Read ebira Ịmaakị 11 Bible Online

Ịmaakị 11 - ebira bible

Ịmaakị 11

¹E mèe vee tù Ijerusarẹmị, dị ẹ sị ngụ ẹkụra Ịbẹtị-Ihwegi ọnịrị Ịbẹtanị, ọgụrị Ataba Orivi. Dị Ijeesu tụ́ ezirẹma anị ẹẹva,

²dị ọ kà a yị wa ka, “Nọ ịnị ẹkụra ana và eyi ká wụ nịnị avọọ! Wàa maanị yị sị ngụ ịzọọ nịnị kẹnẹ, u vee re ozi ịkẹrịkẹtẹ ọnya anaa za zù, ọza ọọ̀yị tụra a da. Ngwa a, dị ụ waa sị ọọ vẹ nịnị!

³Àa nyị ọza ana kà a ka: ‘Sị ẹ vẹ dị ụ maanị aa mẹ?’ Kà a yọ nịnị ka, ‘Ananyị yị ee sì ọọ nị; Ọ vaa sịị tụ́ vaavẹ ịsọọnị-ịsọọnị.’ ”

⁴Di e si hu aa na nị. Ệ ne tù ka â za ozi ịkẹrịkẹtẹ ọnya zù ini ukere oze ẹ́hẹ. Dị ẹ ngwa a nị.

⁵Dị aza ẹnyị ana jẹẹ ịzọọ ka, “Sị ụ waa mẹ nịnị? Ụ waa ngwa ozi ịkẹrịkẹtẹ ọnọọ nịị?”

⁶Dị ẹ kà a yị wa ịsị Ijeesu vịdị kà nị. Dị aza ẹnẹẹ navọ wa ka ẹ̀ẹ na nị.

⁷Dị ẹnịnị sị ozi ịkẹrịkẹtẹ ọnọọ ve tù Ijeesu nị. Dị ẹ tụ́ awuru ẹnịnị tụ́ ịrẹma ịkẹrịkẹtẹ ọnọọ, dị Ijeesu yaayịtẹ ị́rẹsụ anị nị.

⁸Dị aza ọrụrụ-ọrụrụ tụ́ achị ẹnịnị tụ́ oze nị, dị aza ẹnyị rẹ jị avọ́ ọchị, dị ẹ tụ́ ọọ tụ́ oze nị.

⁹Dị aza ene hi ọvịdị ọnịrị aza ene hi ịrẹma ee nowu ka, “Ihosana! Ohomorihi ọ̀ dà tụ́ ịnị ụbanyị yị ọza ana aa vẹ ịnị ịrẹha Ananyị yị!

¹⁰Ohomorihi ọ̀ dà tụ́ ịnị ụbanyị yị ọza ana aa vẹ vaa rị ohinọyị Idevidi, ada ayị! Sị ụga yị Ohomorihi ẹbẹẹba keekere nịnị!”

¹¹Dị Ijeesu na ngụ Ijerusarẹmị, dị ọ ngụ ini irehi Ohomorihi, dị ọ tangwa re avaba ịsa chẹrẹkẹ nị. Agụvị ka ọyị ộ ta, dị ọnịrị ezirẹma anị si hu aa nọ Ịbẹtanị nị.

¹²Ẹnẹnẹ eyinẹhẹ anị, ẹ mẹ̀ hụrẹ Ịbẹtanị aa vẹ, ụngwẹ aa kụ̀ Ijeesu.

¹³Dị ọ tana eyi re ọchị ọnya aanị ana sị mẹẹ anka ezu ka ộ vị avị-avị nị. Ô ne re e ka ahịka oni vee re ẹtụtụ ị́rẹsụ anị nị. Ịjị o tù ịzọọ, ẹ yị nyị ịsị o re, ẹ̀ yị vị avị kẹnẹ, agụvị ka eè yi tù ụmẹ ọnị ọ sịị̄ tụ́.

¹⁴Dị Ijeesu kà a yị ọchị ọnọọ ka, “Ọza ọ mā vana rị ẹtụtụ awụ pooro.” Ezirẹma anị ệ wụ́ ịrẹyị ọnọọ.

¹⁵Ịjị ẹ va sị ngụ Ijerusarẹmị, dị Ijeesu na ngụ ini irehi Ohomorihi nị. Dị aa dụ aza ana aa sẹ ohu ini irehi Ohomorihi ọnọọ nị. Dị ọ và iteevuru aza anaā vara ẹkẹhị nịnị, ọnịrị aga aza anaā ná arekuku nịnị angga nị.

¹⁶Ọ yị zẹẹ ka ọzọnyị-ọzọnyị ọ̀ sị ẹnya ọnyọọnyị zị oze ini irehi Ohomorihi ọnọọ para hu.

¹⁷Dị aa zụ̀ wa ịsa nị, dị ọ ka, “Aanịka Iwe Ohomorihi ọ yị vịdị sị ọọ kà ka: ‘A vaa hị́ irehi amị ịzị avaba anẹhẹẹ̄ mẹ̀ aduwa’? Ama ẹwụ nịnị ọ kụkụ sị ọọ vara ịzị anako nịnịị̄ tẹ̀.”

¹⁸Ịjị ohirẹsụ ẹbanyị irehi Ohomorihi beri ọzwọzọda nịnị wụ́ ọọ, ê sì oze ka ẹnị ẹ̀ wụ ọọ. Angwa Ijeesu ee hí wa, agụvị ka ịsa oni Ijeesu aa zụ̀ aza vị ene hí avaba aza irenu.

¹⁹Ịjị oruva si tù, dị ẹ hụụnị ẹkụra ọnọọ nị.

²⁰Ẹnẹnẹ eyinẹhẹ anị, ẹ màa na óze, ê re ka ọchị ọnọọ (ana yà anka ezu) ọ sị wụ huuu na ngụ ịnị ẹpa anị.

²¹Ipita ộ tamayị ịrẹyị ọnọọ, dị ọ ka, “Ọga, re! Ọchị oni u chì hi avọọ, ọ sị wụ ọ!”

²²Dị Ijeesu tụ́ ohi, dị ọ ka, “Dọ Ohomorihi wụ́!

²³Ịzẹyịza mị kà a wụ nị, ọza tụra ọza ana àa kà a yị ataba ọnọnị ka ọ̀ kwẹẹtẹ di ò ne ẹngụ ngụ ini òkū, dị ọ̀ yị mẹ ayị ẹẹva nị, ama dị ọ dọ wụ́ ka ịsị ọnị kà vaa mẹ nị, avọọ ọ màa yàa yọ nị.

²⁴Agụvị avọọ dị ma kà a wụ, wàa mẹ̀ aduwa, ịsa tụra ịsa ọnị ụ wàa dá ịpẹ anị, dọ wụ́ ka wa sị ọọ re dọ, agụvị we re e dọ.

²⁵Wàa jẹẹ, dị ụ waa mẹ̀ aduwa nị, àa nyị ọza ana ayị anị aa kụ́ wụ, vagu ọọ, agụvị dị Ada awụ ẹbẹẹba ọnị ọ̀ rẹ vagu wu ịnị ịvị awụ

²⁶[Agụvị avọọ wẹ̀ yị vagu aza, Ada awụ nịnị ẹbẹẹba ọnị ọ yị rẹ vaa vagu wu ịnị ịvị awụ nịnị.”]

²⁷Ẹnịnị ẹ rẹ vavẹ Ijerusarẹmị. Íjeesu màa zị ụsẹ ini irehi Ohomorihi, dị ohirẹsụ ẹbanyị irehi Ohomorihi beri ọzwọzọda nịnị ọnịrị ọdọvịdị nịnị ve tù ọọ nị.

²⁸Dị ẹ kà a yọ ka, “Ọda ịsị ụ maanị aa sịị mẹ? Ẹnẹ sị ọda ọnọnịị wụ ka wa maanịị mẹ?”

²⁹Dị Ijeesu ka, “Ẹmị raa họ̀ wụ nịnị use ịrẹyị ọnya. Wèe tụ́ mi ohi nịnị, ẹmị rẹ vaa kà a wụ nịnị ọda ọnị mị maanị aa sịị mẹ:

³⁰Ọyịhwọzenyi ọnị Ịjọọnụ aa mẹ avọọ, Ohomorihi ọ́ọ́ sị ọda anịị yọ nị, à vị aza? Tụ́ ohi nịnị!”

³¹Di eyee pe ẹngụ nyị ahankata nị, dị ẹ ka, “Yàa kà a ka ‘Ohomorihi ọ sị yọ nị’, dị ọ ka sị ẹ vẹ dị ẹyị ẹ̀ yị dọ ọ wụ́?

³²Ị́ yáá vaa kà a ka ‘aza ẹ sị yọ nị?’ ” Angwa aza ée hí wa, agụvị ka avaba aza ệ dọ ka, ịzẹyịza, Ịjọọnụ vị ọnịsẹ.

³³Agụvị avọọ dị ẹ kà a yị Ijeesu ka, “Yẹ yị yẹ.” Dị Ijeesu ọnị rẹ kà a yị wa ka, “Ẹ̀hẹẹ, ẹmị ẹ yị rẹ vaa kà a wụ nịnị ọda ọnị mị maanị aa sịị mẹ.”