Read ebira 2 Anịkọrịntị 2 Bible Online

2 Anịkọrịntị 2 - ebira bible

2 Anịkọrịntị 2

¹Agụvị avọọ ma raà sị ayị amị sị ọọ ka mẹ yị kụkụ vaa vẹ ịda awụ nịnị, di me ve du wu nịnị ayị.

²Mâ sị ẹwụ nịnị du ayị, ẹnẹ kụkụ vaa kụ́ ẹmị ẹngụụ nịya? Ẹ yị nyị ọza ẹnẹsa, ẹ̀ yị rẹ vị ẹwụ nịnị oni mi du ayị.

³Ịsị mị vịdị rẹ chẹrẹ tụ́ hi wu nịnị yị. Me yi sì ka ma vẹ ịda awụ nịnị ịnị ụmẹ ọnọọ, di u we ne du mi ayị nịnị, ẹwụ nịnị anaa vọrọ ka ọ̀ kụ́ mị ẹngụ nịya. Mâ yẹ kaakara ka ịnẹ amị òo hine, ịnẹ avaba awụ nịnị re vee hine bẹẹ.

⁴M mẹ̀ chẹrẹ iwe ọnọọ tụ́ hi wu nịnị, ayị amị vị ene du ẹtẹẹtẹrẹ, dị ẹgọ aa ká mị eyi. Ayị vị ka me si du wu nịnị ayị, ama dụ wa zụ sị yẹ nịnị ka mê sì ịrẹyị awụ nịnị ẹtẹẹtẹrẹ.

⁵Àa nyị ọza ene du ọza ayị, ayị vị emi o du ayị. Ẹ̀ yị daka vị avaba awụ nịnị o du ayị, ô du aza ẹnyị awụ nịnị ayị. Me yi sì ka ma kà a baaba.

⁶Ụya ana aza ọrụrụ-ọrụrụ awụ nịnị sị rị ẹngụ ọza ọnọọ, ộ hyakụ hụ ịsị ọ hụ.

⁷Ama kụkụ vagu ọọ du wee hunẹnẹẹ ayị nịnị, ka ayị anị ve si du ẹnẹmẹhị!

⁸Aarịhịnị nịnị, navọ ò re ka we yi sì ịrẹyị anị nịnị!

⁹Agụvị avọọ mị chẹrẹ iwe ọnọọ tụ́ hi wu nịnị nị, ka ma sị zama wụ nịnị re, wàa wụ́ ịrẹyị amị nịnị ịnị avaba ịsa ọnị mị kà.

¹⁰Ọza ọnị ụ wàa vagu ịnị ịsa odivi ọnị ọ mẹ nịnị, ẹma rẹ sị vagu ọza ọnọọ. Àa nyị ka ma vagu ọza, dị mị vagu ọọ nị, agụvị awụ nịnị mị vavọọ sị mẹ ọ́vịdị Ikirisiti nị.

¹¹Ẹ̀ yị vị avọọ, Echu sị yị huna. Yáa yẹ irikichi ana aa mẹ.

¹²M mè ne tù Itirowasị ka ma na kà enube ọyịza Ikirisiti ịzọọ, me ne tù ka Ananyị yị ọ sị oze mẹ tịtẹ ịzọọ yị mị.

¹³Ama ayị amị ọ sị vazi, agụvị ka me yi re Ịtayịtọsị ọyịnyara amị. Dị mị hụụ ịzọọ, dị maa nọ Imasedoniya nị.

¹⁴À vẹ ya kụ́ Ohomorihi avọ! Ẹ́yịrị Ikirisiti mẹ̀ sị vị ọnya, ộ mẹ̀ ka è ree ka Ikirisiti ọ raà nyị ehuna avaba ayị. Ộ sị yị mẹ anka ịsa ana nyị agụ ozoza ọnị ọzọza aa wụ́ avọọ ka aza ẹ̀ zụ yẹ ini oze Ikirisiti avaba aha.

¹⁵Vị ị sị mẹẹ anka eturare ana agụ anị zoza oni Ikirisiti aa sịị mẹ ịsọvọọ hi Ohomorihi avọọ nị. Ộ gara hi ẹtẹ yị avaba aza ana aa há ọnịrị aza ene ee vu ẹtẹ.

¹⁶Yị aza ene ee vu ẹtẹ, vị ị sị mẹẹ anka ịsa agụ ene sú, ana agụ anị rẹẹ̄ wụ̀ ọza avọọ nị. Ama yị aza ana vọ, vị ịsị mẹẹ anka ịsa ana yàra, ana agụ anị rẹẹ̄ mẹ ka ọza ọ̀ yàra avọọ nị.

¹⁷Ẹyị ẹ yị yà anka aza ọrụrụ-ọrụrụ ẹnyị ana sị ụvọ za ịrẹyị Ohomorihi anka ịsị a sịị̄ sẹ ohu. Ama Ohomorihi ọ tụ́ ẹyị ụtụ nị, dị yaa sị ịzẹyịzaa kà ịrẹyị anị ọ́vịdị Ohomorihi anka aza ọnị ọnịrị Ikirisiti sị vị ọnya.