Read ebira Odeyi 24 Bible Online

Odeyi 24 - ebira bible

Odeyi 24

¹Ịrẹma ẹkụhị ẹẹhị kwooze, di ohirẹsụ ọbanyị irehi Ohomorihi ana aā hị́ Ananịya chí nọ Isesariya nị. Ọnịrị azọkụ nịnị beri ọza ịnya ana yẹ eyi ịrẹka ọyịkụ ana aā hị́ Iteturọsị ẹ zị na nị. Ịjị e tù ịda ịgọvọnọ ọnọọ, dị ẹ kà a yọ ịrẹyị ẹnẹẹ sị za Ịpọọrụ nị.

²A mẹ̀ hị́ Iteturọsị, dị aa kà ịrẹyị anaa ka Ịpọọrụ ộ mẹ̀ nị. Dị ọ ka, “Taarụ! Ẹwa mẹ ka ya maanị nyị ẹngwọọrọ ẹtẹẹtẹrẹ nị. Ịrẹyọyẹ awụ ọ raà mẹ ka we tenyi ịsa ọrụrụ-ọrụrụ ịnị ẹkụra ayị.

³Ịnị ayị ô hine tụ́ ịnị avaba ịsa ẹnẹnị ẹtẹẹtẹrẹ. Taarụ! Yâ kụ́ wụ avọ ẹtẹẹtẹrẹ.

⁴Me yi sì ka me du ụmẹ awụ ha. Aarịhịnị, nyị isuuru, dụ wa wụ́ ịrẹyị chee ọnị ị za vẹ.

⁵Ya sị yẹ ka enezigi ọ́nọrụ odivi ọnọnị vị nị. Aa mẹ ka avaba Aniju nịnị avaba ẹhẹ ệ mẹ ẹvazi. Ọnị ọ vị ọdọvịdị ogu Anịnazarẹtị nịnị nị.

⁶Vi o ree sì ka oni ò du irehi Ohomorihi ẹngụ, dị ị zaa nị. [Ị yaanị sị ọkarẹyị mẹ yọ anka ọda ayị;

⁷ama Irisiya ọga ọbanyị isoja nịnị ộ vẹ, dị ọ va sị ụkata dọ ọ hụrẹ yị ụvọ nị.

⁸Dị ọ ka aza ana zaa, ẹ̀ vẹ ịda awụ nị.] Wàa họ̀ ọnọrụ ọnọnị use, ụ vaa yẹ ịzẹyịza, ịsị ẹ vẹ dị ị va zaa.”

⁹Dị Aniju nịnị dọ ọ ivenu ka ịzẹyịza avaba ịsa ọnọọ kà vị nị.

¹⁰Di ịgọvọnọ mi Ịpọọrụ ụvọ ka ọ̀ kụ́ irenu anị nị. Dị Ịpọọrụ ka, “Mâ yẹ ka o si kù ọnị ụ hụrẹ vị ọmọkarẹyị tụ́ ịnị ẹkụra ọnọnị. Ịnẹ amị ô hine ka ma kà irenu amị zụ̀ wụ.

¹¹A zụ hwọọ wâ yẹ ka o yi huna ẹkụhị ẹwụrẹva ọnị mị hịrẹ nọ Ijerusarẹmị ka ma na hẹkẹ avọọ.

¹²Aniju nịnị eyi re ka mê beri aza nyị ahankata ini irehi Ohomorihi. Eyi re re ka mâ tụ́ ọza ịrẹyị ini irehi Ohomorihi nịnị, àa vị ịnị ẹkụra

¹³Ẹ yị nyị ịsị ẹ rẹ zụ sị sị zụ̀ wụ ka ịsị ẹ ka mâ mẹ aanị vị ịzẹyịza.

¹⁴Mâ dọ ka hịịn, maa hẹkẹ Ohomorihi ada ayị nịnị ini oze Ikirisiti ẹnẹ ẹnị ka ọyị vọrọ. Mâ dọ avaba ịsa anaa chẹrẹ tụ́ ịnị ọda wụ́ beri ịrẹyị ọnị ọnịsẹ nịnị rẹ chẹrẹ tịtẹ.

¹⁵Ẹma rẹ nyị ọyịtureyi ini Ohomorihi, anka ẹ́nị mẹ̀ rẹ nyị, ka oku nịnị vaa haa kwẹẹtẹ hụụnị isu, ọnọọ vị ka oku ọnịzẹyịza ọnịrị oku aza ẹnẹ ẹ̀ yị vị ọnịzẹyịza.

¹⁶Dị maa sịị vụrị ka me re ka ayị amị ộ nị ọ́vịdị Ohomorihi ọnịrị aza nị.

¹⁷“O si kù ọnị mị hụrẹ Ijerusarẹmị. Dị mị va nọ ịzọọ ka ma sị ẹkẹhị na yị aza amị, dị ma rẹ mẹ̀ ịsọvọ hi Ohomorihi nị.

¹⁸Ịjị mị sị ẹngụ amị vara ọnịnị, dị Aniju ẹnyị ana hụrẹ Esiya vẹ, ve re mi ini irehi Ohomorihi ka maa mẹ̀ ịsọvọ hi Ohomorihi nị. Ẹ yị nyị ọkọnị aza ana kara mị, ẹ yị rẹ nyị ẹvazi.

¹⁹Aniju ẹnẹẹ ẹ̀ẹ ka â nyị ịsị mị mẹ, ẹnị a vọrọ ka ẹ̀ vẹ, dị ẹ̀ va kụ́ irenu ẹnịnị nị.

²⁰Ẹ̀ yị vị avọọ, aza ẹnẹnị ene hi ịzẹnị aanị, ẹ̀ kụkụ kà a ịsị ẹ ka mâ mẹ, dị ẹnị za mị nọ ịnị ikootu.

²¹Ama mâ yẹ kẹnẹ ka mâ kà ịrẹyị ọnya, m mẹ̀ yà ịnị akakana ẹnịnị ịzọọ ka mâ dọ wụ́ ka oku nịnị vaa haa hụụnị isu; agụvị avọọ ẹ za mị nị.”

²²Ịhwẹrịsị ộ yẹ ini oze Ikirisiti ẹtẹẹtẹrẹ. Dị ọ za ịrẹyị ọnọọ jẹẹ nị. Dị ọ ka, “Ịjị Irisiya ana vị ọga ọbanyị isoja nịnị ọ̀ọ vẹ, mị vaa mẹ̀ ọkarẹyị ịrẹyị awụ nịnị.”

²³Dị ọ ka ọga isoja nịnị ẹchẹhị ọnya ò sị eyi pe Ịpọọrụ nị. Ọ kà ọ̀ sị oze yị Ịpọọrụ, dị ọ̀ rẹ navọ aza Ịpọọrụ ka è ve hee yi, dị ẹ̀ rẹ sị ịsa yọ.

²⁴Ộ mẹ ẹkụhị chee, di Ịhwẹrịsị ọnịrị ose anị ana aā hị́ Idirusira vẹ nị. Ose anị ọnọọ vị Aniju. Dị ọ tụ́ na hị́ Ịpọọrụ, dị ẹ wụ́ ịrẹyị, a mẹmẹ zụ sị ayị tụra Ijeesu Ikirisiti nị.

²⁵Ịjị Ịpọọrụ aa kà ịrẹyị ka â vọrọ ka ọza ọ̀ọ mẹ ịzẹyịza, dị ọ̀ sị ụvọ za ẹngụ anị, dị ọ rẹ ka ẹkụhị ọkarẹyị aa vẹ, angwa ee hí Ịhwẹrịsị. Dị ọ ka Ịpọọrụ ọ̀ọ na da, ka ọnị rẹ vanaa tụ́ hị́ ọọ, ịhị oni òo re oze nị.

²⁶Ịhwẹrịsị o re roo ka Ịpọọrụ daba vaa sị ẹkẹhịị chire ọnị irenu; agụvị avọọ dị aa tụ́ naa hị́ Ịpọọrụ ụpọsa-ụpọsa di ee beri ọọ kà ịrẹyị.

²⁷Ị́rayị ẹẹva mẹ̀ sị mẹ para hu, dị Ịpọkịyọsị Ịhwẹsịtọsị dọ Ịhwẹrịsị ịrẹsụ nị. Ịhwẹrịsị ô sì ka ọnị ọ̀ mẹ ịsị Aniju nịnị sì, agụvị avọọ dị ọ navọ Ịpọọrụ tụ́ ịnị ẹngwa nị.