Read ebira Ịtayịtọsị 2 Bible Online

Ịtayịtọsị 2 - ebira bible

Ịtayịtọsị 2

¹Ama ẹwụ àa kà ịrẹyị, waa kà ịzẹyịza obooro.

²Kàa yị anọrụ ana sị vị azọkụ ka ẹ̀ sị ụvọ za ẹngụ ẹnịnị, dị ẹ̀ nyị ebira ana vọrọ, dị ẹ̀ẹ mẹ̀ ebira ịrẹyọyẹ. Ẹnịnị ẹ̀ sị ayị tụ́ ịnị ẹdọwụ obooro. Kàa ka èe sì ịrẹyị ọza, dị ẹ̀ rẹ nyị ayọnẹtẹ.

³Rẹ kà a yị anẹẹ ana sị vị azọkụ ka, ẹ̀ẹ mẹ̀ ebira ana vọrọ tụra anẹẹ ọnịnị. Kàa ka asị e re du ọza ịrẹsụ, asị ẹ vị ọrịhị eche oyihú, ama ẹ̀ẹ sị ịsa ene zozaa zụ̀ aza.

⁴Ẹ̀ẹ vavọọ aa mẹ, ẹ va zụ sịị zụ̀ anẹẹ ana vị ozweyi ka è sì ịrẹyị ọva ẹnịnị ẹnịrị ezi ẹnịnị.

⁵Ẹnịnị ẹ̀ẹ mẹ̀ ebira ịrẹyọyẹ, dị ẹ̀ nyị ayị ọnịnị, dị ẹ̀ rẹ vị ọnẹẹ ozoza tụ́ eehi ọva ẹnịnị, dị ẹ̀ẹ ngụ ayị ọza. Ẹnịnị ẹ̀ẹ ka ịrẹsụụ hi yị ọva ẹnịnị, agụvị asị a nyị ọza ana zụ kà ịrẹyị odivi hi ịrẹyị Ohomorihi.

⁶Rẹ vavọọ kà a yị anọrụ ana vị ozweyi ka ẹnị ẹ̀ rẹẹ mẹ̀ ebira ịrẹyọyẹ!

⁷Ẹwụ ụvọta ọ̀ọ mẹ̀ ebira ẹtẹẹrẹ, dị aza ẹ̀ zụụ sị ịrẹyị awụụ hị́ ọsa, dị ẹ̀ rẹ zụụ hama wụ. Nyị ayị ọnya, dụ wa rẹ sị ayị tụ́ ịnị ịsa ọnị waa sịị zụ̀ aza, dụ wa nyị isuuru ịnị anị.

⁸Waa kà ịrẹyị ịzẹyịza, agụvị asị ọza zụ kụ hịrẹ ịrẹyị awụ. Wàa vavọọ aa mẹ, ọza ana àa ka ọnị aa kụ̀ụ hịrẹ ịrẹyị awụ, ụhị vaa nyị ọ, agụvị ka é yi vee re ịrẹyị odivi ayị ana a vọrọ ka ọ̀ọ kà.

⁹Kàa ka ezi ahụ nịnị ẹ̀ẹ ka ịrẹsụụ hi yị ọga ẹnịnị, dị ẹ̀ rẹẹ mẹ avaba ịsa ene zé ọga ẹnịnị eyi. Asị ẹ rẹ va ọga ẹnịnị ịkarenu.

¹⁰Kàa ka asị e yi ọga ẹnịnị oyi, ama ẹ̀ẹ sịị zụ̀ ka ẹnị ẹ́ẹ nyị ịzẹyịza ịnị avaba ịsa! Ẹ̀ẹ vavọọ aa mẹ, ẹ vaa mẹ ka ịrẹyị Ohomorihi Ọdọzaha ayị ọ̀ zụ zé aza eyi ini oze tụra oze.

¹¹Ohomorihi ọ raa sị ayamva anị zụ̀ avaba aza, ana zụ mẹ ka avaba aza ẹ̀ zụ há.

¹²Ayamva ọnọọ aa sịị zụ̀ ka ya hụrẹ avaba ebira oni Ohomorihi è yi sì ụvọ, ọnịrị ịsa ẹhẹ ọnọnị ọnị ọchẹngụ ayịị̄ sì, ama dị yaa mẹ̀ ebira ịrẹyọyẹ, dị yaa mẹ̀ ịsa ana vọrọ ọnịrị ịsa oni Ohomorihi sì ịnị ẹhẹ ọnị ị yà aanị.

¹³Yáa jẹẹ ee zí ụmẹ ọnọọ ọnị ị vaa sị nyị ayohine ẹtẹẹtẹrẹ. Ụmẹ ọnọọ avaba aza ve sii re igirima Ohomorihi ana nyị ụbanyị, ana vị Ijeesu Ikirisiti Ọdọzaha ayị nị.

¹⁴Ijeesu ọnọọ ọ vịdị sị ẹngụ anịị yị, agụvị dị ọ̀ zụ hị́ yị varẹma nị, agụvị dị ya zụ há hụụnị avaba ịsa edivi. Dị ọ́ mẹ ayị ayị ọnịnị, dị ị kụkụ sị vị aza anị ana aa sịị vụrị ka yaa mẹ̀ ịsa ene zoza nị.

¹⁵Waa kà ịrẹyị ẹnẹnịị yà aza, waa sị avaba ụkata awụụ pe waa juwe, dị ụ wa rẹẹ tụ́ wa ohuvọ. Asị ụ zẹẹ ka à nyị ọza ana sị eyi wụ wụ.