Read ebira Ịjọọnụ 4 Bible Online

Ịjọọnụ 4 - ebira bible

Ịjọọnụ 4

¹Ananyị yị ộ yẹ ka Anihwarisi nịnị ệ wụ́ ọọ ka ọnị ee tura azaa huna Ịjọọnụ, dị ọnị raa mẹ ọyịhwenyii yị azaa huna a nị.

²Àa ka à ka, Ijeesu ọnị ụvọta ọ yị mẹ̀ ọyịhwọzenyi yị aza; ezirẹma anị kẹnẹ aa mẹ ọyịhwenyii yị aza nị.

³Agụvị avọọ dị ọ hụrẹ Ijudiya dị aa nọ Igariri nị.

⁴Â nyị ka ò zị oze Ịsamarịya.

⁵Dị ọ va ngụ ẹkụra ọnya Ịsamarịya ana aā hị́ Ịsayịka nị. Ịzọọ vị ana gụrị ẹtẹ oni Ijekọvụ sị yị ozi anị Ijosẹẹhụ.

⁶Ịkangga Ijekọvụ vị ana rẹ yà ịzọọ. Íjeesu mè tù ịzọọ, ụsẹ ọnọọ ọ sị ngụ ọọ ẹngụ, dị ọ yaayịtẹ ụtọ ịkangga ọnọọ nị. Ẹhụụ ụmẹ agogo ẹwụrẹva ọọdụ avọọ, ọ vavọọ sị na ngụ ịzọọ nị.

⁷Ọnẹẹ Anịsamarịya ọnya aanị ộ vẹ ịzọọ ka ọnị ọ̀ va dà enyi. Dị Ijeesu kà a yọ ka, “Ká enyi mi, me hú de!”

⁸Ịjọnọọ, ezirẹma Ijeesu e si hu aa naa hị́ ịsọyịrị ini ubooro.

⁹Dị ọnẹẹ Anịsamarịya ọnọọ tụ́ Ijeesu ohi, dị ọ ka, “Ho! Ẹ́wụ ana vị Aniju mẹmẹ nyẹngụ kà a yị ẹmị Anịsamarịya ka ma ká enyi wụ di u we hú ọọ?” Ẹ yị nyị ịsị ẹẹ̄ kụ́ Aniju ọnịrị Anịsamarịyaa gẹ.

¹⁰Dị Ijeesu re tụ́ ọ ohi, dị ọ ka, “À kà ka wâ yẹ ẹyịza oni Ohomorihiī sịị yị ọza, dị ụ rẹ yẹ ọza ana kà ka wa ká enyi yị ọnị di oni ò hú nị, ẹwụ rẹ yaanị dá ịpẹ yọ, dị ọ yaanị sị enyi anaā mẹ ka ọza ọ̀ yàra yị wụ.”

¹¹Dị ọnẹẹ ọnọọ tụ́ ohi, dị ọ ka, “Ọga, ịkangga ọnọnị ộ nyịnẹ, wẹ yị rẹ nyị ịsa ana a vọrọ ka wa sị dà enyi; ịzị ụ vaa sị enyi anaā mẹ ka ọza ọ̀ yàra ọnọọ hụrẹ?

¹²Ijekọvụ ohiku ayị ọ chị ịkangga ọnọnị tụ́ ịzẹnịị yị nị. Ezi anị ọnịrị ịsụpa anịị̄ hú enyi ịnị anị. U wéé ro ka ewee kuku huna Ijekọvụ nị?”

¹³Dị Ijeesu tụ́ ọ ohi, dị ọ ka, “Ọza ene èe hú enyi nị ịkangga ọnọnị, enyi rẹ vanaa kụ̀ ọọ.

¹⁴Ama ọza ene èe hú enyi ẹnẹ ẹmị àa sị yọ, enyi ọ mā vana kụkụ kụ̀ ọọ paa. Enyi ọnọọ ọnị mị vaa sịị yọ vị ana vaa yà anka enyi ẹtẹ ene ee hi ẹtẹ pooro avọọ tụ́ ịnịnẹ ọza ọnọọ; dị aa mẹ ka ọ̀ yàra ị́dị Ohomorihi pooro zịna-zịna.”

¹⁵Dị ọnẹẹ ọnọọ ka, “Ọga, aarịhịnị, ká enyi ọnọọ mị me hú de, dị ‘asị’ enyi kụkụ kụ̀ mị paa, dị asị mị rẹ̀ rẹ kụkụ vẹ ịzẹnị va dà enyi!”

¹⁶Dị Ijeesu kà a yọ ka, “Na hị́ ọva awụ vẹ ịzẹnị!”

¹⁷Dị ọnẹẹ ọnọọ ka, “Mẹ yị nyị ọnọrụ, ọ.” Dị Ijeesu ka, “Wâ kà a ẹtẹẹrẹ ka wẹ yị nyị ọnọrụ.

¹⁸Ọnọrụ ẹẹhị ụ va da nị. Ọza ọnị ụ yà ịdị anị booro aanị, ẹ yị vị ọva awụ ọ vị. Wâ kà ịzẹyịza ịnị ọsọnị.”

¹⁹Dị ọnẹẹ ọnọọ kụkụ ka, “Ọga, mee ro ka ọnịsẹ ụ vị nị.

²⁰Ohiku ẹyị Anịsamarịya vị anaā hẹkẹ Ohomorihi ị́rẹsụ ataba ọnọnị. Ama ẹwụ nịnị Aniju ka Ijerusarẹmị a vọrọ ka à yàa hẹkẹ Ohomorihi nị.”

²¹Dị Ijeesu kà a yọ ka, “Ọnẹẹ ọnọnị, ịzẹyịza m maa kà a wụ nị, ụmẹ aa vẹ ana aza ẹ̀ yị kụkụ vaa hẹkẹ Ohomorihi Ada ayị ịnị ataba ọnọnị, à vị Íjerusarẹmị.

²²Ẹwụ nịnị vị ana aa hẹkẹ ọza ọnị ụ wẹ̀ yị yẹ nịnị; ama àa vị ẹyịị yọ, yâ yẹ ọza ọnị yaa hẹkẹ, agụvị ka ọza ana vaa dọ ọzaa há vị ana vaa hụrẹ ịdị Aniju nịnị ị vẹ.

²³Ama ụmẹ aa vẹ, ộ hyakụ si tù booro aanị, ana aza ana aa mẹ ahẹkẹ obooro, vaa hẹkẹ Ohomorihi Ada ayị ịnị ayị ọnya ọnịrị ịnị ịzẹyịza. Ẹngụ aza ẹnẹẹ Óhomorihi Ada ayị sì ka ẹ̀ẹ hẹkẹ ọnị nị.

²⁴Ohomorihi vị ọza ọnị ọza ò yi zụ re. Agụvị avọọ aza ana àa hẹkẹ ẹ, â nyị ka ẹ̀ẹ sị ayị ọnya ọnịrị ịzẹyịzaa hẹkẹ ẹ.”

²⁵Dị ọnẹẹ ọnọọ ka, “Mâ yẹ ka Imesaya ana aā hị́ Ikirisiti vaa vẹ ẹhẹ. Ọ̀ọ vẹ, ọ vaa kà avaba ịsaa zụ̀ yị.”

²⁶Dị Ijeesu ka, “Ẹmị ene ee pe wuu kà ịrẹyị aanị, ẹma vị Ikirisiti ọnọọ nị.”

²⁷Ịnị ọsọnị ẹ yà aa kà, di ezirẹma Ijeesu vẹ nị. Ô hí wa irenu ka ọnịrị ọnẹẹ aa kà ịrẹyị; ama ẹ yị nyị ọza ẹnịnị ana họ̀ ọnẹẹ ọnọọ use ka si ee sì, ẹ yị rẹ họ̀ Ijeesu ka sị ẹ vẹ di ee pee kà ịrẹyị.

²⁸Dị ọnẹẹ ọnọọ kụkụ navọ ụnọkọ odenyi anị tụ́ ịzọọ, dị ọ varẹma nọ ini ubooro, dị ọ na kà a yị aza ene hi ịzọọ ka:

²⁹“Vẹ nịnị, ve re ọnọrụ ọnya, ana kà a yị mị bemi, avaba ịsị mị vịdị mẹ da. Ẹwáá ka ọnị ọ vị Ikirisiti ọnọọ nị?”

³⁰Dị aza ẹnẹẹ hụụnị ẹkụra, ee nee tù Ijeesu nị.

³¹Ịnị ụmẹ ọnọọ, ezirẹma Ijeesu ệ dá ịpẹ yọ ka, “Ọga, rị ịsa de!”

³²Dị Ijeesu tụ́ wa ohi, dị ọ ka, “Mâ nyị ịsọyịrị ana a vọrọ ka ma rị, ọnị ụ wẹ̀ yị yẹ nịnị.”

³³Dị ezirẹma anị aa họ̀ ẹngụ use ka, “Ẹwáá ka vị a nyị ọza ana sị ịsọyịrị va yọ nị?”

³⁴Dị Ijeesu va kà a yị wa ka, “Ịsọyịrị amị ọ vị ka ma mẹ̀ ịsa ọnị ọza ana tụ́ mị vẹ ẹhẹ sì, dị ma mẹ̀ ụkọrọ anị ta nị.

³⁵Áa vị ẹwụ nịnị ọọ̄ kà a ka: ‘Ọ sị vọ ụhwẹ ẹẹna, dị à kụ́ ịsa ịnị aarẹ gụ?’ Jẹẹ ma kà ịsa ọnyaa wụ nịnị, oo! Kana eyi re aarẹ nịnị, ịsa ịnị anị ẹ sị mẹ, o si tù ka à kụ́ wa gụ.

³⁶Ọza ana aa kụ́ ịsa ịnị aarẹ gụ, vaa dọ ọgụ, ịsa ana aa kụ́ụ gụ vị aza ana vaa yàra ị́dị Ohomorihi pooro zịna-zịna. Ọnọọ vaa mẹ ka ọza ene chire ịsa ọnịrị ọza ana kụ́ ịsa gụ è duduu jẹ.

³⁷Ịrẹyị ana a kà avọọ vị ịzẹyịza, a ka: ‘Ọza ịnya ô chire ịsa, dị ọsa ọnị kụ́ ẹtụtụ anị gụ nị.’

³⁸Maa tụ́ wụ nịnị ka wa na kụ́ ịsa gụ nịnị ịnị aarẹ ọnị ụ wẹ̀ yị vịdị mẹ̀ ụkọrọ ịnị anị nịnị. Aza ẹnẹsa ẹ mẹ̀ ụkọrọ ịzọọ nị, ama ẹwụ nịnị aa naa rị ọgụ ụkọrọ ẹnịnị nị.”

³⁹Aza ọrụrụ-ọrụrụ ịnị Anịsamarịya ẹnẹẹ ệ sị ayị tụra Ijeesu agụvị ịrẹyị ọnị ọnẹẹ ọnọọ kà ka, avaba ịsị ọnị vịdị mẹ da, ọ kà yị ọnị nị.

⁴⁰Ịjị Anịsamarịya ẹnẹẹ ve tù Ijeesu, dị ẹ dá ịpẹ yọ ka ọ̀ yà ịda ẹnịnị chee nị. Dị Ijeesu yà ịzọọ mẹ ẹkụhị ẹẹva nị.

⁴¹Aza ọrụrụ-ọrụrụ ệ vana sị ayị tụra a agụvị ịrẹyị oni Ijeesu ọnị ụvọta kà yị wa.

⁴²Dị ẹ kụkụ kà a yị ọnẹẹ ọnọọ ka, “Ẹ ya raà sị ayị tụra a booro aanị, ẹ yị vị agụvị ịrẹyị ọnị ụ kà yị kẹnẹ; ama ẹyị ụvọta ọ sị ịrẹyị anị wụ́, ya sị yẹ ka ịzẹyịza, ọnị ọ vị Ikirisiti, ana vị Ọdọzaha anẹhẹ nị.”

⁴³Íjeesu mẹ̀ sị ẹkụhị ẹẹva mẹ ịzọọ, dị ọ hụụ ịzọọ, dị aa nọ Igariri nị.

⁴⁴Ijeesu ọnị ụvọta ộ vịdị sị ọọ kà ka, “Ọnịsẹ ọ mā nyị ụbanyị ịnị ẹkụra anị.”

⁴⁵Ị́jeesu mẹ̀ va sị ngụ Igariri, anịzọọ ệ dọ ọ, agụvị ka ẹ́nịnị mẹ̀ nọ Ijerusarẹmị na rị Eche Ọyịparahu, ê re avaba ịsa oni Ijeesu mẹ.

⁴⁶Dị Ijeesu rẹ va nọ Ikana ịnị ẹtẹ Igariri, ịzọọ vịdị yà sị enyi vara eche nị. Â nyị ọzọbanyị ọnya ịzọọ, ẹnẹ ẹngụ aa zị ozi anịị tụ́ Ikapanawumi.

⁴⁷Ọ́nọrụ ọnọọ mẹ̀ wụ́ ka Ijeesu ọ sị hụrẹ Ijudiya va ngụ Igariri, di o ne tù ọ nị. Dị ọ dá ịpẹ yị Ijeesu ka ò chí vẹ, dị ọ̀ va mẹ ozi ọnọrụ anị ụkụ, agụvị ka ee vee sú nị.

⁴⁸Dị Ijeesu kà a yọ ka, “Ẹ̀ yị vị u re apọtẹrẹwa ọnịrị ụkọrọ ohyozirenu nịnị, wẹ mā dọ wụ́ nịnị.”

⁴⁹Dị ọzọbanyị ọnọọ ka, “Ọga, vẹ ye chí na, di ozi emi ò ve sú de!”

⁵⁰Dị Ijeesu kà a yọ ka, “Waa na, ka ozi ewu vaa daahi.” Ọnọrụ ọnọọ ộ dọ ịrẹyị oni Ijeesu kà yọ wụ́, dị aa na nị.

⁵¹Ọ́nọrụ ọnọọ mèe chíi na, di ezi ahụ anị va gẹrị ọọ, dị ẹ kà a yọ ka, “Ozi ewu ọ sị nyima aa daahi ọ!”

⁵²Dị ọ họ̀ wa use ka, ye re ụmẹ oni o si nyima aa daahi nị? Dị ẹ kà a yọ ka, “Ụmẹ agogo ọnya ịnị ọọdụ ẹẹrị, ọ́vanggoro anị ta nị.”

⁵³Dị ada ozi ọnọọ sị yẹ ka ụmẹ ọnọọ gẹdẹ-gẹdẹ Íjeesu sị kà a ka ozi anị vaa daahi nị. Dị ọnị ụvọta ọnịrị avaba aneehi anị sị ayị tụra Ijeesu nị.

⁵⁴Ọnọọ ọ vị apọtẹrẹwa ọhụva oni Ijeesu mẹ, ọ mẹ̀ hụrẹ Ijudiya va ngụ Igariri nị.