Read ebira Imatiwu 19 Bible Online

Imatiwu 19 - ebira bible

Imatiwu 19

¹Íjeesu mẹ̀ sị ịrẹyị ẹnẹnị kà ta, dị ọ hụrẹ Igariri, dị ọ nọ ẹkụra Ijudiya ákẹnẹ Okuha Ịjọdanị nị.

²Ọkọnị aza ệ saasa a, dị ọ mẹ wa ụkụ ịzọọ nị.

³Anihwarisi ẹnyị ệ ká Ijeesu vẹ ka ẹnị ẹ̀ va zama a re. Dị ẹ kà a yọ ka, “Ọ́ọ́ vọrọ ka ọza ọ̀ hụ agụvị ịsị òo re kẹnẹ yi ose anị tịtẹ?”

⁴Di o tụ́ wa ohi, dị ọ ka, “Aanịka wẹẹ̀ yị kà a ini Iwe Ohomorihi nịnị ka hụrẹ ụmọrụmọ ọza ana mẹ ọza, vị ana mẹ wa ọnọrụ ọnịrị ọnẹẹ?”

⁵Dị Ijeesu ka, “Agụvị avọọ dị ọnọrụ hụụ ịdị ada anị ọnịrị ọnyị anị, dị ọnịrị ose anị vabẹ, dị ẹnị ẹyịva kụkụ sị vara ẹngụ ọnya.

⁶Ẹ yị kụkụ vị ẹẹva ẹ vị, ama ẹngụ ọnya. Agụvị avọọ, ịsị Ohomorihi sị vabẹ, asị a kụkụ ha a hi!”

⁷Dị Anihwarisi ẹnẹẹ họ̀ ọ use ka, “Sị ẹ vẹ dị Imosiisi va kà a ka à sị iwe ivenu yọ di è yi ọọ tịtẹ?”

⁸Dị Ijeesu kà a yị wa ka, “Agụvị ayị ọkatẹngụ awụ nịnị Imosiisi sị zẹẹ ka we yi ose ewu nịnị nị. Ama hụrẹ ụmọrụmọ ẹyị vị avọọ ọ mẹ̀ vịdị yà.

⁹Dị ma kà a wụ nịnị, ọza ene èe yi ose anị tịtẹ, ẹ̀ yị vị agụvị ịrẹkọyịsẹ, dị ọ na nyị ọsa nị, ộ sẹ̀ ịrẹka. Ọza ana àa nyị ọnẹẹ ene e yi tịtẹ, ọnị ọ rẹ sẹ̀ ịrẹka.”

¹⁰Dị ezirẹma anị kà a yọ ka, “Àa vị aanị ị́rẹyị ẹvarose mẹ̀ yà nị, wáá yẹ ka o yi zoza ka ọza ọ̀ nyị ọnẹẹ?”

¹¹Dị Ijeesu tụ́ wa ohi, dị ọ ka, “Ẹ yị vị avaba aza ẹ zụ dọ ịrẹyị ọnọnị, ẹ̀ yị vị aza ana a sị yị.

¹²Â nyị osiretu ẹnyị ana a vavọọ ma hụụnị ịnẹ ọnyị ẹnịnị vẹ. Ẹnyị yà ịzọọ ana aza vara osiretu. Aza ẹnyị rẹ yà ịzọọ ana sị ayị hụụnị ọnẹẹ ọyịnyị, agụvị ka Ada ayị ẹbẹẹba aa mẹ ịjọvaa tụra wa nị. Ọza ana àa zụ dọ ọ, ọ̀ dọ ọ!”

¹³Aza ẹnyị aanị ệ kụ́ ezi eweyi ká Ijeesu vẹ ka ọ̀ sị ụvọ tụra wa, dị ọ̀ mẹ̀ aduwa yị wa. Dị ezirẹma anị aa tụ́ aza ẹnẹẹ ohuvọ nị.

¹⁴Ama dị Ijeesu kà a yị wa ka, “Navọ ezi eweyi nịnị ẹ̀ vẹ ịda amị, asị ụ dọ wa oro, agụvị ka ẹngụ ẹnịnị ẹ nyị ịzị Ada ayị ẹbẹẹba yà aa mẹ ịjọva nị.”

¹⁵Dị ọ sị ụvọ tụra wa, dị ọ hụụ ịzọọ nị.

¹⁶Ẹkụhị ọnya ọza ịnya ộ vẹ ịda Ijeesu, dị ọ kà a yọ ka, “Ọga ọyịza, sẹ vị ịsa ozoza ana a vọrọ ka ma mẹ, dị ma nyẹngụ yàra pooro zịna-zịna ị́da Ohomorihi?”

¹⁷Dị Ijeesu kà a yọ ka, “Sị ẹ vẹ dị waa hị́ mị ‘Ọga ọyịza’? Ẹ yị nyị ọza ọyịza ikonya vụrụ-vụrụ, ẹ̀ yị vị Ohomorihi ọnịnya kẹnẹ. Ama wèe sì ka wa yàra pooro zịna-zịna, sị ụvọ za ọda!”

¹⁸Dị ọ kà a yị Ijeesu ka ye re ẹnị ọ vị? Dị Ijeesu ka, “Asị ụ wụ̀ ọza; Asị ụ sẹ̀ ịrẹka; Asị u yi oyi; Asị ụ dọ ivenu ireche.

¹⁹Sị ụbanyị yị ada awụ ọnịrị ọnyị awụ! Di u we sì ịrẹyị ọnọhụva anka ẹngụ awụ!”

²⁰Dị ozi ọnọrụ ọnọọ kà a yọ ka, “M mẹ̀ hụrẹ vị ozweyi mị hụrẹ sị ụvọ za avaba ọda ẹnẹnị geri-geri nọ. Sị a vọrọ ka ma kụkụ mẹ?”

²¹Dị Ijeesu kà a yọ ka, “Wèe sì ka wa gụ, na ná avaba ogu ọnị ụ nyị, dị ụ wa sị ẹkẹhị anị mẹ ọpịsarị nịnị ẹyịza, dị ụ wa nyẹngụ nyị ogu tụ́ ịda Ohomorihi. Dị ụ wa vẹ, dị ụ wa vaa dụ mịị zịịzị!”

²²Ama Ịjị ozi ọnọrụ ọnọọ maanị wụ́, dị ọ sị ayị oyidu aa na nị, agụvị ka opisa ọbanyị ọ vị nị.

²³Ịjọnọọ dị Ijeesu kà a yị ezirẹma anị ka, “Ịzẹyịza m maa kà a wụ nịnị nị, ọ vaa daa tụ́ akanyaa yị ọnyẹkẹhị nịnị kẹnẹ, dị ẹ̀ zụ ngụ ịzị Ada ayị ẹbẹẹba yà aa mẹ ịjọva.

²⁴Dị ma rẹ kà a wụ nịnị ka: Ộ tụ́ akanya yị opisa ka ọ̀ zụ ngụ ịzị Ohomorihi yà aa mẹ ịjọva huna ọ mẹ̀ tụ́ akanya ka ịnyaakụmị ọ̀ ngụ ịnị uhwohwo ọrịhị na para hu.”

²⁵Ịjị ezirẹma wụ́ ịrẹyị ọnọọ, ô hí wa irenu ẹnẹmẹhị, dị ẹyaa kà a ka, “Ho! Àa vavọọ yọ, ẹnẹ vaa há aanị?”

²⁶Ijeesu ô re wa, dị ọ ka ọza ọ rẹ ẹ̀ yị zụ mẹ̀ ẹ nị, ama Ohomorihi ọ zụ mẹ̀ ẹ, agụvị ka ẹ yị nyị ịsị Ohomorihi ọ̀ yị zụ mẹ.

²⁷Dị Ipita ka, “Re, avaba ịsa ẹ́yị navọ tịtẹ, dị yaa dụ wụụ zị nọ; sị ẹyị kụkụ vaa nyị aanị?”

²⁸Dị Ijeesu kà a yị wa ka, “Ịzẹyịza m maa kà a wụ nịnị nị, ẹwụ nịnị ana aa dụ mịị zị aanị, ịjị àa sị ẹhẹ vara ọwọọwa, dị ẹmị Ozi ọza onigirima sị yaayịtẹ ị́rẹsụ aga ohinọyị amị nị, ẹwụ nịnị rẹ vaa yaayịtẹ ị́rẹsụ aga ohinọyị ẹwụrẹva, dị waa mẹ̀ ọkarẹyị tụ́ ịrẹsụ Anisirẹrị ana vị ịrẹsụ ẹwụrẹva nịnị.

²⁹Ọza ọ̀ọ navọ irehi anị, àa vị ẹyịnyara anị anọrụ, àa vị anẹẹ, ọ̀ọ navọ ada anị, àa vị ọnyị anị, ọ̀ọ navọ ose anị, àa vị ezi anị, ọ̀ọ navọ aarẹ tịtẹ agụvị ịrẹha amị, Ohomorihi rẹ vaa sị ịsa ene huna avọọ oze ẹchẹhị-ẹchẹhịị sí ọọ atọ, dị ọza ọnọọ rẹ yàra pooro zịna-zịna.

³⁰Ama aza ọrụrụ-ọrụrụ ana vị ọdọvịdị booro aanị, ẹ vaa vị ọdịrẹma; dị aza ana vị ọdịrẹma na vị ọdọvịdị.”