Read ebira Ịjọọnụ 7 Bible Online

Ịjọọnụ 7 - ebira bible

Ịjọọnụ 7

¹Ịrẹma ẹnẹẹ, di Ijeesu aa ngụ Igariri zịịzị nị. O yi sì ka ọnị ọ̀ varẹma nọ Ijudiya, agụvị ka Aniju nịnị ene hi ịzọọ, ee sì ka ẹnị ẹ̀ wụ ọ.

²Aniju nịnị aa vaa rị eche ẹnịnị ọnya ana aā hị́ Eche Ajẹngụ.

³Dị ẹyịnyara Ijeesu kà a yọ ka, “Hụụ ịzẹnị, dị ụ wa nọ Ijudiya, di ezirẹma awụ ene hi ịzọọ ẹ̀ nyẹngụ re ụkọrọ ọnị ụ waa mẹ!

⁴Ọza ene èee sì ka eyi ọ̀ yẹ ọnị, ọ mā sị ụkọrọ anị tẹ. Ụ mẹ̀ maanị aa mẹ̀ ụkọrọ ẹnẹnị aanị, sị ẹngụ awụ zụ̀ anẹhẹ dị è re e!”

⁵Ẹyịnyara Ijeesu ịnyẹmba ẹnị ẹyị hyakụ sị ayị tụra a bẹẹ.

⁶Dị Ijeesu kà a yị wa ka, “Ụmẹ amị o yi tù, ama avaba ụmẹ vị ụmẹ ẹwụ nịnị.

⁷Anẹhẹ ẹ yị zụ nyị ịhyẹrẹ awụ nịnị, ama ẹyaa nyị ịhyẹrẹ ẹmị, agụvị ka mịị̄ kà a yị wa ka ẹ yaa mẹ̀ ịsa odivi.

⁸Ẹwụ nịnị ọ̀ọ hịrẹẹ nọ ini eche ọnọọ! Ẹmị ẹ̀ yị nọ, agụvị ka ụmẹ amị oò yi tù.”

⁹Ịjị ọ maanị sị kà, dị ọ yị yà Igariri nị.

¹⁰Ịjị ẹyịnyara anị si hu, dị Ijeesu ọnị raa hịrẹẹ nọ ini eche ọnọọ nị. Ama vi o were na nị, ọ yị sị ẹngụ tụ́ ẹhẹ na ọ maa na.

¹¹Dị Aniju nịnị ee sì ọọ ịzị ẹ yà rị eche nị. Dị ẹ ka, “Ịzị ọ yà kẹ?”

¹²Dị aza tangwa aa kà ịrẹyị Ijeesu nyamaa nị. Aza ẹnyị ka ọza ọyịza ọ vị nị; aza ẹnyị ka eyiye, vi ee vene aza nị.

¹³Ama ẹ yị nyị ọza ana nyayịnẹ kà ịrẹyị anị tụ́ ẹhẹ, agụvị ka eyee hí angwa ọdọvịdị Aniju nịnị.

¹⁴Ịjị a sị ngụ achẹva eche, dị Ijeesu nọ ini irehi Ohomorihi, dị ọ na zụ̀ aza ịsa nị.

¹⁵O si hí wa irenu, dị ẹ ka, “Ọ́nọrụ ọnọnị mẹmẹ maanị yẹ ịsa, ịrẹma ọnọ ọ̀ yị kọsẹ iwe da?”

¹⁶Dị Ijeesu tụ́ wa ohi, dị ọ ka, “Ịsị maa sịị zụ̀ aza aanị, ẹ yị vị ịrẹyị ẹmị ụvọta ọ vị, ama ịrẹyị Ọza ana tụ́ mị vẹ ẹhẹẹ yọ nị.

¹⁷Ọza ana àa mẹ̀ ịsa ọnị o sì, vaa yẹ ịsị maa sịị zụ̀ aza aanị, àa vị ịrẹyị Ohomorihii yọ nị, à vị ka ẹ́ẹngụ amị kẹnẹ m maa dàa kà nị.

¹⁸Ọza ana àaa dà ẹngụ anịị kà, vị ene ee sì ụbanyị yị ẹngụ anị. Ama ọza ene èee sì ụbanyịị yị ọza ana tụ́ ọọ, ọnị ọ vị ọnịzẹyịza nị, o mē vene ọza.

¹⁹Aanịka Imosiisi ọ yị vịdị sị ọdaa wụ nịnị? Áá nyị ọza awụ nịnị ana saasa ọda ọnọọ? Sị ẹ vẹ di u wee sì ka wa wụ̀ mị nịnị?”

²⁰Dị ọkọnị aza ẹnẹẹ tụ́ Ijeesu ohi, dị ẹ ka, “Wáá yẹ ka ụhwẹ echu yà ịnị ẹngụ awụ? Ene ee sì ka ọnị ọ̀ wụ wụ?”

²¹Dị Ijeesu kà a yị wa ka, “Mâ mẹ̀ ụkọrọ ọbanyị ọnya, o si hí avaba awụ nịnị irenu.

²²Imosiisi ộ vịdị kà a wụ nịnị ka waa jị ozi ewu nịnị ụvẹvẹnẹ, ama ẹ yị vị Imosiisi ọnị ụvọta ọ kà a, ohiku awụ nịnị o nyima anị nị. Ụụ̄ hyakụụ jị ozi ọnọrụ awụ nịnị ụvẹvẹnẹ ịnị ẹkụhị ụhwọtụ.

²³Waa jị ozi ewu nịnị ụvẹvẹnẹ ịnị ẹkụhị ụhwọtụ, agụvị asị ụ jịnẹ ọda Imosiisi nịnị. Sị ẹ vavẹ dị ụ waa kụ́ ayịị hi mi nịnị, agụvị ka mâ mẹ ọza ụkụ saka-saka ịnị ẹkụhị ụhwọtụ?

²⁴Asị ụ rẹ̀ mẹ̀ ọkarẹyị eyi-eyi nịnị, waa sị ịzẹyịzaa mẹ̀ ọkarẹyị nịnị.”

²⁵Dị Anijerusarẹmị ẹnyị ka, “Aanịka ẹ yị vị ọza ene eyee sì ka ẹnị ẹ̀ wụ yị?

²⁶Wee re! Ọnị aa kà ịrẹyị eyi ịnọyị-ịnọyị, dị ẹ̀ yị nyị ọza ana kanyị ọọ aanị nọ! Ẹwáá ka vị ọdọvịdị nịnị sị dọ ka ịzẹyịza ọnị ọ vị Ikirisiti ọnọọ nị?

²⁷Ama ẹ yâ yẹ ịzị ọnọrụ ọnọnị hụrẹ vẹ. Ịhị Ikirisiti ọnọọ ọ̀ọ vẹ, ẹ yị vaa nyị ọza ana yẹ ịzọọ hụrẹ vẹ.”

²⁸Íjeesu màa zụ̀ aza ịsa ini irehi Ohomorihi, dị ọ kà ịrẹyị tụ́ ẹba nị, dị ọ ka, “Wáá yẹ mị nịnị? Wáá rẹ yẹ ịzị mị hụrẹ vẹ nịnị? Ẹ yị vị ẹmị ụvọta ọ tụ́ ẹngụ amị vẹ ẹhẹ. Ọza ana tụ́ mị vẹ ẹhẹ vị ọnịzẹyịza; ama wẹ yị yẹ ẹ nịnị.

²⁹Ama ẹmị â yẹ ẹ, agụvị ka ịdị anị mị hụrẹ vẹ nị; ọnị ọ rẹ tụ́ mị vẹ ẹhẹ nị.”

³⁰Ịjọnọọ di eyee sì ka ẹnị ẹ̀ za a nị; ama ẹ yị nyị ọza ana sị ụvọ kanyị ọọ, agụvị ka ụmẹ anị oò yi tù.

³¹Ama aza ọrụrụ-ọrụrụ ịnị ọkọnị aza ẹnẹẹ ệ sị ayị tụra a, dị ẹ ka, “Áá nyị Ikirisiti ana kụkụ vaa vẹ, ana ahịka ọ kụkụ vaa mẹ̀ ụkọrọ apọtẹrẹwa ene huna ana ọza ọnọnị aa mẹ aanị?”

³²Anihwarisi nịnị ệ wụ́ ka aza tangwa vavọọ aa kà ịrẹyị Ijeesu. Agụvị avọọ dị ẹnịrị ohirẹsụ ẹbanyị irehi Ohomorihi tụ́ iporisi irehi Ohomorihi ka ẹ̀ na za Ijeesu vẹ nị.

³³Dị Ijeesu ka, “Mị vaa yàa pe wu nịnị chee, dị ma va nọ ịdị Ọza ana tụ́ mị vẹ ẹhẹ.

³⁴U vee sì mi nịnị, di u we yi kuku re mi nịnị; agụvị ka ịzị maa nọ, wẹ yị zụ nọ ịzọọ nịnị.”

³⁵Dị Aniju nịnị aa kà a yị ẹngụ ka, “Ịzị ị yẹ ka ọ vaa nọ, di ye yi zụ re e? Ẹwáá ka vị ọ vaa nọ ịdị Anigiriki ịzị Aniju gara hi, dị ọ̀ naa zụ̀ Anigiriki nịnị ịsa ịzọọ nị?”

³⁶Ẹngụ ịrẹyị ịsị aa hị́ avọọ, ka, “U vee sì mi nịnị, di u we yi zụ re mi nịnị; ịzị màa yà, wẹ yị va zụụ vẹ ịzọọ nịnị?”

³⁷Ẹkụhị ọdịrẹma eche ọnọọ, o hu keekere nị. Ịhị ọnọọ, dị Ijeesu kwẹẹtẹ jẹẹ, di o nowu dị ọ ka, “Ọza ene enyi àaa kụ̀, ọ̀ọ ká mịị vẹ, di ò ve hú enyi obooro!

³⁸Â kà a tụ́ ini Iwe Ohomorihi ka enyi anaā mẹ ka ọza ọ̀ yàra obooro, vee sìi hụụnị ayị ọza ana àa sị ayị tụra mịị jịnẹ.”

³⁹Ịrẹyị ọnọnị oni Ijeesu kà aanị vị ịnị ịpa Ụhwẹ Ọnịnị, oni Ohomorihi vaa sị yị aza ana sị ayị tụra a, agụvị ka Ohomorihi ọọ̀ yị sị Ụhwẹ Ọnịnị yị aza ịnị ụmẹ ọnọọ, agụvị ka Ijeesu ọọ̀ yị dọ ụbanyị.

⁴⁰Aza mẹ̀ wụ́, Íjeesu mẹ̀ maanị kà, dị aza ẹnyị ẹnịnị ka, “Ịzẹyịza, ọnọrụ ọnọnị ọ vị Ọnịsẹ ọnọọ nị.”

⁴¹Dị aza ẹnyị ka, “Ọnị ọ vị Ikirisiti ọnọọ nị.” Ama dị aza ẹnyị ka, “Aanịka Igariri Íkirisiti ọnọọ vaa hụrẹẹ vẹ nị?

⁴²Áá vi Iwe Ohomorihi kà a ka ịpa evere Idevidi Íkirisiti vaa hụrẹẹ vẹ nị; dị ahịka Ịbẹtịrẹhẹmị a yà ma a nị. Ịzọọ Ídevidi vịdị ra nị.”

⁴³Agụvị avọọ aza ẹnẹẹ ẹ kụ́ gà hi agụvị Ijeesu.

⁴⁴Aza ẹnyị yaanị sì ka ẹnị ẹ̀ za a, ama ẹ yị nyị ọza ana sị ụvọ kanyị ọọ.

⁴⁵Dị iporisi ẹnẹẹ vavẹ ve tù ohirẹsụ irehi Ohomorihi ọnịrị Anihwarisi nịnị nị. Dị ẹ họ̀ iporisi ẹnẹẹ ka, “Sị ẹ vẹ dụ wẹ̀ yị za a vẹ nịnị?”

⁴⁶Dị iporisi ẹnẹẹ ka, “Ẹẹ̀ yị nyị ọza ana maanị kà ịrẹyị anka ọnọrụ ọnọọ da o.”

⁴⁷Dị Anihwarisi nịnị tụ́ ohi, dị ẹ ka, “Vị ọ́ọ́ rẹ sị ẹwụ nịnị vene bẹẹ nị?

⁴⁸Áá nyị ọdọvịdị nịnị, àa vị Anihwarisi nịnị oni u re ka ộ dọ ọ wụ́ da?

⁴⁹Ọkọnị aza ẹnẹnị ẹnị vị ẹnẹ ẹ̀ yị yẹ ọda Ohomorihi, dị ẹ dọ ọ wụ́, o du waa kù!”

⁵⁰Inikodemọsị ana vịdị vẹ ịdị Ijeesu ịrahụ, ọnị rẹ vị ọnya ịnị ẹnịnị. Dị ọ kà a yị wa ka:

⁵¹“Wáá yẹ ka ọda ayị ọ yị zẹẹ ka à jị ịvị yị ọza, ẹ̀ yị vị a zẹẹ ka ọ̀ kụ́ irenu anị, dị à yẹ ịsị ọ mẹ?”

⁵²Dị ẹnịnị ka, “Anigariri ẹwụ wáá rẹ vị nị? Na zama Iwe Ohomorihi re, di u we re ka ẹ̀ yị nyị ọnịsẹ ikonya ana chị hụrẹ Igariri vẹ da.”

⁵³[Dị ọzọza si hu aa nọ eehi anị nị.