Read ebira 1 Anịkọrịntị 16 Bible Online

1 Anịkọrịntị 16 - ebira bible

1 Anịkọrịntị 16

¹Mi ree sì ka ma kà ọ̀nọ̀ ịnị ịrẹyị oze ẹkẹhị ọnị ụ waa dọ nịnị ka à sị na mẹ ọgụvọ yị aza Ohomorihi. Waa dọ ọ nịnị anka m mè re beri Anigaratiya nịnị juwe.

²Ịnị ẹkụhị ọsẹ ẹkụhị ọsẹ, ọzọza ọ̀ọ sị ịnị ẹkẹhị anịị tẹ̀, anka ọpa ẹkẹhị ọnị ọ nyị; agụvị ịhị màa vẹ ịdị awụ nịnị, asị a na nyị ka àa dọ ẹkẹhị.

³Màa vẹ, dị mị chẹrẹ iwe yị aza ọnị ụ wàa nyị nịnị ka ẹ̀ sị ẹkẹhị oni u wèe re nịnị nọ Ijerusarẹmị.

⁴Yèe re ka ộ vọrọ ka ẹmà rẹ nọ Ijerusarẹmị, dị ẹmịrị wa zị na.

⁵Màa zị oze Imasedoniya aa parahu, mị vaa há ịdị awụ nịnị, agụvị ka oze Imasedoniya mị vaa zị nị.

⁶Ẹyịyara mi vee kù ịdị awụ nịnị chee. Ọnyẹngụ ahịka ịzọọ mị yà dị ọgụ ọ̀ ta nị. Ịjọnọọ ụ va zụụ gụ mị ụvọ nịnị ka ma nọ ịzị màa vaa nọ.

⁷Me yi vee sì ka ahịka mị wụsẹ va sị eyi nya wụ nịnị kẹnẹ nị. Ama mee ro ka mi vee kù ịdị awụ nịnị, Ohomorihi òo sì.

⁸Ama Ẹhwẹsọsị ịzẹnị mị vaa yà pooro dị ẹkụhị Ịpẹntịkọsịtị ò tù nị.

⁹Oze ộ tụ́ mị ọ̀yị mẹ̀ ụkọrọ obooro ịzẹnị booro aanị, ọ̀ọ daka vị ka akwootwọza nịnị vị ana gwẹtẹ

¹⁰Itimoti ọ̀ọ vẹ ịdị awụ nịnị, re ka waa mẹ̀ ẹ inohine nịnị! Wâ yẹ ka ọnị vị ana raa mẹ ụkọrọọ yị Ananyị yị anka ẹmị.

¹¹Asị a nyị ọza ana sị eyi wụ ọọ o! Gụ ọ ụvọ nịnị, dị ọ̀ nyẹngụ nyima ụsẹ anị ịnị ẹngwọọrọ, dị ọ̀ rẹ zụ vavẹ ve tù mi. Mee zí ọnịrị ẹyịnyara ayị ana vọ eyi.

¹²Ịnị ịrẹyị ẹnẹbẹnị ayị Aporo, mâ da ịpẹ yọ ẹtẹẹtẹrẹ ka ọnịrị ẹyịnyara ayị ana vọ è ve hee wu nịnị. Ama mee ro ka o yi sì ka ọnị ọ̀ vẹ booro aanị. Ama òo si oze re, ọ vaa vẹ.

¹³Wee zi nịnị, jẹẹ geri-geri ịnị ẹdọwụ awụ nịnị, nyị ọtụtụrụma, dị ụ wa nyị ụkata nịnị!

¹⁴Wee sì ịrẹyị ẹngụ nịnị ịnị ịsa tụra ịsa ọnị ụ wàa mẹ nịnị!

¹⁵Ẹwụ nịnị ẹyịnyara amị, wâ yẹ Isitihwanasị ọnịrị aneehi anị nịnị. Wâ yẹ ka ẹnị ẹ̀ vịdị dọ enube ọyịza wụ́ ịnị avaba aza ene hi ẹtẹ Akaya nị. Avaba ẹngụ ẹnịnị ẹ́ yaa sịị mẹ ọgụvọọ yị aza Ohomorihi nị. Aarịhịnị,

¹⁶waa sị ụbanyịị yị ẹngụ aza ẹnẹẹ ọnịrị aza ẹnị ọnịrịị èe dudu aa mẹ̀ ụkọrọ.

¹⁷Mâ jẹ m mè re ka Isitihwanasị ọnịrị Ihwotunatọsị beri Achayikọsị ệ vẹ. Ẹnị ẹ kụkụ dọ wụ nịnị ịrẹsụ aa mẹ̀ ịsa oni u wè yi re oze mẹ nịnị nị.

¹⁸Ẹ raà kụ́ mị ẹngụ nịya, anka ẹ mẹ̀ rẹ kụ́ ẹwụ nịnị ẹngụ nịya. Â vọrọ ka wa sị ụbanyị yị ẹngụ aza ẹnẹẹ nịnị!

¹⁹Anịragụ Ohomorihi ene hi Esiya, ka ẹnị kụ́ wụ nịnị. Akwira ọnịrị Ipirisira beri anịragụ Ohomorihi anaā gụ ini eehi ịdị ẹnịnị ka ẹnị kụ́ wụ nịnị ẹtẹẹtẹrẹ, agụvị ka ẹwụrị wa vị ọnya ini oze Ananyị yị.

²⁰Avaba ẹyịnyara ayị ene hi ịzẹnị ka ẹnị kụ́ wụ. Waa kụ́ ẹngụ nịnị ini oze ọnịnị ana sị zụ̀ ka wee sì ịrẹyị ẹngụ nịnị.

²¹Ẹmị Ịpọọrụ ụvọta ọ sị ụvọ amị chẹrẹ ẹ ka maa kụ́ wụ nịnị aanị nị

²²Ọza ene èe yi sì ịrẹyị Ananyị yị, o du oo kù. “Marana ta”, ọnị ọ vị ka, Ananyị yị, waa vẹ.

²³Ẹyịza ọọhẹ Ananyị yị Ijeesu Ikirisiti ọ̀ yà pe awụ.

²⁴Mee sì ịrẹyị avaba awụ nịnị ini oze Ijeesu Ikirisiti ana avaba ayị sị vị ọnya.