Read ebira Aniroomi 1 Bible Online

Aniroomi 1 - ebira bible

Aniroomi 1

¹Ẹma vị Ịpọọrụ ozi ahụ Ijeesu Ikirisiti nị. Ohomorihi ộ hị́ mị ka ma vị ozirẹma Ijeesu, dị ọ̀ rẹ nyị mị ka ma kà enube ọyịza anịị yị aza nị.

²Ohomorihi ộ mẹ̀ ka ọnịsẹ nịnị ẹ̀ vịdị kà a tịtẹ ini iwe Ohomorihi ka a vaa kà enube ọyịza ọnọọ.

³Enube ọyịza ọnọọ vị ịrẹyị Ijeesu Ananyị yị Ikirisiti. Ozi Ohomorihi ọ vị nị. Anka ini oze ọza kẹnẹ, ozi Idevidi ọ vị nị.

⁴Ama ini oze ka Ohomorihi ộ ha a hụụnị isu, ọnọọ ộ sị zụ̀ ka ịdị Ohomorihi ọ hụrẹ vẹ nị, ọnịrị ka Ozi Ohomorihi ọnị ọ sị avaba ụkata yị ọ vị nị.

⁵Ikirisiti ô nyị mi iyi ka ma vị ozirẹma anị, dị ma zụ sị oze zụ̀ avaba anẹhẹ ka ẹ̀ sị ayị tụra a, dị ẹ̀ rẹẹ wụ́ ịrẹyị chire Ohomorihi. Mi vavọọ aa mẹ agụvị ịrẹha anị.

⁶Ịrẹyị ọnọọ ộ rẹ kanyị ẹwụ nịnị Aniroomi bẹẹ, oni Ohomorihi sị hị́ ka wa vị aza Ijeesu oni Ohomorihi nyị ka ọ̀ dọ yị há nịnị.

⁷Mâ kụ́ avaba awụ nịnị ene hi Iroomi oni Ohomorihi sì ịrẹyị anị, dị ọ hị́ wụ nịnị ka wa vị aza anị. Ohomorihi Ada ayị ọnịrị Ijeesu Ananyị yị ọnị ọ nyị ka ọ̀ dọ yị há ẹ̀ mẹ ọyịza wụ nịnị, dị ẹ̀ rẹ sị ẹngwọọrọ yị wụ nịnị!

⁸Ịpaapa da, ini oze Ijeesu oni Ohomorihi nyị ka ọ̀ dọ yị há, mâ kụ́ Ohomorihi avọ agụvị avaba awụ nịnị; aa kà a ngụ avaba ẹhẹẹ zị, ụ mẹmẹ sị ayị tụra Ijeesu oni Ohomorihi nyị ka ọ̀ dọ yị há nịnị.

⁹Mâ sị Ohomorihi ọnị maa sị ayị ọnyaa hẹkẹ, ịnị ka maa kà enube ọyịza Ozi anị tẹ̀ ivenu, ka ẹ yị nyị ka maa mẹ̀ aduwa dị mẹ̀ yị tamayị awụ nịnị.

¹⁰Maa dá ịpẹẹ yị Ohomorihi ka ọ̀ navọ dị ọ̀ mẹ oze mị, anka o mè sì ọọ, dị me ve hee wu nịnị ọgọnị.

¹¹Ayị amị ộ sị ọọ ẹtẹẹtẹrẹ ka me ve hee wu nịnị, dị ma zụ sị ẹyịza ọnị Ụhwẹ Ohomorihi sị yị mị yị wụ nịnị, dị ụ wa zụ nyị ụkata nịnị.

¹²Ịsị maa kà ọ vị ka, màa vẹ, di mi re ụ mẹmẹ sị ayị tụra Ijeesu nịnị nị, ọ vaa mẹ ka ma nyị ọtụtụrụma hu avọọ. Ẹwụ nịnị òo re re, ẹmị mẹmẹ rẹ sị ayị tụra Ijeesu, ọ rẹ vaa mẹ ka ẹwụ nịnị ọ rẹ nyị ọtụtụrụma.

¹³Ẹwụ nịnị ẹyịnyara amị, mee sì ka wa yẹ nịnị ka ụpọsa-ụpọsa mi sii sì ka me ve hee wu nịnị nị, ama dị ịsa ọsa rẹ sị mị dọ oro. Mee sì ka ụkọrọ amị ọ nyị ọgụ ịdị awụ nịnị, anka ọ mẹ̀ rẹ nyị ọgụ ịdị anẹhẹ ana vọ.

¹⁴Avaba aza mị rị ụta nị. Mâ rị aza ana nyị eyohweyi ụta; mâ rẹ rị anịnavị ụta. Ọyiwe ọnịrị aza ẹnẹ ẹ̀ yị yẹ iwe vị ọnị mị rị ụta vabẹ.

¹⁵Agụvị avọọ ma sị ẹngụ tenyi, di me re ka ma rẹ kà enube ọyịza yị ẹwụ nịnị ene re hi Iroomi bẹẹ.

¹⁶Mẹ yị nyị ụhị agụvị enube ọyịza. Ụkata oni Ohomorihi aa sị dọ ọza ana dọ wụ́ụ há ọ vị nị. Aniju nịnị o vịdị tù, di o re ve tù Anigiriki u nịnị nị.

¹⁷Ini oze enube ọyịza, Ohomorihi ộ sị zụ̀, ọ mẹmẹẹ̄ mẹ ka aza ẹ̀ vị ọnịzẹyịza. Avaba anị ộ jẹẹ tụ́ ịrẹsụ ka ọza ọ̀ sị ayị tụra Ohomorihi hụụnị oyinyima ne tù ẹzẹtẹ; anka a mẹ̀ vịdị chẹrẹ ẹ tụ́ ini Iwe Ohomorihi ka: Aza ana vị ọnịzẹyịza (ini eyi Ohomorihi) vaa yàra, agụvị ka ệ sị ayị tụra a.

¹⁸Ohomorihi ọ raà sị zụ̀ hụrẹ ẹbẹẹba ọnị mẹmẹ vaa sị ọyịkụ-ọyịkụụ mẹ̀ ọkarẹyị yị aza agụvị ebira odivi ẹnẹ ẹyaa mẹẹ hi Ohomorihi ọnịrị aza. Ebira odivi ẹnẹ ẹyaa mẹ, ẹ yị zẹẹ ka aza ẹ̀ yẹ ịzẹyịza Ohomorihi.

¹⁹Ịsa ana vọrọ ka aza ẹ̀ yẹ ini oze Ohomorihi, ệ yẹ ẹ, agụvị ka Ohomorihi ọnị ụvọta ọ sị zụ̀ wa nị.

²⁰Óhomorihi mẹ̀ hụrẹ mẹ ẹhẹ, ọ raà sị ẹngụ ọza ọnị ọnị vị zụ̀, ọza ọ̀ yị daka zụ re e. Agụvị ka ọnị ọ mẹ avaba ịsa nị, aza e zụ re e gedebee ka ụkata anị yà ịzọọ pooro zịna-zịna. Ẹ rẹ zụ zị oze avọọ re e ka ọnị ọ vị Ohomorihi nị. Ẹ yị nyị ọza ene kuku re kụ́ vụrụ-vụrụ.

²¹Aza ệ yẹ Ohomorihi, ama ẹ mā sị ụbanyị ana a vọrọ ka à sị yọ; ẹnịnị ẹ mā hyakụ kụ́ ọ avọ. Agụvị avọọ, ịrẹyị kẹnẹ-kẹnẹ ẹnịnị kuku ee ro nị. Ayị ẹnịnị e si hozi, ẹnịnị e mē ro ịrẹyị ana vọrọ.

²²Ẹ ka ẹnị ệ yẹ ịrẹyị, ama ọnụra obooro ẹ vị nị.

²³Ana a vọrọ ka ẹ̀ yaanị sịị sị ụbanyịị yị Ohomorihi ana yára pooro zịna-zịna, ê yi. Ẹ kụkụ aa hẹkẹ ịsa ana a bẹ véné ọzarẹyịrẹsụ ọnịrị inomi beri uye ọnịrị ẹwụ nịnị.

²⁴Agụvị avọọ di Ohomorihi kụkụ navọ wa ka ẹ̀ẹ mẹ̀ ebira ịdọtị ọnị ọchẹngụ ẹnịnị sì nị. Dị ẹ kụkụ aa mẹ̀ ebira ụhịị hi ọchẹngụ ẹnịnị nị.

²⁵Ẹ raà sị ireche dọ ịzẹyịza Ohomorihi ịrẹsụ. Ẹyaa hẹkẹ ịsa ọnị Ohomorihi mẹ, ama ẹ yị hẹkẹ Ohomorihi ana mẹ avaba ịsa ẹnẹẹ. Ohomorihi ọnọọ a vọrọ ka àa ga pooro nị. Aamị.

²⁶Agụvị ka aza vavọọ aa mẹ, di Ohomorihi kụkụ navọ wa ka ẹ̀ẹ mẹ̀ ịsa edivi ọnị ọchẹngụ ẹnịnịị̄ sì, anaā sịị ụhịị nyị ọza nị. Anyẹnẹẹ ẹnịnị bẹẹ ee du ẹhẹ, dị ẹyaa nọ ịdị ẹngụ.

²⁷Avọọ anọrụ ẹnịnị me ree du ẹhẹ nị. Ệ navọ anẹẹ tịtẹ, eyee sì kaakara ka ẹnị ẹ̀ nọ ịdị ọnọrụ, ọnọrụ-ọnọrụ aa mẹ ụnọ. Agụvị ka ẹ vavọọ ee du ẹhẹ, Ohomorihi ô zi oze ịnị ọchẹngụ ẹnịnị sí wa atọ, agụvị ka ịsị e sì ọ vị ọnọọ nị.

²⁸Aza ê yi, ẹ ka eni ee sì ka ẹnị ẹ̀ yẹ Ohomorihi. Agụvị avọọ, di Ohomorihi navọ wa ka èe ro ịrẹyị kẹnẹ-kẹnẹ, dị ẹẹ mẹ̀ ịsa ẹnẹ ẹ̀ yị vọrọ nị.

²⁹Avaba ebira odivi vị ana yarị wa. Ẹyaa sẹ̀ ịrẹka, ẹyaa mẹ̀ ịsa edivi, ẹ rẹ yaa mẹ eyọhụrẹ, ệ nyị ayị odivi, dị ẹyaa kụ̀ ụhị pooro. Ẹyaa wụ̀ ọza, ẹyaa zyaazị, di eyee vene ọza, di e re yee sì ka eni ee du ọza ịrẹsụ. Dị ẹyaa kụ́ ọza ịrẹkaa zị,

³⁰Dị ẹyaa kà ịrẹyị ịrẹma ọza, dị ẹ rẹ yaa kụ́ ayị Ohomorihi. Ẹyaa sị eyii wụ̀ ọza, dị ẹyaa mẹ echu, dị ẹyaa sị ẹngụụ tụ́ ẹba, dị ẹyaa mẹ eyi, dị ẹyaa kụ́ avaba ịsa odivii hi ẹtẹ. Ẹnịnị ẹ mā wụ́ ịrẹyị aza ana ma wa,

³¹ẹ yị yẹ ịrẹyị, ọza ọ yị zụ sị ayị tụra wa. Ẹnịnị e mē ro ịrẹyị ọyịza, ẹ mā rẹ vayị ọza.

³²Ẹnịnị ệ yẹ ka ọda Ohomorihi ộ kà a ka ẹngụ ọza ana àa vavọọ mẹ, vị ana a vọrọ ka à wụ. Ama ẹyaa yịị mẹ̀ ẹ, ẹ rẹ yaa sị ọtụụ kà aza ẹnẹsa ana aa mẹ̀ ẹ ịrẹma.