Read ebira Ịjọọnụ 18 Bible Online

Ịjọọnụ 18 - ebira bible

Ịjọọnụ 18

¹Ịjị Ijeesu vavọọ sị ịrẹyị ẹnẹẹ kà kẹnẹ, dị ọnịrị ezirẹma anị hụụ ịzọọ, dị ẹ nọ akẹnẹ okuha Ikidironi nị. Â nyị ụbazị ọnya ịzọọ, dị Ijeesu ọnịrị ezirẹma anị ngụ ịnị ụbazị ọnọọ nị.

²Ijudasi ana vaa sị Ijeesu chire ọnịvị anị ụvọ aanị, ọnị ọ rẹ yẹ ịzọọ; agụvị ka ụpọsa-ụpọsa Íjeesu ọnịrị ezirẹma anị naa kụ́ụ gụ ịzọọ nị.

³Dị Ijudasi na kụ́ isoja nịnị ọnịrị ẹnyị ini iporisi irehi Ohomorihi vẹ nị. Ohirẹsụ ẹbanyị irehi Ohomorihi ọnịrị Anihwarisi nịnị ẹ tụ́ ẹnẹẹ vẹ nị. Dị ẹ kụ́ ozotupa ọnịrị ẹnya ịrẹkụ, dị ẹ nọ ịzọọ nị.

⁴Ijeesu ọnị ộ vịdị sị yẹ tịtẹ avaba ịsa ene vee tù ọọ. Di o tere pe wa nị, dị ọ họ̀ wa ka, “Eni u wee sì nịnị?”

⁵Dị ẹnịnị tụ́ ọọ ohi ka Ijeesu Anịnazarẹtị yọ nị. Dị Ijeesu ka, “Ẹmị ọnọọ yọ!” Ijudasi ana aa sị ọọ chire ọnịvị anị ụvọ aanị vị ana jẹẹ ịzọọ pe wa.

⁶Íjeesu mẹ̀ yị kà a yị wa kẹnẹ ka, “Ẹmị ọnọọ yọ,” dị aza ẹnẹẹ kà nọ ịrẹma, dị ẹ hyẹdụ và hi ẹtẹ nị.

⁷Dị Ijeesu rẹ họ̀ wa ka, “Eni u wee sì nịnị?” Dị ẹ rẹ ka Ijeesu Anịnazarẹtị yọ nị.

⁸Dị Ijeesu ka, “Ma sị ọọ kà a wụ nịnị ka ẹmị yị. Àa vị ẹmị u wee sì nịnị nị, navọ ẹsẹnị ẹnị ẹ̀ sị oze ẹnịnị!”

⁹Ộ vavọọ kà, agụvị ịrẹyị ọnọọ vịdị kà, ọ̀ zụ sẹ ka, “Ịnị avaba aza ọnị ụ sị mị, ẹ yị nyị ikonya oni mi vú.”

¹⁰Ịsayịmọnị Ipita ộ nyị ụhwọ ọnya. Dị ọ tụ̀ ọọ, dị ọ sị ká ozi ahụ ohirẹsụ ọbanyị irehi Ohomorihi, dị ọ yẹrẹ ẹ ụtọ eyi ụvọrị nị. Ịrẹha ozi ahụ ọnọọ ọ rị Ịmarịkụsị nị.

¹¹Dị Ijeesu kà a yị Ipita ka, “Sị ụhwọ awụ chire ịhị anị! Ụ wáá ka asị mị rị ụya ana Ada amị sị mị ka ma rị nị?”

¹²Di isoja nịnị ẹnẹẹ beri ọga ẹnịnị ọnịrị iporisi Aniju nịnị za Ijeesu, dị ẹ sụ́ ọọ nị.

¹³Dị ẹ vịdị sị ọọ nọ ịdị Ihanasi nị. Ihanasi ọnọọ vị ọyẹ Ikayahwasi ana vị ohirẹsụ ọbanyị irehi Ohomorihi ịnị ịrayị ọnọọ.

¹⁴Ikayahwasi ọnọọ ọ vịdị kà a yị Aniju nịnị ka â vọrọ ka ọza ịnya ò sú yị avaba aza nị.

¹⁵Ịsayịmọnị Ipita ọnịrị ozirẹma Ijeesu ọsa ệ saasa Ijeesu. Ohirẹsụ ọbanyị irehi Ohomorihi ộ yẹ ozirẹma ọsa ọnọọ ẹtẹẹtẹrẹ. Agụvị avọọ, di ozirẹma ọnọọ re oze dụ Ijeesu na ngụ ịnị ohweje ịdị anị nị.

¹⁶Dị Ipita ọnị jẹẹ enoze éyi ẹhẹ nị. Dị ozirẹma ọsa oni ohirẹsụ ọbanyị irehi Ohomorihi yẹ aanị, jịnẹ na kà a yị ozi ọnẹẹ ana sị eyi pe oze aanị, dị ọ sị Ipita ngụ eehi vẹ nị.

¹⁷Dị ozi ọnẹẹ ọnọọ ana sị eyi pe oze, kà a yị Ipita ka, “Aanịka ẹ yị vị ozirẹma ọnọrụ ọnọnị ẹwụ rẹ vị?” Dị Ipita ka, “Eyiye, mẹ yị vị ozirẹma anị!”

¹⁸Ahị vị ana aa za ụmẹ ọnọọ. Dị ezi ahụ nịnị beri iporisi irehi Ohomorihi kà ịra, dị ẹ jẹẹ ịzọọ, dị ẹ yaa wà ịra nị. Di Ipita ọnị rẹ ká wa na nị, dị ọ na jẹẹ pe wa, dị aa wà ịra nị.

¹⁹Ohirẹsụ ọbanyị irehi Ohomorihi ọnọọ ộ họ̀ Ijeesu use ịrẹyị ini oze ezirẹma anị ọnịrị ịsa oni Ijeesu vịdị aa zụ̀ aza.

²⁰Dị Ijeesu tụ́ ohi, dị ọ ka, “Ịnị eyigede mị yàā kà ịrẹyị amịị yị avaba anẹhẹ nị. Ini irehi Ohomorihi mị yàā zụ̀ aza ịsa nị, ọnịrị ini irehi Ohomorihi ịzị Aniju nịnịị̄ kụ́ gụ. Ẹ yị nyị ịrẹyị amị ọnị mịị̄ kà ini ewere.

²¹Sị ẹ vẹ dị ụ kụkụ aa họ̀ mị use? Na họ̀ aza ana wụ́ ịrẹyị ọnị mị kà yị wa! Ẹnịnị ệ yẹ ịsị mị kà.”

²²Ịjị Ijeesu maanị sị kà, dị ọnya ini iporisi ana jẹẹ ịzọọ nya Ijeesu arụhwọtọ, dị ọ ka, “Ohirẹsụ ọbanyị irehi Ohomorihi ụ vavọọ aa kà ịrẹyịị yị nịị?”

²³Dị Ijeesu tụ́ ọ ohi, dị ọ ka, “Màa kà ịrẹyị odivi, sị zụ̀ mị! Ama àa vị ịrẹyị ana vọrọ mị kà nị, sị ẹ vẹ dị ụ waa nya mị arụhwọtọ?”

²⁴Di Ihanasi rẹ sị Ijeesu, a mẹ̀ yị sụ́ ọọ, dị ọ ka à sị ọọ na yị Ikayahwasi ana vị ohirẹsụ ọbanyị irehi Ohomorihi nị.

²⁵Ịsayịmọnị Ipita va na yị jẹẹ ịzọọ aa wà ịra. Dị aza ana jẹẹ ịzọọ kà a yọ ka, “Aanịka ẹ yị vị ozirẹma ọnọrụ ọnọnị ẹwụ rẹ vị?” Dị Ipita raa kụ́ nị, dị ọ ka, “Eyiye, mẹ yị vị ozirẹma anị.”

²⁶Ọnya ini ezi ahụ ohirẹsụ ọbanyị irehi Ohomorihi ọnọọ vị anda ọza oni Ipita vịdị sị ụhwọ jị ụtọ. Dị ọnọọ ka, “Aanịka m mè yi re ẹwụrị ọọ ịnị ụbazị nị?”

²⁷Dị Ipita rẹ ka, “Eyiye.” Obooboro ọnọọ, dị ụkọkọrọ nowu nị.

²⁸Dị ẹ rẹ sị Ijeesu hụụnị eehi ịdị Ikayahwasi, dị ẹ sị ọọ nọ ịdị ịgọvọnọ nị. Ẹnẹnẹ viri-viri ọ vị nị. Aniju nịnị ẹ yị ngụ ịzọọ, agụvị ka e yi sì ka eni è du ẹngụ ẹnịnị ẹngụ, agụvị ẹ̀ zụ rị ịsọyịrị Eche Ọyịparahu.

²⁹Dị Ipayireti va jịnẹ ne tù wa, dị ọ ka, “Ịrẹyị ịsị ụ sị za ọnọrụ ọnọnị vẹ nịnị?”

³⁰Di e tụ́ ohi, dị ẹ ka, “Ọ̀ yị yaanị mẹ̀ ịsa odivi, yẹ yị yaanị za a va wụ.”

³¹Dị Ipayireti ka, “Sị ọọ nịnị, dị ụ wa mẹ̀ ọkarẹyị yọ nịnị anka ọda awụ nịnị!” Dị Aniju nịnị ka, “Yẹ yị nyị ọda ọyịmẹ̀ ọkarẹyị isu yị ọza ọnyọọnyị.”

³²Avaba ẹsẹnị ệ mẹ, agụvị ịrẹyị oni Ijeesu vịdị kà, ọ̀ zụ sẹ, ọ màa kà a ẹngụ isu oni o vee sú.

³³Dị Ipayireti varẹma ngụ eehi na, dị ọ hị́ Ijeesu, dị ọ ka, “Ẹwáá vị Ohinọyị Aniju nịnị nị?”

³⁴Dị Ijeesu ka, “Ẹwụ ụvọta ọ́ọ́ kà ịrẹyị ọnọnị nị, à vị aza ẹnẹsa ẹ kà ịrẹyị amị yị wụ nị?”

³⁵Dị Ipayireti ka, “U wéé ro ka Aniju mị vị nị? Anda awụ nịnị beri ohirẹsụ ẹbanyị irehi Ohomorihi ẹ sị wụ ve chire mi ụvọ nọ. Sị ụ mẹ?”

³⁶Dị Ijeesu tụ́ ohi, dị ọ ka, “Ịjọva ẹmị ọ yị vị ịjọva ẹhẹ ọnọnị. Àa yaanị vị ịjọva ẹhẹ ọnọnị ị́jọva ẹmị yaanị vị nị, ezi ahụ amị yaanị kụ̀ ịrẹkụ, dị Aniju nịnị ẹ yị yaanị zụ za mị. Ama ịjọva ẹmị ọ yị va vị ịjọva ẹhẹ ọnọnị.”

³⁷Dị Ipayireti va họ̀ ọ ka, “Ohinọyị ẹwụ wáá vị ana vị nị?” Dị Ijeesu tụ́ ọọ ohi ka, “Ụ mẹ̀ yị kà a, avọọ yọ, ohinọyị mị vị nị. Â ma mị, mâ vẹ ịnị ẹhẹ, ka ma va sị ịzẹyịza zụ̀ aza. Ọza ene èe sì ịzẹyịza, vaa wụ́ ịrẹyị amị.”

³⁸Dị Ipayireti ka, “Sị ẹ vị ịzẹyịza kẹ?” Ịjị ọ vavọọ sị kà, dị ọ rẹ varẹma ne tù Aniju nịnị, dị ọ ka, “Ẹ yị nyị ịvị oni mi re ka ộ rị nịnị, oo!

³⁹Ama anka ịsị ụụ̄ mẹ nịnị, mịị̄ hụrẹ anịnẹngwa ọnya ụvọ wụ nịnị ini Eche Ọyịparahu. Agụvị avọọ, wéé sì ka ma hụrẹ Ohinọyị Aniju ụvọ yị wụ nịnị?”

⁴⁰Dị avaba aza ẹnẹẹ re nowu zẹtẹ, dị ẹ ka, “Eyiye, asị ụ hụrẹ ọnọrụ ọnọnị ụvọ yị; vana hụrẹ Ibaraba ụvọ yị!” Ibaraba ọnị vị oyi.