Read ebira 1 Itimoti 4 Bible Online

1 Itimoti 4 - ebira bible

1 Itimoti 4

¹Ụhwẹ Ọnịnị aa kà a, oyi were, ka ịnị ụmẹ ọdịrẹma ẹhẹ, aza ẹnyị ẹ yị kụkụ vaa sị ayịị tụra Ohomorihi. Dị ẹ kụkụ aa wụ́ ịrẹyị ụhwẹ echu eneē vene ọza, ọnịrị ịsa ọnị ụhwẹ echu aa sịị zụ̀ aza.

²Dị eyee cheeche, dị ẹyaa mẹ ogevegeve. Dị ayị ẹnịnị ẹ yị hyakụ kụkụ jị pèe, dị ọ sị mẹẹ ka vị a raà sị enyusẹ ịrịịra tụra ayị ẹnịnị, dị a sị ọọ wụ nị.

³Dị ẹ ka ẹ yị vọrọ ka aza ẹ̀ẹ nyị ọnẹẹ, dị ẹ rẹ ka asa aza rẹ̀ rị ịsa ẹnyị. Ama Ohomorihi vị ana mẹ̀ ịsa ẹnẹẹ ka aza ana vị ọdọwụ dị ẹ rẹ yẹ ịzẹyịza, ẹ̀ sị ọọ, dị ẹ̀ kụ́ ọnị avọ tụ́ ọọ, dị ẹ̀ẹ rị ọọ.

⁴Avaba ịsa oni Ohomorihi mẹ vị ene zoza, ẹyị nyị ana a vọrọ ka ọza òo nyị ịsị anị. Ama aza ẹ̀ẹ rị ọọ, dị ẹ̀ẹ kụ́ Ohomorihi avọ tụ́ ọọ!

⁵Ịsa ọnọọ óo zoza ini eyi Ohomorihi, agụvị ka Ohomorihi ọ́ọ vavọọ sị ọọ kà, dị aza rẹ sị aduwa mẹ̀ tụ́ ọọ nị.

⁶Wàa tama anda ayị nịnị ayị ini oze ịrẹyị ẹnẹẹ, ọnụkọrọ ozoza u waa vịị yị Ijeesu Ikirisiti nị. Wáa sị ịrẹyị ẹdọwụ ọnịrị ịzẹyịza ana a raà sị zụ̀ wụ, dị ụ saasaa pá ẹngụ awụ.

⁷Ama sị ụvọ hụụnị ịtọpa kẹnẹ-kẹnẹ ana ahịka ẹ yị nyị ịsị ẹ kụ́ ẹnịrị Ohomorihi gẹ. Wee tenyi ebira awụ ini oze ene zé Ohomorihi eyi!

⁸Ọza èee tenyi ọchẹngụ anị, ọ́ọ nyị ọgụ chee. Ama ọza èee tenyi ebira ini oze ene zé Ohomorihi eyi, ọ́ọ nyị ọgụ ini oze tụra oze; agụvị ka ọ vaa mẹ ka ọza ọnọọ ọ̀ ra ẹhẹ obooro ịnị ẹhẹ ọnọnị ọnịrị ịnị ẹhẹ ana aa vẹ.

⁹Ịrẹyị ọnọnị vị ịzẹyịza, áa vọrọ ka à sị avaba ayị dọ ọ.

¹⁰Agụvị avọọ, ị vụrị aa mẹ̀ ụkọrọ nị, agụvị ka yáa sị eyi tụra Ohomorihi ana yára. Ọnị ọ vị Ọdọzaha avaba aza nị, hu keekere, aza ana hyakụ sị ayị tụraa.

¹¹Mẹ ịrẹyị ẹnẹnị ọda, dụ wa sịị zụ̀ aza!

¹²Asị ụ zẹẹ ka ọza ọnyọọnyị ọ̀ sị eyi wụ wụ, agụvị ka wáa mẹhị vị ozweyi! Ama vị ọza ọnị ọdọwụ ana vọ vee sì ka ẹnị ẹ̀ẹ hama ịnị ịrẹyị irenu ọnịrị ebira ẹtẹẹrẹ awụ, ini oyisì ịrẹyị aza ọnịrị ayị ọyịsị tụra Ohomorihi beri ebira ọnịnị.

¹³Dị ma vavẹ, re ka wáa nyị ụmẹ dị waa kà Iwe Ohomorihi zụ̀ aza, dụ wa rẹẹ tụ́ wa ọtụtụrụma, dụ wa zụ̀ wa ịrẹyị Ohomorihi!

¹⁴Asị ụ navọ ụkata ọnị Ụhwẹ Ọnịnị sị wụ tịtẹ! Wáa yẹ ka ọ́nịsẹ nịnị mẹ̀ kà ịrẹyị, dị azọkụ ịragụ Ohomorihi sị ụvọ tụra wụ dị ẹ mẹ̀ aduwa, Ụ́hwẹ Ọnịnị sị ụkata ọnọọ yị wụ nị.

¹⁵Waa sị ịrẹyị ẹnẹẹ mẹ̀ ụkọrọ, dụ wa sị avaba ayị awụụ mẹẹ! agụvị ọzọza ò re, ụ mẹmẹ aa kà a tụ́ ọvịdị.

¹⁶Sị eyi pe ẹngụ awụ ọnịrị ịsa ọnị ụ waa sịị zụ̀ aza! Waa yịị mẹ̀ ịsa ẹnẹẹ, agụvị ka wàaa mẹẹ, ụ vaa dọ ẹngụ awụụ há ọnịrị aza ana aa wụ́ ịrẹyị awụ.