Read ebira Ịmaakị 1 Bible Online

Ịmaakị 1 - ebira bible

Ịmaakị 1

¹Aanị énube ọyịza Ijeesu Ikirisiti Ozi Ohomorihi meme nyima nị,

²anka ọ́nịsẹ nịnị mẹ̀ chẹrẹ ẹ ka, “Re, ọnụtụ amị yị, maa tụ́ ọọ dọ ọvịdị awụ, di ò nee tenyi oze zí wu.”

³Â nyị ọza ịnya aanị ana yà ịnị ụnọmị ana aa nọọ ka, “Tenyi oze Ananyị yị tịtẹ yọ nịnị, tenyi oze anị, dị ọ̀ vọrọ ẹtẹẹtẹrẹ!”

⁴Ịjọọnụ ọhwọzenyi ọ vavẹ, ộ nọ ịnị ụnọmị, dị aa kà ịrẹyị Ohomorihi yị aza nị, dị ọ ka, “Ro ịnẹ varẹma hụụnị ebira odivi awụ nịnị, dị ma mẹ̀ ọyịhwọzenyi yị wụ nịnị, dị Ohomorihi ọ̀ vagu wu ịnị ịvị awụ nịnị!”

⁵Dị avaba Anijudiya nịnị ẹnịrị Anijerusarẹmị nịnị aa nọ ịzị Ịjọọnụ yà nị. Ẹ màa dọ irenu ịvị ẹnịnị, dị Ịjọọnụ aa mẹ ọyịhwenyii yị wa ini Okuha Ịjọdanị nị.

⁶Ịjọọnụ ô chire awuru anaa sị ẹyị ịnyaakụmị hí ịta anị. Dị ọ rẹ sị ịtụmpaha mẹ ụbaja ọnị ọ sị sụ́ ọtẹ nị. Akụvarịva ọnịrị ẹhụ ọ vị ịsọyịrị anị nị.

⁷Ọ màa kà ịrẹyị Ohomorihi, dị ọ ka, “Â nyị ọza ịnya aanị ana vaa vẹ ị́rẹma amị. Ọza ọnọọ ọ nyị ụkata hu mi ẹtẹẹtẹrẹ nị. Mẹ yị hyakụ yà ọza ana vọrọ ka ò nyima dị ọ̀ ngwa adava hụụnị ahụ anị.

⁸Ẹmị aa sị enyi mẹ ọyịhwenyii yị wụ nịnị, ama ọnị vị ana vaa sị Ụhwẹ Ọnịnị mẹ̀ ọyịhwọzenyi yị wụ nịnị.”

⁹Ẹkụhị ọnya Ijeesu ộ hụrẹ ẹkụra Ịnazarẹtị ịnị ẹtẹ Igariri vẹ. Ịjọọnụ ộ mẹ̀ ọyịhwọzenyi yọ ini Okuha Ịjọdanị.

¹⁰Íjeesu mẹ̀ yị jịnẹ hụụnị enyi vẹ kẹnẹ, di o re ka ihinẹba aa naa hi ẹtẹ, dị Ụhwẹ Ọnịnị ee chí vẹ anka arivadi avọọ, di o ve kú ọọ nị.

¹¹Dị ọngwẹ ọnya hụrẹ ẹbẹẹba vẹ ka, “Ẹwa vị Ozi emi oni mi sì ịrẹyị anị nị, ịnẹ amị ô hine tù wu ẹtẹẹtẹrẹ.”

¹²Obooboro ọnọọ dị Ụhwẹ Ọnịnị sị Ijeesu nọ ịnị ụnọmị nị.

¹³Ijeesu ộ yà ịzọọ pooro, ộ mẹ̀ ẹkụhị ẹbẹẹva ịzọọ. Dị Echu na zama a re nị. Uye ịnị avị nịnị vị ana rẹ yà ịzọọ bẹẹ, ama anggẹẹrị nịnị aa mẹ ozi ahụụ yị Ijeesu nị.

¹⁴Ịrẹma anaa sị Ịjọọnụ za tụ́ ịnị ẹngwa, dị Ijeesu va ngụ Igariri, dị aa kà enube ọyịza Ohomorihi nị,

¹⁵dị ọ ka, “Ụmẹ o si tù, ọ sị vọ chee, dị ịjọva Ohomorihi ọ̀ vẹ. Ro ịnẹ varẹma hụụnị ebira odivi awụ nịnị, dị ụ wa dọ enube ọyịza wụ́ nịnị!”

¹⁶Ịjị aa parahu ụtọ irehu Igariri, di o re Ịsayịmọnị ọnịrị Andụrụ ọyịnyara anị, e mèe ne ọhaa ngụ enyi, agụvị ka ozube ivovo ẹ vị nị.

¹⁷Dị Ijeesu kà a yị wa ka, “Vẹ, dị waa dụ mị ịrẹma nịnị! Mị vaa vara wụ nịnị aza anaā kụ́ azaa vẹ, anka ụ mẹ̀ẹ̄ kụ́ ivovo avọọ.”

¹⁸Obooboro ọnọọ dị ẹ và ọha ẹnịnị hi ẹtẹ, dị ẹyaa dụ ọ ịrẹmaa na nị.

¹⁹Ọ mẹ̀ rẹ da zị chee, di o re Ijemiisi, ozi Izebedi ọnịrị ọyịnyara anị Ịjọọnụ nị. Ẹnịnị vị ana yà ịnị ẹpa ẹnịnị, dị ẹyaa gẹ ọha ẹnịnị nị.

²⁰Dị ọ wụsẹ hị́ wa nị, dị ẹ navọ ada ẹnịnị ọnịrị anụkọrọ anị tụ́ ịnị ẹpa ọnọọ, dị ẹyaa dị ụ ọọ ịrẹmaa na nị.

²¹Ẹnịnị ẹ va ngụ Ikapanawumi. Ẹ́kụhị ụhwọtụ mè yi tù kẹnẹ, dị Ijeesu ngụ ini irehi ahẹkẹ Aniju, dị aa sị ịsaa zụ̀ aza nị.

²²Oze ana aa zịị zụ̀ wa ịsa vị ene hí wa irenu, agụvị ka aa zụ̀ wa ịsa anka ọza ana nyị ọda avọọ; ọ yị zụ̀ wa ịsa anka ọ́zwọzọda nịnị mẹ̀ẹ̄ zụ̀ aza ịsa.

²³Â nyị ọnọrụ ọnya aanị ana yà ini irehi ahẹkẹ Aniju ọnọọ, ộ nyị ụhwẹ echu. Di o nowu tụ́ ẹba,

²⁴dị ọ ka, “Navọ yị hẹẹ, sẹ jị gẹ ẹyịrị ẹwụ, Ijeesu Anịnazarẹtị? Ụ wáá vẹ ka wa va wụ yị nị? Mâ yẹ ọza ọnị ụ vị; ẹwa vị Ọza Ọnịnị Ohomorihi nị.”

²⁵Dị Ijeesu tụ́ ọọ ohuvọ dị ọ ka, “Ụsẹ mẹ hẹẹ, dị ụ wa jịnẹ hụụnị ẹngụ ọnọrụ ọnọọ!”

²⁶Dị ụhwẹ echu ọnọọ henyi ọnọrụ ọnọọ jigi-jigi, di o nowu zẹtẹ, dị ọ jịnẹ hụụnị ẹngụ anị nị.

²⁷O si hí avaba aza ẹnẹẹ irenu ẹtẹẹtẹrẹ; agụvị avọọ dị ẹyaa họ̀ ẹngụ use ka, “Ẹngụ ịrẹyị sẹ vị ọnọnị aanị? Ịrẹyị ọwọọwa wáá rẹẹ yị? Ọnọrụ ọnọnị ộ sị ụkata mẹ ọda tụra ụhwẹ echu nịnị ịrẹsụ, ệ wụ́ chire e.”

²⁸Aza ệ wụsẹ sị ịrẹyị Ijeesu wụ́, dị ẹ na aa kà a ngụ ẹkụra Igaririi zịịzị nị.

²⁹Ẹ mẹ̀ yị hụụnị irehi ahẹkẹ Aniju ọnọọ kẹnẹ, dị ẹ nọ ini eehi Ịsayịmọnị ọnịrị Andụrụ nị, ẹnịrị Ijemiisi beri Ịjọọnụ ẹ zị na nị.

³⁰Ọnyị ose Ịsayịmọnị vị ọnị ọvanggoro za, dị ọ hụtẹtẹ nị. Dị ẹnịnị wụsẹ kà a yị Ijeesu nị.

³¹Dị ọ vẹ, dị ọ sị ụvọ gẹ ọnẹẹ ọnọọ kwẹẹtẹ nị. Dị ọvanggoro anị ọnọọ ộ wụsẹ ta, dị o sì wa ọzọga nị.

³²Ịjị oruva si tù, ọ́ yị mẹ̀ sị ngụ ẹtẹ, dị aza kụ́ avaba ọnịkụ ọnịrị aza ana nyị ụhwẹ echu nịnị ká Ijeesu vẹ nị.

³³Avaba anẹkụra ẹnẹẹ ệ wara gụ enoze irehi oni Ijeesu yà.

³⁴Ijeesu ộ mẹ̀ aza ọrụrụ-ọrụrụ ụkụ irenyi-irenyi ana za wa. Dị ọ rẹ dụ ụhwẹ echu ọrụrụ-ọrụrụ jịnẹ hụụnị ẹngụ aza nị. Ọ yị zẹẹ ka ụhwẹ echu ẹnẹẹ ẹ̀ kà ịsọnyị-ịsọnyị, agụvị ka ệ yẹ Ijeesu.

³⁵Ẹnẹnẹ eyinẹhẹ anị, ẹ́tẹ mèe yii vee hweyi kẹnẹ dị Ijeesu kwẹẹtẹ, dị ọ jịnẹ nọ aha ọnya aanị ịzị aza ẹ̀ yị yà nị, dị ọ na mẹ̀ aduwa ịzọọ nị.

³⁶Dị Ịsayịmọnị ọnịrị anda ẹnịnị ee sì ọọ zị nị.

³⁷Ịjị e si oo re, dị ẹ kà a yọ ka, “Avaba aza ee sì wu ọ.”

³⁸Ama dị Ijeesu kà a yị wa ka, “À vẹ ya nọ ịnị ẹkụra ana vọ kara yị aanị, dị ma rẹ na kà ịrẹyị Ohomorihi yị wa bẹẹ; agụvị ka ụvị avọọ mị vẹ nị.”

³⁹Dị aa ngụ ẹtẹ Igariri zịịzị nị, dị aa kà ịrẹyị Ohomorihi ini irehi ahẹkẹ Aniju ẹnịnị, dị aa dụ ụhwẹ echu nịnị jịnẹ hụụnị ẹngụ aza nị.

⁴⁰Â nyị ọnịkụ ọbanyị ọnya ana ká Ijeesu vẹ, dị ọ jị idinku ku ẹtẹ, dị aa dá ịpẹẹ yọ nị. Dị ọ ka, “Wèe sì, wa nyẹngụ mẹ ụkụ amịị mị.”

⁴¹Ayị anị ộ vá Ijeesu ẹtẹẹtẹrẹ. Dị ọ tana ụvọ anị, dị ọ sị kanyị ọọ nị, dị ọ ka, “Mê sì de, ụkụ awụ ọ̀ ta!”

⁴²Ọ mẹ̀ yị kà a kẹnẹ, dị ụkụ ọbanyị ọnọọ wụsẹ ta hụụnị ẹngụ anị nị.

⁴³Ijeesu ô hú ọọ ụvọ ẹtẹẹtẹrẹ ka ọ̀ wụsẹẹ na;

⁴⁴Dị ọ rẹ kà a yọ ka, “Re ka wẹ yị kà a yị ọza ọnyọọnyị o! Sị ẹngụ awụ na zụ̀ ohirẹsụ irehi Ohomorihi, ka â mẹ wụ ụkụ; dị ụ wa na mẹ ịsị Imosiisi kà a ka wa mẹ”.

⁴⁵Ama dị ọnọrụ ọnọọ na, dị ọ naa kà a yị aza ọrụrụ-ọrụrụ, dị aa kà a zịịzị nị. Agụvị avọọ Ijeesu ọ yị kụkụ nyẹngụ va ngụ ịnị ẹkụra ini eyigede, dị ọ na yà ịzị aza ọ̀ yị yà nị. Aza vị ana aa yịị hara hụrẹ avaba aha nee tù ọọ ịzọọ.