Read ebira Iruuku 4 Bible Online

Iruuku 4 - ebira bible

Iruuku 4

¹Ụhwẹ Ọnịnị ộ dọ avaba ayị Ijeesu, dị ọ và hụrẹ Ijodani vẹ nị. Dị Ụhwẹ Ọnịnị sị Ijeesu nọ ịnị ụnọmị nị.

²Ịzọọ Échu na yà zama a re mẹ ẹkụhị ẹbẹẹva nị. Ịnị avaba ụmẹ ọnọọ, ẹ yị nyị ịsị Ijeesu rị. Ịjị ẹkụhị ẹbẹẹva sị gụ, dị ụngwẹ aa kụ̀ ọ nị.

³Dị Echu kà a yị Ijeesu dị ọ ka, “Àa vị Ozi Ohomorihi ụ vị nị, mẹ ọda ka ịrẹta ọnọnị ọ̀ vara akara!”

⁴Ama dị Ijeesu tụ́ ohi, dị ọ kà a yọ ka, “Â chẹrẹ ẹ ka: ‘Ẹ yị vị ịsọyịrị kẹnẹ, ọ zụ sị ọza vị ọza, ẹ̀ yị vị avaba ịrẹyị oni Ohomorihi kà!’ ”

⁵Dị Echu rẹ sị ọ nọ ịrẹsụ ataba ana nẹba ẹtẹẹtẹrẹ nị. Dị ọ wụsẹ sị avaba ẹkụra irenyi-irenyi ene hi ẹhẹ ọnọnị zụ̀ ọọ nị.

⁶Dị Echu kà a yọ ka, “Mị vaa sị avaba ẹkụra ẹnẹnị ọnịrị ụbanyị ẹnịnịị chire wu ụvọ. E reè si chire ẹmị ụvọ, ọza ene èe zé mi eyi, mị nyẹngụ sị yị.

⁷Agụvị avọọ, wàa zẹẹ ka wa tana tụra ẹtẹ yị mị, mị vaa sị avaba anịị yị wụ.”

⁸Ịjọnọọ dị Ijeesu kà a yọ ka, “Â chẹrẹ ẹ ka: ‘Waa tanaa tụra ẹtẹẹ yị Ohomorihi Ananyị yị, ọnị ịnyara kẹnẹ ụ rẹ vaa hẹkẹ nị.’ ”

⁹Dị Echu rẹ sị ọọ nọ Ijerusarẹmị, dị ọ sị ọọ na tụ́ oregerege ini irehi Ohomorihi nị. Dị ọ kà a yọ ka, “Àa vị Ozi Ohomorihi ụ vị nị, ji hụụ ịzọọ ve hi ẹtẹ!

¹⁰Wâ yẹ ka a sị ọọ chẹrẹ ka: ‘Ọ vaa mẹ ọda yị anggẹẹrị anị dị ẹ̀ sị eyi pe wu.

¹¹Dị ẹ gụ wụ rị ụvọ, agụvị asị u ne gù ahụ awụ chire ịrẹta.’ ”

¹²Dị Ijeesu re tụ́ ọ ohi, dị ọ ka, “A rẹ chẹrẹ ẹ ka: ‘Wẹ yị nyayịnẹ zama Ananyị yị Ohomorihi awụ re.’ ”

¹³Ịjị Echu sị ọ zama re ta, dị ọ hụụ ịdị anị chee nị.

¹⁴Ijeesu ộ và nọ Igariri, dị ụkata Ụhwẹ Ọnịnị yà rị ọọ nị. Ịrẹyị anị ọ sị ngụ ịrẹyị ngụ avaba ịzọọ zị.

¹⁵Dị aa zụ̀ wa ịsa ini irehi Ohomorihi ẹnịnị nị. Dị avaba aza aa ga a nị.

¹⁶Ijeesu ộ vẹ Ịnazarẹtị, ịzị a yà pá a. Ẹ́kụhị ụhwọtụ mè si tù, dị ọ rẹ nọ ini irehi Ohomorihi Aniju nịnị nị, anka ọ mẹ̀ vịdị yị mẹ. Dị ọ kwẹẹtẹ ka ọnị ọ̀ kà Iwe Ohomorihi nị.

¹⁷Â sị iwe ọnịsẹ Ayịsaya yọ. Ọ mẹ̀ hụ̀ iwe ọnọọ, di o re ịzị a chẹrẹ ịsa ọnọnị tụ́ nị:

¹⁸“Ụhwẹ Ọnịnị Ohomorihi ộ dọ avaba ayị amị, agụvị ka ọ sị mị nyị ka ma kà enube ọyịza yị onosiye nịnị. Ộ tụ́ mị ka ma kà a yị aza ana a sụ́ ka a vaa ngwa waa tịtẹ, dị ma rẹ mẹ ogweyi nịnị ka èe re ẹtẹ; dị ma rẹ dọ aza ana aa mẹ ehunaa yịị tịtẹ;

¹⁹ộ nyị mị ka ma rẹ nọ ọ yị aza ịrayị oni Ohomorihi vaa sị dọ aza anịị há.”

²⁰Dị Ijeesu kú iwe ọnọọ oku, dị ọ rẹ sị yị ọza ana sị eyi pe iwe, dị ọ na yaayịtẹ nị. Dị aza ene hi ini irehi Ohomorihi ọnọọ sị eyi pe Ijeesu, di eyee re e gegege nị.

²¹Dị Ijeesu nyima, dị aa kà a yị wa ka, “Ajịnị ị́rẹyị ọnọọ sẹ nị, anka ụ mẹ̀ wụ́ ọọ nịnị ịsọọnị.”

²²Ẹnịnị ệ dọ ivenu ịrẹyị ọnị ọ kà, di o hí wa irenu nị, agụvị ka ịrẹyị anị ô zoza ẹtẹẹtẹrẹ. Dị ẹ ka, “Aanịka ẹ yị vị ozi Ijosẹẹhụ ọnọọ yị?”

²³Dị Ijeesu rẹ kà a yị wa ka, “Mâ yẹ ka u vee che ụhịrẹyị ọnọnịị mị nịnị ka: ‘Omahọnọ, wẹ rẹ̀ mẹ ẹngụ awụ ụkụụ! Avaba ịsị yaa wụ́ ka wâ mẹ Ìkapanawumi, rẹ mẹẹ ẹkụra awụ ịzẹnị bẹẹ!’ ”

²⁴Dị ọ kà a yị wa ka, “Ịzẹyịza, m maa kà a wụ nịnị nị, ọza ọ mā dọ ọnịsẹ ẹkụra anị.”

²⁵Dị ma kà ịzẹyịza wụ nịnị ka osoku ọrụrụ-ọrụrụ e hi ịnị ẹtẹ Isirẹrị ịnị ụmẹ Erija nị. Ụmẹ ọnọọ, ộ mẹ̀ ịrayị ẹẹta tụra ụhwẹ ịhịnọnyị, orihi ọ yị zụ̀. Dị ụngwẹ aa kụ̀ ẹtẹẹtẹrẹ ịnị avaba ẹtẹ ọnọọ nị.

²⁶Ama Ohomorihi ọ yị tụ́ Erija nọ ịdị osoku ọnyọọnyị, ẹ̀ yị vị osoku ana yà ẹkụra Ịzarẹhwatị kẹnẹ ịnị ẹtẹ Ịsịdọnị.

²⁷Ọnịkụ ọbanyị ọrụrụ-ọrụrụ e re hi ịnị ẹtẹ Isirẹrị nị ịnị ụmẹ Erisa ana vị ọnịsẹ. Ama ẹ yị nyị ọnyara ẹnịnị ana a mẹ ụkụ, ẹ̀ yị vị Ịnaamanị ana vị Anisiriya kẹnẹ.

²⁸Ịjị aza ene hi ini irehi Ohomorihi ọnọọ maanị wụ́, ayị ọ sị wa kụ́ ẹtẹẹtẹrẹ.

²⁹Dị ẹ kwẹẹtẹ, di e tura Ijeesu hụụnị ẹkụra, dị ẹ sị ọọ nọ ịrẹsụ ataba ana a dà ẹkụra ẹnịnị tụ, ka ẹnị ẹ̀ na tụ̀ ọ ụvọ zina nị.

³⁰Ama di Ijeesu zị oze ịnị akakana ẹnịnị, di o si hu aa na nị.

³¹Ijeesu ộ nọ ẹkụra Ikapanawumi ịnị ẹtẹ Igariri. Dị aa zụ̀ wa ịsa ịnị ẹkụhị ụhwọtụ nị.

³²Oze ana aa zịị zụ̀ wa ịsa vị ene hí wa irenu, agụvị ka ịrẹyị anị ộ nyị ụkata.

³³Â nyị ọnọrụ ọnya aanị ana yà ini irehi Ohomorihi Aniju ịzọọ, ộ nyị ụhwẹ echu. Di o nowu tụ́ ẹba,

³⁴dị ọ ka, “Navọ yị hẹẹ, sị ẹ jị gẹ ẹyịrị ẹwụ, Ijeesu Anịnazarẹtị? Ụ wáá vẹ ka wa va wụ yị nị? Mâ yẹ ọza ọnị ụ vị, ẹwa vị Ọza Ọnịnị Ohomorihi nị.”

³⁵Dị Ijeesu tụ́ ọ ohuvọ, dị ọ ka, “Wụsẹ mẹ hẹẹ, dị ụ wa jịnẹ hụụnị ẹngụ ọnọrụ ọnọọ!” Ụ́hwẹ echu ọnọọ mè ne ọnọrụ ọnọọ nya ẹtẹ éyi aza ẹnẹẹ, dị ọ jịnẹ hụụnị ẹngụ anị nị, ama ọ yị tụ̀ ọ ụnava.

³⁶O si hí avaba aza ẹnẹẹ irenu ẹtẹẹtẹrẹ, agụvị avọọ dị ẹ yaa kà a yị ẹngụ ka, “Ẹngụ ịrẹyị sẹ vị ọnọnị aanị? Aa sị ụkataa mẹ ọdaa tụra ụhwẹ echu nịnị ịrẹsụ, dị ẹ yaa jịnẹẹ tụ́ ẹhẹ nị!”

³⁷Dị ịrẹyị Ijeesu sị ngụ ịrẹyị ngụ avaba ẹkụra ọnọọ zịịzị nị.

³⁸Dị Ijeesu hụụnị irehi Ohomorihi ọnọọ, dị ọ nọ ini eehi Ịsayịmọnị nị. Ọnyị ose Ịsayịmọnị vị ọnị ọvanggoro za ẹtẹẹtẹrẹ, dị ẹ na dá ịpẹ yị Ijeesu agụvị anị nị.

³⁹Dị Ijeesu na jẹẹ pee, dị ọ tụ́ ọvanggoro ọnọọ ohuvọ, dị ọvanggoro ọnọọ ta nị. Dị ọnẹẹ ọnọọ wụsẹ kwẹẹtẹ, di o kuku ee sì wa ọzọga nị.

⁴⁰Ịjị oruva si tù, dị ọyị aa naa ngụ ẹtẹ, dị avaba aza ana nyị ọnịkụ irenyi-irenyi kụ́ wa ká Ijeesu vẹ nị. Dị ọ sị ụvọ tụra wa bemi-bemi, dị ọ mẹ wa ụkụ saka-saka nị.

⁴¹Dị ụhwẹ echu nịnị ẹnị rẹ jịnẹ hụụnị ẹngụ ọza ọrụrụ-ọrụrụ, di eyee nowu ka, “Ẹwa vị Ozi Ohomorihi nị!” Ọ màa tụ́ wa ohuvọ, ọ yị zẹẹ ka ẹ̀ kà ịrẹyị, agụvị ka ẹnịnị ệ yẹ ka Ikirisiti ọ vị nị.

⁴²Eyinẹhẹ anị, ẹ́tẹ mèe yii vee hweyi kẹnẹ, dị Ijeesu kwẹẹtẹ, dị ọ nọ aha ọnya aanị ịzị aza ẹ̀ yị yà nị. Dị aza ee sì ọọ nị. Ịjị e si oo re, dị ẹ yị zẹẹ ka ọ̀ hụụ ịdị ẹnịnị nị.

⁴³Ama dị ọ kà a yị wa ka, “Â nyị ka ma rẹ kà enube ọyịza, Óhomorihi mẹmẹ aa mẹ ịjọva yị anẹkụra ọsa; agụvị ka ụvị avọọ Óhomorihi tụ́ mị vẹ ẹhẹ nị.”

⁴⁴Di aa kà ịrẹyị Ohomorihi ini irehi ahẹkẹ Aniju nịnị Ígariri nị.