Read ebira Ịjọọnụ 19 Bible Online

Ịjọọnụ 19 - ebira bible

Ịjọọnụ 19

¹Di Ipayireti ka à za Ijeesu, di è tụ́ ọọ ịjapa nị.

²Dị isoja nịnị ẹnẹẹ mẹ ọkẹkẹrẹkụ ikeyi-ikeyi, di e si kú Ijeesu ịrẹsụ nị. Dị ẹ rẹ sị awuru ohinọyị ovivi chire e nị.

³Dị ẹyaa kụ́ ọọ ka, “Taarụ, ohinọyị Aniju nịnị.” Dị ẹyaa nya a arụhwọtọ nị.

⁴Di Ipayireti rẹ jịnẹ ne tù aza ẹnẹẹ nị. Dị ọ kà a yị wa ka, “Re, maa sị ọọ jịnẹẹ vee tù wu nịnị, dị ụ wa yẹ nịnị ka me yi re ịvị ịnị ụvọ anị.”

⁵Dị Ijeesu jịnẹ vẹ, di o kú ọkẹkẹrẹkụ ikeyi-ikeyi ọnọọ, di o re chire awuru ohinọyị ovivi ọnọọ nị. Dị Ipayireti kà a yị aza ẹnẹẹ ka, “Wee re nịnị, ọnọrụ ọnọọ yọ!”

⁶Ịjị ohirẹsụ ẹbanyị irehi Ohomorihi ọnịrị iporisi irehi Ohomorihi ree, dị ẹ ka, “Kanyị ọọ za apavahị! Kanyị ọọ za apavahị!” Dị Ipayireti ka, “Ẹwụ nịnị ụvọta ọ̀ sị ọọ, dụ wa na kanyị ọọ za apavahị nịnị, agụvị ka ẹ yị nị ịvị ene emi re ịnị ụvọ anị.”

⁷Dị Aniju nịnị tụ́ ọọ ohi, dị ẹ ka, “Yâ nyị ọda ọnya. Anka ọda ayị ọnọọ, vị a vọrọ ka ò sú nị, agụvị ka aa hị́ ẹngụ anị Ozi Ohomorihi nị.”

⁸Ịjị Ipayireti vavọọ wụ́ ịrẹyị ọnọọ, angwa o re hí ọọ hu avọọ.

⁹Dị ọ rẹ varẹma nọ ini eehi, dị ọ na họ̀ Ijeesu ka ịzị ọ hụrẹ vẹ nị. Ama Ijeesu o yi tụ́ ọ ohi.

¹⁰Dị Ipayireti va kà a yọ ka, “We yi tụ́ mi ohi ịrẹyịị? Wáá yẹ ka mâ nyị ọda ọyịhụrẹ wụ ụvọ, dị mị rẹ nyị ọda ọyịkanyị wụ za apavahị nị?”

¹¹Dị Ijeesu ka, “Wẹ yị yaanị nyị ụkata ọyịmẹ̀ mị ịsọnyị-ịsọnyị, ẹ̀ yị vị oni Ohomorihi sị ụkata ọnọọ yị wụ. Ọza ana sị mị chire wu ụvọ, ịvị anị banyị hu nị.”

¹²Ípayireti mẹ̀ maanị wụ́, di o kuku ee sì ka ọnị ọ̀ hụrẹ Ijeesu ụvọ nị. Ama dị Aniju nịnị nowu tụ́ ẹba, dị ẹ ka, “Wàa hụrẹ ọnọrụ ọnọnị ụvọ, wẹ yị kụkụ vị ọta ohinọyị Aniroomi. Ọza ana àa sị ẹngụ anị vị ohinọyị, ọ sị kwẹẹtẹ tù ohinọyị Aniroomi.”

¹³Ịjị Ipayireti vavọọ wụ́ ịrẹyị ọnọọ, dị ọ sị Ijeesu jịnẹ vẹ nị. Dị ọ va yaayịtẹ aha ọkarẹyị anị nị. Aā hị́ ịzọọ “Oze ịrẹta”, ama Igabata Ániheberuū hị́ ọọ nị.

¹⁴Ụmẹ agogo ịhịnọnyị ẹnẹnẹ ọ vị ịhị ọnọọ nị. Ịhị ọnọọ ẹ́nịnị siī tenyi ẹngụ zí Eche Ọyịparahu nị. Dị Ipayireti kà a yị Aniju nịnị ka, “Ohinọyị awụ nịnị yọ!”

¹⁵Di e nowu zẹtẹ, dị ẹ ka, “Sị ọọ hụrẹ oze! Sị ọọ hụrẹ oze! Na kanyị ọọ za apavahị!” Dị Ipayireti họ̀ wa ka, “Ma kanyị ohinọyị awụ nịnị za apavahịị?” Di ohirẹsụ ẹbanyị irehi Ohomorihi tụ́ ohi, dị ẹ ka, “Yẹ yị nyị ohinọyị ọsa, ẹ̀ yị vị ohinọyị Aniroomi.”

¹⁶Dị Ipayireti sị Ijeesu chire wa ụvọ ka à na kanyị ọ za apavahị nị. Dị ẹ sị Ijeesu, dị ẹyaa na nị.

¹⁷Dị Ijeesu jịnẹ tụ́ ẹhẹ, dị ọ za apavahị anị, dị ọ sị ọ aa nọ aha ọnya aanị ana aā hị́ “Aha akokoro ịrẹsụ” ọnị Anihiburu anaā hị́ ịzọọ “Ịgọrịgọt”.

¹⁸Dị a kanyị Ijeesu za apavahị tụ́ ịzọọ nị. Dị a rẹ kanyị aza ẹnị ẹẹva za apavahị tụ́ eyi ẹnyị eyi ọsa, di Ijeesu ọnị yà ịnị akakana ẹnịnị nị.

¹⁹Ipayireti chẹrẹ ịsa ọnya, dị ọ vàa kú apavahị Ijeesu nị. Ịsa ọnọọ chẹrẹ yị: “Ijeesu Anịnazarẹtị, Ohinọyị Aniju.”

²⁰Aniju ọrụrụ-ọrụrụ ệ kà ịsa ọnọọ ọnị ọ vavọọ chẹrẹ, agụvị ka ịzị a kanyị Ijeesu za apavahị tụ́, ộ gụrị ẹkụra ẹtẹẹtẹrẹ. Â sị ẹkụra Ihiburu chẹrẹ ẹ, dị a rẹ sị ẹkụra Iratini beri Igiriki vavọọ chẹrẹ ẹ nị.

²¹Dị ohirẹsụ ẹbanyị irehi Ohomorihi Aniju nịnị na kà a yị Ipayireti ka, “Asị ụ chẹrẹ ẹ ka, ‘Ohinọyị Aniju’ ama kà a ka, ‘Ọ ka ọnị ọ vị ohinọyị Aniju nị.’ ”

²²Dị Ipayireti ka, “Ịsị mị sị chẹrẹ, ma sị ọ chẹrẹ da.”

²³Ịjị isoja nịnị raà kanyị Ijeesu za apavahị, dị ẹ kụ́ awuru anị, dị ẹ gà a hi oze ẹẹna nị. Dị isoja ọnya-ọnya ẹnịnị kụ́ oze ọnya-ọnya nị. Dị ẹ rẹ vavọọ sị ọtịnịnẹ awuru anị nị. Ọtịnịnẹ awuru anị vị ene e hí ọnya kẹnẹ, ọza ọ yị gẹ ẹ.

²⁴Dị isoja nịnị ẹnẹẹ kà a yị ẹngụ ka, “Asị ị na a, ama à vẹ ya jị osisii tụ́ ọọ, dị ya yẹ ọza ana àa vọrọ ka ọ̀ sị ọọ!” Ọnọọ ộ mẹ̀ agụvị ịsa ana a chẹrẹ tụ́ ini Iwe Ohomorihi ọ̀ zụ sẹ ka, “Ẹ́ẹ gà ịta amị hi ẹngụ ẹnịnị ụvọ; ệ jị osisii agụvị ọtịnịnẹ awuru amị.” Ịsị isoja nịnị ẹnẹẹ mẹ ọ vị ọnọọ nị.

²⁵Ọnyị Ijeesu ọnịrị onyeyiza ọnyị anị beri Imeri ose Ikiropasị ọnịrị Imeri Anịmagịdara ệ jẹẹ gụrị apavahị Ijeesu.

²⁶Ijeesu ô re ọnyị anị ọnịrị ozirẹma anị oni o sì ịrẹyị anị ka ẹ jẹẹ ịzọọ. Dị ọ kà a yị ọnyị anị ka, “Ịnya, ozi ewu yị!”

²⁷Dị ọ rẹ kà a yị ozirẹma ọnọọ ka, “Ọnyị awụ yị, oo!” Hụrẹ ụmẹ ọnọọ, dị ozirẹma ọnọọ kụkụ sị Imeri ka ọ̀ na ra ini eehi anị nị.

²⁸Ijeesu ộ yẹ ka booro aanị ọnị ọ sị avaba ịsa mẹ ta. Agụvị dị Iwe Ohomorihi ọ̀ zụ sẹ, dị ọ ka enyi aa kụ̀ ọnị nị.

²⁹Â nyị ẹnya ọnya aanị ana yà ịzọọ, eche ọsụrẹyị vị ohihi tụ́ ịnị anị. Dị ẹ sị awẹ, dị ẹ jị ọọ ngụ eche ọnọọ nị. Dị ẹ sị ọọ tụ́ ịrẹsụ ọchị ọnya aanị, dị ẹ sị ọọ tụ́ Ijeesu irenu nị.

³⁰Dị Ijeesu hú eche ọnọọ, dị ọ ka, “Ma sị mẹ ta.” Dị ọ ká ịrẹsụ hi, dị ọ hụrẹ ụhwẹ anị ụvọ nị.

³¹Ịhị ọnọọ vị ẹkụhị ene e siī tenyi ẹngụụ zí ẹkụhị ụhwọtụ. Ẹnịnị ẹ mā zẹẹ ka oku ọ̀ gẹ ịrẹsụ apavahị ne tù ẹkụhị ụhwọtụ. Ẹkụhị ụhwọtụ ọnọọ vị irenyi. Agụvị avọọ, dị Aniju nịnị na kà a yị Ipayireti ka eni èe nee che ẹchụkụ ahụ aza ẹnẹẹ, dị ẹnị ẹ̀ kụ́ wa hụụ ịzọọ.

³²Dị isoja nịnị vẹ, di e che ẹchụkụ ahụ ọnịpaapa ọnịrị ọza ẹnẹsa ana a kanyị ẹnịrị Ijeesu za apavahị nị.

³³E mè ve tù Ijeesu dị ẹ ve tù ka oni ô wusu da, dị ẹnịnị è yi kuku che e ẹchụkụ ahụ nị.

³⁴Dị ọnya ini isoja nịnị ẹnẹẹ sị ọha, di o gù ọ chire Ijeesu akaha, dị anya ọnịrị enyi ká va jịnẹ nị.

³⁵Ọza ene re ka ộ vavọọ mẹ, ọ́ kà a, agụvị dị ẹwụ nịnị ọ̀ rẹ zụ dọ wụ́. Ịrẹyị ọnọọ kà vị ịzẹyịza; ọ rẹ yẹ ka ịzẹyịza ọ́nị aa kà nị.

³⁶Ịsa ẹnẹẹ ệ mẹ, agụvị dị ịrẹyị ana a kà tụ́ ini Iwe Ohomorihi ọ̀ zụ sẹ, ka, “Ọza o yi vee che ẹchụkụ anị ikonya.”

³⁷Iwe Ohomorihi ọ rẹ kà a aha ọsa ka, “E vee re ọza ẹnẹ ẹ vịdị kà ọha ngụ.”

³⁸Â nyị ọnọrụ ọnya aanị ana aā hị́ Ijosẹẹhụ Anarịmatịya. Ozirẹma Ijeesu ọ vị ini ewere nị, agụvị ka angwa Aniju nịnị ee hí ọọ. Dị ọ na dá ịpẹ yị Ipayireti ka ọnị aa naa sị oku Ijeesuu hụụ ịzọọ nị. Dị Ipayireti ka ooho nị. Ijosẹẹhụ ộ na, dị ọ na sị ọọ nị.

³⁹Inikodemọsị ene vịdị ne tù Ijeesu ịrahụ, ộ saasa Ijosẹẹhụ na. Dị ọ sị eturare ana aā hị́ imiiri ọnịrị aaro ene e hura vabẹ za nị. Eturare ọnọọ ộ rata ẹtẹẹtẹrẹ (ẹhụụ ampo anọ ẹẹva avọọ ọ vị nị).

⁴⁰Dị ẹ sị oku Ijeesu, dị ẹ sị ịta ọvwọọvụ, dị ẹ sị eturare ọnọọ tụ́ ọọ, di e si chire e ikuma nị. Avọọ Ániju nịnị memeē ne oku nị.

⁴¹Ịzị a yà kanyị Ijeesu za apavahị aanị, ụbazị ọnya yà ịzọọ. Ịnị ụbazị ọnọọ, â nyị ụsị ọnya aanị ana a chị tụ́ ịnị ịrẹta, ọwọọwa ọ vị nị; ọza ọọ̀ yị sị oku ọnyọọnyị tụ́ ọọ da.

⁴²Dị ẹ sị oku Ijeesu tụ́ ịzọọ nị, agụvị ka ụmẹ ẹkụhị ụhwọtụ Aniju nịnị ee vee tù, dị ịzọọ ộ rẹ gụrị ẹtẹ nị.