Read ebira Iruuku 17 Bible Online

Iruuku 17 - ebira bible

Iruuku 17

¹Ijeesu ộ kà a yị ezirẹma anị ka, “Ẹ yị zụ nyị ka ịsị ẹẹ̄ mẹ ọzaa mẹ ịvị, ọ yị vẹ; ama ọza ana àa kụ́ ọọ vẹ, ọ sị dà.

²Ọza ana àa mẹ ka ọnya ini ezi eweyi ẹnẹnị ọ̀ mẹ ịvị, ọ yaanị dahi huu yọ ka à sị ịrẹtọkwayị ọbanyị, di è kuru ọọ gẹ ẹ ọrọkọ, di è ne e ngụ oku.

³Sị eyi pe ẹngụ awụ nịnị! Ọhụva awụ ọ̀ọ rị ịvị awụ, ụ tụ́ ọọ ohuvọ! Òo ro ịnẹ varẹma, dị ụ vagu ọọ!

⁴Ọ̀ọ daka rị ịvị awụ ụpẹ ịhịmba ịnị ẹkụhị, dị ọ rẹ vẹ ụpẹ ịhịmba ọnọọ dị ọ ka aarịhịnị ka vị ọnị ọ̀ yị yẹ nị, ụ vagu ọọ!”

⁵Dị odeyi nịnị kà a yị Ananyị yị ka, “Aarịhịnị, mẹ ka ẹdọwụ ayị ọ̀ banyị hu avọọ!”

⁶Dị Ananyị yị ka, “Ẹdọwụ awụ nịnị ọ̀ọ banyị anka ihu ikonya ene weyi hu keekere, wa zụ kà a yị ọchị ọnọnị nịnị ka ọnịrị ẹpa anị ò hu, dị ọ̀ hị́ ẹngụ anị tụ́ ini òkū, vị aa wụ́ ịrẹyị awụ nịnị nị.”

⁷“À kà a ka wâ nyị ozi ahụ nịnị, dị ọ yà ịnị aarẹ aa kụ́ ịrịkụ, à vị ka dị ọ̀ọ sị eyii pe ịsụpa nị, ọ̀ọ hụụnị aarẹ vẹ, ụ wáá vaa kà a yọ nịnị ka ọ̀ wụsẹ na yaayịtẹ, dị ọ̀ọ rị ịsa nị?

⁸Eyiye! Ịsị ụ vaa kà a yọ, ọ vị ka: ‘Mẹ ịsa oruva amị tịtẹ mị! Dị ụ wa vara awuru awụ dị ụ wa jẹẹ pe mi, màaa rị ịsa! Màa sị ịsa rị, dị ụ wa va na rị ịsa awụ!’

⁹Àa mẹ ọda yị ozi ahụ, dị ọ mẹ̀ ịsa ana a ka ọ̀ mẹ nị, ẹ yị nyị ka ọ̀ dọ avọ.

¹⁰Avọọ gẹdẹ-gẹdẹ ẹwụ nịnị mẹ̀ rẹ yà nị. Wàa sị ịsa a mẹ ọda anị yị wụ nịnị mẹ, kà a nịnị ka: ‘Ezi ahụ kẹnẹ ị vị nị. Ẹ yị nyị ka yee sì avọ. Ụkọrọ ana a vọrọ ka ya mẹ kẹnẹ, ị mẹ nị.’ ”

¹¹Íjeesu màa nọ Ijerusarẹmị, dị ọ zị oze ana yà ịnị akakana Ịsamarịya ọnịrị Igariri nị.

¹²Íjeesu màa ngụ ịnị ẹkụra oweyi ọnya aanị, dị ọnịkụ ọbanyị ẹẹwụ va gẹrị ọọ nị. Dị ẹnịnị jẹẹ ẹnẹẹnẹ,

¹³di e nowu tụ́ ẹba ka, “Ijeesu Ọga! Vá ayị ayị de!”

¹⁴Dị Ijeesu re wa nị, dị ọ ka, “Waa na nịnị, dị ụ wa sị ẹngụ awụ nịnị na zụ̀ ohirẹsụ irehi Ohomorihi!” Ẹ́nịnị màa na óze, dị ẹngụ ẹnịnị ta nị.

¹⁵Ọ́za ịnyara ẹnịnị mè re ka ẹngụ anị ọ́ọ ta, dị ọ vavẹ, dị ọ sị ọngwẹ anị tụ́ ẹba, dị aa sị ụgaa yị Ohomorihi nị.

¹⁶Dị ọ tana tụra ẹtẹ ọ́vịdị Ijeesu, dị aa kụ́ ọọ avọ nị. Ọza ọnọọ vị Anịsamarịya.

¹⁷Dị Ijeesu tụ́ ohi, dị ọ ka, “Aanịka ẹ yị vị aza ẹnị ẹẹwụ a mẹ ụkụ? Ịzị aza ẹnị ịhịịna ana vọ yà?

¹⁸Ẹ yị nyị ọza ịnya ene e re ana vavẹ va sị ụga yị Ohomorihi, ẹ̀ yị vị ọzọga ọnọnị ịnya kẹnẹẹ?”

¹⁹Dị Ijeesu kà a yọ ka, “Kwẹẹtẹ, dị ụ wa na, agụvị ka ẹdọwụ awụ ọ sị wụ mẹ ụkụ!”

²⁰Anihwarisi ẹnyị ệ họ̀ Ijeesu use ka, “Ye re ụmẹ oni Ohomorihi vaa sị mẹ ịjọva?” Dị Ijeesu tụ́ ohi, dị ọ ka, “Ẹ yị nyị ịsị ẹ vaa sị zụ̀ ka Ohomorihi aa mẹ ịjọva.

²¹Ọza ọ yị vaa kà a ka: ‘Ọnị yọ!’ à vị ka: ‘Ọnị ọ vị ọsọọ nị!’ Agụvị ka Ohomorihi o si nyima aa mẹ ịjọva ịnị akakana awụ nịnị da.”

²²Dị ọ rẹ kà a yị ezirẹma anị ka, “Ụmẹ aa vẹ oni u vee sì ka we re ẹkụhị ọnya ịnị ẹkụhị ẹmị Ozi ọza onigirima, di u we yi zụ re e nịnị.

²³Aza ẹnyị vaa kà a wụ nịnị ka: ‘Re e ịzẹnị!’ à vị ka: ‘Re e ịzọsọọ!’ Ama asị ụ jịnẹ tụ́ ẹhẹ ne sì ọ zịịzị nịnị!

²⁴Ịhị ẹmị Ozi ọza onigirima àaa vẹ aanị, vị ọ vaa sị mẹẹ ị́nyanya mẹ̀ẹ̄ rị hụrẹ eyi ẹnyị naa ngụ eyi ọsa ini ihinẹba avọọ nị.

²⁵Ama â nyị ka ma vịdị rị ụya ọrụrụ-ọrụrụ da, dị anụmẹ ọnọnị è yi mi tịtẹ.

²⁶Ịhị ẹmị Ozi ọza onigirima àaa vẹ, vị ọ vaa yà anka ụmẹ Inowa avọọ nị.

²⁷Ịnị ụmẹ Inowa, aza vị ana aa rị, di eyee hú, dị anọrụ aa nyị ọnẹẹ, dị anẹẹ aa vá anọrụ. Avọọ ẹ mẹ̀ mẹ pooro ne tù ẹkụhị oni Inowa sị ngụ ịnị ẹpa nị. Dị ọhaara enyi vẹ, dị ọ va kụ́ avaba aza ana vọ nị.

²⁸Ịnị ụmẹ Ịrọọtị, avọọ rẹ yịị yọ. Aza vị anaa rị, di eyee hú, dị ẹyaa hị́, dị ẹ rẹ yaa ná; eyee chire ịsa, ẹ rẹ yaa dà irehi.

²⁹Ama ịhị ọnị Ịrọọtị jịnẹ hụụnị ẹkụra Isodọmị gẹdẹ-gẹdẹ, ịhị ọnọọ orihi ịra ọnịrị ata ịra-ịra zụ̀ hụrẹ ẹbẹẹba vẹ dị ọ rị avaba aza ana vọ ịra và ha nị.

³⁰Avọọ ọ mẹ̀ rẹ vaa yà gẹdẹ-gẹdẹ, ịhị ẹmị Ozi ọza onigirima ọ̀ọ sị ẹngụ zụ̀ nị.

³¹Ịhị ọnọọ, ọza ana àa yà ịrẹsụ irehi, dị ẹnya anị hi ini eehi nị, asị ọ kà a ka oni èe chí naa kụ́ ọọ! Ọza ana àa rẹ yà ịnị aarẹ, asị ọnị rẹ varẹma nọ ini eehi!

³²Tamayị ịrẹyị ose Ịrọọtị nịnị o!

³³Ọza ene èe sì ka oni èe tenyi ụhwẹ anịị tẹ, vi ee vú ọọ nị. Ọza ene èe ne ụhwẹ anị ta, ọnị ọ sị ọọ tẹ nị.

³⁴Dị ma kà a wụ nịnị ka ịnị ịrahụ ọnọọ, aza ẹnị ẹẹva vaa hụtụ aha ọnya, dị a sị ọnya, dị a navọ ọsa tịtẹ.

³⁵Anyẹnẹẹ ẹẹva vaa yà aha ọnya, di e dudu aa kwọ̀ ịsa; dị a sị ọza ịnya ẹnịnị, dị a navọ ọsa.

³⁶[Aza ẹnị ẹẹva rẹ vaa yà ịnị aarẹ, dị a sị ọnyara ẹnịnị, dị a rẹ navọ ọsa.”]

³⁷Dị ezirẹma anị kà a yọ ka, “Ịzọọ vị, Ananyị yị?” Dị Ijeesu kà a yị wa ka: “Ịzị oku ọ̀ọ yà, ịzọọ ụ́ba nịnịị̄ hi nị.”