Read ebira Ọda 17 Bible Online

Ọda 17 - ebira bible

Ọda 17

¹Wàa mẹ̀ ịsọvọ, asị ụ sị imaaru a vị atẹmẹ ana nyị ẹngụkata na mẹ̀ ịsọvọ yị Ẹnẹyịmavara ana vị Ohomorihi awụ nịnị. Ọọ̀ nyị ịhyẹrẹ ẹngụ ịsa ịsọvọ ẹnẹẹ.

²Wàa wụ́ ka a nyị ọnọrụ a vị ọnẹẹ ọnya ịnị ọnya ịnị ẹkụra awụ nịnị ana aa mẹ akamawụ hi Ẹnẹyịmavara, dị ọ sị ahụ jịnẹ ọkatịtẹ Ohomorihi

³naa hẹkẹ ori, a vị ọyị, a vị ụhwẹ, a vị ụzọmị nịnị nị.

⁴Wàa wụ́ ẹngụ enube ọnọnị, sị ahụ sì iruvo ịrẹyị ọnọọ hwịnị-hwịnị. Àa vị ịzẹyịza ọza ana ka ịrẹyị anị mẹ̀ ebira odivi ana vị enyisi ịnị ẹtẹ Isirẹrị nị,

⁵a sị ọ jịnẹ nọ ịrẹma ẹkụra, dị a sị ịrẹta-ịrẹta wụ̀ ọ.

⁶Di o vee tu ka a wụ̀ ọza ọnyọọnyị, a nyị ka a nyị onivenu ẹẹva, a vị aza ẹnị ẹẹta ana vaa dọ ivenu. Àa vị ọza ịnya kẹnẹ ọ dọ ivenu, ọza ẹ yị nyayịnẹ wụ̀ ọ.

⁷Onivenu nini ẹ vịdị ee ne ịrẹta nya a, dị aza ana vọ ẹ va sị ịrẹta nya a nị. Aa vavọọ a mẹ̀ ọkarẹyị yị aza edivi, udivi vaa hụrẹ ẹtẹ.

⁸Àa nyị ịrẹyị ọkatẹngụ ọnị ọmọkarẹyị okokooro ẹ yị zụ ka, anka ẹhụ ịrẹyị ogu oyizune, ụnava ịnị ọchẹngụ, a vị ẹhahi ọza ọyị wụ̀ ọnịrị ọza ọyị nyeeyi wụ̀. Ẹngụ ịrẹyị ẹnẹnị vị ana vaa kụ nọ ịzị Ẹnẹyịmavara Ohomorihi nyị ka aa hẹkẹ ọnị.

⁹Sị ịrẹyị awụ tụ ọvịdị ohirẹsụ irehi Ohomorihi ọnịrị ọmọkarẹyị ana ya ịrẹsụ ode ịnị ụmẹ ọnọọ. Navọ wa ẹ tụ ohi tụ ịnị ịrẹyị ọnọọ.

¹⁰Ẹnịnị vaa mẹ̀ ọkarẹyị ama ẹwụ vaa mẹ anka a mẹ ọkarẹyị ịrẹyị ọnọọ.

¹¹Dọ ọkarẹyị ọnị ẹ mẹ, dị ụ waa saasa avaba ịrẹyị ọnị ẹ ka tu ẹtẹ.

¹²Ọza tụra ọza ene ro ka ọnị ọ zụ mẹ akamawụ hi ọmọkarẹyị, a vị ohirẹsụ irehi Ohomorihi nịnị, vị ana vaa wụ̀; agụvị ebira odivi ọ hụrẹ ẹtẹ Isirẹrị.

¹³Ọza tụra ọza ana àa wụ́ ọkarẹyị ebira odivi vee hí angwa, dị ẹ yị nyayịnẹ mẹ ịrẹyị ọhịmị.

¹⁴Ịrẹma ọnị Anisirẹrị raà dọ ẹtẹ ọnị Ẹnẹyịmavara Ohomorihi ẹnịnị sị yị wa, dị ẹ ra, e vee sì ka ẹnị ẹ rẹ nyị ohinọyị anka anẹkụra nịnị ana kara wa.

¹⁵Re ka ọza ọnị wa nyị ka ọ vị ohinọyị awụ nịnị vị ọza ọnị Ẹnẹyịmavara ọnị ụvọta sị nyị. Ẹngụ ọza ọnọọ ọ vị ọza ịnị ẹngụ awụ nịnị, asị ọ vị anikinami.

¹⁶Ohinọyị ẹ yị vaa nyị umaata rụrụ yị isoja anị, dị ẹ yị vaa tụ aza nọ Ijipiti na hị́ umaata agụvị ka Ẹnẹyịmavara ộ raà kà a ka asị aza anị varẹma nọ Ijipiti.

¹⁷Ohinọyị ẹ yị vaa nyị ọnẹẹ ọrụrụ agụvị asị ẹ mẹ̀ ẹ ka ọ va hụrẹ ịrẹma Ẹnẹyịmavara. Asị ọ rẹ kụ isiriva ọnịrị igooru ahaahara mẹ aanị.

¹⁸Ọ̀ọ sị rị, a nyị ka ọ nyị iwe ọda Ohomorihi ana a chẹrẹ eyi Anireevi ana vị ohirẹsụ irehi Ohomorihi.

¹⁹Ohinọyị ọ sị iwe ọda ọnọnị pe ẹngụ, dị ọọ ka a ịnị avaba ẹhẹ anị agụvị ọ kọsẹ a mẹ vọrọ ka ọ nyị angwahi Ẹnẹyịmavara, dị ọ saasa avaba ịsa ana kà tụ ịnị iwe ọnọọ.

²⁰Ọsọnị ọ vaa mẹ ka asị o ro ka ọnị o huna anda ẹnịnị ana vọ.