Read ebira Anihwiripi 2 Bible Online

Anihwiripi 2 - ebira bible

Anihwiripi 2

¹Wáa yẹ nịnị ka ẹwụrị Ikirisiti ọ sị vị ọnya nịnị. Ọnọọ ộ sị ụkata yị ayị awụ nịnị. Ikirisiti óo sì ịrẹyị awụ nịnị, agụvị avọọ ayị awụ nịnị óo hunẹnẹ. Ẹwụrị Ụhwẹ Ọnịnị ọ sị vabẹ nịnị, ụ raa ngụ ayị ẹngụ nịnị, di u ree roo yị ẹngụ nịnị nị.

²Agụvị avọọ, navọ wa sị ayị yị ẹngụ, dị ụ wa rẹẹ sị ayị ọnyaa sì ịrẹyị ẹngụ nịnị, dị ụ wa rẹ nyị ariro ọnya nịnị. Ọnọọ vaa mẹ ka ịrajẹ amị ọ̀ gụ.

³Asị a nyị ọza ana sị ụhị ọyị kụ̀ mẹ ịsọnyị-ịsọnyị. Asị ụ rẹ mẹ̀ ịsa agụvị di u we zụ sii wo oto nịnị. Ọzọza ọ̀ kà ẹngụ anị chi, asị aza ẹnyị ro o ka ọnị óo huna ọsa.

⁴Asị ọzọza rè sì ọyịza yị ẹngụ anị kẹnẹ, ama wee sì ọyịzaa yị ẹngụ nịnị.

⁵Ẹngụ ayị oni Ijeesu nyị avọọ, a vọrọ ka ẹwụ nịnị ọ̀ rẹ nyị nị:

⁶Ikirisiti vị ana yà anka Ohomorihi avọọ, ama ẹ yị sị ahụ kà aba ka ọnịrị Ohomorihi ọ̀ọ mẹ ọpa.

⁷Ọnị ụvọta ộ sị ẹngụ anị ka ẹ yị nyị ịsị ọnị vị, ị ọ vara ẹngụ anị ozi ahụ nị. Ộ vara ẹngụ anị anka ọza rị ẹyịrẹsụ,

⁸dị ọ ra ịnị ẹhẹ anka ọza nị. Ộ kà ẹngụ anị chi, dị ọ hyakụ zẹẹ ka à wụ́ ọnị, dị ahịka vị a hyakụ kanyị ọ za ọchị apavahị nị.

⁹Agụvị avọọ di Ohomorihi kụkụ sị ọ tụ́ ẹba ẹtẹẹtẹrẹ nị; dị ọ rẹ sị ịrẹha ene huna avaba ịrẹha yọ nị.

¹⁰Avaba ịsa ene hi ẹbẹẹba ọnịrị ẹhẹ beri ini eku, ẹ̀ẹ wụ́ ịrẹha Ijeesu, e vee kú ẹtẹẹ yọ.

¹¹Avaba ẹnịnị rẹ vaa sị irenu ẹnịnịị kà a ka Ijeesu Ikirisiti ọ vị Ananyị yị nị. Ọnọọ rẹ vaa sị igirima yị Ohomorihi ana vị Ada anị.

¹²Ẹwụ nịnị anda ayị, anka ụ mẹ̀ yịị wụ́ ịrẹyị amị, m mẹ̀ yà ịdị awụ nịnị, wa vavọọ yịị wụ́ ịrẹyị amịị hu avọọ nịnị, m mẹ̀ yị mẹ daka kụkụ yà ịdị awụ nịnị aanị. Sị angwahi Ohomorihi beri ẹgahị, wa sịị mẹ̀ ụkọrọ ana vaa mẹ ka wa há nịnị;

¹³agụvị ka Ohomorihi aa mẹ̀ ụkọrọ ịnị ayị awụ nịnị nị, ọnị ọ vị ka aa mẹ ka wee sì ka wa mẹ̀ ịsa ene zée eyi nịnị, dị ụ wa rẹẹ mẹẹ nịnị.

¹⁴Ịsa tụra ịsa ọnị ụ wàa mẹ, asị ụ rị ihuhu, asị ụ rẹ nyị ahankata tụ́ ọ nịnị.

¹⁵Wa vavọọ mẹ agụvị asị ụ na nyị ohuvọ, dị ụ wa zụ nị nịnị. Ọnọọ ọ vaa mẹ ka wa zụ vị ezi Ohomorihi ẹnẹ ẹ̀ yị nyị ịsa odivi nị. Ụ mẹ̀ yà ịnị akakana anẹhẹ edivi ana ayị ẹnịnị ẹ̀ yị vọrọ aanị, áa vọrọ ka wa vị ẹtohweyi yị wa tụ́ ịnị ẹhẹ nịnị.

¹⁶Sị ụvọ za ịrẹyị anaā mẹ ka ọza ọ̀ yàra nịnị, agụvị ịhị Ikirisiti ọ̀ọ vavẹ, ma zụ jẹ ịrajẹ ka echi ọnị mị zwe ọnịrị ụkọrọ ọnị mị mẹ, ọ rẹ̀ va vị ọọhẹ.

¹⁷Ụ mẹ̀ sị ayị tụra Ijeesu nịnị, vị ọ sị mẹẹ ka ụ mẹ̀ ịsọvọ hi Ohomorihi nịnị nị. Àa nyị ka à sị ụhwẹ ẹmị ụvọta tụ́ ịnị ịsọvọ ọnọọ, mị vaa jẹẹ tụ́ ọ. Mee pe wu jẹ nịnị,

¹⁸ẹwụ nịnị ọ̀ rẹ vavọọ pe mii jẹ.

¹⁹Ijeesu Ikirisiti Ananyị yị òo sì, mi vee jintuu tụ́ Itimotii hi wu nịnị. Ọ̀ọ vavẹ va kà enube awụ nịnịị mị, ayị amị vaa nẹtẹ.

²⁰Ẹ yị nyị ọza ẹnẹsa ene ee ro ịsị mee ro, àyị vị Itimoti ọnịnya. Ọnịnya ịrẹyị awụ nịnị re dooro nị.

²¹Ọzọza vị ene ee sì ẹ́ẹngụ anị kẹnẹ. Ẹnịnị ẹ yị tẹsị ịrẹyị Ikirisiti.

²²Wáa yẹ nịnị ka Itimoti ọ́ọ nyị ebira. Ẹmịrị ọ ô dudu kà enube ọyịza. Ô pe mi mẹ̀ ụkọrọ ọnọọ anka ozi mee pe ada anịị mẹ̀ ụkọrọ avọọ.

²³Agụvị avọọ, ọnị mị ro ka mi vee jintuu tụ́ụ hi wu nịnị, màa sị yẹ ịsị ẹ vaa za ịrẹyị amịị ịrẹsụ nị.

²⁴Ananyị yị òo sì, ó yị vee kù, dị ẹmị ụvọta ọ̀ vẹ.

²⁵Mèe roo ka áa vọrọ ka ma tụ́ Ẹpahwịrọdịtụsị vavẹ ve tù wu nịnị. Ẹmịrị ọ dudu vị ọdọwụ. Ẹmịrị ọ ore dudu mẹ̀ ụkọrọ, di i re dudu và ụvọ bẹ kụ́ ịrẹkụ nị. Ọnị ụ tụ́ vẹ nịnị ka ọ̀ va gụ mị ụvọ ini oze ịsa ọnị mẹ yị nyị nị.

²⁶O si kù ene eyi awụ nịnị hụrẹ aa tụra a. Ayị amị ọ yị nẹtẹ, agụvị ka wâ wụ́ ọ nịnị ka ẹngụ ộ zị ọ.

²⁷Ịzẹyịza ẹngụ ộ zị ọ, ana ahịka ọ sị vọ chee ò wusu. Ama Ohomorihi ộ vayị anị; ẹ yị vị ọnịnya kẹnẹ, ama beri ẹmị bẹẹ. Àa yị vị avọọ, ayodu yaanị raà dà tụ ịnị ayodu yị mị.

²⁸Agụvị avọọ, mị hyakụ ee sì ka ma wụsẹ tụ ọ hi wu nịnị nị, agụvị wàa rẹ varẹma re e nịnị, dị ayị awụ nịnị òo hine, dị asị ẹmị rẹ kụkụ vavọọ du ayị baaba.

²⁹Aarịhịnị, sị ịrajẹ dọ ọ nịnị anka ẹnẹbẹnị ini oze Ananyị yị. Ẹngụ ọza ọnọọ, aa vọrọ ka wa sị ụbanyị yọ nịnị.

³⁰Ọ sị vọ chee ò wusu agụvị ụkọrọ Ikirisiti kẹnẹ. Ộ sị ịrẹsụ tụ́ isu, agụvị ọ̀ nyẹngụ mẹ ọgụvọ ọnị ụ yaanị mẹ yị mị nịnị.