Read ebira 2 Itimoti 1 Bible Online

2 Itimoti 1 - ebira bible

2 Itimoti 1

¹Ẹma vị Ịpọọrụ nị. Ohomorihi ô sì ọ ka ma vị odeyi Ijeesu Ikirisiti, dị ma na kà a yị aza ịrẹyị oni Ohomorihi kà, ka ẹ yị zị nyị ka ọnị ọ yị vaa mẹ ka aza ẹnẹ ẹnịrị Ijeesu Ikirisiti sị vị ọnya, ẹ̀ yàra ịdị anị pooro zịna-zịna.

²Maa chẹrẹ iwe ọnọnịị tụ́ụ hi wu Itimoti ozi emi, mée sì ịrẹyị awụ. Ohomorihi Ada ayị ọnịrị Ijeesu Ikirisiti Ananyị yị ẹ̀ mẹ ọyịza wụ, dị ẹ̀ vayị awụ, dị ẹ̀ rẹ mẹ ẹngwọọrọ yị wụ.

³Máa kụ́ Ohomorihi avọ, ọnị maa sị ayị ọnyaa hẹkẹ anka ohiku ayị nịnị avọọ. Màaa mẹ̀ aduwa ụmẹ tụra ụmẹ, ọọdụ ọnịrị ịrahụ, mịị̄ tamayị awụ.

⁴Mâ tamayị ụ maa jị òrèrè. Eyi awụ aa tụra mị ẹtẹẹtẹrẹ; mee sì ka me re wu dị ayị amị ò zụ hine ẹtẹẹtẹrẹ.

⁵Ma rẹ tamayị, ụ mẹmẹ sị ayị ọnya tụra Ohomorihi. Avọọ Ịrọyịsị ọnyị awụ ọbanyị ọnịrị Iyunisi ọnyị awụ mẹ̀ rẹ sị ayị ọnya tụra Ohomorihi nị. Mâ yẹ kaakara ka avọọ ẹwụ mẹ̀ rẹ sị ayị ọnya tụra Ohomorihi nị.

⁶Agụvị avọọ, mee sì ka wa tamayị ụkata oni Ohomorihi sị wụ, m mẹ̀ sị ụvọ tụra wụ, dị mị mẹ̀ aduwaa wụ. Waa sị ụkata ọnọọ mẹ̀ ịsaa hu avọọ.

⁷Ụhwẹ Ọnịnị oni Ohomorihi sị yị, ọ mā mẹ ka yee hí angwa. Ama Ụhwẹ Ọnịnị ọnọọ vị anaa mẹ ka yaa nyị ụkata, di yee sì ịrẹyị ọza, dị yaa rẹẹ sị ụvọọ za ẹngụ ayị.

⁸Asị ụ na nyị ụhị ọ̀yị kà ịrẹyị Ananyị yị! Asị ụ rẹ na nyị ụhị agụvị ẹmị ana yà ịnị ẹngwa agụvị anị. Ama è wè re tenyi ẹngụ anka Óhomorihi ọ̀ọ mẹ̀ sị ụkata wụ, dị ụ wa nyị ụvọ tụ́ ịnị ụya ọnị ọzaa rị agụvị enube ọyịza.

⁹Ohomorihi ọ dọ yị ha, dị ọ hị́ yị ka yaa mẹ̀ ebira ọnịnị nị. Ẹ́ yị vị agụvị ịsị ị mẹ ọ vavọọ sị mẹ; ama agụvị ayamva anị kẹnẹ ọnịrị agụvị eto ọnị ọ vịdị sị mẹ yọ nị. Ini oze Ikirisiti ọ vavọọ sị vayị ayị hụrị ụmọrụmọ dị a va yẹ ka aa mẹ ẹhẹ nị.

¹⁰Ijeesu Ikirisiti Ọdọzaha ayị mẹ̀ vavẹ ẹhẹ aanị, Ohomorihi ọ raà mẹ ka aza è ree. Ijeesu ọ va raà kụ́ ụkata isu kwooze; ọ raà mẹ ka aza ẹ̀ kụkụ yára pooro dị asị e kuku sú. Ini oze enube ọyịza ị ya yẹ ọsọnị nị.

¹¹Agụvị enube ọyịza ọnọọ Óhomorihi nyị mị ka ma vị odeyi, dị maa kà a, dị ma rẹ sịị zụ̀ aza nị.

¹²Agụvị avọọ m maanị aa rị ụya aanị nị. Ama ụhị ẹ yị hụ agụvị avọọ nyị mị, agụvị ka mâ yẹ ọza ọnị mị sị ayị tụra. Mâ yẹ kaakara ka ịsị o si chire mị ụvọ, o zụ si eyi pee pooro ne tù ẹkụhị ọkarẹyị.

¹³Ịrẹyị ịzẹyịza ọnị mị raà sị zụ̀ wụ, sị ụvọ zaa; ọ̀ vị ịrẹyị ọnị ụ waa saasa. Wa vavọọ mẹ ini oze ọ́yị sị ayị tụra Ijeesu Ikirisiti ọnịrị ịrẹyị anị oyisì.

¹⁴Sị ụkata Ụhwẹ Ọnịnị ana yà ịnị ayị ayị, dị ụ wa sị sị eyi pe ịsị Ohomorihi si chire wu ụvọ.

¹⁵Wâ yẹ ka avaba ẹnịnị ene hi Esiya vana và hụụ ịrẹma amị. Ihwigẹlọsị ọnịrị Iherimogene yà ịnị aza ẹnẹẹ.

¹⁶Ohomorihi ọ̀ vayị aneehi Onesihworọsị. Ụmẹ tụra ụmẹ ọ sịị kụ́ mị ẹngụụ nịya nị. Ụhị ọyị nyị ọ ka mị yà ịnị ẹngwa

¹⁷Ọ màa yị va ngụ Iroomi kẹnẹ ô sì mi avaba aha, di o ve re mi nị.

¹⁸Ananyị yị ọ̀ navọ ịnị ẹkụhị ọkarẹyị, ọ̀ vayị Onesihworọsị oo! Wâ yẹ ka vị ọ nyayịnẹ gụ mị ụvọ Ẹ́hwẹsọsị ẹtẹẹtẹrẹ nị.