Read ebira 2 Anịtẹsaronika 2 Bible Online

2 Anịtẹsaronika 2 - ebira bible

2 Anịtẹsaronika 2

¹Ẹwụ nịnị ẹyịnyara amị, ini oze ka Ijeesu Ikirisiti Ananyị yị vaa vaa vẹ ọnịrị ụmẹ ọnị ọ vaa sị kụ́ yị nee pe ẹngụ anị, aarịhịnị

²asị ụ na zẹẹ ka ayị awụ nịnị ọ̀ wụsẹ vazi. Asị ụ rẹ zẹẹ ka angwa ò hí wu nịnị, agụvị ka aza aa kà a ka ẹkụhị Ananyị yị o si tu. Aza ẹnyị ẹ zụ kà a ka vị ẹnị vavọọ re ẹtẹ nị. Ọ zụ hwọọ a hị́ ka vị aza ẹnyị aa kà a ka Ohomorihi ọ vavọọ kà a yị ẹnị nị. Aza ẹnyị ẹ rẹ zụ kà a ka ẹyị hyakụ chẹrẹ ẹ tụ́ ini iwe vẹ nị.

³Asị ụ zẹẹ ka à nyị ọza ene vene wu nịnị ini oze ọnyọọnyị o. Ẹkụhị ọnọọ ọ́ yị vaa vẹ ne tù ụmẹ ana aza ọrụrụ-ọrụrụ vaa và ịrẹma Ohomorihi, dị ọza ọnọọ anaā jịnẹ avaba ọda ọ̀ sị ẹngụ anị tụ́ ẹhẹ. Ọnị ọ vị ọza ene vee vú ẹtẹẹ tụ́ ini ẹkụra nị.

⁴Ọnị ọọ̄ kụ̀ụ hịrẹ avaba ịsa ana aza aa hị́ Ohomorihi, ọnịrị avaba ịsa ana aza aa sị ụbanyịị yị. Dị ọ rẹ sị ẹngụ anị tụ́ ẹba ka ọnị ọ hyakụ huna avaba ẹnịnị nị. Ọ vá naa yaayịtẹ ini irehi Ohomorihi, dị ọ ka ọnị ọ vị Ohomorihi nị.

⁵Wáá kụkụ tamayị ka máa vịdị kà avaba ịsa ẹnẹnịị wụ nịnị, m mẹ̀ yà ịdị awụ nịnị?

⁶Ama áa nyị ịsa ẹnẹ ẹ̀yị zẹẹ ka ịsa ẹnẹnị ẹ̀ mẹ booro aanị. Wáa yẹ ịsa ọnọọ nịnị. Ịjị ụmẹ anị òo si tù, ọza odivi ọnọọ vaa sị ẹngụụ zụ̀.

⁷Ịsị ẹẹ̄ mẹ ka ọza ọ̀ jịnẹ avaba ọda o si nyima aa mẹ̀ ụkọrọ da, ama aza ẹyị yẹ. Ama ẹ́ yị nyị ịsị ọ vaa mẹ, àyị vị ịhị ọza ana sị ụvọ jị ọ oze, ọ̀ọ raà sị ụvọ kwooze.

⁸Ịjọnọọ ọgọnị dị ọza odivi ọnọọ sị ẹngụ anị zụ̀. Dị Ijeesu Ananyị yị sị ụhwẹ ana aa tụ́ụ hụụnị irenu anịị vẹ, dị ọ sị wụ ọọ. Dị ọ rẹ sị ẹtohweyi ọnị ọ za vẹ, di o si vú ọ ẹtẹ.

⁹Ọza odivi ọnọọ vịdị vaa sị ụkata Echuu vẹ, dị aa sịị mẹ̀ ụkọrọ ịvọpa ọnịrị ohyozirenu ireche.

¹⁰Ịnị ịsa odivi anị, ọ vaa sị irechee vene aza ene vee vụ ẹtẹ. E vee vu ẹtẹ kẹnẹ, agụvị ka ẹnịnị e yi sì ịrẹyị ịzẹyịza, ana zụ mẹ ka à yaanị dọ wa há.

¹¹Agụvị avọọ dị Ohomorihi tụ́ ịsị ẹẹ̄ sị ọzaa nyeeyi saka-saka, agụvị dị ẹ̀ kụkụụ dọ ịrẹyị ireche kẹnẹẹ wụ́ nị.

¹²Avaba ẹnịnị ẹnẹ ẹ̀ yị dọ ịzẹyịza wụ́ dị a hịka ịvị ọyị mẹ kẹnẹ áyị ẹnịnị hine tụ́ nị, Ohomorihi vaa jị ịvịị yị wa.

¹³Ẹwụ nịnị ẹyịnyara amị, áa nyị ka yaa kụ́ Ohomorihi avọ pooro agụvị awụ nịnị ana Ananyị yị sì ịrẹyị anị. Ohomorihi ọ nyị ẹwụ nịnị tịtẹ hụrẹ ụmọrụmọ ka ọnị ọ̀ dọ wụ nịnị há nị. Ọ́ vavọọ mẹ ini oze Ụhwẹ Ọnịnị ana vara wụ nịnị ọnịnị ọnịrị ka wâ dọ ịzẹyịza wụ́ nịnị.

¹⁴Ịsa oni Ohomorihi hị́ wụ nịnị tụ́ ịnị anị, ọ vị ọnọọ nị. Ộ hị́ wụ nịnị ini oze enube ọyịza ọnị ị kà wụ nịnị, dị ụ wa va nyị tụ́ ịnị ụbanyị Ijeesu Ikirisiti Ananyị yị.

¹⁵Agụvị avọọ, anda ayị nịnị, jẹẹ geri-geri, dị ụ wa sị ụvọ za enube ọnị ị sị zụ̀ wụ nịnị ịnị ịrẹyị ọnị ị kà ọnịrị ini iwe ọnị ị chẹrẹ!

¹⁶Ijeesu Ikirisiti Ananyị yị ụvọta ọnịrị Ohomorihi Ada ayị ée sì ịrẹyị ayị. Ệ vayị ka ya nyị ayohunẹnẹ pooro zịna-zịna, dị ya rẹ nyị ọyịtureyi tụ́ ịnị ịsa ene zoza.

¹⁷Ẹnịnị ẹ̀ navọ ẹ̀ sị ayị awụ nịnị hunẹnẹ, dị ẹ̀ mẹ ka wa nyị ọtụtụrụma, dị ụ wa zụụ mẹ̀ ebira ozoza, dị ụ wa rẹ zụụ kà ịrẹyị ene zoza nịnị pooro!