Read ebira Ịmaakị 2 Bible Online

Ịmaakị 2 - ebira bible

Ịmaakị 2

¹Ộ da kù chee Ijeesu ộ vavẹ va ngụ Ikapanawumi. Anẹkụra ẹnẹẹ ẹ sị ọọ wụ́ gẹtẹ ka ọ yà ini eehi.

²Dị aza wara gụ tawụ-tawụ ini irehi ọnọọ nị. Irehi vị ene hí yị aza huuu va ngụ enoze. Ẹ yị kụkụ nyị aha vụrụ-vụrụ ịnịnẹ irehi ọnọọ. Dị Ijeesu aa kà ịrẹyị Ohomorihii yị wa nị.

³Ịjọnọọ dị aza ẹnị ẹẹna ẹnyị aanị ká a vẹ nị. Dị ẹnịnị chema oswẹngụ ọnyara vẹ nị.

⁴Ẹnịnị ẹ yị nyẹngụ sị oswẹngụ ọnọọ tù ịzị Ijeesu yà, agụvị ka aza ẹ sị rụrụ baaba. Ệ sị ọọ hịrẹ ịrẹsụ irehi ọnọọ. Dị ẹ chị obooro oni Ijeesu yà nị. Ịjị ẹ sị ọọ chị ta, di e chí odooro oni oswẹngụ ọnọọ hụtụ ịnị anị hi ẹtẹ nị.

⁵Ịjị Ijeesu re ka ệ sị ayị tụra ọnị, dị ọ kà a yị oswẹngụ ọnọọ ka, “Ozi, ma raà vagu wu ịnị ịvị awụ.”

⁶Â nyị ọzwọzọda ẹnyị aanị ana yaayịtẹ ịzọọ. Di eyee ro o ịnị ayị ẹnịnị ka:

⁷“Sị ẹ vẹ dị ọ maanị aa kà? Vị aa kụ̀ Ohomorihi ụhụ aanị nọ! Ẹnẹ zụ vagu ọza ịnị ịvị anị, ẹ̀ yị vị Ohomorihi ọnịnya kẹnẹ?”

⁸Obooboro ọnọọ Ijeesu ọ sị yẹ ịsị eyee ro ịnị ayị ẹnịnị. Agụvị avọọ dị ọ kà a yị wa ka, “Sị ẹ vẹ dị ẹwụ nịnị vavọọ ee ro ẹngụ ịsa ẹnẹnị ịnị ayị awụ nịnị?

⁹Ye re ana rọ hu, ọyịkà yị oswẹngụ ọnọọ ka â vagu ọọ ịnị ịvị anị, à vị ka à kà a yọ ka ọ̀ kwẹẹtẹ, dị ọ̀ sị odooro anị, dị ọ̀ zị ụsẹ?”

¹⁰Ama mee sì ka wa yẹ nịnị ka ẹmị Ozi ọza onigirima ộ nyị ụkata ọyịvagu ọza ịnị ịvị anị ịnị ẹhẹ ọnọnị. Dị ọ kà a yị oswẹngụ ọnọọ ka:

¹¹“Ẹma kà a yị wụ nị: Kwẹẹtẹ, sị odooro awụ, dị ụ waa nọ eehi awụ!”

¹²Obooboro ọnọọ, dị ọ kwẹẹtẹ, dị ọ sị odooro anị, dị aa na éyi avaba ẹnịnị nị. Ô hí avaba aza ẹnẹẹ irenu ẹtẹẹtẹrẹ, dị ẹyaa sị ụgaa yị Ohomorihi nị. Dị ẹ ka, “Yẹẹ̀ yị maanị re da.”

¹³Ẹkụhị ọnya dị Ijeesu rẹ jịnẹ nọ ụtọ irehu, dị ọkọnị aza ká a vẹ, dị aa sị ịsaa zụ̀ wa nị.

¹⁴Ọ màa parahu, di o re Ireevi, ozi Arịhwịyọsị, ka ọ yaayịtẹ ịzị a yàā dọ ẹkẹhị irehi. Dị Ijeesu kà a yọ ka, “Vẹ, dị ụ waa dụ mị ịrẹma!” Dị Ireevi kwẹẹtẹ, dị aa dụ ọọ na nị.

¹⁵O si kù chee kẹnẹ, dị Ijeesu ngụ ini eehi Ireevi, dị ẹyaa rị ịsa nị. Ọdẹkẹhirehi ọnịrị aza edivi vị ene re hi ịzọọ aa rị ịsa bẹẹ beri Ijeesu ọnịrị ezirẹma anị; agụvị ka ẹnịnị ệ rụrụ, dị ẹyaa dụ Ijeesu ịrẹma nị.

¹⁶Ọzwọzọda nịnị ana rẹ vị Anihwarisi ê re, Íjeesu mèe beri aza edivi ẹnịrị ọdẹkẹhirehi nịnị rị ịsa. Dị ẹ kà a yị ezirẹma anị ka, “Sị ẹ vẹ di ee beri ọdẹkẹhirehi ọnịrị aza edivi nịnị ị rị ịsa?”

¹⁷Ịjị Ijeesu maanị wụ́, dị ọ kà a yị wa ka, “Ịsa ọ̀ yị zị ọza, o mē sì ọmahọnọ. Ọza ọnị ịsa aa zị kẹnẹ, oō sì ọmahọnọ nị. Agụvị avọọ mẹ yị vẹ ka ma hị́ ọnịrẹyịzẹyịza, ẹ̀ yị vị ka ọnịvị nịnị è ro ịnẹ varẹma.”

¹⁸Ezirẹma Ịjọọnụ nịnị ọnịrị ezirẹma Anihwarisi nịnị vị anaā ba awẹ ịjẹnyị. Dị aza ẹnyị aanị ká Ijeesu vẹ nị, dị ẹ kà a yọ ka, “Sị ẹ vẹ dị ezirẹma Ịjọọnụ ọnịrị ezirẹma Anihwarisi nịnịị̄ ba awẹ, dị ezirẹma ẹwụ ẹnị ẹ̀ yị mā vavọọ mẹ?”

¹⁹Dị Ijeesu kà a yị wa ka, “Aza ọza ana aa nyị ọnẹẹ ẹ́ẹ́ zụ ba awẹ ịnị ụmẹ ọnị ọva ọnẹẹ yà pe wa? Ịnị ụmẹ ọnị ọva ọnẹẹ yà pe wa, ẹ yị zụ ba awẹ.

²⁰Ama ẹkụhị aa vẹ anaa vaa sị ọva ọnẹẹ hụụ ịzọọ, ịjọnọọ ẹ vaa ba awẹ.

²¹Ọza ọ mā dà ịta ọwọọwa dị ọ̀ gẹ ẹ za awuru ọkụkụ. Ọza ọ̀ọ vavọọ mẹ, dị ịta ọwọọwa ọnọọ na hụụnị awuru ọkụkụ, dị awuru ọnọọ na hu avọọ.

²²Ọza ọ mā rẹ sị eyi-eche tụ́ ini okoko ana vị ọkụmị. Ọza ọ̀ọ vavọọ mẹ, dị eche ọnọọ chaka okoko ọnọọ, dị ọ và ha. Agụvị avọọ â vọrọ ka à sị eyi-eche tụ́ ini okoko ọkatẹngụ.”

²³Ịnị ẹkụhị ụhwọtụ ọnya dị Ijeesu ọnịrị ezirẹma anị aa parahu ịnị aarẹ ọnya aanị ana a kụ́ akụ tụ́ nị. Ẹ́nịnị màa na, dị ezirẹma anị aa jị ịrẹsụ akụ anị.

²⁴Dị Anihwarisi nịnị kà a yị Ijeesu ka, “Re, sị ẹ vẹ dị ẹyaa mẹ̀ ịsa ọnị ọda ọ̀ yị zẹẹ ka à mẹ ịnị ẹkụhị ụhwọtụ?”

²⁵Dị Ijeesu kà a yị wa ka, “Aanịka wẹẹ̀ yị kà ịsa oni Idevidi mẹ, ịjị ụngwẹ aa kụ̀ ọnịrị aza anị dị è yi re ịsa rị?

²⁶Ộ ngụ ini irehi Ohomorihi na, dị ẹ rị Ịbụrẹẹdị anaa sị yị Ohomorihi nị. Anka ọ́da mẹ̀ kà a, ohirẹsụ irehi Ohomorihi nịnị kẹnẹ a vọrọ ka ẹ̀ rị ẹngụ Ịbụrẹẹdị ọnọọ nị. Ama Idevidi ộ rị ọ, dị ọ dà yị aza anị bẹẹ nị. Ụmẹ ọnọọ Abiyata ọ vị ohirẹsụ ọbanyị irehi Ohomorihi nị.”

²⁷Dị Ijeesu rẹ kà a yị wa ka, “Ohomorihi ộ mẹ̀ ẹkụhị ụhwọtụ agụvị aza; ọ́ yị mẹ aza agụvị ẹkụhị ụhwọtụ.

²⁸Agụvị avọọ, ẹmị Ozi ọza onigirima ọ rẹ vị ọga ẹkụhị ụhwọtụ bẹẹ nị.”