Read ebira Ịjọọnụ 20 Bible Online

Ịjọọnụ 20 - ebira bible

Ịjọọnụ 20

¹Ẹnẹnẹ viri-viri, ịnị ẹkụhị ọsẹ, ẹtẹ oò yi hweyi, dị Imeri Anịmagịdara nọ ini ikuta, di o ne tù ka a sị ịrẹta zina hụụnị enoze ikuta ọnọọ nị.

²Di o zwe ne tù Ịsayịmọnị Ipita ọnịrị ozirẹma ọsa oni Ijeesu sì ịrẹyị anị. Dị ọ kà a yị wa ka, “Ẹ raà sị Ananyị yị hụụnị ikuta, ọ! Yẹ yị yẹ ịzị ẹ sị ọọ na tụ́.”

³Dị Ipita ọnịrị ozirẹma ọsa kwẹẹtẹ, dị ẹyaa nọ ini ikuta ọnọọ nị.

⁴Ẹnị ẹyịva vi ene dudu ee zwee na, dị ahịka ozirẹma ọsa o zwe dọ ọvịdị Ipita na ngụ ini ikuta nị.

⁵Di o nyima, di o re ịta ọvụ ọnọọ nị; ama ọ yị ngụ ịnịnẹ ikuta.

⁶Dị Ịsayịmọnị Ipita ọnị aa dụ ọọ vẹ ịrẹma nị. Ọ mẹ̀ vẹ kẹnẹ, dị ọ wụsẹ ngụ ịnịnẹ ikuta nị. Ô re ka ịta ọvụ ẹnẹẹ tịtẹ ịzọọ.

⁷O re re ịta ana a sị para Ijeesu ịrẹsụ. Ọnọọ ọnị ọ yị yà ịzị ịta ana vọ yà; ọnị vị ana kara tụ́ aha anị irenyi.

⁸Di ozirẹma ọsa ana vịdị dọ ọvịdị na ngụ ini ikuta, ọnị rẹ ngụ ịnịnẹ ikuta nị. O mè re e, ộ dọ wụ́.

⁹Ẹnịnị ẹ̀ yị va yẹ Iwe Ohomorihi ana vịdị kà a ka Ijeesu vaa haa hụụnị isu.

¹⁰Di ezirẹma ẹnẹẹ sị varẹma aa nọ eehi nị.

¹¹Di Imeri ọnị jẹẹ ẹhẹ ini ikuta ịzọọ, di ee sụ ùnè nị. O mèe sụ ùnè, di o nyima, dị aa jị eyii ngụ ini ikuta ọnọọ nị.

¹²Di o re ka anggẹẹrị ẹẹva ene chire awuru ọvwọọvụ sẹnẹ-sẹnẹ yaayịtẹ ịzọọ nị. Ọnya yà eyi ịrẹsụ, dị ọsa rẹ yà eyi ahụ ịzị oku Ijeesu vịdị yà nị.

¹³Dị ẹ họ̀ Imeri ka, “Ọnẹẹ ọnọnị, sị ẹ vẹ dị ụ waa jị òrèrè?” Dị ọ ka, “A raà sị Ananyị yị hụụ ịzẹnị, mẹ yị yẹ ịzị ẹ sị ọọ tụ́.”

¹⁴Ịjọọ maanị sị kà, dị ọ kana eyi, di o re ka Ijeesu jẹẹ ịzọọ nị. Ama Imeri ọ yị yẹ ka Ijeesu yọ nị.

¹⁵Dị Ijeesu họ̀ ọ ka, “Ịnya, sị ẹ vẹ di u wee sụ ùnè? Eni u wee sì?” Dị Imeri sị ọọ hị́ ka ọza ene ee sere ụbazị yọ nị. Dị ọ ka, “Aarịhịnị, àa vị ẹwa sị ọọ nị, kà a mị ịzị ụ wàa sị ọọ na tụ́, dị ma na sị ọọ hụụ ịzọọ!”

¹⁶Dị Ijeesu va kà a yọ ka, “Imeri!” Di Imeri kana eyi, dị ọ kà a ịnị ẹkụra Ihiburu ka, “Iraboni” (iruvo anị ọ vị “Iticha” à vị “Ọzwọzịsa”).

¹⁷Dị Ijeesu kà a yọ ka, “Asị ụ sị ụvọ kanyị mị, agụvị ka mẹ yị varẹma nọ ẹbẹẹba ị́dị Ada amị! Ama na kà a yị ẹyịnyara amị ka: maa nọ ẹbẹẹba ị́dị Ada amị ana rẹ vị Ada ẹwụ nịnị; ọnị ọ vị Ohomorihi amị, dị ọ rẹ vị Ohomorihi awụ nịnị nị.”

¹⁸Dị Imeri Anịmagịdara vẹ, dị ọ va kà a yị ezirẹma ana vọ ka ọnị ọ sị Ananyị yị re, dị ọ rẹ kà ịrẹyị ẹnẹnị yị ọnị nị.

¹⁹Oruva ịhị ọnọọ gẹdẹ-gẹdẹ ana vị ẹkụhị ọsẹ, dị ezirẹma Ijeesu kụ́ gụ hi ini eehi, di e chire oze hi ẹngụ nị, agụvị ka angwa Aniju nịnị ee hí wa. Dị Ijeesu vana va jẹẹ ịnị akakana ẹnịnị, dị ọ kụ́ wa ka, “Ẹngwọọrọ ọ̀ vị awụ nịnị!”

²⁰Ịjị ọ vavọọ sị kà, dị ọ sị ụvọ anị ọnịrị akaha anị zụ̀ wa nị. Ịjị ezirẹma nịnị sị Ananyị yị re, dị ẹ kụkụ aa jẹ kẹnẹ nị.

²¹Dị Ijeesu rẹ kụ́ wa ka, “Ẹngwọọrọ ọ̀ vị awụ nịnị!” Dị ọ ka, “Áda amị mẹ̀ tụ́ mị vẹ ẹhẹ, avọọ ẹ́mị mẹ̀ rẹ tụ́ ẹwụ nịnị aa nọ ẹhẹ nị.”

²²Ịjị ọ vavọọ sị kà, dị ọ tụ́ ụhwẹ kú wa nị, dị ọ ka, “Dọ Ụhwẹ Ọnịnị nịnị!

²³Wàa vagu ọza ịnị ịvị anị nịnị, vị Ohomorihi rẹ vagu ọza ọnọọ avọọ nị. Wàa kà a ka ịvị ọza yị yà ịnị ịrẹsụ anị nịnị, vị aa yà ịnị ịrẹsụ anị nị.”

²⁴Â nyị ọnya ini ezirẹma Ijeesu ẹwụrẹva ana aā hị́ Ịtọmọsị Ejima. Ọnị ọ yị yà ịzị ezirẹma ana vọ yà dị Ijeesu ve tù wa.

²⁵Di ezirẹma ana vọ kà a yị Ịtọmọsị ka, “Ya sị Ananyị yị re, ọ!” Dị Ịtọmọsị kà a yị wa ka, “Ẹ̀ yị vị mi re apịtahụ iso ịnị ụvọ anị, dị ma jị igege amị ngụ ọọ, dị ma rẹ jị ụvọ ngụ akaha anị, mẹ yị vaa dọ ọ wụ́.”

²⁶Ịrẹma ẹkụhị ịhịnta para hu, di ezirẹma Ijeesu rẹ kụ́ gụ hi ini eehi nị. Ịtọmọsị kụkụ yà ịzọọ pe wa. Oze vị vị oyichire, dị Ijeesu rẹ vana va jẹẹ ịnị akakana ẹnịnị nị. Dị ọ rẹ kụ́ wa ka, “Ẹngwọọrọ ọ̀ vị awụ nịnị!”

²⁷Dị Ijeesu kà a yị Ịtọmọsị ka, “Sị igege awụ tụ́ ịzẹnị, di u we re ụvọ amị! Rẹ tana ụvọ awụ, dị ụ wa sị tụ́ ịnị akaha amị! Asị ụ rẹ̀ kụkụ mẹ ayị ẹẹva, waa dọ ọ wụ́!”

²⁸Dị Ịtọmọsị tụ́ ọọ ohi, dị ọ ka, “Ananyị yị, Ohomorihi amị!”

²⁹Dị Ijeesu kà a yọ ka, “A vị agụvị ka we si mi re, ụ va dọ wụ́ụ? Aza ene è yi re mi, dị ẹ dọ mị wụ́, vaa daa jẹ.”

³⁰Ijeesu ọ rẹ mẹ̀ ụkọrọ apọtẹrẹwa ọrụrụ-ọrụrụ ọsa éyi ezirẹma anị ọnị ọza ọ̀ yị chẹrẹ tụ́ ini iwe ọnọnị.

³¹Ẹsẹnị vị ana a chẹrẹ, agụvị dị ụ wa dọ wụ́ nịnị ka Ijeesu ọ vị Ikirisiti Ozi Ohomorihi nị; ọnịrị ka wàa sị ayị tụra a nịnị, dị ọ̀ zụ mẹ ka wa nyẹngụ yàra ị́dị Ohomorihi pooro zịna-zịna nịnị.