Read ebira Ijosuwa 1 Bible Online

Ijosuwa 1 - ebira bible

Ijosuwa 1

¹Â nyị ụmẹ ọnya aanị, ịnị ụmẹ ọnọọ Imosiisi ana vị ozi ahụ Ẹnẹyịmavara ó wusu. Â nyị ọnọrụ ọnya aanị ana vị ọnọgụvọ anị ana aā hị́ Ijosuwa. Ịrẹha ada anị ọ rị Inuni nị. Ẹkụhị ọnya Ẹnẹyịmavara ô pe e kà ịrẹyị.

²Ộ kà, Imosiisi ana vị ozi ahụ anị mè wusu aanị, Ijosuwa ọ̀ kwẹẹtẹ dị ọ̀ kụ́ avaba Anisirẹrị jịnẹ Okuha Ịjọdanị na ịnị ẹtẹ ọnị ọnị aa sị wa.

³Ẹnẹyịmavara kà ọnị a sị aha tụra aha ọnị Ijosuwa ọ̀ jị ahụ ngụ yọ anka ọnị mẹ̀ vịdị kà a yị Imosiisi.

⁴Ộ kà ẹtẹ ọnị ọnị vaa sị yọ ọ kwẹẹtẹ hụụ ịnị ụnọmị va hịrẹ na ngụ Ịrẹbanọnị, hụrị Ịrẹbanọnị na ngụ irehu ọbanyị ọnịrị irehu Iyuhwuretisi ne beri avaba ẹtẹ Anihiti ọnịrị ẹtẹ ana na ngụ oku ọbanyị ana aā hị́ Imeditareniya.

⁵Ẹnẹyịmavara rẹ kà a yị nyị ọza ana va nyayịnẹ và eyii kà Ijosuwa pooro dị ọ̀ sị ẹhẹ tịtẹ. Ộ kà ọnị mẹ̀ yà pè Imosiisi, avọọ ọnị mẹ̀ rẹ vaa yà pè Ijosuwa nị. Ọ kà ọnị ọ yị vaa mẹ̀ ụhị nyị ọ, ọnị ọ yị vaa hụrẹ ẹ ụvọ.

⁶Ẹnẹyịmavara kà Ijosuwa ọ̀ nyị ọtụtụrụma, dị ọ sị ayị vị ọnya, ka ọnị ọ vaa kụ́ aza ẹnẹẹ dị ẹ̀ na dọ ẹtẹ ọnọọ nị. Ọ kà ọnị ọ́ọ vịdị raà hị́ eku yi ohiku ẹnịnị ka ọnị aa sịị yị wa.

⁷Ẹnẹyịmavara ô hu Ijosuwa ọvụ ka ọ̀ jẹẹ gere-gere, dị ọ̀ nyị ọtụtụrụma ẹtẹẹtẹrẹ, di o re ka ọnị óo si eyi pè avaba ịrẹyị oni Imosiisi ozi ahụ anị ka yị ọ, dị ọ̀ saasa a. Ộ kà asị o jesi hụụnị ịrẹyị aanị zị oze ọnyọọnyị. Asị ọ ha zị eyi ụvọrị, a vị eyi ụvọha. Ọ kà ẹ̀ẹ vavọọ mẹ, ọnị ọ vaa mẹ ka ò re mẹ, o ve re mẹ ịnị ịsa tụra ịsa tụra ịsa ọnị ọ̀ọ sị ụvọ tụra ka ọnị aa mẹ.

⁸Di Ẹnẹyịmavara rẹ ka asị ọ zẹẹ ka Iwe ọda ọnị ọnị sị yị ọ avọọ, ọ hụrẹ ẹ ụvọ o! Ọ kà ọ̀ sịị tụ́ irenu jị ahẹ pooro, ọọdụ ọnịrị ịrahụ, agụvị di ò si eyi pè e, dị ọ mẹ avaba ịsa ana a chẹrẹ hi ịnị anị. Ọ kà ịjọnọọ o vee ree mẹ ịnị ịsa ọnị ọ̀ọ ka ọnị aa mẹ nị, di ee zee yọ.

⁹Dị Ẹnẹyịmavara rẹ ka ọnị ọ kà a yọ nọ! ọnị ka ọ̀ nyị ọtụtụrụma dị ọ sị ayị vị ọnya. Ọ kà asị o hí angwa, asị ayị hụrẹ ẹ ịnẹ ka ọnị Ẹnẹyịmavara ana vi Ohomorihi anị vaa yàa pè e oze tụra oze ọnị ọ̀ọ vaa zị.

¹⁰Ẹnẹyịmavara mẹ̀ vavọọ sị ka, di Ijosuwa va hị́ ohi-ohi aza ẹnẹẹ dị ọ mẹ̀ ọda yị wa ka

¹¹ẹ na ngụ ịzị aza ẹnịnị kụ́ udi tụ́, dị ẹ̀ kà a yị aza ẹnẹẹ ka e tenyi ịsọyịrị tịtẹ, ka ọ̀ọ na mẹ ẹkụhị ẹẹta tụ́ ọ ẹ vaa jịnẹ nọ akẹnẹ Okuha Ịjọdanị, dị ẹ̀ na dọ ẹtẹ ọnị Ẹnẹyịmavara ana vị Ohomorihi ẹnịnị aa sịị yị wa ana vaa vị ẹtẹ ẹnịnị.

¹²Di Ijosuwa va hị́ Anirubẹnị ọnịrị Anigadi neberi achẹva ịrẹsụ Anịmanasẹ dị ọ ka

¹³ẹ̀ tamayị ịrẹyị oni Imosiisi ọnụtụ Ẹnẹyịmavara kà yị wa. Ọ kà Imosiisi ọ́ọ kà a ka Ẹnẹyịmavara ana vi Ohomorihi ẹnịnị vaa sị ẹtẹ ọnọnị yị wa, dị ọ yị zẹẹ ka à nyị ịsị ẹ kanyị wa.

¹⁴Ọ kà Imosiisi ọ́ kà a ka ose ẹnịnị ẹnịrị ezi beri ogu ẹnịnị ẹ va yà ịnị ẹtẹ ọnị ọnị Imosiisi sị yị wa tụ́ akẹnẹ Ijodani oze ọnị ọyịị̄ zị hụrẹ vẹ. Dị Ijosuwa ka ama ẹnị ana vọ ne beri isoja nịnị ẹ̀ kụ ẹnya ịrẹkụ obobooro, dị ẹ jịnẹ nọ akẹnẹ ọsa anka isoja nịnị aa nọ ịrẹkụ avọọ. Ọ kà ẹ̀ yà ọvịdị anda ẹnịnị ana vọ dị ẹ̀ gụ wa ụvọ,

¹⁵pooro dị Ẹnẹyịmavara ọ̀ sị ụhwọtụ yị wa, ọnị mẹ mẹmẹ yị ẹwụ nịnị. Dị ẹnị ẹ rẹ dọ ẹtẹ ẹnịnị ọnị Ẹnẹyịmavara ana vi Ohomorihi ẹnịnị aa sị yị wa. Ọ kà ịjọnọọ dị ẹ̀ va vavẹ ịnị ẹtẹ ana a raà dọ yị wa, dị ọ kụkụ vị ẹẹnịnị. Ọ kà ẹtẹ ọnọọ Imosiisi ọnụtụ Ẹnẹyịmavara sị yị wa tụ́ akẹnẹ Okuha Ịjọdanị oze ọnị ọyịị̄ zịị hụrẹ nị.

¹⁶Dị aza ẹnẹẹ tụ́ Ijosuwa ohi dị ẹ ka avaba ịsị Ijosuwa ọ̀ọ kị kà yị ẹnị kẹnẹ, ẹnị vaa mẹ̀ ẹ, aha tụra aha ọnị ọ̀ọ tụ̀ ẹnị nọ, ẹnị aa na.

¹⁷Ẹ rẹ ka anka ẹnị mẹ̀ wụ́ ịrẹyị chire Imosiisi avọọ, avọọ ẹnị mẹ̀ rẹ vaa wú ịrẹyịị chire Ijosuwa nị. Ẹ ka ama Ẹnẹyịmavara ana vi Ohomorihi Ijosuwa ọ̀ yà pè e kẹnẹ anka ọ mẹ̀ vịdị yà pè Imosiisi.

¹⁸Ẹ rẹ ka àa nyị ọza ọnyọọnyị ana kụ̀ hịrẹ Ijosuwa, dị ọ̀ yị saasa avaba ịrẹyị ọnị ọ kà yị ẹnị nị, vị a vaa wụ́ ọza ọnọọ nị. Ẹ ka ọ nyị nyị ọtụtụrụma kẹnẹ, dị ọ sị ayị vị ọnya.