Read ebira 2 Anịkọrịntị 8 Bible Online

2 Anịkọrịntị 8 - ebira bible

2 Anịkọrịntị 8

¹Ẹwụ nịnị ẹyịnyara amị, jẹẹ yaa kà a wụ nịnị ịsị Ohomorihi sị ayamva anị mẹ yị anịragụ anị ene hi Imasedoniya.

²Ẹzamare irenyi-irenyi vị ana nyayịnẹ tù wa ẹtẹẹtẹrẹ. Ama ayị ẹnịnị o yi hine pooro, ana ahịka ẹnịnị ẹ yị sị ụvọ kú oku vụrụ-vụrụ, ẹ mẹ̀ daka yị vị onosiye.

³Dị ma kà a wụ nịnị ka ẹnịnị ệ mẹ hu ọpa ẹnẹ ẹ zụ mẹ, ệ hyakụ mẹ huna ọpa ụkata ẹnịnị bẹẹ. Ayị ẹnịnị kẹnẹ ẹ vavọọ si sì ọọ nị.

⁴Ệ da ịpẹ yị ẹtẹẹtẹrẹ ka à nyị ẹnị iyi dị ẹnị ẹ̀ nyị ụvọ tụ́ ẹkẹhị ọyịsị yị aza Ohomorihi.

⁵Ẹnịnị ẹ raà mẹ huna ọpa ẹnẹ ẹyị tụra eyi, ệ vịdị raà sị ẹngụ ẹnịnị yị Ananyị yị, dị ẹ kụkụ va sị ẹngụ ẹnịnị ị nyị, anka Ohomorihi mé sì ọọ.

⁶Agụvị avọọ yé hú Ịtayịtọsị ụvọ ụkọrọ ẹyịza ọyịmẹ̀ ọnọnị oni o nyima anị aanị, ò re ka ọnị ọ́ za a ẹtẹ beri ewu nịnị.

⁷Waa mẹ ẹtẹẹrẹ ịnị avaba ịsa nịnị. Wâ dọ wụ́ nịnị, wa rẹ zụ kà ịrẹyị nịnị, dị ụ rẹ yẹ ịrẹyị nịnị nị. Wa rẹ kụ́ ẹngụ hi ụkọrọ Ohomorihi nịnị, we re sì ịrẹyị ayị nịnị. Re ka ụ raa mẹ̀ ụkọrọ ẹyịza ọyịmẹ̀ nịnị ẹtẹẹtẹrẹ o.

⁸Mẹ yị mẹ̀ ẹ ọdaa wụ nịnị. Ama mee sì ka ma yẹ, u meme sì ịrẹyị ọza nịnị; agụvị avọọ m maa kà a wụ nịnị, aza ana vọ mẹmẹ aa gụ aza ụvọ nị.

⁹Wâ yẹ nịnị, Íjeesu Ananyị yị oni Ohomorihi nyị mẹ ohinọyị ka ọ̀ dọ yị há, ịzị ọ vayị ọza na zá. Ọzọbanyị ọ vị nị, ộ hụvị awụ nịnị bàrà onosiye, ka ẹwụ nịnị ọ̀ zụ vara ọzọbanyị ini oze osiye anị.

¹⁰Ịsị emi ro nị ịrẹyị ọnọnị yị: Ụkọrọ oni u nyima anị nịnị ayẹnẹ, â vọrọ ka wa mẹ̀ ẹ ta nịnị. Ẹwụ nịnị ọ vị ọnịpaapa ene sì ka waa mẹ̀ ẹ, di u re nyima aa mẹ̀ ẹ nịnị nị.

¹¹Wa yịị mẹ̀ ụkọrọ ọnọọ nịnị, dị ụ wa mẹ̀ ẹ ta nịnị! Ụ mẹ̀ sị ayị sị ọọ, di u sì ọọ nịnị, vavọọ sị ayị sị ọọ dị ụ waa mẹ̀ ẹ ta nịnị! Ịsa tụra ịsa ọnị ụ waa nyị, ụ sị mẹ̀ ẹ nịnị.

¹²Wàa sị ayị sị ọọ nịnị, ọpa ịsị ụ waa nyị dị ụ sị mẹ ọgụvọ nịnị nị, Ohomorihi vaa dọ. Ọ yị kà a ka wa na sị ịsị ụ wẹ yị nyị vẹ nịnị.

¹³Mẹ yị kà a ka aza ana vọ ẹ̀ yà ịnị aha, dị ẹwụ nịnị ọ̀ọ rị ụya.

¹⁴Ama wâ nyị rị ụvọ nịnị booro aanị, agụvị avọọ â vọrọ ka wa mẹ ọgụvọ yị aza ẹnẹ ẹ̀ yị nyị nịnị. Ịhị ẹwụ nịnị ẹ̀ yị rẹ kụkụ nyị rị ụvọ, dị ẹnị nyị nị, dị ẹnị rẹ mẹ ọgụvọ yị ẹwụ nịnị. Ọnọọ vaa mẹ ka wa vị ẹbẹẹbẹ nịnị.

¹⁵Avọọ ọ mẹ̀ vị nị, anka a mẹ̀ vịdị chẹrẹ ẹ tụ́ ini Iwe Ohomorihi ka: Ọza ana kụ́ baaba, aanị ọ yị rụrụ baaba; ọza ana va kụ́ chee ẹ yị nyị ka áanị o si weyi.

¹⁶Yâ kụ́ Ohomorihi avọọ ka ộ mẹ̀ ka Ịtayịtọsị ộ sị ayị sì ịrẹyị awụ nịnị, anka ẹyị mẹ̀ rẹẹ mẹ

¹⁷Ẹ yị vị ịpẹ ọnị ị dá yọ kẹnẹ ọ dọ: ọnị ụvọta ộ hyakụ sì ọọ ịnị ayị anị ka ọnị ọ̀ vẹ ịdị awụ nịnị.

¹⁸Yaa tụ́ ẹnẹbẹnị ayị ọnyaa saasa a ana avaba anịragụ Ohomorihi ẹ̀ẹ sị ụbanyị yị, agụvị ka aa mẹ̀ ụkọrọ enube ọyịza ọyịkà.

¹⁹Ẹ yị hyakụ vị ọnọọ kẹnẹ, anịragụ ẹ sị ọọ nyị, dị ẹ tụ́ ọọ ka ọ̀ọ saasa ayịị jịnẹ ini oze ụkọrọ ẹyịza ọyịmẹ̀ nị ọnị yaa mẹ nị. Yaa sịị sị ụbanyịị yị Ohomorihi, dị ya rẹ sị zụ̀ ka yee sì ka ya gụ aza ụvọ.

²⁰Ye yi sì ka ya mẹ ka aza ẹ̀ẹ tụ́ yị ohuvọ ini oze ọnị ị zị sị ụvọ za ẹyịza ọbanyị ọnọọ.

²¹Ẹ yị vị Ananyị yị kẹnẹ, i yee sì ka ya mẹ̀ ịsa ana vọrọ ini eyi anị. Yee sì ka ya rẹẹ mẹ̀ ịsa ana vọrọ ini eyi ọza bẹẹ.

²²Ị raa tụ́ ẹnẹbẹnị ayị ọsaa saasa wa. Ya raà sị ịrẹyị ọrụrụ-ọrụrụ zama a re, ye si oo re ụmẹ tụra ụmẹ ka oō sì ẹtẹẹtẹrẹ ka ọnị ọ̀ gụ aza ụvọ. Ộ yẹ ka aza ana a zụ sị ayị tụra ụ vị nịnị nị. Ọnọọ ọ rẹ mẹ ka ọ̀ hyakụ sì ka ọnị ọ̀ mẹ ọgụvọ hu avọọ.

²³Àa vị Ịtayịtọsị yọ, ẹmịrị ọ, o dudu aa mẹ̀ ụkọrọ ka ya gụ wụ nịnị ụvọ nị. Anda ayị ana vọ ana saasa a, vị ọnụtụ anịragụ Ohomorihi, dị ẹ rẹ yaa sị ụbanyị vaa yị Ikirisiti nị.

²⁴Agụvị avọọ, sị zụ̀ ka wee sì ịrẹyị ẹnịnị, dị avaba anịragụ Ohomorihi ẹ̀ yẹ. Dị ẹ̀ rẹ yẹ ka ẹ yị vị ị yaa sị wụ nịnịị wo oto kẹnẹ-kẹnẹ.