Read ebira Ịtayịtọsị 1 Bible Online

Ịtayịtọsị 1 - ebira bible

Ịtayịtọsị 1

¹Ẹma vị Ịpọọrụ ana vị ozi ahụ Ohomorihi, dị mị rẹ vị odeyi Ijeesu Ikirisiti nị. Ohomorihi ộ tụ́ mị ka ma na gụ aza ọnị ọ́ sị nyị ụvọ ka ẹ̀ zụ sị ayị tụra a: dị ma rẹ sị zụ̀ wa, dị ẹ̀ zụ yẹ ịzẹyịza anaā sịị oze zụ̀ aza ka ẹ̀ zụụ mẹ̀ ebira ene ze Ohomorihi eyi.

²Mị vavọọ aa mẹ, agụvị ka máa nyị ọyịtureyi ka ị vaa yàra ịdị Ohomorihi pooro zịna-zịna. Ịsị Ohomorihi kà hụrị ụmọrụmọ dị a va yẹ ka aa mẹ ẹhẹ ọ vị ọnọọ nị. Yáa yẹ ka Ohomorihi o mē cheeche.

³Ịjị ụmẹ anị ve si tù, dị Ohomorihi ana vị Ọdọzaha ayị va sị avaba ịrẹyị ọnọọ zụ̀ aza ini oze ịrẹyị anị ọnị o si chire mi ụvọ nị Ộ mẹ ọdaa mị ka ma vavọọ mẹ.

⁴Maa chẹrẹ iwe tụ́ụ hi wu, ozi emi Ịtayịtọsị, agụvị ka ẹmịrị ẹwụ óo dudu sị ayị tụra Ijeesu. Ohomorihi Ada ayị ọnịrị Ijeesu Ikirisiti Ọdọzaha ayị ẹ̀ mẹ ọyịza yị wụ o.

⁵Iruvo ọnị mị sị navọ wụ tụ́ Ikirete ọ vị ka we tenyi ịsa ana a vọrọ ka à mẹ nị. Nyị azọkụ ịragụ Ohomorihi tụ́ ẹkụra ọzọza. Tamayị ịsị mị vịdị kà wụ oo!

⁶Ọza ana àaa vaa vị ọzọkụ ịragụ, ẹ́ yị vọrọ ka ọ̀ nyị ohuvọ vụrụ-vụrụ. Ọnẹẹ ikonya kẹnẹ a vọrọ ka ọ̀ nyị nị, dị ezi anị ẹ̀ vị ọdọwụ. Ẹ́ yị vọrọ ka aza è re ezi anị ka ẹyaa mẹ̀ ebira kẹnẹ-kẹnẹ, dị ẹ̀ rẹẹ mẹ akamawụ.

⁷Agụvị ka ọdọvịdị ịragụ o si eyi pe ịragụ Ohomorihi, ẹ́ yị vọrọ ka ọ̀ nyị ohuvọ ọnyọọnyị. Asị ọ vị ọza ana ahịka aanị ịnya kẹnẹ ọọ̄ dụ nị, asị ọ rẹ vị ọza anaā hụraa kụ́ ayị, dị asị ọ́ rẹ vị ohweche. Asị ọ vị ọnịrazị, dị asị ọ rẹ vị ọza anaā sịị ayị tụ́ ịnị ẹkẹhị kẹnẹ.

⁸Ama áa vọrọ ka ọ̀ vị ọza eneē sì ọzọga, dị ó re sì avaba ịsa ene zoza. Áa rẹ vọrọ ka ọ̀ zụ mẹ̀ ebira ịrẹyọyẹ, dị ọ̀ vị ọnịzẹyịza, dị ọ̀ nyị ebira ọnịnị, dị ọ̀ rẹ sị ụvọ za ẹngụ anị.

⁹Áa vọrọ ka ọ̀ rẹ sị ụvọ za ịrẹyị Ohomorihi ana vị ịzẹyịza, anka á mẹ vịdị raà sị zụ̀ ọ: dị ọnị ọ̀ rẹ yẹ ọ mẹmẹ zụ sị ịrẹyị ịzẹyịza beri aza juwe, dị ọ̀ rẹẹ sịị zụ̀ aza ẹnẹ ẹ̀ yị dọ ịrẹyị ọnọọ ka, e si nyeeyi.

¹⁰Áa nyị aza ẹnyị ọrụrụ-ọrụrụ ana vị anayọkatẹngụ, ọkụrẹka, dị ẹ rẹ vị enevene nị. Ọrụrụ-ọrụrụ ẹnịnị vị Aniju.

¹¹Ẹyaa sị ịsa ẹnẹ ẹ̀ yị vọrọọ zụ̀ aza. Dị ẹyaa kụ́ avaba aza ene hi ini eehi ọnyaa nyeeyi. Ẹkẹhị kẹnẹ ẹ sị eyi tụ́ ịnị anị nị. Re ka ẹngụ aza ẹnẹẹ waa za wa irenu kú oku.

¹²Anikirete ọnya ana vị ọnịsẹ ộ vịdị kà a ka: Anikirete nịnị vị enee cheeche pooro, vị ẹẹ̄ mẹ anka uye ịnị avị avọọ nị. Onuworo ẹ vị nị, dị ẹ rẹ vị ọnịnọbanyị nị.

¹³Ịrẹyị ọnọọ vị ịzẹyịza. Agụvị avọọ, tụ́ wa ohuvọ ẹtẹẹtẹrẹ, agụvị ẹ̀ vara ayị ẹnịnị tụ́ ini oze ẹdọwụ obooro.

¹⁴Asị ẹ kụkụ sị ayị tụ́ ịnị ịtọpa kẹnẹ-kẹnẹ Aniju nịnị ọnịrị ọda ana aza kẹnẹ mẹ ene ee du ịzẹyịza obooro.

¹⁵Ayị ọza ọ̀ọ nị, avaba ịsa vị ana vaa nị ini eyi anị. Ama ayị ọza ọ̀ yị nị, dị ẹ̀ yị rẹ vị ọdọwụ nị, ẹ yị nyị ịsị ẹẹ̄ nị ini eyi anị. Ayị anị beri ivehu anị nyẹmba ẹ yị hyakụ nị.

¹⁶Ẹẹ̄ sị irenuu kà a ka ẹnị ẹẹ̄ yẹ Ohomorihi, ama ebira ẹnịnị ẹ́ yị sị zụ ka ẹ́ẹ yẹ Ohomorihi. Ịsa eenyisi ẹnịnịị̄ mẹ nị, dị ẹ rẹ yaa mẹ akamawụ nị, ẹ yị nyị ịsa ozoza ẹnẹ ẹnịnị zụ mẹ vụrụ-vụrụ.