Read ebira Ịjọọnụ 14 Bible Online

Ịjọọnụ 14 - ebira bible

Ịjọọnụ 14

¹Ijeesu ộ kà a yị ezirẹma anị ka, “Asị ụ zẹẹ ka ayị awụ nịnị ò du! Sị ayị tụra Ohomorihi, dị ụ wa rẹ sị ayị tụra mị nịnị bẹẹ!

²Ịdị Ada amị, irehi vị ana gwẹtẹ ịzọọ. Ọ̀ yị vavọọ yà, mị yaanị kà a wụ nịnị: Mee nee tenyi aha tịtẹ yị wụ nịnị.

³Màa na sị aha tenyi tịtẹ wụ nịnị, mị raa vaavẹ, dị ma va sị wụ nịnị ne pe ẹngụ, agụvị ịzị màa yà, dị ẹwụ nịnị ọ̀ rẹ yà ịzọọ.

⁴Wâ yẹ oze ịzị maa nọ nịnị.”

⁵Dị Ịtọmọsị kà a yọ ka, “Ananyị yị, yẹ yị hyakụ yẹ ịzị ụ waa nọ. Ị mẹmẹ va yẹ oze ịzọọ?”

⁶Dị Ijeesu tụ́ ọọ ohi, dị ọ ka, “Ẹma vị oze ọnọọ nị, ẹma vị ịzẹyịza nị, ẹma rẹẹ̄ mẹ ka ọza ọ̀ yàra nị. Ẹ yị nyị ọza ana nyẹngụ nọ ịdị Ada amị, ẹ̀ yị vị oze amị ọ zị.

⁷Wàa yaanị yẹ mị nịnị, ụ rẹ yaanị yẹ Ada amị nịnị bẹẹ. Hụrẹ ọyaanị na, wa sị ọọ yẹ nịnị, we re si oo re nịnị.”

⁸Dị Ihwiripi ka, “Ananyị yị, sị Ada awụ ọnọ zụ̀ yị, ka avaba oni yee sì ọ vị ọnọọ nị.”

⁹Dị Ijeesu kà a yọ ka, “Ẹhụ ọnị mị hụrẹ yà pe wu nịnị aanị, wẹ yị yẹ mịị, Ihwiripi? Ọza ene èe re mi, ọ rẹ sị Ada amị re. Sị ẹ vẹ dị ụ kụkụ rẹ ka ma sị Ada amị zụ̀ wụ?

¹⁰Aanịka wẹ yị dọ wụ́ ka ẹmịrị Ada amị vị ọnya, ka ẹmị rị ọọ vị ana vabẹ? Ịrẹyị ọnị maa kà a wụ nịnị avọọ, ẹ yị vị ẹmị ụvọta aa dà a kà. Ada amị ẹnẹ ẹmịrịị vị ọnya aa mẹ̀ ụkọrọ anị nị.

¹¹Dọ mị wụ́ ka ẹmịrị Ada amị vị ọnya, dị ị vabẹ nị; ẹ̀ yị vị avọọ, ụ dọ mị wụ́ agụvị ụkọrọ ọnị mị hyakụ aa mẹ!

¹²Ịzẹyịza m maa kà a wụ nị, ọza ana àa sị ayị tụra mị, ụkọrọ ọnị maa mẹ̀ aanị, ọ́nị rẹ vaa mẹ nị. Ọ hyakụ vaa mẹ̀ ụkọrọ ana banyị hu ẹsẹnị bẹẹ, agụvị ka maa nọ ịdị Ada amị.

¹³Ịsa tụra ịsa oni u wèe họ̀ use anị ịnị ịrẹha amị nịnị, mị vaa mẹ̀ ẹ, agụvị dị à zụ sị igirima yị Ada amị ini oze ẹmị Ozi anị.

¹⁴Ịsa tụra ịsa oni u wèe họ̀ use anị ịnị ịrẹha amị, mị vaa mẹ̀ ẹ.”

¹⁵“Wàa ka wee sì ịrẹyị amị nịnị, ụ vaa saasa ọda amị nịnị.

¹⁶Mị vaa dá ịpẹẹ yị Ada amị, dị ọ sị Ohunẹnọzayị ọsa va yị wụ nịnị, dị ọ̀ kụkụ yà ịdị awụ nịnị pooro zịna-zịna.

¹⁷Ohunẹnọzayị ọnọọ ọ vị Ụhwẹ Ọnịnị anaā sịị ịzẹyịzaa zụ̀ nị. Anẹhẹ ọnọnị kẹnẹ ẹ yị va zụụ nyị Ụhwẹ Ọnịnị ọnọọ, agụvị ka ẹnịnị e yi zụ re e, ẹ yị rẹ va yẹ ẹ. Ama àa vị ẹwụ nịnịị yọ, ẹwụ nịnị ộ yẹ ẹ, agụvị ka ọ vaa yàa pe wu nịnị, dị ọ rẹ yà ịnị ayị awụ nịnị.

¹⁸Mẹ yị vaa navọ wụ nịnị kẹnẹ anka ozi oku avọọ. Mị vaa vaavẹ ịdị awụ nịnị.

¹⁹Òo nee kù chee, anẹhẹ e yi kuku vee re mi. Ẹwụ nịnị vee re mi. Mị yàra, ẹwụ nịnị rẹ vaa yàra bẹẹ.

²⁰Ịhị ẹkụhị ọnọọ òo si tù, ụ vaa yẹ nịnị ka ẹmịrị Ada amị vị ọnya, dị ẹmịrị ẹwụ nịnị rẹ vị ọnya dị ị sị vabẹ nị.

²¹Ọza ana àa dọ ọda amị, dị ọ saasa a nị, oni o sì ịrẹyị amị nị. Ada amị oni re vee sì ịrẹyị ọza ene èe sì ịrẹyị amị. Ẹmị re vee sì ịrẹyị ọza ọnọọ, dị mị rẹ sị ẹngụ amị zụ̀ ọ.”

²²Dị Ijudasi, ẹ yị vị Ijudasi Isikarịyọtị aa kà, ka, “Ananyị yị, ụ mẹmẹ vaa sị ẹngụụ zụ̀ ẹyị, dị ụ wẹ yị sị zụ̀ anẹhẹ?”

²³Dị Ijeesu tụ́ ọ ohi, dị ọ ka, “Ọza ene èe sì ịrẹyị amị, ọ vaa sị ụvọọ za ịrẹyị amị; Ada amị vee sì ịrẹyị anị. Dị ẹmịrị Ada amị dudu vẹ, dị ị va ra ịnị ayị anị.

²⁴Ọza ene è yi sì ịrẹyị amị, ọ yị vaa sị ụvọọ za ịrẹyị amị. Ịrẹyị ọnị maa kà ọnị ụ waa wụ́ nịnị aanị, ẹ yị vị ịrẹyị ẹmị ụvọta ọ vị, ịrẹyị Ada amị ana tụ́ mị vẹ ẹhẹẹ yọ nị.

²⁵Ịrẹyị ẹnẹnị vị ọnị maa kà a wụ nịnị, m mẹ̀ yị yà ịdị awụ nịnị aanị.

²⁶Ohunẹnọzayị ọnọọ ana vị Ụhwẹ Ọnịnị, ana Ada amị vaa tụ́ụ vẹ ịnị ịrẹha amị, ọ vaa sị avaba ịsaa zụ̀ wụ nịnị, dị ọ rẹ mẹ ka wa tamayị avaba ịrẹyị ọnị mị vịdị sị kà a wụ nịnị.

²⁷“Maa mẹ ka wa nyị ẹngwọọrọ nịnị; ẹngụ ẹngwọọrọ ọnị mị nyị m maa mẹ̀ ka wa nyị nịnị nị. Ẹ yị vị ẹngụ ẹngwọọrọ ọnị ẹhẹ sịị yị ọza m maa mẹ̀ ka wa nyị nịnị. Asị ụ zẹẹ ka ayị awụ nịnị ò du; asị u re hí angwa nịnị!

²⁸Wâ wụ́ ka ma sị ọọ kà a wụ nịnị ka maa na, dị ma rẹ và ká wụ nịnị vẹ. Wèe sì ịrẹyị amị nịnị, ụ vaa jẹ nịnị ka maa nọ ịdị Ada amị, agụvị ka Ada amị o huna mị nị.

²⁹Maa kà avaba ịsa ẹnẹnịị wụ nịnị dị ẹ̀ va mẹ, agụvị ịhị ẹ̀ẹ sị mẹ, dị ụ wa zụ dọ mị wụ́ nịnị.

³⁰Me yi kuku sì ka ma kà ịrẹyịị wụ nịnị gọdọ hu aanị, agụvị ka ohinọyị ẹhẹ ọnọnị aa vẹ. Ama ọ yị nyị ụkata ị́rẹsụ amị.

³¹Maa mẹ avaba ịsa ana Ada amị mẹ ọdaa mị ka ma mẹ, agụvị dị anẹhẹ ẹ̀ zụ yẹ ka mê sì ịrẹyị Ada amị. Vẹ ya hụụ ịzẹnị, ya na nịnị!”