Read ebira 1 Anịkọrịntị 1 Bible Online

1 Anịkọrịntị 1 - ebira bible

1 Anịkọrịntị 1

¹Ẹma vị Ịpọọrụ nị. Ohomorihi ọ vavọọ sì ọọ, dị ọ hị́ mị ka ma vị odeyi Ijeesu Ikirisiti nị. Ẹmịrị Isositenesi ẹnẹbẹnị ayị aa chẹrẹ iwe ọnọnịị tụ́ụ hi wu nịnị

²anịragụ Ohomorihi ana yà ẹkụra Ịkọrịntị, ẹwụ nịnị oni Ohomorihi hị́ ka ẹ̀ vị aza ọnịnị anị, ini oze ka ẹnịrị Ijeesu Ikirisiti ọ sị vị ọnya, ne beri avaba aza avaba aha ana aa hị́ ịrẹha Ijeesu Ananyị yị, ọza ana nyị ẹyịrị wa.

³Ohomorihi Ada ayị ọnịrị Ijeesu Ikirisiti Ananyị yị ẹ̀ mẹ ọyịza wụ nịnị, dị ẹ̀ sị ẹngwọọrọ yị wụ nịnị!

⁴Mịị̄ kụ́ Ohomorihi amị avọ pooro agụvị awụ nịnị, agụvị ka ini oze ka ẹwụrị Ijeesu Ikirisiti ọ sị vị ọnya nịnị, ọ raà mẹ ọyịza yị wụ ẹtẹẹtẹrẹ.

⁵Ọ sị wụ nịnị mẹ ọzọbanyị ini oze tụra oze ini oze ka ọ́ọ sị ụkata wụ nịnị ka waa kà avaba ịrẹyị anị, dụ wa rẹ yẹ ịrẹyị nịnị.

⁶Ịrẹyị Ijeesu Ikirisiti (ọnị ụ vịdị wụ́ nịnị) ọ raà ha ẹpa tụ́ ịnị ayị awụ nịnị;

⁷agụvị avọọ, ụ mẹ̀ jẹẹ ee zí ẹkụhị oni Ijeesu Ikirisiti Ananyị yị vaa sị sị ẹngụ anịị zụ̀ nịnị aanị, ẹ yị nyị ụkata ikonya oni Ohomorihiī sịị mẹ ọza ẹyịza ọnị ụ wẹ̀ yị nyị nịnị.

⁸Ikirisiti vaa sị ụvọọ za wụ nịnị pooro ne tù ụmẹ ọdịrẹma, agụvị ịhị Ijeesu Ikirisiti Ananyị yị ọ̀ọ vavẹ, asị ụ na nyị ohuvọ nịnị vụrụ-vụrụ.

⁹A zụ sị ayị tụra Ohomorihi. Ọnị ọ hị́ wụ nịnị ka ẹwụrị Ozi anị Ijeesu Ikirisiti Ananyị yị ọ̀ vabẹ nị.

¹⁰Ẹwụ nịnị ẹyịnyara amị, máa sị ịrẹha Ijeesu Ikirisiti Ananyị yị dá ịpẹ wụ nịnị ka wa sị ịnẹ yị ẹngụ nịnị. Asị ụ zẹẹ ka ẹhahi ọ̀ ngụ ịnị akakana awụ nịnị! Và ụvọ bẹ ẹtẹẹtẹrẹ nịnị, dụ wa nyị ayị ọnya nịnị, dụ wa rẹ nyị ariro ọnya nịnị!

¹¹Ẹwụ nịnị ẹyịnyara amị, áa nyị ẹyịnyara Ichiro ana vẹ va kà a mị ka waa zyaazị nịnị.

¹²Ịsị maa kà, yị: ọzịnya-ọzịnya awụ nịnị aa kà ịsa irenyi-renyi. Aza ẹnyị ka Ịpọọrụ ọ́nị jẹẹ yị nị, aza ẹnyị ka Aporo ọ́nị jẹẹ yị nị, dị aza ẹnyị rẹ ka Ipita ọ́nị jẹẹ yị nị. Dị aza ẹnyị ẹnị rẹ ka Ikirisiti ẹ́nị jẹẹ yị nị.

¹³Wa sị Ikirisiti gà hi nịnị, ahẹẹ? Ịpọọrụ óó sú ị́rẹsụ apavahị agụvị awụ nịnị nị? Ịrẹha Ịpọọrụ áá sị mẹ̀ ọyịhwọzenyi wụ nịnị nị?

¹⁴Máa kụ́ Ohomorihi avọ ka mẹyị mẹ̀ ọyịhwọzenyi yị ọzọnyị-ọzọnyị awụ nịnị, àyị hụhụ vị Ikirisiti ọnịrị Ịgayọsị kẹnẹ.

¹⁵Agụvị avọọ, ẹ yị nyị ọza ịnị awụ nịnị ana zụ kà a ka máa sị ịrẹha amị mẹ̀ ọyịhwọzenyi yị ọnị.

¹⁶Máa tamayị ka ma rẹ mẹ̀ ọyịhwọzenyi yị aneehi Isitivanasi. Ama mẹyị kụkụ yẹ, àa nyị ọza ẹnẹsa ọnị mị mẹ̀ ọyịhwọzenyi yị.

¹⁷Ikirisiti ọyị tụ́ mị ka ma naa mẹ ọyịhwenyii yị aza. Enube ọyịza ọ tụ́ mị ka ma naa kà nị. Ẹ yị rẹ vị irenu ịrẹyọyẹ ọza kẹnẹ, m maa sịị kà a; àyị vị avọọ, di isu oni Ikirisiti sú ị́rẹsụ apavahị dị ẹ yị kụkụ nyị ịsị ọ vị.

¹⁸Aza ene ee vu ẹtẹ vị ene roo ka enube ọyịza ana aa kà ka Ikirisiti óo sú ị́rẹsụ ọchị apavahị vị ịrẹyị ịyẹyẹ. Ama yị ẹyị oni Ohomorihi aa dọ ọ há, ụkata Ohomorihi ọ vị nị.

¹⁹Áa chẹrẹẹ tụ́ ini Iwe Ohomorihi ka (Ohomorihi ka): “Mị vaa kụ́ ịrẹyọyẹ ọyẹrẹyị nịnị ị kwooze; aza ana yẹ ịsa, dị mị kụ́ ịsa ẹnẹ ẹ yẹ kwooze.”

²⁰Ịjọnọọ yọ, ịzị ọyẹrẹyị ọnịrị ọzwọzọda nịnị kuku hi? Aza ana rẹẹ̄ nyị ahankata ịnị ẹhẹ ọnọnị, ịzị eni re hi? Ohomorihi ọ raà sị zụ̀ ka ịrẹyọyẹ ẹhẹ ọnọnị vị ụra kẹnẹ-kẹnẹ.

²¹Ịnị ịrẹyọyẹ Ohomorihi, ọyị zẹẹ ka aza ẹ̀ sị ịrẹyọyẹ ẹngụ ẹnịnị yẹ ọnị. Ama Ohomorihi ọ́ọ vavọọ sì ọọ ka enube ọyịza ọnị yaa kà, ana aza ẹnyị ro ka ụra ọ vị nị, ka aza ana àa dọ ọ wụ́ ọnị ọ̀ dọ wa há.

²²Aniju nịnị vị eneē sì apọtẹrẹwa; dị Anigiriki nịnị ẹnị ee sì ịrẹyị ịrẹyọyẹ.

²³Ama ẹyị vị ana aa kịị kà enube ọyịza Ijeesu ana a kanyị za ọchị apavahị kẹnẹ. Enube ọyịza ọnọọ vị ana aa mẹ ka Aniju nịnị ẹ̀ và ịrẹma kà a. Ọ rẹ mẹ ka Anigiriki nịnị è ree ka ụra kẹnẹ-kẹnẹ ọ vị nị.

²⁴Ama aza oni Ohomorihi sị hị́ kẹnẹ, ẹ̀ẹ vị Aniju, ẹ̀ẹ vị Anigiriki, ẹ́ẹ yẹ ka Ikirisiti vị ụkata ọnịrị ịrẹyọyẹ Ohomorihi.

²⁵Ịsị aza ro ka vị Ohomorihi mẹ ụra ịnị anị nị, ụra ọnọọ óo huna ịrẹyọyẹ ọza. Ịzị aza èe ree ka Ohomorihi vị ọkụmị, ọkụmị ọnọọ ọ́ọ nyị ụkata huna aza.

²⁶Ẹwụ nịnị ẹyịnyara amị, kana eyi ịnị akakana ẹngụ awụ nịnị, di u we re ẹngụ aza ọnị ụ vị oni Ohomorihi hị́ nịnị. Àa ka à na kà, ayị vị aza ọrụrụ-ọrụrụ awụ nịnị ọ vị ọyẹrẹyị, ayị rẹ vị ọrụrụ-ọrụrụ awụ nịnị ọ nyị ụkata, ayị vị ọrụrụ-ọrụrụ awụ nịnị ọ vị ọza ẹtẹẹtẹrẹ.

²⁷Ohomorihi ọ raà nyị ịsị anẹhẹ ro ka ịyẹyẹ ọ vị nị, ka ọnị ọ̀ sị mẹ̀ ụhị nyị ọyẹrẹyị nịnị. Ọ rẹ nyị ịsị anẹhẹ ro ka ẹyị nyị ụkata ka ọnị ọ̀ rẹ sị mẹ̀ ụhị nyị ọnụkata nịnị.

²⁸Ohomorihi ọ́ọ nyị ịsị anẹhẹ ro ka ịsa kẹnẹ-kẹnẹ ọ vị, dị aza aa sị eyii wụ ọọ ọnịrị ịsị aza ro ka ẹ yị nyị ịsị ẹ vị ka ọnị ò si du ịsị aza ro ka ọ́ọ vị ịsa obooro ha.

²⁹Agụvị avọọ ẹ yị nyị ọza ana nyẹngụ nyị irenu ọ́vịdị Ohomorihi.

³⁰Ohomorihi ọ raà sị wụ nịnị ka ẹwụrị Ijeesu Ikirisiti ọ̀ vị ọnya nịnị. Ohomorihi ọ rẹ raà mẹ ka Ikirisiti ọ̀ vị ịrẹyọyẹ ayị. Ikirisiti ọ jị ịhị yị ọ́vịdị Ohomorihi nị, ọ sị yị vara aza ọnịnị Ohomorihi, ọ rẹ sị yị hị́ varẹma hụụnị avaba ịsa edivi.

³¹Agụvị avọọ, anka a mẹ̀ chẹrẹẹ tụ́ ini Iwe Ohomorihi: “Ọza ana àa ka oni ee wo oto, ọ̀ọ sị Ananyị yịị woo oto.”