Read ebira Ịjọọnụ 15 Bible Online

Ịjọọnụ 15 - ebira bible

Ịjọọnụ 15

¹Ijeesu ọ rẹ kà a yị ezirẹma anị ka, “Mị sị mẹẹ anka ọchị anaā tụ́ ana aā hị́ ịvayịnị avọọ nị. Ada amị vị ana sị mẹẹ anka ọza ana nyị ụbazị ene ee tenyii ọchị ọnọọ avọọ.

²Avaba avọ ọnị màa há, ẹnẹ ẹ̀ yị tụ́ ẹtụtụ, dị ọ dà a ne ta. Ama avọ ana àaa tụ́ ẹtụtụ, di o tenyi ọ, dị ọ̀ọ tụ́ hu avọọ.

³A raà sị ịrẹyị ọnị mị kà wụ nịnị aanị tenyi wu nịnị.

⁴Navọ ya vị ọnya nịnị, dị ẹmịrị ẹwụ nịnị ọ̀ vabẹ. Wâ yẹ nịnị ka avọ́ ọchị ẹ yị zụ tụ́ ẹtụtụ yị ẹngụ anị àa sị ọ dà hụụnị ọchị obooro. Avọọ ẹwụ nịnị ọ̀ yị mẹ̀ rẹ nyẹngụ nyị ẹtụtụ, ẹ̀ yị vị ụ zẹẹ ka ẹmịrị ẹwụ nịnị ọ̀ vị ọnya nị.

⁵“Mị ka ẹmị vị ana yà anka ọchị ịvayịnị avọọ. Ẹwụ nịnị vị avọ. Ọza ana àa zẹẹ ka ẹmịrị ọnị ọ̀ vị ọnya dị ya rẹ vabẹ, ọ vaa nyị ẹtụtụ ẹtẹẹtẹrẹ. Ẹ yị nyị ịsị ụ zụ dà mẹ nịnị, wẹ̀ yị zẹẹ ka ẹmịrị ẹwụ nịnị ọ̀ vị ọnya.

⁶Ọza ẹnẹ ẹ̀ yị zẹẹ ka ẹmịrị ọnị ọ̀ vị ọnya, dị a dà a ne ta anka avọ́ ọchị avọọ. Dị ọ wụ, dị aza va tọ̀ọ́ yọ, dị ẹ kụ́ wa va hi ịnị ịra, dị ẹ rị ịra.

⁷Wàa zẹẹ ka ẹmịrị ẹwụ nịnị ọ̀ vị ọnya, dị ịrẹyị amị yà ịnị ayị awụ nịnị nị, we zụ họ̀ use ịsa tụra ịsa ene èe zé wu nịnị eyi, ụ waa nyị ọọ nịnị.

⁸Wàa nyị ẹtụtụ nịnị ẹtẹẹtẹrẹ, ọ vaa mẹ ka aza ẹ̀ sị ụbanyị yị Ada amị nị; oze avọọ ụ rẹ nyẹngụ zị vị ezirẹma amị nịnị nị.

⁹Mê sì ịrẹyị awụ nịnị anka Áda amị ọnị mè re sì ịrẹyị amị. Asị ụ và hụụ nị ịrẹyị awụ nịnị oni mi sì!

¹⁰Wàa sị eyi pe ọda amị nịnị, wẹ yị vaa vàa hụụnị ịrẹyị awụ nịnị oni mi sì. Avọọ émi mè re sị eyi pe ọda Ada amị, dị mẹ̀ yị và hụụnị ịrẹyị amị oni o sì nị.

¹¹M maanị aa kà ịrẹyị ọnọnịị wụ nịnị, agụvị dị ịrajẹ ọnị mị nyị, ọ̀ zụ và awụ nịnị, ịjọnọọ dị ịrajẹ awụ nịnị kụkụ sị gụ.

¹²“Ọda ọnị mị mẹ wụ nịnị, yị; Ka we sì ịrẹyị ẹngụ nịnị anka ẹ́mị mè re sí ịrẹyị awụ nịnị.

¹³Ẹ yị nyị ịrẹyị ọza oyisì ene huna ọsọnị ka ọza ò sú agụvị ọta anị.

¹⁴Wàaa mẹ̀ ịsa ọnị mị kà wụ nịnị, ọta amị ụ vị nịnị avọọ nị.

¹⁵Hụrẹ ọyaanị na, mẹ yị kụkụ hị́ wụ ozi ahụ amị nịnị. Wâ yẹ ka ozi ahụ ọ mā yẹ ịsị ọga anị aa mẹ. Maa hị́ wụ nịnị ọta amị, agụvị ka avaba ịrẹyị ana Ada amị kà mị, mị sị zụ̀ wụ nịnị nị.

¹⁶Ẹ yị vị ka ẹwụ nịnị ọ nyị mị nị, ama ẹma vị ana nyị wụ nịnị nị. Mâ nyị wụ nịnị ka wa zụ naa nyị ẹtụtụ nịnị ẹtẹẹtẹrẹ ana vaa yà pooro zịna-zịna, agụvị ịsa tụra ịsa ọnị ụ wàa họ̀ Ada amị use nịnị ịnị ịrẹha amị, dị ọ̀ sị yị wụ nịnị.

¹⁷Ọda ọnị mị mẹ wụ nịnị yị ka: we sì ịrẹyị ẹngụ nịnị!”

¹⁸Dị Ijeesu rẹ ka, “Anẹhẹ àaa nyị ịhyẹrẹ awụ nịnị, tamayị ka ẹmị ẹ vịdị nyị ịhyẹrẹ anị nị.

¹⁹Àa vị áanẹhẹ ụ vị nịnị nị, anẹhẹ yaanị sì wu nịnị anka aza anị. Ama ẹwụ ẹ yị vị áanẹhẹ; ẹma sị ẹwụ nịnị nyị hụụnị ẹhẹ; agụvị avọọ ánẹhẹ aa nyị ịhyẹrẹ awụ nịnị nị.

²⁰Tamayị ịrẹyị ọnị mị vịdị kà wụ nịnị ka ozi ahụ o mē huna ọga anị. Ẹ̀ẹ raà sị ụya rị mị, ẹ rẹ vaa sị ụyaa rị ẹwụ nịnị bẹẹ. Ẹ̀ẹ dọ ịrẹyị amị, ẹ rẹ vaa dọ ịrẹyị ẹwụ nịnị bẹẹ.

²¹Ẹ vaa mẹ avaba ịsa ẹnẹẹ hi wu nịnị, agụvị ka wâ vị áamị nịnị, ịjị ahịka ẹnịnị ẹ yị yẹ Ọza ana tụ́ mị vẹ ẹhẹ.

²²Mẹ̀ yị yaanị vẹ ẹhẹ va kà ịrẹyị yị wa, ẹ yị yaanị rị ịvị; ama booro aanị, e yi kuku re kụ́.

²³Ọza ana àa nyị ịhyẹrẹ amị, vị ọ rẹ nyị ịhyẹrẹ Ada amị avọọ nị.

²⁴Ụkọrọ ẹbanyị-ẹbanyị ọnị mị mẹ ịnị akakana ẹnịnị, ẹ̀ yị nyị ọza ana vavọọ mẹẹ da; mẹ̀ yị yaanị mẹ ẹngụ ụkọrọ ẹnẹẹ, ẹ yị yaanị rị ịvị. Ama ẹ sị ụkọrọ ẹnẹẹ re, ẹ nyị nyị ịhyẹrẹ amị ọnịrị Ada amị bẹẹ.

²⁵Ama â nyị ka ịrẹyị ana a chẹrẹ tụ́ ini iwe ọda ẹnịnị, ọ̀ zụ sẹ. Â vịdị chẹrẹ ẹ ka: ‘Ẹyaa nyị ịhyẹrẹ amị kẹnẹ-kẹnẹ.’

²⁶“Ịhị Ohunẹnọzayị ọnọọ ọ̀ọ vẹ, ọnị mị vaa tụ́ hụụ ịdị Ada amịị vẹ, ọ vaa dọ ivenuu tụ́ ịnị ịrẹyị amị. Ọnị ọ vị Ụhwẹ Ọnịnị anaā sịị ịzẹyịzaa zụ̀ nị; ịdị Ada amị ọ hụrẹ vẹ nị.

²⁷Ẹwụ nịnị rẹ vaa dọ ivenu tụ́ ịnị ịrẹyị amị bẹẹ, agụvị ka ịdị amị ụ yà nịnị hụrẹ ụmọrụmọ nị.