Read ebira Aniroomi 10 Bible Online

Aniroomi 10 - ebira bible

Aniroomi 10

¹Ẹwụ nịnị ẹyịnyara amị, maa mẹ̀ aduwa, ayị amị ee sì ọọ ẹtẹẹtẹrẹ ka ọ maa navọ Anisirẹrị nịnị ẹ̀ zụ há.

²Mâ dọ ivenu tụ́ ọọ ka ẹnịnị ee sì ka ẹnị ẹ̀ẹ hẹkẹ Ohomorihi ẹtẹẹtẹrẹ. Ama oze ẹnẹ ẹnịnị zị, ọ yị vị oze ịrẹyọyẹ.

³Ẹnịnị ẹ yị yẹ, Óhomorihi mẹmẹẹ̄ jị ịhị yị ọza. Ẹnị ee sì ka ẹnị ẹ̀ zị oze ẹ́ẹngụ ẹnịnị mẹẹ. Ẹ yị zẹẹ ka ẹnị ẹ̀ saasa oze oni Ohomorihi ọnịị̄ zịị jị ịhị yị ọza.

⁴Ikirisiti ọ kụ́ avaba ịrẹyị ọda Aniju nịnị vẹ ịnị ọzarẹyịrẹsụ nị. Avaba ọza ana àa kụkụ sị ayị tụra Ohomorihi kẹnẹ, dị Ohomorihi kụkụ za wa ịrịka tụ́ ịnị ọnịrẹyịzẹyịza.

⁵Àa vị ịnị ka Ohomorihi ọ̀ za ọza ịrịka tụ́ ịnị ọnịrẹyịzẹyịza, agụvị ka ộ saasa ọdaa yọ, â nyị ịsị Imosiisi vịdị kà ịnị anị. Ọ kà, “Ọza tụra ọza ana àa mẹ̀ ịsa ọnị ọda kà, ọ vaa yàra agụvị ọda ọnọọ.”

⁶Ama ịnị ka Ohomorihi ọ̀ za ọza ịrịka tụ́ ịnị ọnịrẹyịzẹyịza, agụvị ka ộ sị ayị tụra Ikirisiti, a rẹ nyị ịsị a kà ịnị anị. A ka, “Asị u ne roo ịnị ayị awụ ka ẹnẹ vaa nọ ẹbẹẹba ịda Ohomorihi?” (Ọnọọ vị ka dị ọ̀ na sị Ikirisiti chí vẹ.)

⁷Asị u re ne roo ka ẹnẹ vaa vaa chíi nọ ụvẹtẹ? (Ọnọọ vị ka dị ọ̀ na sị Ikirisiti hụụnị eku jịnẹ vẹ.)

⁸Ama si Iwe Ohomorihi kà? Ọ kà, “Ịrẹyị Ohomorihi ọ sị gụrị ẹwụ, ọ hyakụ yà ini irenu awụ bẹẹ ọnịrị ịnị ayị awụ.” Ịrẹyị ọnọọ ọ vị ka ọza ọ̀ sị ayị tụra Ohomorihi nị. Enube ọyịza ọnị yaa kà ọ vị ọnọọ nị.

⁹Wàa sị irenu awụ dọ ka hịịn, Ijeesu ọ vị Ananyị yị nị, dị ụ rẹ sị ayị awụ dọ wụ́ ka Ohomorihi ộ haa kwẹẹtẹ hụụnị isu nị, Ohomorihi vaa dọ wụụ há.

¹⁰Ọza ana àa sị ayị anị tụra Ohomorihi, dị Ohomorihi zaa ịrịka tụ́ ịnị ọnịrẹyịzẹyịza. Ọza ana àa sị irenu dọ ka ọnị ộ sị ayị tụra Ohomorihi, dị Ohomorihi dọ ọ há.

¹¹Agụvị ka â chẹrẹẹ tụ́ ini Iwe Ohomorihi ka, “Ọza tụra ọza ana àa sị ayị tụraa, ụhị ọyị vaa nyị ọọ.”

¹²Wâ vị Aniju oo, wẹ yị vị Aniju oo, ẹ yị nyị irenyi ịnị anị. Ohomorihi ọ nyị avaba aza nị. Ọọ̄ vayị avaba aza ana àa hị́ ọọ ẹtẹẹtẹrẹ.

¹³Ọza tụra ọza ana àa hị́ Ohomorihi Ananyị yị kẹnẹ, ọ vaa dọ ọ há nị.

¹⁴Ama ẹ́ mẹmẹ zụ hị́ ọọ ka ọ dọ ẹnị ha ẹ̀ẹ vị ẹ sị ayị tụra a? Ẹ mẹmẹ vaa sị ayịị tụra a ẹ̀ẹ vị ẹnịnị wụ́ ini oze anị? Ẹ̀nịnị mẹmẹ vaa wụ́ ọọ ẹ́ẹ vị a nyị ọza ana kà a yị wa?

¹⁵Ọza ọ̀ yị tụ́ ọza ka ọ̀ na kà enube ọnọọ, ọ mẹmẹ va naa kà a? Â vịdị vavọọ chẹrẹẹ tụ́ ini Iwe Ohomorihi ka, “Ọọ da zoza kẹnẹ ka aza anaā kà enube ọyịza aa vẹ.”

¹⁶Ama ayị vị avaba ẹnịnị ẹ dọ enube ọyịza ọnọọ. Ayịsaya ộ vịdị kà a ka, “Ananyị yị, aza ẹ yị dọ enube ọyịza ọnị yaa kà, ọ!”

¹⁷Enube Ikirisiti ọyịkà ọọ̄ mẹ̀ ka aza ẹ̀ wụ́ ọọ nị. Ye si oo re aanị ka enube ọyịza ọyịwụ ọ rẹẹ̄ mẹ ka aza ẹ̀ sị ayị tụra Ijeesu nị.

¹⁸Ama me ve họ̀ use ka aanị ka Aniju nịnị è yị wụ́ enube ọyịza da? Ẹnịnị ệ wụ́ ẹtẹẹtẹrẹ. Avaba anẹhẹ ẹ sị wụ́, a màa kà ịrẹyị ọnọọ. Ịrẹyị ẹnịnị ọ na sị ngụ avaba ẹhẹ.

¹⁹Mi ree họ̀ use ka, aanị ka Anisirẹrị ẹnị ẹ yị yẹ? Imosiisi ọ hyakụ vịdị tụ́ ohi ịrẹyị ọnọnị nị. Ọ kà Ohomorihi kà, “Mị vaa mẹ ka waa kụ̀ ụhịị hi anẹkụra ẹnẹ ẹ̀ yị vị anẹkụra obooro nịnị. Mị rẹ vaa mẹ ka waa kụ́ ayịị hi anẹkụra ana vị ọnụra nịnị.”

²⁰Ayị Ayịsaya ọnị ộ hyakụ vị́ hu avọọ, dị ọ kà a ka Ohomorihi ka, “Aza ene è yi sì mi, e si mi re. Aza ẹnẹ ẹ̀ yị hyakụ họ̀ use amị, ma raà sị ẹngụ zụ̀ wa.”

²¹Ama ini oze Anisirẹrị nịnị Ohomorihi ọ va kà a ka, “Eyinị-eyinị maa sịị tana ụvọ ka ma sị sị anakamawụ ẹnẹnị, anaā và mị ị̀karenu aanị nị.”