Read ebira Anikorasi 4 Bible Online

Anikorasi 4 - ebira bible

Anikorasi 4

¹Ẹwụ nịnị ọga, waa mẹ̀ ịsa ana vọrọọ yị ezi ahụ awụ nịnị. Tamayị ka ẹwụ nịnị ọ rẹ nyị ọga ọnya tụ́ ẹbẹẹba.

²Waa mẹ̀ aduwa nịnị ịnị ụmẹ tụra ụmẹ; asị ụ zẹẹ ka ayị awụ nịnị ọ̀ọ ngụ ọọ zị, wàa mẹ̀ aduwa; dị ụ wa rẹẹ kụ́ Ohomorihi avọ nịnị

³Wa rẹẹ mẹ̀ aduwaa yị nịnị ka Ohomorihi ọ̀ mẹ oze yị, dị ya zụ kà enube ọyịza ini oze ịrẹyị Ikirisiti oni iruvo anị nyịnẹ. Waa yẹ ka agụvị ịrẹyị ọnọọ mị yà ịnị ẹngwa nịnị nị.

⁴Mẹ aduwaa mị nịnị ka ma zụ kà a zụ̀ aza, ọ mẹ̀ vọrọ, dị ẹnịnị ẹ̀ zụ yẹ.

⁵Yẹ, ụ mẹmẹẹ sị ịrẹyọyẹẹ mẹ ebiraa hi aza ẹnẹ ẹ̀ yị vị ọdọwụ. Re ka we yi du ụmẹ ha nịnị.

⁶Re ka waa sị ịrẹyọyẹẹ kà ịrẹyịị yị aza, dị ịrẹyị awụ nịnị òo hine aza. Ọza ana àa họ̀ wụ nịnị use ịrẹyị, yẹ ụ mẹmẹẹ tụ́ ọọ ohi nịnị.

⁷ Ịtayịkịkọsị vị ẹnẹbẹnị ayị ini oze Ijeesu. Ọ vaa vẹ, dị ọ̀ kà avaba enube ini oze amịị wụ nịnị. Mée sì ịrẹyị anị agụvị ka aa sị ayị ọnyaa mẹ ụkọrọọ yị ịragụ Ohomorihi. Ẹmịrị ọ o dudu vị ozi ahụ Ananyị yị.

⁸Agụvị avọọ m maa tụ́ ọ hi wu nịnị nị, ka ọ̀ va kụ́ wụ nịnị ẹngụ nịya, dị ọ̀ kà a wụ nịnị, ị mẹmẹ yà hi ịzẹnị.

⁹Ọnịrị Onesimọsị ẹnẹbẹnị ayị ini oze Ijeesu oni i sì ịrẹyị anị, aa zịị vẹ nị. Onesimọsịị ọnị vị ana rẹ sị ayị ọnya jẹẹ pe Ijeesu. Anda awụ nịnị ọ vị nị. Ẹ vaa kà a wụ nịnị avaba ịsị aa na ịzẹnị.

¹⁰Arisitakọsị ẹnẹ ẹmịrịị yà ịnị ẹngwa ịzẹnị ka ọnị kụ́ wụ nịnị. Ịmaakị, ozi ọyịnyara Ịbanabasị, ka ọnị rẹ kụ́ wụ nịnị. Màa vịdị sị ọ kà a wụ nịnị ini oze anị ka ọ̀ọ vẹ ịda awụ nịnị, we sì ọọ ọzọga nịnị.

¹¹Ijeesu ana aā rẹẹ hị́ Ịjọsịtọsị ka ọnị kụ́ wụ nịnị. Aza ẹnị ẹyịta ẹnẹnị kẹnẹ ẹ vị Aniju ene ee pe mii mẹ̀ ụkọrọ yị ịjọva Ohomorihi nị. Ẹnịnị ệ kụ́ mị ẹngụ nịya ẹtẹẹtẹrẹ.

¹²Epahwirasi ka ọnị rẹ kụ́ wụ nịnị. Anda awụ nịnị ọnị rẹ vị, dị ọ rẹ vị ozi ahụ Ijeesu Ikirisiti nị. Ọọ̄ mẹ̀ aduwaa wụ nịnị ẹtẹẹtẹrẹ, ka waa vịraa tụ́ ịnị ịsa Ohomorihi nịnị; dụ wa zụ yẹ ịsị Ohomorihi sì, dị ụ wa rẹ zụụ mẹẹ nịnị.

¹³Ẹmị ụvọta ọ́ọ dọ ivenu tụ́ ọọ ka aa mẹ̀ ụkọrọ ẹtẹẹtẹrẹ agụvị awụ nịnị ọnịrị agụvị Anirayodesiya beri Anihiraporisi.

¹⁴Iruuku ana vị idokita oni i sì ịrẹyị anị, ọnịrị Ịdẹmasị ka ẹnị kụ́ wụ nịnị.

¹⁵Kụ́ anda ayị ene hi Irayodesiya, ọnịrị Inimpasi beri anịragụ Ohomorihi anaā kụ́ụ gụ ini eehi anị!

¹⁶Àa sị iwe ọnọnị kà wụ nịnị, re ka a rẹ kà a yị anịragụ Ohomorihi ene hi Irayodesiya. Ẹwụ nịnị ọ̀ rẹ kà iwe anị Anirayodesiya vaa sịị tụ́ụ hi wu nịnị!

¹⁷Kà ẹ yị Achipọsị ka ò re ka ọnị ọ́ọ mẹ̀ ụkọrọ oni Ananyị yị sị chire e ụvọ.

¹⁸Ẹmị ụvọta aa chẹrẹ ọsọnị aanị nị: Wáá dahi nịnị? Tamayị ka ịnị ẹngwa mị yà ịzẹnị nị. Ohomorihi ọ̀ mẹ ọyịza wụ nịnị o.