Read ebira Iruuku 19 Bible Online

Iruuku 19 - ebira bible

Iruuku 19

¹Ijeesu ọ na ngụ Ijeriko, dị aa parahu nị.

²Â nyị ọza ịnya aanị ịzọọ ana aā hị́ Ịzakịyọsị. Ọnị ọ vị ohinọyị ọdẹkẹhirehi nịnị nị, ọzọbanyị ọ rẹ vị nị.

³Ee sì ka oni ò re ẹngụ ọza oni Ijeesu vị, ama o yi zụ re e, agụvị ka aza ọ sị rụrụ baaba. Ịzakịyọsị ọnị vị ọza oweyi.

⁴Di o zwe tụ́ ọvịdị ọkọnị aza ẹnẹẹ, dị ọ na hịrẹ ọchị ụnẹ ọnya ka oni ò re Ijeesu, agụvị ka ịzọọ aa zịị parahu nị.

⁵Ịjị Ijeesu tù ịzọọ, dị ọ và eyi hịrẹ, di o re Ịzakịyọsị nị. Dị ọ kà a yọ ka, “Ịzakịyọsị, wụsẹ chí vẹ, agụvị ka ẹ yị zụ nyị ka ẹ yị vị ịdị awụ m maa yà ajịnị.”

⁶Dị Ịzakịyọsị wụsẹ chí vẹ, dị ọ sị ịrajẹ dọ Ijeesu ọzọga tụ́ ini eehi nị.

⁷Ịjị aza maanị ree, dị ẹyaa rị ihuhu nị, ka, “Ho! Ijeesu o ne ree chí ini irehi ọza odivi o!”

⁸Dị Ịzakịyọsị kwẹẹtẹ jẹẹ, dị ọ kà a yị Ananyị yị ka, “Re, Ananyị yị! Mị vaa sị achẹva avaba ịsa ọnị mị nyịị mẹ ọpịsarị nịnị ẹyịza; aza ọnị mị vịdị mẹ rị, mi vee sí ọọ yọ oze ẹẹna.”

⁹Dị Ijeesu kà a yọ ka, “Ẹdọha o si tù aneehi ọnọnị ajịnị; agụvị ka ọza ọnọnị ọnị rẹ vị ozi Abụrahamị.

¹⁰Agụvị ka ẹmị Ozi ọza onigirima vị ana vẹ ka me sì aza ene vú, dị ma dọ wa há.”

¹¹Aza màa wụ́ ịrẹyị ẹnẹnị, dị Ijeesu re che ụhịrẹyị ọnya tụ́ ọọ yị wa nị. Ijeesu aa gụrị Ijerusarẹmị, dị aza ee ro o ka obobooro ọnọọ Ohomorihi aa vaa sịị zụ̀ ọ mẹmẹ aa mẹ ịjọva nị.

¹²Agụvị avọọ, dị Ijeesu kà a yị wa ka, “Â nyị ọzọbanyị ọnya aanị, ana hụrẹ eehi nọ ẹkụra onoze ọnya ka ọnị ọ̀ na rị ohinọyị ịzọọ, dị ọnị ọ̀ vavẹ.

¹³Dị ọ hị́ ẹẹwụ ini ezi ahụ anị, dị ọ sị achuchu ọnya-ọnya yị wa, dị ọ ka: ‘Waa sịị sẹ̀ ohu nịnị pooro dị ma vẹ!’

¹⁴“Anẹkụra anị ệ nyị ịhyẹrẹ anị, dị ẹ tụ́ aza saasa a ka ẹ̀ kà a ka eni e yi sì ka ọ̀ vị ohinọyị ẹnịnị nị.

¹⁵Ịjị ọ na sị ohinọyị anị rị, dị ọ vavẹ, dị ọ ka à hị́ ezi ahụ anị ọnị ọ sị ẹkẹhị yị vẹ, di oni ò re ọgụ ọnị ọzọza rị, ẹ mẹ̀ sị sẹ̀ ohu nị.

¹⁶Dị ọnịpaapa vẹ nị, dị ọ ka: ‘Ọga, achuchu ọnya awụ ộ rị ọgụ achuchu ẹẹwụ.’

¹⁷Dị ọga anị kà a yọ ka: ‘Akọrọ, ozi ahụ obooro! Agụvị ka wâ nyị ịzẹyịza tụ́ ịnị ịsa oweyi, mị vaa sị wụụ mẹ ohinọyị tụ́ ịrẹsụ ẹkụra ẹẹwụ.’

¹⁸Dị ọnọhụva vẹ nị, dị ọnị rẹ ka: ‘Achuchu ọnya awụ ộ rị ọgụ achuchu ẹẹhị.’

¹⁹Dị ọga anị rẹ kà a yị ọnị ka ọ vaa rị ohinọyị tụ́ ịrẹsụ ẹkụra ẹẹhị nị.

²⁰Dị ọnya vẹ nị, dị ọ ka, ‘Ọga, achuchu ọnya awụ yị. Mị sị ankasihu gụ ọọ ịrẹgụ tẹ nị.

²¹Agụvị ka angwa awụ vị eneē hí mi, agụvị ka ọza ọkatẹngụ ụ vị nị. Ịsị ụ wẹ̀ yị sị tịtẹ, ụụ̄ sị nị; ịsị u wè yi chire, ụụ̄ há nị.’

²²Dị ọga anị kà a yọ ka: ‘Ẹwụ ozi ahụ odivi ọnọnị! Ịrẹyị irenu awụ m maa sịị mẹ̀ ọkarẹyị awụ nị. Wâ yẹ ka ọza ọkatẹngụ mị vị nị; dị maa sị ịsa ọnị mẹ̀ yị sị tịtẹ, dị mị raa há ịsa oni mè yi chire nị.

²³Sị ẹ vẹ dị ụ wẹ̀ yị sị ẹkẹhị amị na tụ́ ịnị ịbankị. M mẹ̀ yaanị vẹ aanị, dị mị na sị ọọ beri ẹtụra anị.’

²⁴Dị ọga anị kà a yị aza ana jẹẹ pe e ka: ‘Dọ ọ achuchu ọnyara ọnọọ nịnị, dị ụ wa sị yị ọza ana nyị achuchu ẹẹwụ!’

²⁵Dị ẹ kà a yọ ka: ‘Ọga, achuchu ẹẹwụ ọ nyị nọ!’

²⁶Dị ọga ọnọọ ka: ‘Dị ma kà a wụ nịnị ka ọza ana àa nyị ịsa, á vaa sị ịsaa tụ́ ọọ yị nị. Ọza ẹnẹ ẹ̀ yị nyị ịsa, ọnị ọ̀ọ hyakụ nyị, vị ana aa dọ ọ.

²⁷Ama ọnịvị amị ẹnẹnị ana ka eni e yi sì ka ma vị ohinọyị ẹnịnị aanị, kụ́ wa vẹ ọ́vịdị amị ịzẹnị, dị ụ wa wụ̀ wa nịnị!’ ”

²⁸Ịjị Ijeesu maanị sị ịrẹyị ọnọnị kà, dị ọ tụ́ ọvịdị ẹnịnị aa hịrẹẹ nọ Ijerusarẹmị nị.

²⁹Ọ màa vaa ngụ Ịbẹtị-Ihwegi ọnịrị Ịbẹtanị, ọgụrị ataba ana aā hị́ Ataba Orivi, dị ọ tụ́ ezirẹma anị ẹẹva nị,

³⁰dị ọ ka, “Nọ ịnị ẹkụra ana và eyi ká wụ nịnị avọọ. Wàa maanị yị sị ngụ ịzọọ nịnị kẹnẹ, u vee re ozi ịkẹrịkẹtẹ ọnya ana a za zù, ọza ọọ̀ yị tụra a da. Ngwa a dị ụ wa sị ọọ vẹ nịnị!

³¹Àa nyị ọza ana kà a ka: ‘Sị ẹ vẹ dị ụ waa ngwa a nịnị?’ Dị ụ kà a yọ nịnị ka agụvị ka Ananyị yị ee sì ọọ yọ nị.”

³²Dị ẹnị ana a tụ́ si hu aa na; di e ne tù ọ, anka ọ mẹ̀ rẹ yị kà a yị wa gẹdẹ-gẹdẹ nị.

³³Ẹ màa ngwa ozi ịkẹrịkẹtẹ ọnọọ, dị ọza ana nyị họ̀ wa ka, “Sị ẹ vẹ dị ụ waa ngwa ozi ịkẹrịkẹtẹ ọnọọ nịnị?”

³⁴Dị ẹ kà a yọ ka, “Ananyị yị ee sì ọọ nị.”

³⁵Dị ẹnịnị sị ozi ịkẹrịkẹtẹ ọnọọ ve tù Ijeesu nị. Ẹnịnị ệ tụ́ awuru ẹnịnị tụ́ ịrẹma ịkẹrịkẹtẹ ọnọọ, dị ẹ sị Ijeesu yaayịtẹ ị́rẹsụ anị nị.

³⁶Ọ màa na, dị aza aa tụ́ achị ẹnịnịị hi oze nị.

³⁷Ọ màa vaa ngụ Ijerusarẹmị, di o tù ịzị oze zị chí hụụnị Ataba Orivi nị. Dị ọkọnị aza ịrẹma anị aa jẹ, di eyee nowuu ga Ohomorihi nị agụvị avaba ụkọrọ ẹbanyị ene e re.

³⁸Dị ẹ ka, “Ohomorihi ọ̀ dà tụ́ ịnị ụbanyị yị ohinọyị ana aa vẹ ịnị ịrẹha Ananyị yị! Ẹngwọọrọ ọ̀ yà ini ihinẹba, di igirima ọ̀ rẹ yà ẹbẹẹba!”

³⁹Dị Anihwarisi ẹnyị ana yà ịnị ọkọnị aza ẹnẹẹ kà a yị Ijeesu ka, “Nda, kà a ka ezirẹma awụ ẹ̀ sị irenu ẹnịnị kú oku!”

⁴⁰Dị Ijeesu tụ́ ohi, dị ọ kà a yị wa ka, “Ẹma kà a wụ nịnị nị, aza ẹnẹnị èe kú irenu ẹnịnị, vị ịrẹta nịnị ee nowuu tụ́ ẹba nị.”

⁴¹Íjeesu màa vaa ngụ ịnị Ijerusarẹmị, di o re e, ộ jị òrèrè agụvị anị.

⁴²Dị ọ ka, “Àa yẹ wa hyakụ yẹ ajịnị ịsa ana zụ sị ẹngwọọrọ yị wụ! Ama we yi zụ re e nịnị booro aanị.

⁴³Ẹkụhị aa vẹ ọnị ọnịvị vaa kụ́ ezii pe ugene ana kara wụ, dị ẹ rẹ kara wụ okiri-okiri ka asị u re oze zị.

⁴⁴Dị ẹ vara wụ eteesu saka-saka beri ezi ewu. Ẹnịnị ẹ yị vaa navọ ịrẹta ẹnyịị tụra ọsa, agụvị ka wẹ yị yẹ ụmẹ oni Ohomorihi sị vẹ ka ọnị ọ̀ va dọ wụ há.”

⁴⁵Dị Ijeesu ngụ ini irehi Ohomorihi, dị aa dụ aza ana aa sẹ̀ ohu ịzọọ jịnẹ nị.

⁴⁶Dị ọ kà a yị wa ka, “Â chẹrẹ ẹ tụ́ ini Iwe Ohomorihi ka: ‘Irehi amị vaa vị irehi aduwa,’ ama ẹwụ nịnị ọ sị ọọ vara ịzị ịjagụda nịnịị̄ tẹ̀.”

⁴⁷Dị aa zụ̀ aza ịsa eyinị-eyinị ini irehi Ohomorihi ọnọọ nị. Dị ohirẹsụ ẹbanyị irehi Ohomorihi ọnịrị ọzwọzọda nịnị ne beri ọdọvịdị ẹkụra nịnị ee sì oze ka ẹnị ẹ̀ wụ ọọ nị.

⁴⁸Ama ẹnịnị e yi re oze vavọọ mẹ̀ ẹ, agụvị ka avaba aza vị ana nyayịnẹ sị ụtọ pe ịrẹyị anị.