Read ebira Anẹhwẹsọsị 4 Bible Online

Anẹhwẹsọsị 4 - ebira bible

Anẹhwẹsọsị 4

¹Ẹmị ana yà ịnị ẹngwa agụvị Ananyị yị maa dá ịpẹẹ wụ nịnị ka waa mẹ̀ ebira ana vọrọ tụra wụ nịnị anka aza oni Ohomorihi sị hị́.

²Nyị ịrẹsụ ọkahi, nyị ayohunẹnẹ, dị ụ wa rẹ vị onisuuru nịnị ẹtẹẹtẹrẹ. Wee sì ịrẹyị ẹngụ nịnị ini oze ọyịsị ẹngụ jị ọọ yị ẹngụ nịnị.

³Ẹwụ nịnị ọnị Ụhwẹ Ọnịnị sị vabẹ, re ka wáa sị vụrị dị ụ wa yị vavọọ vabẹ nịnị ịnị ẹngwọọrọ!

⁴Wa sị vị ọnya nịnị, anka ẹ́ngụ ọza mẹ̀ vị ọnya avọọ. Ụhwẹ Ọnịnị rẹ vị ọnya. Avọọ ị́sa oni Ohomorihi hị́ wụ nịnị ka wa vaa tụra eyi anị ọnị mẹ̀ rẹ vị ọnya nị.

⁵Ananyị yị vị ọnya, ẹdọwụ ọnị ị nyị ọ rẹ vị ọnya, dị a rẹ mẹ̀ ọyịhwọzenyi ọnyọọnyaa yị nị.

⁶Ohomorihi ana vị Ada avaba aza rẹ vị ọnya. Ọnị ọ nyị avaba ịsa nị, dị ọ rẹẹ̄ sị avaba ịsaa mẹ̀ ụkọrọ nị. Ọ rẹ yà ịnị avaba ịsa.

⁷Áa nyị ịsa ọrụrụ-ọrụrụ irenyi-irenyi oni Ikirisitiī sịị yị ọza. Ộ vavọọ raà sị ịsa yị ọzịnya-ọzịnya ayị.

⁸Â vịdị kà a tụ́ ini Iwe Ohomorihi ka, “Ọ mẹ̀ hịrẹ nọ ẹbẹẹba, ộ kụ́ aza ọnị ọ sị ehuna ẹnịnị nyị za, dị ọ gà ẹyịza yị aza nị.”

⁹Ịjị a kà a ka, “ộ hịrẹ nọ ẹbẹẹba”, sẹ vị iruvo anị? Ọnọọ ọ vị ka ô vịdị zi chí nọ ụvẹtẹ-ụvẹtẹ huuu da.

¹⁰Ọza ana vịdị nọ ụvẹtẹ, ọnị ọnọọ ọ rẹ và nọ ẹbẹẹba keekere nị, agụvị dị ọ̀ kụkụ yà avaba aha.

¹¹Ọnị ọ sị ụkata yị aza ẹnyị ka ẹ̀ vị odeyi, dị aza ẹnyị ẹ̀ vị ọnịsẹ, dị aza ẹnyị ẹ̀ rẹ vị enenubọyịza nị. Ọ rẹ sị ụkata yị aza ẹnyị ka ẹ̀ vị aza ana sị eyi pe aza Ohomorihi, dị aza ẹnyị ẹ̀ẹ zụ̀ aza ịsa nị.

¹²Ộ vavọọ mẹ, agụvị ò zụ tenyi avaba aza Ohomorihi ẹngụ, dị ẹ̀ zụụ mẹ̀ ụkọrọ Ikirisiti, dị ẹ̀ rẹ zụụ mẹ ọgụvọọ yị (anịragụ Ohomorihi ana vị) ẹngụ Ikirisiti.

¹³Avọọ ọ mẹ̀ vaa yịị yà pooro ne tù ụmẹ ọnya, ana ahịka avaba ayị vaa vaabẹ ịnị ọyịsị ayị tụra Ikirisiti, dị ya rẹ yẹ Ozi Ohomorihi. Ịjọnọọ ị vaa vịra, dị i rẹ gụ, anka Íkirisiti ọnị mẹ̀ rẹ yà.

¹⁴Ịjọnọọ, yẹ yị kụkụ vaa yà anka ezweyi ẹnẹ ẹ̀ yị mā jẹẹ aha ọnya, dị enevene ana aa zụ̀ aza ịsa aa kụ́ waa vaa chíi vaa hịrẹ anka ahị avọọ. Dị ẹyaa sị irikichi ẹnịnịị be aza enee vee vene.

¹⁵Ama à navọ yee sì ịrẹyị ẹngụ, dị yaa kà ịzẹyịzaa yị ẹngụ, agụvị dị yaa vịraa véné Ikirisiti ini oze tụra oze! Ikirisiti vị ana jẹẹ yị ịrẹsụ,

¹⁶ana aa sị oze zụ̀ avaba ẹngụ ana vọ. Ọnị ọ kụ́ avaba ẹnịnị vabẹ nị, anka ọ́zị mẹ̀ kụ́ ọchẹngụ ọza gẹ. Dị ẹyaa mẹ ụkọrọọ zị oze ọnya nị. Avaba ọchẹngụ ọza ọ̀ọ vavọọ aa mẹ̀ ụkọrọ, ọ mẹ̀ vọrọ, ọ vaa mẹ ka avaba ọchẹngụ ọ̀ọ vịra. Avọọ ọ mẹ̀ rẹ vị yị (anịragụ Ohomorihi ana vị) ẹngụ Ikirisiti nị, ọzọza àa gụ ọsa ụvọ, di e ree sì ịrẹyị ẹngụ nị.

¹⁷Maa sị ịrẹha Ananyị yị kà wụ nịnị ọ̀nọ̀ ka asị ụ rẹ̀ kụkụ zị ụsẹ anka anarịmadọwụ nịnị, ana ahịka ịrẹyị kẹnẹ-kẹnẹ eē ro nị.

¹⁸Ayị ẹnịnị vị ịrahụ; ẹnịnị ẹ́ yị nyị tụ́ ịnị ẹhẹ obooro oni Ohomorihiī sịị yị ọza, agụvị ka ẹ yị nyị ịsị ẹ yẹ, dị ẹ rẹ yaa mẹ ayọkatẹngụ nị.

¹⁹Ẹnịnị ẹ sị ụhị wara rị. Ẹ kụkụ raà sị avaba ẹngụ ẹnịnị yị ebira kẹnẹ-kẹnẹ. Ẹyaa mẹ avaba ebira ịdọtị pooro, ẹ yị za ụvọ jẹẹ.

²⁰Ama ẹ yị vị ịsị Ikirisiti sị zụ̀ ẹwụ nịnị ọ vị ọnọọ.

²¹Wâ wụ́ ịrẹyị Ikirisiti nịnị da, ọ rẹ raà zụ̀ wụ nịnị ịsa. Yáa yẹ ka ịrẹyị anị vị ịzẹyịza.

²²Agụvị avọọ kụkụ sị ebira awụ nịnị ịyẹẹyẹ tịtẹ! Ebira ọnọọ vị ịsa ọnị ọchẹngụ ọzaā sì eneē vene ọza; ọ sị wụ nịnị wụ da.

²³Navọ Ohomorihi ọ̀ vara ayị awụ nịnị ọnịrị ariro awụ nịnị ọwọọwa.

²⁴Kụkụ nyị ebira ọwọọwa oni Ohomorihi mẹ véné ẹngụ anị nịnị! Ẹngụ ebira ọnọọ vị anaā mẹ̀ ịsa ana vọrọ, dị ọ́ nị, di o re zé Ohomorihi eyi.

²⁵Agụvị avọọ, asị u rè kuku cheeche nịnị! Ọzọza ọ̀ọ kà ịzẹyịzaa yị ọnọhụva anị, agụvị ka avaba ayị vị ọnya.

²⁶Wa zụ kụ́ ayị, ama asị ụ zẹẹ ka ọyịkụ ọ̀ sị wụ na mẹ ịvị! Asị ụ zẹẹ ka wa kịị kụ́ ayị pooro dị ọyị ọ̀ ta.

²⁷Asị ụ sị oze yị Echu nịnị!

²⁸Ọza eneē vidii yi oyi, ọ̀ na hụụnị oyi oyiyi! Ọ̀ kụkụ naa sị ụvọ anịị mẹ̀ ụkọrọ ini oze ene zoza, dị ọ̀ zụ nyị, dị ọ̀ hyakụụ mẹ ọgụvọọ yị onosiye nịnị bẹẹ!

²⁹Asị ụ rẹ̀ kà ịrẹyị odivi nịnị! Ama waa kà ịrẹyị ọyịza ana vaa gụ aza ụvọ nịnị, dị aza ana aa wụ́ ịrẹyị awụ nịnị, è zụ re ọgụvọ ịnị anị.

³⁰Asị ụ mẹ ka ayị Ụhwẹ Ọnịnị Ohomorihi ò du nịnị! Ụhwẹ Ọnịnị oni Ohomorihi sị wụ nịnị vị apọtẹrẹwa ana sị zụ̀ ka ẹkụhị aa vẹ oni Ohomorihi vaa sị dọ wụ nịnịị há.

³¹Asị ụ rẹ̀ kụkụ nyị ẹngụrẹyị ọnịrị ọyịkụ nịnị! Asị u rè nowu kú ẹngụ nịnị, asị ụ rẹ̀ rẹ kụ̀ ẹngụ ụhụ nịnị! Hụụnị avaba ebira odivi nịnị!

³²Ama waa ngụ ayị ẹngụ nịnị, dị ụ waa vayị ẹngụ nịnị, dị ụ wa rẹẹ vagu ẹngụ nịnị, anka Ohomorihi mẹ̀ hụ agụvị Ikirisiti dị ọ vagu wu nịnị.