Read ebira Ihwirimọnị 1 Bible Online

Ihwirimọnị 1 - ebira bible

Ihwirimọnị 1

¹Ẹmị Ịpọọrụ ana yà ịnị ẹngwa agụvị enube ọyịza Ijeesu Ikirisiti ne beri ẹnẹbẹnị ayị Itimoti ini Ikirisiti aa chẹrẹ iwe ọnọnịị tụ́ụ hi ẹwụ ọta ayị Ihwirimọnị oni yi sì ịrẹyị anị, ọnị ẹyịrị dudu aa mẹ̀ ụkọrọ ọnyara.

²Ị raa sị iwe ọnọnịị tụ́ụ hi anịragụ anaā kụụ gụ ịdị awụ, beri Apiya onyeyiza ayị ini Ikirisiti, ọnịrị Achipọsị ẹnẹ ẹyịrị dudu vị isoja Ijeesu.

³Ohomorihi Ada ayị ọnịrị Ijeesu Ikirisiti Ananyị yị ẹ̀ mẹ ọyịza wụ nịnị, dị ẹ rẹ mẹ ẹngwọọrọ yị wụ nịnị.

⁴Ụmẹ tụra ụmẹ ọnị màa mẹ̀ aduwa, ẹ yị nyị ka mẹyị tamayị awụ, dị mị raa kụ́ Ohomorihi amị avọ.

⁵Mị vavọọ aa mẹ, agụvị ka máa wụ́ ka wee sì ịrẹyị aza Ohomorihi, dị ụ rẹ sị ayị tụra Ijeesu Ikirisiti Ananyị yị nị.

⁶Maa mẹ̀ aduwa ka ẹdọwụ ọnị ụ nyị tụ ịnị anị, ọ̀ va mẹ ka wa yẹ avaba ịsa ọyịza ọnị nyị hu avọọ, agụvị ka ẹyịrị Ikirisiti ọ sị vị ọnya.

⁷Ẹnẹbẹnị, ịrẹyị ọza ọnị u sì, ộ mẹ̀ ka ịnẹ amị ò hine ẹtẹẹtẹrẹ, ộ rẹ sị ọtụtụrụma mị bẹẹ. Wa raà mẹ ka avaba aza Ohomorihi ẹ̀ nyị ayọnẹtẹ.

⁸Ini oze Ikirisiti, máa yaanị nyị irenu ọ̀yị kà a wụ, ịsị a vọrọ ka wa mẹ.

⁹Ama agụvị ka me sì ịrẹyị awụ, ịpẹ m maa dáa wụ nị. Wáa yẹ ka ẹmị Ịpọọrụ, ma sị vị ọzọkụ, dị mị rẹ yà ịnị ẹngwa agụvị Ijeesu Ikirisiti booro aanị nị.

¹⁰Maa dá ịpẹ ịrẹyị Onesimọsịị yị wụ. Ma raà sị ọ vị ozi ma m mẹ̀ yà ịnị ẹngwa ịzẹnị.

¹¹Ịyẹẹyẹ, ẹ́ yị nyị ịsị Onesimọsị vịdị vị yị wụ; ama booro aanị, ọ sị vị ọza okumi-okumi yị ẹmịrị ẹwụ.

¹²Maa sị ọ varẹma vaa wụ̀, ayị amị ọ́ọ saasa aa vẹ.

¹³Mị yaanị sì ka ma sị ọ pe ẹngụ, dị ọ̀ dọ wụ ịrẹsụ, dị ọ̀ọ zị mị ụtụ, m mẹ yà ịnị ẹngwa agụvị enube ọyịza ịzẹnị aanị

¹⁴Ama mé yi sì ka ma sị ụkata za wụ gụ mị ụvọ. Mee sì ka ẹwụ ụvọta ọ̀ sị ayị awụ mẹẹ. Agụvị avọọ, ẹ́ yị nyị ịsị mị vaa mẹ ẹ̀ yị vị ụ sị ụvọ tụ́ ọ.

¹⁵Ẹyịyara, vị Onesimọsị hụụ ịdị awụ yị ụmẹ chee, agụvị dị ọ̀ kụkụ va yà ịdị awụ pooro nị.

¹⁶Ẹ́ yị kụkụ vị ọrịhị awụ kẹnẹ Onesimọsị vị, o si huna ọrịhị yị wụ. Ọyịnyara ayị ini Ikirisiti ọ kụkụ vị nị. Ịsa obooro ọ vị mị nị; máa yẹ ka ọ vaa vị ịsa obooro hu avọọ yị wụ anka ọza, dị ọ rẹ kụkụ va vị ọdọwụ bẹẹ.

¹⁷Wàa hị́ mị ọnọhụva awụ, aarịhịnị dọ Onesimọsị pe ẹngụ anka ụ mẹ yaanị dọ mị.

¹⁸Àa nyị ịrẹyị odivi ọnị ọ mẹ wụ, ọ̀ọ daka rị wụ ụta, kụkụ chẹrẹ avaba anị tịtẹ mị.

¹⁹Ẹmị Ịpọọrụ ụvọta ọ sị ụvọ amị chẹrẹ ẹ tụ́ ịzẹnị nị ka: Mị vee sí ọ yị wụ. Ẹ́ yị nyị ka ma tama wụ ayị, dụ wa yẹ ka ẹma nyị ẹwụ ụvọta ịnyẹmba nị.

²⁰Ẹnẹbẹnị ayị, aarịhịnị hụ agụvị Ananyị yị dụ wa mẹ̀ ịsa ọnọnị mị. Sị ayị amị nẹtẹ agụvị ka ẹmịrị ẹwụ vị ọnya ini Ikirisiti.

²¹M màa chẹrẹ iwe ọnọnị aanị, maa yẹ kaakara ka ụ vaa mẹ ịsị maa dá ịpẹ anịị yị wụ. Máa yẹ ka ụ vaa mẹẹ huna m mẹ kà a.

²²Aarịhịnị, tenyi aku ọnya tịtẹ mị, agụvị ka máa nyị ọyịtureyi ka Ohomorihi vaa dọ aduwa awụ nịnị, dị a sị mị vavẹ va yị wụ nịnị.

²³Epahwirasi ẹnẹ ẹmịrịị yà ịnị ẹngwa agụvị Ijeesu Ikirisiti ka ọnị kụ́ wụ.

²⁴Aza ẹnẹ ẹmịrịị dudu aa mẹ̀ ụkọrọ ana vọ: Ịmaakị, Arisitakọsị beri Ịdẹmasị ọnịrị Iruuku ka ẹnị rẹ kụ́ wụ.

²⁵Ẹyịza ọọhẹ Ananyị yị Ijeesu Ikirisiti ọ̀ yà pe avaba awụ nịnị.