Read ebira Aniroomi 3 Bible Online

Aniroomi 3 - ebira bible

Aniroomi 3

¹Â nyị ịsị Aniju nịnị kụkụ va sị dahi hu aza ẹnẹ ẹ̀yị vị Aniju aanị? Ọgụ ịsị ẹ kụkụ va yà ịnị ụvẹvẹnẹ ọyịjị?

²Ohi amị ọ vị ka ọ́ọ nyị ọgụ ẹtẹẹtẹrẹ ini oze tụra oze. Ịpaapa da, Aniju nịnị Óhomorihi sị ịrẹyị anị chire ụvọ nị.

³À kà a ka aza ẹnyị ẹnịnị ẹ yị dọ ịrẹyị ọnọọ wụ́, vị ọnọọ wáá zụ mẹ ka asị Ohomorihi ọnị rẹ kụkụ nyị ịzẹyịza nị?

⁴Asị Ohomorihi zẹẹ! Ẹ yị nyị ịsị ẹ zụ mẹ ka asị Ohomorihi vị ọnịrẹyịzẹyịza, òo zee eyi avaba aza ẹ̀ vị onireche. Â vịdị vavọọ chẹrẹẹ tụ́ ini Iwe Ohomorihi ka, “Ụmẹ tụra ụmẹ ọnị ụ wàa kà ịrẹyị, avaba aza vee ree ka ịzẹyịza ụ waa kà nị. Aza ẹ̀ẹ zama ịrẹyị awụ re, e vee re ka ịsa ana vọrọ ụụ̄ mẹ nị.”

⁵Ọ̀ọ sị vị ka ẹ yị àa mẹ̀ ịsa odivi, ịjọnọọ aza nyẹngụ ree hu avọọ gedebee ka ịsa oni Ohomorihiī mẹ ộ vọrọ yọ? Ị mẹmẹ vee tụ́ ohi? Ọsọnị vị ọnị maa kà kẹnẹ anka ịsị ọzaā hụraa kà.

⁶Asị Ohomorihi zẹẹ! Ohomorihi ọnị ọ̀yị nyị ịzẹyịza, ọ́nị mẹmẹ vaa mẹ̀ ọkarẹyị anẹhẹ?

⁷Mèe vee cheeche, dị ọ mẹ ka aza è re ka Ohomorihi ộ nyị ịzẹyịza ẹtẹẹtẹrẹ yọ? Aanịka ayị vị ọ hyakụ aa sị ụbanyịị yọọ hu avọọ? Â vọrọ ka ọ̀ kụkụ yịị jị ịvịị mị ka ọnịvị mị vị nị?

⁸A vị ị kụkụ vaa kà a ka: À vẹ yaa mẹ̀ ịsa odivi, dị ọyịza ọ̀ zụ hụụnị anị vẹẹ? Â hyakụ nyị aza ene ee du mi ka máa vavọọ kà. A vaa jị ịvị ana vọrọọ yị wa.

⁹Ẹyị Aniju yọ, yáá dahi hu aza ẹnẹ ẹ̀yị vị Aniju? Vụrụ-vụrụ, yẹ yị dahi hu wa ikonya! Máa vịdị raà sị zụ̀ ka ẹyịrị wa vị ọnị ụvọ ịvị kara tịtẹ.

¹⁰Wáa yẹ ka áa vịdị chẹrẹẹ tụ́ ini Iwe Ohomorihi ka, “Ẹ yị nyị ọza ana aa mẹ̀ ịsa ana vọrọ, ẹ yị nyị ọza ịnya vụrụ-vụrụ.

¹¹Ẹ yị nyị ọza ana yẹ ịsa ana vọrọ, ẹ yị nyị ọza ene ee sì ka ọnị ọ̀ saasa Ohomorihi.

¹²Ọzọza o si nyeeyi hụrẹ oze Ohomorihi. Ọnyọọnya ẹ vị nị, ẹyaa mẹ kẹnẹ-kẹnẹ. Ẹyị nyị ọza ana aa mẹ ọyịza; ẹ yị hyakụ nyị ọza ikonya.”

¹³Irenu ẹnịnị ọ zụ wụ̀ ọza. Dị ẹyaa sị ịrarẹ ẹnịnịị vene ọza. Ịrẹyị irenu ẹnịnị ọ́ọ rẹ anka ẹchịpa ibe avọọ.

¹⁴Ozirenu odivi-odivi ẹẹ̄ sị irenu ẹnịnịị tụ́ụ hi ọza nị.

¹⁵Ọza ọyị wụ̀ ọ mā tụ́ wa akanya.

¹⁶Aha tụra aha ẹnẹ ẹ̀ẹ nọ vị ene eē duu hi ẹtẹ, dị ẹ mẹ ka anịzọọ ẹ̀ẹ rị ụya.

¹⁷Ẹnịnị ẹ mā navọ ka aza ẹ̀ ra vabẹ ịnị ẹngwọọrọ.

¹⁸Ẹnịnị ẹ yị nyị angwahi Ohomorihi vụrụ-vụrụ.

¹⁹Yáa yẹ ka avaba ịsị a chẹrẹ tụ́ ịnị ọda Ohomorihi ọ́ọ za a avaba aza anaa sị ọda ọnọọ yị. Ọnọọ vaa mẹ ka asị a nyị ọza ene kuku zụ re kụ́; dị avaba anẹhẹ ẹ̀ na kụ́ irenu ẹnịnị ọ́vịdị Ohomorihi.

²⁰Agụvị avọọ ẹ yị nyị ọza ana mẹ̀ ịsa ọnị ọda kà dị ọ̀ zụ hwọọ mẹ ka Ohomorihi ọ̀ jị ịhị yọ. Ịsị ọda Ohomorihiī mẹ kẹnẹ ọ vị ka aza ẹ̀ yẹ ka ẹnị ẹ sị ịvị mẹ nị.

²¹Booro aanị, Ohomorihi ọ raà sị zụ̀ ọza, ọ mẹmẹẹ̄ vara ọza ọnịrẹyịzẹyịza; dị asa a nyị ịrẹyị ọda ịnị anị; ọda Ohomorihi ọnịrị ọnịsẹ nịnị ẹ́ẹ dọ ivenu tụ́ ọọ.

²²Aza ana sị ayị tụra Ijeesu, Óhomorihiī vara ọnịrẹyịzẹyịza nị. Avaba aza ana sị ayị tụra Ijeesu Ikirisiti kẹnẹ, Óhomorihiī vavọọ mẹ nị. Oze ọnya ọ vị yị avaba aza nị,

²³agụvị ka avaba aza ẹ sị ịvị mẹ, ẹ yị kụkụ nyị tụ́ ịnị igirima Ohomorihi.

²⁴Ama Ohomorihi ọ́ọ vayị aza, dị ọ jị ịhị yị aza ọọhẹ kẹnẹ nị. Ini oze Ijeesu Ikirisiti ana hị́ aza varẹma ọ vavọọ sị mẹẹ nị.

²⁵Ohomorihi ọ́ọ sị ọọ zụ̀ gedebee ka ọnị óo si sí ụta ịvị aza ana â sị ayị tụra anya oni o che sẹ́ ẹtẹ. Ohomorihi ọ́ọ vavọọ mẹ, agụvị dị ọ̀ zụ sị ịzẹyịza anị zụ̀ aza. Ịyẹẹyẹ vị oni Ohomorihi nyị isuuru, dị ọ sị eyi jịnẹ ịvị ana aza aa mẹ.

²⁶Ama booro aanị, Ohomorihi ộ sị zụ̀ ka ọnị ộ nyị ịzẹyịza, ọnị ọ vị ka ộ nyị ịzẹyịza hi ẹngụ anị. Ọnị ọ rẹẹ̄ jị ịhị yị aza ana àa sị ayị tụra Ijeesu nị.

²⁷Sị ị kụkụ nyẹngụ si wo oto aanị? Ẹ yị nyị! Sị ẹ vẹ di yè yi nyengu wo oto? Ye yi nyẹngụ wo oto, agụvị ka vị ị sị ayị tụra Ohomorihi kẹnẹ nị, ẹ yị vị agụvị ka yaa saasa ọda

²⁸Agụvị avọọ ya sị yẹ ka aza ana àa sị ayị tụra Ohomorihi kẹnẹ, ọọ̄ jị ịhị yị nị; ẹ yị vị agụvị ka aza aa mẹ̀ ịsa ọnị ọda kà.

²⁹Ohomorihi Aniju kẹnẹ Óhomorihi wâ vị nị? Aanị ka ẹ yị vị ọnị ọ rẹ vị Ohomorihi Anigiriki nịnị? Ọnị ọnyọọnya ọ vị Ohomorihi ẹnịnị nị,

³⁰agụvị ka Ohomorihi vị ọnya. Ọnị ọ vaa jị ịhị yị Aniju nịnị nị, agụvị ka ệ sị ayị tụra a.

³¹Áá zụ kà a ka ya raà mẹ ka ọda Ohomorihi ọ̀ vị ịrẹyị kẹnẹ-kẹnẹ? Asị Ohomorihi zẹẹ! Ọda vị ọnị ị hyakụ sị tụ́ udi ana vọrọ tụra a.