Read ebira Aniroomi 5 Bible Online

Aniroomi 5 - ebira bible

Aniroomi 5

¹Óhomorihi mẹ̀ raà jị ịhị yị agụvị ka yâ sị ayị tụra aanị, ya sị ẹngwọọrọ nyị beri Ohomorihi ini oze Ijeesu Ananyị yị Ohinọyị oni Ohomorihi nyị ka ọ̀ dọ yị ha.

²Agụvị ka yâ sị ayị tụra Ijeesu, ọ raà mẹ ka ya va yẹ́ ayamva Ohomorihi. Ịnị ayamva Ohomorihi ọnọọ ị yà dị ị kụkụ aa sị ịrajẹẹ tụra eyi ka ị vaa nyị tụ́ ịnị ụbanyị Ohomorihi nị.

³Ẹ yị vavọọ kẹnẹ, ị raa jẹ ịrajẹẹ tụ́ ịnị ụya ọnị yaa rị aanị bẹẹ, agụvị ka yâ yẹ ka ụyọrị vị anaā mẹ ka ọza ọ̀ zụ sị ẹngụ dọ ịrẹyị.

⁴Yàa zụụ sị ẹngụụ dọ ịrẹyị, ọ vaa mẹ ka yaa vịra. Yàa sị vịra, dị yaa nyị ọyịtureyi.

⁵Yàa nyị ọyịtureyi, ụhị ọ yị vaa nyị yị, agụvị ka Ohomorihi ộ mẹ̀ ka ya yẹ, o meme sì ịrẹyị ayị ini oze Ụhwẹ Ohomorihi ọnị ọ sị tụ ịnị ayị ayị.

⁶Ịnị ụmẹ ọnị yẹ̀ yị zụ gụ ẹngụ ayị ụvọ, Ikirisiti ộ vẹ, di o ve sú yị ẹyị aza edivi ịnị ụmẹ oni Ohomorihi nyị nị.

⁷Ộ tụ́ akanya, dị à nyị ọza ana dọ ka ọnị hyakụ ee súu yị ọnịzẹyịza. Àa daka vavọọ nyị ọza, ọnịzẹyịza obooro ọ vaa dọ ka oni ò sú yị nị.

⁸Ama Ohomorihi ọnị ộ sị zụ ka oni ô sì ịrẹyị ayị ẹtẹẹtẹrẹ. Ẹ́yị mẹ̀ yị daka vị ọnịvị, dị Ikirisiti ve sú yị ẹyị nị.

⁹Agụvị anya oni o si che sẹ ẹtẹ o mè sú, Óhomorihi sị jị ịhị yị booro aanị nị. Yâ yẹ ka ọ hyakụ vaa dọ yịị háa hụụnị ọyịkụ anị ịnị ẹkụhị ọdịrẹma.

¹⁰Ọnịvị Ohomorihi ị vịdị vị nị. Ama agụvị isu oni Ozi anị sú yị yị, Ohomorihi ọ raà sị yị vara ọta anị. Ị mẹ̀ sị vara ọta anị aanị, ẹ yị kụkụ nyị ka àa jị ọọ ịrẹka ka Ozi anị ọnọọ vaa dọ yịị há, agụvị ka ộ yàra.

¹¹Ẹ yị vị avọọ kẹnẹ, ọ mẹ̀ vị. Ohomorihi ọ raà mẹ ka yaa mẹ ụbanyị agụvị Ijeesu Ananyị yị Ikirisiti, ọnị ọ mẹ ka ẹyịrị Ohomorihi ọ̀ varẹma ze nị.

¹²Oze ịnị ụvị ọza ịnya ịvị zị ngụ ịnị ẹhẹ nị, di isu saasa ịvị ọnọọ vẹ nị. Hụrẹ ịhị ọnọọ avaba aza kuku ee sú nị, agụvị ka avaba ẹ sị ịvị mẹ.

¹³Dị a va yẹ ka aa mẹ ọda, aza ene hi ịnị ẹhẹ hụrẹ aa mẹ̀ ebira odivi nị. Ịjị ẹ̀ yị nyị ọda, Ohomorihi ọ yị chẹrẹ ịvị ana aza aa mẹ̀ẹ tịtẹ.

¹⁴Hụrẹ ụmẹ Adamị ve tù ụmẹ Imosiisi, aza hụrẹ yà ịnị ụvọ iswọọza nị. Aza ẹnẹ ẹ̀ yị daka mẹ ịvị ana Adamị mẹ gẹdẹ-gẹdẹ, vị ene ee yii sú. Adamị vị ana a sị mẹẹ anka Ọza ịnya ana vaa vẹ avọọ.

¹⁵Ama oze oni Ohomorihi zịị sị ịsaa yị ọza ọọhẹ, o yi véné oze ana Adamị zị mẹ ịvị. Ịzẹyịza, aza ọrụrụ-ọrụrụ ê sú agụvị ịvị ọnị ọza ịnya ọnọọ mẹ. Ama ayamva Ohomorihi oni ô huna avọọ ẹtẹẹtẹrẹ. Ini oze ayamva ọza ịnya ana vị Ijeesu Ikirisiti, Ohomorihi ộ sị ẹyịza anị yị aza ọrụrụ-ọrụrụ ọọhẹ kẹnẹ.

¹⁶Oze oni Ohomorihi zịị sị ịsa yị ọza ọọhẹ, o yi véné oze ọnị ọza zị mẹ ịvị. Ọ́za ịnya mẹ̀ mẹ ịvị, dị Ohomorihi mẹ̀ ọkarẹyị yị aza ka ẹ sị ịvị rị nị. Ama aza mẹ̀ kụ ịvị irenyi-irenyi mẹ, dị Ohomorihi va sị ayamva anị va yị aza ọọhẹ, dị ọ jị ịhị yị aza kẹnẹ nị.

¹⁷Ịzẹyịza ọ vị nị ka agụvị ịvị ọnị ọza ịnya mẹ, ọnị ọ vị ka Adamị, iswọọza sị nyị ụkata ịrẹsụ aza nị. Ama ịsị ọza ịnya ana vị Ijeesu Ikirisiti ọnị va mẹ, ẹ yị vị o were huna avọọ. Avaba aza oni Ohomorihi raà vayị anị ẹtẹẹtẹrẹ, dị ọ sị ẹyịza yị wa, ọnị ọ vị ka ộ za wa ịrịka tụ́ ịnị ọnịrẹyịzẹyịza, ẹ vaa nyị ụkata, dị ẹ yàra ịdị Ohomorihi pooro zịna-zịna.

¹⁸Ye si oo re ka agụvị ka ọza ịnyara ộ mẹ̀ ịvị, ọ mẹ̀ ka avaba aza ẹ̀ rị ịvị nị. Avọọ gẹdẹ-gẹdẹ ọ́za ịnya ana mẹ ịzẹyịza mẹ̀ rẹ mẹ ka Ohomorihi ọ̀ jị ịhị yị avaba aza, dị ẹ̀ yàra ị́dị anị pooro zịna-zịna nị.

¹⁹Ọza ịnya ọ mẹ akamawụ, dị ọ mẹ ka aza ọrụrụ-ọrụrụ ana vọ ẹ̀ vị ọnịvị nị. Avọọ gẹdẹ-gẹdẹ ọ́za ịnya ana wụ́ ịrẹyị chire Ohomorihi ọnị mẹ̀ rẹ mẹ ka Ohomorihi ọ̀ jị ịhị yị aza ọrụrụ-ọrụrụ nị.

²⁰Ọda ộ vẹ, agụvị ịsa odivi ọ̀yị mẹ ọ̀ọ banyị hu avọọ. Ama ịzị ịvị ọ̀ọ yà aa banyị, ịzọọ áyamva Ohomorihiī banyịị tụ́ụ hu nị.

²¹Yê re ka iswọọza ộ sị zụ̀, ịvị mẹmẹ nyị ụkata. Avọọ gẹdẹ-gẹdẹ ị́hị oni Ohomorihi jị yị ọza ọnị mẹ̀ rẹ sị zụ̀, ayamva Ohomorihi ọnị mẹ̀ rẹ nyị ụkata nị. Dị ọ rẹ mẹ ka aza ẹ̀ yàra ị́dị anị pooro zịna-zịna agụvị Ijeesu Ananyị yị Ikirisiti nị.