Read ebira Ịjọọnụ 16 Bible Online

Ịjọọnụ 16 - ebira bible

Ịjọọnụ 16

¹“M maanị aa kà ịrẹyị ọnọnịị wụ nịnị, agụvị asị ụ na jị mị ịrẹka nịnị.

²Ẹ vaa dụ wụ nịnịị jịnẹẹ hụụnị irehi Ohomorihi. Mị ka ụmẹ hyakụ aa vẹ, dị aza ana aa wụ wụ nịnị, ro o ka vị ẹnị aa mẹ̀ ịsa ozozaa yị Ohomorihi nị.

³Ẹ vavọọ vaa mẹ wụ nịnị, agụvị ka ẹnịnị ẹ yị yẹ Ada amị, avọọ ẹnịnị ẹ̀ yị mẹ̀ rẹ yẹ mị nị.

⁴Mâ maanị jintu sị ọọ kà a wụ nịnị, agụvị ịjị ụmẹ ọnọọ òo si tù, wa tamayị nịnị ka mâ vịdị sị ọọ kà a wụ nịnị. Mẹ yị vịdị kà ịrẹyị ẹnịnịị wụ nịnị hụrẹ ụmọrụmọ, agụvị ka mị yị yà ịdị awụ nịnị.”

⁵“Ama booro aanị, maa nọ ịdị Ọza ana tụ́ mị vẹ ẹhẹ. Ẹ yị va nyị ọza awụ nịnị ana họ̀ mị ka ịzị maa nọ.

⁶M mẹ̀ va aa kà a wụ nịnị aanị, ayị awụ nịnị ọ va ta du.

⁷Ama dị ma kà ịzẹyịza wụ nịnị ka màa na, ọ dahi yị wụ nịnị hu nị. Mẹ̀ yị na, Ohunẹnọzayị ọnọọ ọ yị vaa vẹ ịdị awụ nịnị. Màa zị na, dị mị tụ́ ọọ ve tù wu nịnị.

⁸Ịjị Ohunẹnọzayị ọnọọ ọ̀ọ vẹ, ọ vaa sị zụ̀ anẹhẹ ka ệ rị ịvị, dị ọ rẹ mẹ ka ẹ̀ yẹ ịrẹyịzẹyịza beri ọkarẹyị Ohomorihi.

⁹Ẹnịnị ệ rị ịvị, agụvị ka ẹnịnị ẹ yị sị ayị tụra mị.

¹⁰Ohunẹnọzayị ọnọọ rẹ vaa sị zụ̀ wa ịsị ẹ vị ịrẹyịzẹyịza, agụvị ka maa nọ ịdị Ada amị, we yi kuku re mi nịnị.

¹¹Ọ rẹ vaa sịị zụ̀ ịsị ẹ vị ọkarẹyị Ohomorihi, agụvị ka Ohomorihi ọ sị ịvị jị yị ohinọyị ẹhẹ ọnọnị da.

¹²“Mị yaanị yị nyị ịrẹyị ọrụrụ-ọrụrụ ana a vọrọ ka ma kà wụ nịnị; ama wẹ yị kụkụ zụ za a nịnị booro aanị.

¹³Ama ịhị Ụhwẹ Ọnịnị anaā sịị ịzẹyịzaa zụ̀, ọ̀ọ vẹ, ọ vaa mẹ ka wa yẹ avaba ịzẹyịza nịnị. Ọ yị vaa dà ẹ́ẹngụ anịị kà; ịrẹyị ọnọ ọ̀ọ wụ́ kẹnẹ, ọ vaa kà nị. Ọ rẹ vaa sịị zụ̀ wụ nịnị ịsa ana aa vẹ ụhwọọ.

¹⁴Ọ vaa sị igirimaa yị mị, agụvị ka ịrẹyị amị ọ vaa kà a wụ nịnị nị.

¹⁵Avaba ịsị Ada anị ọ̀ọ nyị vị áamị; agụvị avọọ mị kà a ka ịrẹyị amị ọ vaa kà a wụ nịnị nị.”

¹⁶Dị Ijeesu rẹ ka, “Òo kù chee, we yi kuku vee re mi nịnị; òo re nee kù chee, di u ree re mi nịnị.”

¹⁷Dị ezirẹma anị ẹnyị aa họ̀ ẹngụ ka, “Ẹngụ ịrẹyị ịsị aa kà a yị aanị kẹ, ‘Òo kù chee, we yi kuku vee re mi nịnị; òo re kù chee, u vee re mi nịnị.’ Ọ rẹ ka, ‘agụvị ka ọnị aa nọ ịdị Ada anị.’ ”

¹⁸Dị ẹ ka, “Sị ẹ vị iruvo òo kù chee ọnọọ? Yẹ yị yẹ ịsị aa kà ịrẹyị anị o.”

¹⁹Ijeesu ọ sị yẹ ka eyee sì ka ẹnị ẹ̀ họ̀ ọnị use ịrẹyị. Dị ọ kà a yị wa ka, “Mị ka òo kù chee, we yi kuku vee re mi nịnị, òo re ne kù chee, u re vee re mi nịnị. Ịsị ụ waa họ̀ ẹngụ awụ nịnị use anị ọ́ọ́ vị ọnọọ nị?

²⁰Ịzẹyịza m maa kà a wụ nịnị nị, u vee nowu, di u wee sụ ùnè nịnị, ama dị anẹhẹ ẹnị aa jẹ. Ayị awụ nịnị vee du, ama ayodu awụ nịnị vaa vara ayohine.

²¹Ọnyẹnẹẹ àaa barẹẹ, ayị anị vị ene vee du, agụvị ka ụmẹ ụyọrị anị o si tù. Ama ọ̀ọ sị ozi anị ma, dị ayị ụyọrị anị kuku hi ọ, agụvị ka ọ kụkụ aa jẹ ka ọnị ọ sị ozi ma va ngụ ịnị ẹhẹ.

²²Ayị awụ nịnị o si du booro aanị, ama mị vanaa vẹ vee hee wu nịnị; ịjọnọọ ayị awụ nịnị vee hine ẹtẹẹtẹrẹ. Ẹ yị nyị ọza ana va zụụ dọ wụ nịnị ẹngụ ayohine ọnọọ.

²³“Ịhị ẹkụhị ọnọọ òo si tù, wẹ yị vaa họ̀ mị use ịsọnyị-ịsọnyị nịnị. Ịzẹyịza m maa kà a wụ nị, ịsa tụra ịsa ọnị ụ wàa họ̀ Ada amị use ịnị ịrẹha amị nịnị, ọ vaa sịị yị wụ nịnị.

²⁴Pooro ve tù ọyaanị, ẹ̀ yị nyị ịsị u họ̀ use ịnị ịrẹha amị nịnị da. Huse ịsa nịnị, u vee ree dọ nịnị! Ọnọọ ọ vaa mẹ ka ịrajẹ awụ nịnị ọ̀ zụ gụ nị.”

²⁵Dị Ijeesu ka, “Ịrẹyị ẹnẹnị vị ọnị mị vịdị aa sị ụhịrẹyịị kà a wụ nịnị. Ama ụmẹ aa vẹ, ọnị mẹ̀ yị kụkụ vaa sị ụhịrẹyịị kà ịrẹyịị wụ nịnị. Mị kụkụ vaa kà ịrẹyị Ada amịị zụ̀ wụ nịnị chapaa kẹnẹ nị.

²⁶Ịnị ịhị ọnọọ, u vee họ̀ use ịsa hụụnị ụvọ Ada amị ịnị ịrẹha amị nịnị. Mẹ yị kà a ka ẹma vaa dá ịpẹẹ yị Ada amị agụvị awụ nịnị nị, oo!

²⁷Ada amị ọnị ụvọta ô sì ịrẹyị awụ nịnị, agụvị ka wê sì ịrẹyị amị nịnị, dị ụ rẹ dọ wụ́ nịnị ka ịdị Ohomorihi mị hụrẹ vẹ nị.

²⁸Ịzẹyịza, ịdị Ada amị mị hụrẹ dị mị vẹ ịnị ẹhẹ nị. Mị raa hụụnị ẹhẹ, dị ma nọ ịdị Ada amị.”

²⁹Dị ezirẹma anị kà a yọ ka, “Ịhịịn, wee re ụ mẹ̀ kụkụ aa kà ịrẹyị chapaa, dị ụ wẹ̀ yị kụkụ sị ụhịrẹyị kà ịrẹyị.

³⁰Ya sị yẹ booro aanị ka wâ yẹ avaba ịsa, ẹ yị kụkụ nyị ka ọza ọ̀ọ họ̀ wụ use ịrẹyị. Ọsọnị ộ mẹ̀ ka ya dọ wụ́ ka ịdị Ohomorihi ụ hụrẹ vẹ nị.”

³¹Dị Ijeesu tụ́ wa ohi ka, “Aanịka vụ ụ yị va dọ wụ́ nịnị aanị nị?

³²Ụmẹ aa vẹ, ộ hyakụ si tù booro aanị, ana a vaa gara wụ nịnịị hi, dị ọzọza zị nọ eehi anị, dị ụ kụkụ navọ ẹmị ịnya nịnị. Ama mẹ yị vị ẹmị ịnya, agụvị ka Ada amị ộ yà pe mi.

³³Maa kà ịsa ẹnẹnịị wụ nịnị, agụvị dị ẹmịrị ẹwụ nịnị ọ̀ zụ vị ọnya, dị ụ wa nyị ẹngwọọrọ nịnị. Ụ vaa rị ụya nịnị ẹtẹẹtẹrẹ ịnị ẹhẹ, ama ngwara eyi hi nịnị, agụvị ka ma sị ẹbẹẹba ẹhẹ nyị!”