Read ebira 1 Anịkọrịntị 7 Bible Online

1 Anịkọrịntị 7 - ebira bible

1 Anịkọrịntị 7

¹Booro aanị, mee sì ka ma kà ọ̀nọ̀ ini oze ịrẹyị ọnị ụ chẹrẹ iwe anị tụ́ hi mi nịnị. Ọza ana àa ka ọnị ọ yị nyị ọnẹẹ, ọ́ọ mẹẹ ẹtẹẹrẹ.

²Ama agụvị ịrẹkọyịsẹ, ọzọza ọ̀ nyị ọnẹẹ anị, dị ọnẹẹ ọzọza ọ̀ va ọnọrụ anị.

³Ọnọrụ ọzọza ọ̀ọ mẹ̀ ịsa ana vọrọọ yị ose anị, dị ọnẹẹ ọzọza ọnị ọ̀ rẹẹ mẹ̀ ịsa ana vọrọọ hi ọva anị.

⁴Ọnẹẹ ọ yị nyị ọda ọchẹngụ anị; ọva anị ọ nyị ọda anị. Ọnọrụ ọnị ọ yị rẹ nyị ọda ọchẹngụ anị, ose anị ọ nyị ọda anị nị.

⁵Asị ẹvarose yi ka ẹnị ẹ yị kanyị ẹngụ, ẹ̀ yị vị ẹ hụhụ dọ ka ẹnị aa sị ụmẹ chee tịtẹ, dị ẹnị ẹ̀ẹ mẹ̀ aduwa. Ẹ̀ẹ vavọọ sị ọ mẹ, ẹ̀ rẹẹ mẹ ẹvarose ẹnịnị, agụvị asị Echu ne re oze za wa mẹ ịvị, agụvị ka ẹ yị zụ sị ụvọ za ẹngụ ẹnịnị.

⁶Ịnị ka ọza ọ̀ nyị ọnẹẹ, óo zoza, ama mẹ yị mẹ̀ ẹ ọda.

⁷Mị yaanị sì ka avaba aza ẹ̀ yà anka ẹ́mị mẹ̀ yà. Ama ụkata oni Ohomorihi sị yị ọzọza vị irenyi-irenyi. Ohomorihi ộ sị ụkata yị aza ẹnyị ka ẹ̀ zụ mẹ ọsọnị, dị ọ rẹ sị ụkata yị ọsa ka ẹ̀ zụ mẹ ọsọọ nị.

⁸Màa kà a yị okoviya nịnị ọnịrị osoku nịnị ka ẹ̀ kụkụ yà, m mẹ̀ yà aanị, óo zoza.

⁹Ama ẹnịnị ẹ̀ yị zụ sị ụvọ za ẹngụ ẹnịnị, ẹ̀ na nyị ọnẹẹ. Ọza ọ̀ọ vana nyị ọnẹẹ, ọ́ọ dahi hu ka ụngwẹ ara ọ̀ọ kụ̀ ọọ, dị ọ̀ọ sị ụyaa rị ọ.

¹⁰Yị ẹvarose nịnị, maa mẹ̀ ọdaa yị wa ka asị a nyị ọnẹẹ ene yi ọva anị tịtẹ. Ẹ yị vị ẹmị kẹnẹ aa kà a wụ nịnị, avọọ Ananyị yị mẹ̀ mẹẹ ọda nị.

¹¹Ọnẹẹ ọ̀ọ ka ọnị ee yi ọva anị, ọ̀ kụkụ na yaayịtẹ, asị ọ va ọnọrụ ọsa. Ẹ̀ yị vị avọọ, ọnịrị ọva anị ọ̀ varẹma ze. Asị ọnọrụ ọnị re yi ose anị tịtẹ o.

¹²Mị raà kà ịrẹyịị yị ẹwụ nịnị ana vọ. Ẹmị ụvọta kẹnẹ aa kà ọsọnị nị. Ananyị yị ọ yị mẹ̀ ẹ ọda: Ọdọwụ ọ̀ọ nyị ọnẹẹ ẹnẹ ẹ̀ yị dọ wụ́, dị ose ọnọọ dọ ka ọnịrị ọ aa yịị ra nị, asị o ne yi ọ.

¹³Ọnẹẹ ana rẹ dọ wụ́, ọnị ọ̀ọ rẹ vá ọnọrụ ẹnẹ ẹ̀ yị dọ wụ́, dị ọva anị ọnọọ dọ ka ọnịrị ọ aa yịị ra nị, asị oni re ne yi ọ.

¹⁴Ọnọrụ ẹnẹ ẹ̀ yị dọ wụ́, ose anị ọ raà sị ọ tụ́ irenyi yi Ohomorihi, agụvị ka ọnị ộ dọ wụ́. Ọnẹẹ ẹnẹ ẹ̀ yị dọ wụ́, ọva anị ọnị ọ rẹ raà sị ọ tụ́ irenyi yị Ohomorihi, agụvị ka ọnị ộ dọ wụ́. Ẹ̀ yị vị avọọ, ẹnịnị ẹ yị zụ́ sị ezi ẹnịnị tụ́ irenyi yị Ohomorihi. Ama ọ mẹ yà aanị, ezi ẹnịnị kụkụ vaa vị ọnịnị.

¹⁵Ama ọza ẹnẹ ẹ̀ yị dọ wụ́ ọ̀ọ kà a ka ọnị ee yi ọsa ana dọ wụ́, ụ dọ ooho. Ọ̀ọ vavọọ yà, ẹ yị nyị ọda ana za ọdọwụ ọnọọ, àa vị ọnọrụ, àa vị ọnẹẹ. Ama Ohomorihi óo sì ka yaa yà ịnị ẹngwọọrọ.

¹⁶Ẹwụ ọnẹẹ ana dọ wụ́, wáá daka yẹ, à vị wa zụ mẹ ka Ohomorihi ọ̀ dọ ọva awụ ẹnẹ ẹ̀ yị dọ wụ́ há? Ẹwụ ọnọrụ ana dọ wụ́, wáá daka yẹ, à vị ẹwa rẹ zụ́ mẹ ka Ohomorihi ọ̀ dọ ose ewu ẹnẹ ẹ̀ yị dọ wụ́ há?

¹⁷Ọzọza ọ̀ yà udi ọnị ọ yà, dị Ohomorihi hị́ ọọ, dị ọ̀ rẹ mẹ ọpa ụkata oni Ohomorihi sị yọ! Ọda ọnị maa mẹẹ yị avaba anịragụ Ohomorihi ọ vị ọnọọ nị.

¹⁸Ọza ana àa sị ụvẹvẹnẹ jị dị Ohomorihi vaa hị́ ọọ nị, asị ọ kà a ka ọnị aa sị ụvẹvẹnẹ ọnọọ kwooze! Ọza ẹnẹ ẹ̀ yị jị ụvẹvẹnẹ dị Ohomorihi va hị́ ọọ, asị ọ na kà a ka ọnị aa jị ụvẹvẹnẹ!

¹⁹Ọza ọ̀ọ jị ụvẹvẹnẹ, ọ̀ yị jị ụvẹvẹnẹ, ẹ yị nyị ọ mẹ̀ kà. Ịsị ẹ vị ịrẹyị obooro ọ vị ka ọza ọ̀ sị ụvọ za ọda Ohomorihi nị.

²⁰Ọzọza mẹ̀ yà dị Ohomorihi va hị́ ọọ avọọ, ọ̀ vavọọ yị yà.

²¹Àa vị ọrịhị ụ vị dị Ohomorihi va hị́ wụ nị, asị ụ kụkụ sị ayị nọ ịnị anị. Ama wèe re oze hụụnị ọrịhị ọnọọ, ụ hụụnị anị.

²²Ọza ana àa vịdị vị ọrịhị dị Ananyị yị va hị́ ọọ ka ọnịrị ọ ọ̀ vị ọnya nị, ozi ọ kụkụ vị yị Ananyị yị nị. Ọza ana àa rẹ vị ozi dị Ananyị yị va hị́ ọọ nị, ọ kụkụ sị vara ọrịhị Ananyị yị.

²³Ohomorihi ọ raà hị́ wụ nịnị, ọ sị ụta awụ nịnị sí; agụvị avọọ asị ụ kụkụ na vị ọrịhị ọza nịnị.

²⁴Ẹwụ nịnị ẹyịnyara amị, udi ọnị ọzọza yà, dị Ohomorihi va hị́ ọọ, ọ̀ yị yà udi ọnọọ, dị ọnịrị Ohomorihi ọ̀ vabẹ!

²⁵Ini oze ịrẹyị anẹẹ, ana ahịka ẹ̀ yị nyị ọnọrụ, ọnịrị okoviya nịnị, ẹ yị nyị ọda ana Ananyị yị mẹ mị ini oze ẹnịnị. Ama maa kà a wụ nịnị ịsị emi ro. Wa zụ sị ayị tụra mị nịnị agụvị ka, Ananyị yị ộ vayị amị.

²⁶Eme ro ka agụvị ẹngụkata ene si nyima booro aanị, ọzọza ọ̀ọ yà anka ọ̀ mẹ̀ yà booro aanị, óo zoza.

²⁷Ọza ana àa sị ọnẹẹ nyị, asị ọ kà ka ọnị ee yi ọọ. Ọza ẹnẹ ẹ̀ yị nyị ọnẹẹ, asị ọ kà ka ọnị aa nyị ọnẹẹ.

²⁸Ama wàa na nyị ọnẹẹ, wẹ yị mẹ ịvị. Ọnẹẹ ẹnẹ ẹ̀ yị nyị ọnọrụ, ọ̀ọ na va ọnọrụ, ọ yị mẹ ịvị. Ama mẹ yị yaanị sì ka wáa nyị ẹngụkata eyinị-eyinị ẹnẹ ẹngụ aza ẹnẹẹ vaa nyị nịnị.

²⁹Ẹwụ nịnị ẹyịnyara amị, ịsị máa kà, yị: Ụmẹ ayị aa chee aanị. Agụvị avọọ, hụrị ọyaanị na, aza ana nyị ọnẹẹ, ẹ̀ẹ mẹ anka aza ẹnẹ ẹ̀ yị nyị ọnẹẹ avọọ.

³⁰Aza ene èe sú ùnè, ẹ̀ẹ mẹ anka aza ene è yi sú ùnè avọọ. Aza ana raa jẹ, ẹ̀ẹ mẹ anka aza ẹnẹ ẹ̀ yị jẹ avọọ!

³¹Ọza ana àa nyị ịsa aa mẹ ịnị ẹhẹ ọnọnị, ẹ̀ẹ mẹ anka ọza ẹnẹ ẹ̀ yị sị avaba ayị anị tụ́ ọọ! Agụvị ka ẹhẹ ọnọnị mẹ̀ yà booro aanị, aa vaa ta.

³²Me yi sì ka à nyị ịsị ẹ và wụ ayị zi nịnị. Ọza ẹnẹ ẹ̀ yị nyị ọnẹẹ, vị anaā sịị ayịị tụ́ ịnị ịsa Ananyị yị. Vị eē sì ka ẹnị ẹ̀ẹ mẹ̀ ịsa ene zé Ananyị yị eyi kẹnẹ nị.

³³Ama ọza ana nyị ọnẹẹ, vị anaā sịị ayịị tụ́ ịnị ịsa ẹhẹ, dị ee sì ka ọnị ọ̀ọ mẹ̀ ịsa ene zé ose anị eyi;

³⁴agụvị avọọ, dị ariro anị sị há hi ẹẹva. Ọnẹẹ ẹnẹ ẹ̀ yị rẹ nyị ọnọrụ, ọnịrị ẹnẹ ẹ̀ yị yẹ ọnọrụ da vị ana rẹẹ̄ sị ayịị tụ́ ịnị ịsa Ananyị yị. Ẹnịnị vị eneē sì ka ẹnị ẹ̀ sị ẹngụ ẹnịnị beri ayị ẹnịnị yị Ohomorihi. Ama ọnẹẹ ana nyị ọnọrụ, vị anaā sịị ayịị tụ́ ịnị ịsa ẹhẹ, agụvị ka ee sì ka ọnị ọ̀ọ mẹ̀ ịsa ene zé ọva anị eyi.

³⁵Ọsọnị vị ọnị maa kà, ka ma sị gụ wụ nịnị ụvọ. Ẹ yị vị mee sì ka ma dọ wụ nịnị oro. Ama mee sị ka wa mẹ̀ ịsa ana vọrọ nịnị, dị ụ waa sị avaba ayị awụ nịnị saka-sakaa hẹkẹ Ananyị yị.

³⁶Ọza ọ̀ọ nyị ọnẹẹ tụ́ oze, dị o rò ka ọnị aa mẹ̀ ebira ẹnẹ ẹ̀ yị vọrọọ hi ọ nị; ẹ̀ yị kụkụ zụ sị ụvọ za ẹngụ anị, dị ee sì ka ẹnị ẹ̀ nyị ẹngụ nị, ẹ yị nyị ịvị ịnị anị. Ẹnịnị ẹ̀ na nyị ẹngụ.

³⁷Ama ọza ọ̀ọ raà sị ayị anị sị ọọ ka ọnị ọ yị nyị ọnẹẹ, dị ẹ̀ yị vị ọza ọ vavọọ sị ụkata za a nị; ọ̀ọ rẹ yẹ ka ọnị ọ zụ sị ụvọ za ẹngụ nị, ọ́ọ mẹ̀ ẹ ẹtẹẹrẹ, ọ̀ yị nyị ọ.

³⁸Ọza ana nyị ọnẹẹ anị, ọ́ọ mẹ̀ ẹ ẹtẹẹrẹ. Ọza ẹnẹ ẹ̀ yị nyị aanị, ọ́ọ mẹ̀ ẹ ẹtẹẹrẹ hu nị.

³⁹Ọnẹẹ ọnị ọva anị ọ̀ọ yị yàra, ọda ọ yị zẹ ẹ ka ọ̀ kụkụ na va ọnọrụ ọsa. Ama ọva anị òo wusu, óo re oze na va ọza ene zé eyi anka Ohomorihi mè sì ọọ.

⁴⁰Ama ọ̀ yị varẹma nyị ọnọrụ, ọ́ zụ jẹẹ hu nị. Avọọ ọ mẹ̀ yà ini eyi ẹmị nị. Mee ro ka ẹma rẹ nyị Ụhwẹ Ohomorihi bẹẹ.