Read ebira Imatiwu 20 Bible Online

Imatiwu 20 - ebira bible

Imatiwu 20

¹“Oze ana Ada ayị ẹbẹẹba aa zịị mẹ ịjọva vị ana sị mẹẹ anka adarehi ọnya aanị, ana kwẹẹtẹ ẹnẹnẹ viri-viri ka ọnị ọ̀ na dọ anụkọrọ, dị ẹ̀ va mẹ̀ ụkọrọ yị ọnị ịnị ụbazị anị.

²Ộ dọ yị anụkọrọ ẹnẹẹ ka ọnị vaa sị Ịnayịra ẹẹva yị wa ịnị ụkọrọ ẹkụhị-ẹkụhị. Ịjị ẹ sị dọ, dị ọ kụ́ wa nọ ịnị ụbazị anị nị.

³Ịjị ọ rẹ naa mẹ ẹhụụ ụmẹ agogo ịhịna, dị ọ jịnẹ nọ ẹhẹ, di o ne tù ka aza ẹnyị jẹẹ kẹnẹ-kẹnẹ ini ohu nị.

⁴Dị ọ kà a yị wa ka: ‘Nọ ịnị ụbazị amị nịnị, ka mị vaa sị ịsa ana àa vọrọọ wụ nịnị.’ Di e si hu aa nọ ịzọọ nị.

⁵Dị ọnọrụ ọnọọ rẹ jịnẹ nọ ẹhẹ ịnị ẹhụụ ụmẹ agogo ẹwụrẹva ọnịrị ẹhụụ ụmẹ agogo ẹẹta, dị ahịka avọọ ọ mẹ̀ rẹ mẹ nị.

⁶Ịnị ẹhụụ ụmẹ agogo ẹẹhị oruva, dị ọ rẹ jịnẹ nọ ẹhẹ, di o re ne tù aza ẹnyị ana jẹẹ kẹnẹ-kẹnẹ nị. Dị ọ rẹ kà a yị wa ka: ‘Sị ẹ vẹ dị ụ jẹẹ kẹnẹ-kẹnẹ hụrẹ ẹnẹnẹ nịnị?’

⁷Dị ẹ kà a yọ ka agụvị ka ẹ yị nyị ọza ana hị́ ẹnị ụkọrọ yọ nị. Dị ọ kà a yị wa ka: ‘Nọ ịnị ụbazị amị nịnị ka ịsị ẹ̀ẹ vọrọ, mị vaa sịị yị wụ nịnị.’

⁸Ịjị oruva si tù, dị ọza ana nyị ụbazị kà a yị ozi ahụ anị ka: ‘Hị́ anụkọrọ ẹnẹẹ, dụ wa sị ẹkẹhị ụkọrọ ẹnịnị yị wa! Nyima hụụnị ana vẹ ọdịrẹma ne tù ọnịpaapa.’

⁹Ịjị aza anaa dọ ịnị ụmẹ agogo ẹẹhị vẹ, dị a sị Ịnayịra ẹvẹẹva yị wa nị.

¹⁰Ama ịjị ọnịpaapa vẹ, ê ro o ka ẹnị vaa dọ ọ hu aza ana vọ. Dị ahịka Ịnayịra ẹvẹẹva a rẹ sị yị ẹnị nị.

¹¹Ịjị ẹ sị ọọ dọ, dị ẹyaa rị ihuhuu hi adarehi ọnọọ nị,

¹²di ẹ ka: ‘Ọdịrẹma ẹnẹnị vị ana mẹ̀ ụkọrọ agogo ọnya kẹnẹ, dị ụ mẹ ka ẹyị ana sị ịrẹma tụ́ ịnị ọyị hụrẹ ẹnẹnẹ, ẹyịrị wa ẹ̀ vị ẹbẹẹbẹ nị.’

¹³Dị adarehi ọnọọ tụ́ ọza ịnya ẹnịnị ohi, dị ọ ka: ‘Ọta amị, wáá yẹ ka mẹ yị mẹ wụ ịsa odivi?’ Aanịka ẹ yị vị ụkọrọ Ịnayịra ẹẹva ẹkụhị ẹ́mịrị ẹwụ vịdị kà a tụ́?

¹⁴Sị ẹkẹhị awụ, dị ụ waa nọ eehi awụ! Ọpa ọnị mị sị wụ aanị, mị raa sịị yị ọdịrẹma ọnọnị nị. Avọọ m mè sì ọọ nị.

¹⁵Aanịka me yi re oze sị ẹkẹhị amị mẹ̀ ịsa ene zé mi eyi? A vị agụvị ka mâ mẹ ẹyịza, áyị aa sịị kụ́ wụụ?

¹⁶Avọọ ọ́dịrẹma mẹ̀ vaa vị ọdọvịdị, dị ọdọvịdị vị ọdịrẹma nị.”

¹⁷Íjeesu màa hịrẹẹ nọ Ijerusarẹmị, dị ọ hị́ ezirẹma anị ẹwụrẹva tụ́ oboka óze, dị ọ kà a yị wa ka:

¹⁸“Re, yaa hịrẹẹ nọ Ijerusarẹmị. A vaa sị ẹmị Ozi ọza onigirimaa chire ohirẹsụ ẹbanyị irehi Ohomorihi ụvọ, ọnịrị ọzwọzọda nịnị. Ẹ vaa mẹ̀ ọkarẹyị isuu mi;

¹⁹dị ẹ sị mị chire anarịmadọwụ nịnị ụvọ. Aza ẹnẹẹ vaa sị mịị mẹ̀ isiya, dị ẹ jị atẹ kú mi, dị ẹ rẹ kanyị mị za ọchị apavahị. Ama ịhyẹgwẹta anị, mị vaa haa hụụnị isu.”

²⁰Dị ọnyị ezi Izebedi kụ́ ezi anị ve tù Ijeesu nị; dị ọ va ku ẹtẹ yọ, dị ọ ka ọ̀ mẹ̀ ịsa ọnya yị ọnị nị.

²¹Dị ọ ka, “Si u wee sì ka ma mẹ yị wụ?” Dị ọ kà a yị Ijeesu ka, “Navọ, ịnị ụmẹ igirima awụ, ezi emi ẹyịva ẹnẹnị, ọnyara ọ̀ yaayịtẹ éyi ụvọrị awụ, dị ọsa ọ̀ yaayịtẹ éyi ụvọha awụ!”

²²ị Ijeesu tụ́ ohi, dị ọ ka, “Wẹ yị yẹ ịsị u wee họ̀ use nịnị. Wáá va zụụ sị akoo hú ụyọrị oni mi vee hú nịnị?” Dị ẹ kà a yọ ka, “Ya zụ mẹ̀ ẹ.”

²³Dị Ijeesu ka, “Ịzẹyịza yọ, ụ vaa sị akoo hú ụyọrị oni mi vee hú nịnị. Ama ẹmị ẹ yị nyị ọda ọyịkà a wụ nịnị ka aza ẹnyị ẹ̀ yaayịtẹ éyi ụvọrị amị, dị ọsa ọ̀ yaayịtẹ éyi ụvọha amị. Ada amị ọ vaa sịị yị aza ọnọọ sị ọọ tenyi tịtẹ yị nị.”

²⁴Ịjị ezirẹma ẹẹwụ ana vọ maanị wụ́, dị ẹyaa kụ́ ayịị hi ẹyịnyara ẹẹva ẹnẹẹ nị.

²⁵Dị Ijeesu hị́ wa pe ẹngụ, dị ọ kà a yị wa ka, “Wâ yẹ ka ohinọyị anẹhẹ vị anaā mẹ ehunaa yị aza, dị azẹbanyị ẹnịnị aa mẹ ẹchakaa yị wa.

²⁶Ama ẹ yị vọrọ ka áawụ nịnị ọ̀ vavọọ yà. Ọza ene èe sì ka ọnị ọ̀ nyị ụbanyị ịnị awụ nịnị, ọ̀ vị ozi ahụ aza ana vọ.

²⁷Ọza ene èe sì ka ọnị ọ̀ vị ọdọvịdị, â vọrọ ka ọ̀ vị ozi ahụ avaba aza.

²⁸Agụvị ka ẹmị Ozi ọza onigirima mẹ yị vẹ ka à mẹ ozi ahụ yị mị, ama ka ma mẹ ozi ahụ yị aza, dị ma rẹ sị ụhwẹ amị hị́ aza ọrụrụ-ọrụrụ varẹma.”

²⁹Íjeesu ọnịrị ezirẹma anị màa hụrẹ Ijeriko, ọkọnị aza ệ saasa a.

³⁰Ogweyi ẹẹva ẹnyị aanị ana yaayịtẹ ụtọ oze, ệ wụ́ ka Ijeesu aa parahu. Di e nyima ee nowu ka, “Ananyị yị, ẹwụ ozi Idevidi, vayị ayị de!”

³¹Dị ọkọnị aza ẹnẹẹ tụ́ wa ohuvọ ka è kú irenu ẹnịnị nị. Di e re nowu hu avọọ ka, “Ananyị yị, ẹwụ Ozi Idevidi, vayị ayị de!”

³²Dị Ijeesu jẹẹ, dị ọ hị́ wa vẹ nị, dị ọ ka, “Si u wee sì ka ma mẹ yị wụ nịnị?”

³³Dị ogweyi ẹnẹẹ kà a yọ ka, “Ananyị yị, ị ka ye re ẹtẹ nọ.”

³⁴Ijeesu ộ vayị ẹnịnị, dị ọ sị ụvọ kanyị eyi ẹnịnị nị. Obooboro ọnọọ, di eyee re ẹtẹ nị. Dị ẹnịnị kụkụ saasa a nị.