa sị ụyaa rị ọọ pooro di ò sí avaba ụta anị.

³⁵Avọọ gẹdẹ-gẹdẹ Ada amị ẹbẹẹba mẹ̀ vaa mẹ wụ nịnị nị, ọzịnya-ọzịnya awụ nịnị ọ̀ yị vagu ọnọhụva anị hụụnị ayị anị vẹ.”