Read ebira Ọda 27 Bible Online

Ọda 27 - ebira bible

Ọda 27

¹Imosiisi ọnịrị azọkụ Anisirẹrị nịnị ệ hu ịragụ Anisirẹrị ana gụ ụvọ ka, ẹ̀ saasa avaba ọda ọnị ọnị aa ka yị wa aanị.

²Ẹ̀ẹ sị jịnẹ Okuha Ịjọdanị na ngụ ẹtẹ ọnị Ẹnẹyịmavara Ohomorihi ẹnịnị aa sị yị wa, ẹ kụ ịrẹta ẹbanyị-ẹbanyị gụ, dị ẹ wụ ọ̀dà ọvwọọvụ ku wa,

³dị ẹ chẹrẹ avaba ọda ẹnẹnị hi ini anị. Ịjị wàa sị ngụ ịnị ẹtẹ ozoza ọnị Ẹnẹyịmavara Ohomorihi ohiku ẹnịnị wo oto anị yị wụ nịnị.

⁴Ịjị ụ wàa jịnẹ tụ akẹnẹ Okuha Ịjọdanị, nọ ịrẹsụ ataba Ẹba. Kụ ịrẹta ẹnẹnị gụ vabẹ ịzọọ, dị ẹ wụ ọda ọvwọọvụ ku wa anka ọnị mẹ̀ ọda anị yị wa ajịnị.

⁵Ẹ́ sị ịrẹta da ụta yị Ẹnẹyịmavara Ohomorihi awụ nịnị; asị ụ sị ịrẹta ana a sị enyusẹ há jị ọ nịnị.

⁶Asị ụ sị ịrẹta ana há jị ụta ọnyọọnyị yị Ẹnẹyịmavara Ohomorihi awụ nịnị. Ịzọọ ụ vaa mẹ̀ ịsọvọ ana aā rị ịra,

⁷dị ụ mẹ̀ ịsọvọ, dị ụ rị ịsa ịsọvọ ẹvabẹ, di u wee hine ayị nịnị ọvịdị Ẹnẹyịmavara Ohomorihi awụ nịnị.

⁸Chẹrẹ avaba ịrẹyị ọda Ohomorihi ẹnẹẹ tụ ịrẹsụ ịrẹta teete, dị aza ẹ zụ re e.

⁹Imosiisi ọnịrị ohirẹsụ irehi Ohomorihi ana vị Anireevi, ệ kà a ka Anisirẹrị nịnị e batọ dị ẹ wụ́ ịrẹyị anị. Ọ kà, ajịnị ẹnịnị ẹ sị vara aza Ẹnẹyịmavara Ohomorihi ẹnịnị.

¹⁰Agụvị avọọ, ẹ wụ́ chire e, dị ẹ sị ụvọ za avaba ọda anị ọnị ọnị aa sị yị wa ajịnị.

¹¹Ịhyọnọọ, Imosiisi kà a yị Anisirẹrị ka,

¹²ẹ̀ẹ sị jịnẹ Okuha Ịjọdanị tụ akẹnẹ, ịrẹsụ ẹnẹnị ẹ jẹẹ ịrẹsụ ataba Igerizimi ịnị ụmẹ ana aa sị mẹ̀ aduwa yị aza. Ịrẹsụ ẹnẹẹ ẹ vị ịrẹsụ Isimiyọnị, Ireevi, Ijuda, Iisaka, Ijosẹẹhụ ọnịrị Ịbẹnjamịnị.

¹³Ịrẹsụ ẹnẹnị ẹ̀ vaa jẹẹ ịrẹsụ ataba Ẹba ịnị ụmẹ ọnị aa sị tụ ozirenu nị. Ịrẹsụ ẹnẹẹ ẹ vị ịrẹsụ Irubẹnị, Igadi, Aseri, Izeburuni, Ịdaanị ọnịrị Inahwitari.

¹⁴Anireevi nini vaa sị ọngwẹ tọ ọnya tụ ẹba ka ịrẹyị ẹnẹnị:

¹⁵O yi vee ze yị ọza tụra ọza ana aa sị ịrẹta, ọchị, a vị enyusẹ mẹ ori anị, di e were-were hẹkẹ ẹ. Enyisi ori ọyị hẹkẹ vị yị Ẹnẹyịmavara. Dị avaba aza ọ̀ ha aamị!

¹⁶O yi vee ze yị ọza tụra ọza ẹnẹ ẹ yị sị ụbanyị ada anị ọnịrị ọnyị anị. Dị avaba aza ọ̀ ha aamị!

¹⁷O yi vee ze yị ọza tụra ọza ana aa hu ahụ ọtẹhwị ẹtẹ ọnọhụva anị. Dị avaba aza ọ̀ ha aamị!

¹⁸O yi vee ze yị ọza tụra ọza ana a mẹ ogweyi ò nyeeyi oze. Dị avaba aza ọ̀ ha aamị!

¹⁹O yi vee ze yị ọza tụra ọza ẹnẹ ẹ yị zẹ ka ọnị ọ sị ịsị vọrọ tụra azọga, ezi-oku ọnịrị esoku yị wa. Dị avaba aza ọ̀ ha aamị!

²⁰O yi vee ze yị ọza tụra ọza ana mẹ ụnọ, dị ọ sị ose ada anị. Dị avaba aza ọ̀ ha aamị!

²¹O yi vee ze yị ọza tụra ọza ene pe uye sụ. Dị avaba aza ọ̀ ha aamị!

²²O yi vee ze yị ọza tụra ọza ana sị ọhụva ọnẹẹ, a vị adẹnyara anị ọnẹẹ. Dị avaba aza ọ̀ ha aamị!

²³O yi vee ze yị ọza tụra ọza ana sị ọnyị ose anị. Dị avaba aza ọ̀ ha aamị!

²⁴O yi vee ze yị ọza tụra ọza ene were-were wụ̀ ọza. Dị avaba aza ọ̀ ha aamị!

²⁵O yi vee ze yị ọza tụra ọza ana dọ ẹkẹhị, dị ọ wụ́ ọza ọnị ẹ yị nyị ịsa ọnị ọ mẹ̀. Dị avaba aza ọ̀ ha aamị!

²⁶O yi vee ze yị ọza tụra ọza ẹnẹ ẹ yị mẹ avaba ịsị ọda Ohomorihi kà. Dị avaba aza ọ̀ ha aamị!