Read ebira 1 Anịkọrịntị 14 Bible Online

1 Anịkọrịntị 14 - ebira bible

1 Anịkọrịntị 14

¹Re ka wee sì ịrẹyị ọza nịnị! Re re ka waa sị ayị tụ́ ịnị ka Ụhwẹ Ohomorihi ọ̀ sị ụkata wụ nịnị ka wa zụụ mẹ̀ ịsa irenyi-irenyi nịnị. Hu keekere, wee sì ka wa zụụ kà ịsẹ nịnị.

²Ọza ọnị Ụhwẹ Ohomorihi sị ụkata yị ka ọ̀ọ kà ẹkụra ọsa vị ana aa kà ịrẹyị yị Ohomorihi. Ẹ yị vị aza aa kà ịrẹyịị yị, agụvị ka ẹ yị nyị ọza ana wụ́ ẹkụra ana aa kà. Ịrẹyị ana nyịnẹ Ụ́hwẹ Ohomorihi sị ụkata yọ ka ọ̀ọ kà nị.

³Ama ọza ana aa kà ịsẹ vị ana aa kà ịrẹyịị yị aza. Ịrẹyị anị aa gụ aza ụvọ, ọ raa mẹ ka ayị aza ẹ̀ vị, dị èe hunẹnẹ wa ayị.

⁴Ama ọza ana aa sị ẹkụra ọsaa kà ịrẹyị, ẹngụ anị kẹnẹ aa gụ ụvọ nị. Ọza ana aa kà ịsẹ ọnị vị ana aa gụ avaba ịragụ Ohomorihi ụvọ.

⁵Mị yaanị sì ka avaba awụ nịnị ọ̀ọ sị ẹkụra ọsaa kà ịrẹyị. Ama ịsị mi sì hu ọ vị ka waa kà ịsẹ nịnị nị, ọza ana aa kà ịsẹ o huna ọza ana aa sị ẹkụra ọsaa kà ịrẹyị nị; ẹ̀ yị vị o huhu re ọza ana vaa kà iruvo anịị yị aza, dị ịrẹyị ẹnẹẹ ẹ̀ zụ gụ avaba ịragụ Ohomorihii ụvọ.

⁶Ẹwụ nịnị ẹyịnyara amị, à kà a ka maa vẹ ịdị awụ nịnị, dị maa sị ẹkụra ọsaa kà ịrẹyị. Máá zụ gụ wụ nịnị ụvọ? Ẹ̀ yị vị mị kà a wụ nịnị ịsị Ohomorihi sị zụ mị; ẹ̀ yị vị mị rẹ mẹ ka wa zụ yẹ ịsa Ohomorihi nịnị, à vị ka dị ma kà ịsẹ, à vị ka dị ma rẹ sị ịrẹyị Ohomorihi zụ wụ nịnị, máá zụ gụ wụ nịnị ụvọ?

⁷Hyakụ sị ịrẹyị ịsa ene ee hú, ẹnẹ ẹ̀ yị nyị ụhwẹ, anka ọpanyị, à vị igita avọọ zama a re nịnị! Ịrẹyị anị ẹ̀ yị tụ́ ẹhẹ, ọza mẹmẹ vaa yẹ ahẹ ana aa jị?

⁸Ọpanyị àaa sụ́, dị ọza ẹ̀ yị yẹ ịsa aa kà nị, ene vee tenyi ẹngụ ịrẹkụ?

⁹Avọọ ẹwụ nịnị mẹ rẹ yà nị. Wẹ̀ yị kà ẹkụra ọnị ọza aa wụ́ nịnị, a mẹmẹ vaa yẹ ịsị ụ kà nịnị? Ọ̀ọ vavọọ yà, ịrẹyị awụ nịnị vị ana aa taa hi ịnị ahị kẹnẹ.

¹⁰Ẹkụra irenyi-irenyi ene hi ịnị ẹhẹ, ệ rụrụ. Ama ẹ yị nyị ẹnẹ ẹ̀ yị nyị iruvo ịnị ẹnịnị.

¹¹Mẹ̀ yị wụ́ ẹkụra ọnị ọza aa kà, ọza ana aa kà a vị ọzọga yị mị, dị ẹmị rẹ vị ọzọga yị ọza ọnọọ nị.

¹²U mèe sì ka Ụhwẹ Ohomorihi ọ̀ sị ụkata wụ nịnị, ana a vọrọ ka wee sìi hu nịnị ọ vị ana vaa gụ ịragụ Ohomorihi ụvọ nị.

¹³Agụvị avọọ, ọza ana aa sị ẹkụra ọsaa kà ịrẹyị, ọ̀ mẹ̀ aduwa ka ọnị ọ̀ rẹ zụụ kà iruvo anị.

¹⁴Màaa sị ẹkụra ọsaa mẹ̀ aduwa, ayị amị aa mẹ̀ aduwa ịzẹyịza, ama mẹ yị sị ịrẹyọyẹ amị mẹ̀ ụkọrọ.

¹⁵Ịjọnọọ sị a vọrọ ka ma mẹ? Mee sì ka maa mẹ̀ aduwa ịnị ụkata Ụhwẹ Ohomorihi, dị ma rẹẹ sị ịrẹyọyẹ amịị mẹ̀ aduwa. Mi ree sì ka maa sị ụkata Ụhwẹ Ohomorihi jị ahẹ, dị mị raa sị ịrẹyọyẹ amịị jị ahẹ.

¹⁶È yị vị avọọ, wàaa sị ụkata Ụhwẹ Ohomorihi ga Ohomorihi, aza ẹnẹ ẹ̀ yị wụ́ ẹkụra ọnị ụ waa kà, mẹmẹ zụ kà a ka, “Aamị” tụ́ ịnị ụga ọnị ụ waa sịị yị Ohomorihi? Wâ yẹ ka ọ yị wụ́ ịsị ụ waa kà.

¹⁷Ọ̀ọ daka vị ka wàa aa ga Ohomorihi ẹtẹẹtẹrẹ, ama ọ yị gụ ọza ẹnẹsa ụvọ.

¹⁸Mâ kụ́ Ohomorihi avọ ka ẹmị aa sị ẹkụra ọsaa kà ịrẹyị huna avaba awụ nịnị ana vọ nị.

¹⁹Ama màa yà ịnị ịragụ Ohomorihi, miī sì ka àa vị ịrẹyị ọchị ẹẹhị kẹnẹ mị kà nị, ma sị ịrẹyọyẹ amị kà a, agụvị ma zụ zụ̀ aza ịsa. Ọnọọ ọ dahi hu ka maa sị ẹkụra ọsaa kà ịrẹyị gigirigii hi ẹtẹ nị.

²⁰Ẹwụ nịnị ẹyịnyara amị, asị u rè ro ịrẹyị anka ezweyi nịnị! Re ka wee ro ịrẹyị anka ọza ana sị vịra! Wâ yẹ ka ezweyi ẹ mā mẹ̀ ịsa odivi; ẹwụ nịnị ọ̀ rẹ vavọọ yà anka ezweyi!

²¹Â chẹrẹẹ tụ́ ini Iwe Ohomorihi ka, “Ohomorihi ka ọnị vaa sị anẹkụra ọsa kà ịrẹyịị yị anẹkụra ọnọnị. Anẹkụra ọzọga ọ́nị vaa sị kà ịrẹyịị yị wa nị. Ọ kà ọnị ọ̀ọ vavọọ yị mẹ, aza anị ẹ yị vaa zẹẹ ka ẹnị ẹ̀ wụ́ ịrẹyị anị.”

²²Wee re aanị ka ẹkụra ọsa ọyịsị kà ịrẹyị vị apọtẹrẹwa yị aza ẹnẹ ẹ̀ yị dọ wụ́, ẹ yị vị yị ọdọwụ. Ama ọza ọnị àa kà ịsẹ, ọdọwụ aa sịị gụ ụvọ nị, ọ yị sị gụ aza ẹnẹ ẹ̀ yị dọ wụ́ ụvọ.

²³À kà a ka avaba anịragụ Ohomorihi ẹ sị gụ, dị ọzọza kwẹẹtẹ aa sị ẹkụra ọsaa kà ịrẹyị. Aza ẹnẹ ẹ̀ yị yẹ ịsa ẹnẹẹ, àa vị aza ẹnẹ ẹ̀ yị dọ wụ́, ẹ̀ẹ rẹ vẹ ịzọọ, wéé ro ka ayị vị ẹyaa kà a ka u wee che uvu nịnị nị?

²⁴Ama avaba aza àaa kà ịsẹ, dị ọza ẹnẹ ẹ̀ yị yẹ ịsa ẹnẹẹ, àa vị aza ẹnẹ ẹ̀ yị dọ wụ́, vavọọ vẹ ịzọọ nị, ịrẹyị ọnị ọ wụ́ vaa mẹ ka ayị anị ọ̀ jị ịvị yọ ịnị ịsa odivi ọnị ọ mẹ. Avaba ịrẹyị ọnị ọ wụ́ vaa mẹ̀ ọkarẹyị yọ.

²⁵Ịsa ene ee ro ịnị ayị anị vaa tụ́ ẹhẹ, dị ọ và ku ẹtẹ, dị ọ sị ụbanyị yị Ohomorihi. Dị ọ dọ irenu ka hịịn, ịzẹyịza Ohomorihi yà ịnị akakana awụ nịnị.

²⁶Ẹwụ nịnị ẹyịnyara amị, wáá yẹ ịsị mee sì ka ma kà wụ nịnị? Wàa va sị gụ nịnị, aza ẹnyị ẹ̀ẹ jị ahẹ, dị ọsa ọ̀ọ zụ̀ aza ịsa! Aza ẹnyị ẹ̀ẹ kà a yị aza ana vọ ịsị Ohomorihi sị zụ̀ wa! Aza ẹnyị ẹ̀ rẹẹ sị ẹkụra ọsaa kà ịrẹyị, dị aza ẹnyị ẹ̀ rẹẹ kà iruvo anị. Re ka avaba ịsị àaa mẹ, aa gụ anịragụụ ụvọ!

²⁷Aza ẹ̀ẹ vaa sị ẹkụra ọsaa kà ịrẹyị, ẹ̀ vị ẹhụụ ẹẹva avọọ, ama asị e huna ẹẹta! Ẹ̀ẹ kà a tù ẹngụ tù ẹngụ, dị ọza ẹnẹsa ọ̀ọ kà iruvo ịrẹyị ẹnẹ ẹ kà!

²⁸Ẹ̀ yị nyị ọza ana zụ kà iruvo anị ịzọọ, aza ẹnẹẹ ẹ̀ sị irenu ẹnịnị kú oku ịnị ịragụ Ohomorihi! Ẹnịnị ẹẹ kà ịrẹyị yị ẹngụ ẹnịnị ọnịrị Ohomorihi ịnya kẹnẹ!

²⁹Ẹhụụ aza ẹnị ẹẹva na ngụ ẹẹta avọọ ẹ zụ aa kà ịsẹ, dị aza ana vọ ẹ̀ẹ zama ịrẹyị ẹnẹ ẹ kà re!

³⁰Àa nyị ọza ẹnẹsa ana yaayịtẹ ịzọọ oni Ohomorihi sị ịrẹyị zụ̀, ọza ana vịdị aa kà ịrẹyị ịsọọnị ò kú irenu!

³¹Avaba awụ nịnị ọ zụ aa kà ịrẹyị Ohomorihii tù ẹngụ tù ẹngụ, agụvị avaba awụ nịnị ọ̀ zụ kọsẹ, dị ụ wa rẹ nyị ọtụtụrụma nịnị!

³²Ọza ana nyị ụkata ọyịkà ịrẹyị Ohomorihi, ọ̀ zụ sị ụvọ za ẹngụ anị!

³³Ẹ yị vị Ohomorihi ọọ̄ mẹ̀ ka aza ẹ̀ẹ mẹ jugu-jugu. Ịsa ẹngwọọrọ Óhomorihiī sì ka yaa mẹ nị. Ịnị avaba ịragụ aza Ohomorihi,

³⁴àa sị gụ, anyẹnẹẹ èe kú oku irenu. Ọza ọ yị sị oze yị wa ka ẹ̀ẹ kà ịrẹyị. Ama ẹnịnị ẹ̀ kà ẹngụ ẹnịnị chí, anka ọ́da Ohomorihi mẹ̀ rẹ kà a.

³⁵Èe sì ka à nyị ịsị ẹnị yẹ, ẹ̀ họ̀ ọva ẹnịnị use ini eehi! Ịrẹyị ụhị ọ vị nị ka anyẹnẹẹ ẹ̀ẹ kà ịrẹyị ịnị ịragụ Ohomorihi nị.

³⁶Ho! Ẹwụ nịnị ị́rẹyị Ohomorihi wáá hụụ ịdị anị vẹ nị, à vị ka ịdị awụ nịnị kẹnẹ o tù nị?

³⁷Ọza ene èe ro ka ọnịsẹ ọ́nị vị nị, à vị ka Ụhwẹ Ohomorihi ộ sị ụkata yị ọnị, â nyị ka ọ̀ dọ ka ịsị maa chẹrẹẹ tụ́ụ hi wu nịnị aanị ka ọda Ananyị yị ọ vị nị.

³⁸Ọza ana àa ka ọnị ọ yị yẹ ịrẹyị ọnọnị, asị ọ yẹ!

³⁹Ẹwụ nịnị ẹyịnyara amị, wee sì ka waa kà ịsẹ nịnị! Ama asị ụ kà a ka asị ọza rẹ̀ sị ẹkụra ọsa kà ịrẹyị nịnị!

⁴⁰Waa mẹ avaba ịsa nịnị ini oze ana vọrọ, dị asị ọ nyị ezigi!