Read ebira Anihiburu 12 Bible Online

Anihiburu 12 - ebira bible

Anihiburu 12

¹Wee re ka áa nyị onivenu ọrụrụ-ọrụrụ ana kara yị aanị. Agụvị avọọ ịsa tụra ịsa ana àa vaa dọ yị oro, à vẹ ya sị ọọ kwooze beri ịvị anaā paraa za yị biri-biri! À vẹ ya jẹẹ geri-geri, di yee zwe echi ana yà ọvịdị ayị!

²À vẹ ya sị eyi pe Ijeesu! Ọnị ọ mẹ ka ye nyima ẹdọwụ, dị ọ rẹ mẹ ka ẹdọwụ ayị ọnọọ ọ̀ gụ nị. Ộ dọ ka oni ò sú isu ụhị ị́rẹsụ ọchị apavahị. Ọ yị za ụhị ọnọọ ịrịka tụ́ ịnị ịsọnyị-ịsọnyị agụvị ịrajẹ ọyịjẹ oni Ohomorihi sị tịtẹ ee zí ọọ. Ọ yaayịtẹ éyi ụvọrị ịnị aga Ohomorihi ohinọyị booro aanị.

³Roo nịnị dị a re ẹngụ ọza ana vavọọ sị ẹngụ dọ ịsa edivi ọnị ọnịvị nịnị mẹ hi ọ! Agụvị avọọ asị ụ zẹẹ ka ò du wu nịnị eyi, dị ụ wa na hụrẹ ụvọ nịnị!

⁴Ụ màa sịị vụrị ka asị ụ mẹ̀ ịvị nịnị, oò yi ve tù ka à wụ̀ wụ nịnị tụ́ ịnị anị.

⁵Ọtụtụrụma oni Ohomorihi aa tụ́ wụ nịnị anka ozi anị, vị ayị wéé hí wu nịnị nị? Ọ kà, “Ozi emi, Ohomorihi ọ̀ọọ tụ wụ ohuvọ, asị ụ sị eyi wụ̀ ịrẹyị anị. Àaa sị́ ụyaa rị wụ, asị ụ zẹẹ ka ò du wu eyi.

⁶Agụvị ka ọza ana Ananyị yị sì ịrẹyị anị, ọọ̄ sị ụyaa rị nị; ọza ọnị ọ̀ọ dọ anka ozi anị, o ree tụ́ nị.”

⁷Agụvị avọọ, àaa sị ụyaa rị wụ, ụ sị isuuru dọ ọ nịnị! Ohomorihi vị ana aa mẹ wụ nịnị anka ezi anị. Áá nyị ozi ana ada anị ọ̀yị mā sị ụya rị?

⁸Wẹ̀ yị mā rị ụya nịnị, anka avaba ezi anị mẹ̀ẹ̄ rị ụya, ọnị ọ vị ka ozi ọta ụ vị nịnị nị, wẹ yị vị ezi obooro nịnị.

⁹Ada ayị ịnị ẹhẹ ọnọnịị̄ sị ụyaa rị yị, dị ị ká ịrẹsụ hi yị wa. Wéé ro ka ayị vọrọ ka ya ká ịrẹsụ hi hu avọọ yị Ada ayị ẹbẹẹba, dị ya zụ yára?

¹⁰Ada ayị ịnị ẹhẹ ọnọnị vị ana aa sị ụyaa rị yị mẹ ụmẹ chee kẹnẹ, anka e mè ro ka óo zoza. Ama Ohomorihi ọnị vị anaā sịị ụyaa rị yị ka ọ̀ vị ọgụ yị; ọnị ọ vị ka ya zụ vị ọnịnị, anka ọ́nị mẹ̀ rẹ vị ọnịnị.

¹¹Ịnị ụmẹ ana àaa sịị sị ụyaa rị yị, o vee du yi ayị, yẹ yị vaa jẹ. Ama ọdịrẹma anị, ụyọrị ọnọọ vaa mẹ ka aza ana sị ẹngụ dọ ọ, ẹ̀ẹ mẹ̀ ịsa ana vọrọ, dị ẹ rẹ yaa mẹ̀ ebira ẹngwọọrọ.

¹²Ụvọ awụ nịnị ana sị kata, re ka wáa sị ụkata yọ nịnị! Idinku awụ nịnị ana rẹ sị kata, re ka wáa mẹ ka ọ̀ rẹ nyị ụkata nịnị!

¹³Waa zị ụsẹ ini oze ana vọrọ nịnị! agụvị asị ahụ aza ene ee sika, ne sú saka-saka, àyị vị ka ahụ ẹnịnị ọ̀ vana ta!

¹⁴Sị vụrị, di u we re ka wáa sị ẹngwọọrọ pe aza aa mẹ; dị ụ wa rẹ sị vụrị di u we re ka waa mẹ̀ ebira ọnịnị nịnị! Agụvị ka aza ẹnẹ ẹ̀yị vavọọ mẹ, eyi ve zuu re Ananyị yị.

¹⁵Sị eyi pe ẹngụ awụ nịnị, agụvị asị a nyị ọza ana ahịka ọ rẹ̀ vaa dọ ayamva Ohomorihi! Asị a rẹ nyị ọza ana na yà anka ẹpa ọchị ọnyịrẹyị ana ha dị ọ̀ọ kụ́ ịrẹyịị hi ẹtẹ! Ẹngụ aza ẹnẹẹ vee du aza ọrụrụ-ọrụrụ ẹngụ.

¹⁶Asị a rẹ nyị ọza ana na vị ọsẹrẹka ọnịrị ọza ẹnẹ ẹ̀ yị tẹsị ịrẹyị Ohomorihi anka Iisọ! Iisọ ọ́ọ hụ agụvị ịsọyịrị ụpẹ ọnya kẹnẹ ná ọzọkụ anị yị ọhụva anị.

¹⁷Wáa yẹ nịnị ka ô vene sì pooro ka ada anị ọ̀ mẹ ka ò zé yị ọnị, ama ada anị ô yi. Iisọ ộ hyakụ yị sị ẹgọ sì oze ka oni ò tenyi ịsa ọnị ọnị vịdị mẹ, ama o yi kuku re oze.

¹⁸Ẹ yị vị ataba (Ịsịnayị) ọnị ọza zụ sị ụvọ kanyị, ụ jẹẹ pe nịnị (anka Anisirẹrị nịnị ịyẹẹyẹ). Ịzọọ, ịra aa za giri-giri, ô hozi ruma-ruma, ẹ yị nyị ẹtohweyi vụrụ-vụrụ, dị ahị aa tụ́ kukuku nị.

¹⁹Ọpanyị raa sụ́, di a rẹ nyị ọngwẹ ana aa kà ịrẹyị nị. Aza ẹnẹẹ mẹ̀ wụ́ ọngwẹ ọnọọ, ệ da ịpẹ ẹtẹẹtẹrẹ ka asị ọ kụkụ kà ịrẹyị yị ẹnị.

²⁰Ẹ́ẹ vavọọ dá ịpẹ, agụvị ka ẹ yị nyẹngụ dọ ọda ana a mẹ ka, uye ọ̀ọ hyakụ kanyị ataba ọnọọ kẹnẹ, à sị ịrẹta wụ ọọ.

²¹Ịsa ene e re ô hí wa angwa ẹtẹẹtẹrẹ. Di Imosiisi hyakụ kà a ka vị ọnị aa dá ẹgahị, ángwa mèe hí ọnị nị.

²²Ịzị ẹwụ nịnị vẹ aanị vị ịnị Ataba Ịzayọnị, ọnịrị ịnị ẹkụra Ohomorihi ana yára. Ịzọọ aā hị́ Ijerusarẹmị ini ihinẹba nị. Anggẹẹrị ọrụrụ-ọrụrụ ọnị ọza ọ̀yị yẹ ịrịka vị ene hi ịzọọ.

²³Ịzị ụ vẹ nịnị aanị vị ịzị avaba anịragụ Ohomorihi kụ́ gụ. Ẹnị ẹ vị ezi ịpaapa Ohomorihi ọnị ọ raà chẹrẹ ịrẹha ẹnịnị tụ́ ẹbẹẹba nị. Wa raà saasa ọnịrẹyịzẹyịza nịnị oni Ohomorihi raà mẹ ka ẹ̀ gụ.

²⁴Wa zị vẹ ịdị Ijeesu nịnị, ana yà ịnị akakana aza ọnịrị Ohomorihi ini oze oto ọwọọwa, dị o re che anya anị sẹ́ ẹtẹ nị. Ịsa ana anya ọnọọ aa kà, o zoza huna ịsa ana anya Ẹba aa kà nị.

²⁵Agụvị avọọ, sị eyi pe ẹngụ awụ nịnị, asị u ne yi ọza ana aa kà ịrẹyịị wụ nịnị! Aza ẹnẹẹ ene yi dị ẹ̀yị wụ́ ọnọ ọza ana a kà ịrẹyị Ohomorihi yị wa ịnị ẹhẹ ọnọnị, ẹ yị há. Ẹyị èe re ve yi, dị yẹ̀ yị wụ́ ọnọ ana aa kà a hụrẹ ẹbẹẹba vẹ nị, wéé ro ka ya zụ há vụrụ-vụrụ?

²⁶Ịnị ụmẹ ọnọọ, ọngwẹ anị ô henyi ẹhẹ. Ama ọyaanị, ọ sị eku hị́ ka ẹ yị vị ẹhẹ kẹnẹ oni re venee henyi, ama oni re vee henyi ihinẹba bẹẹ.

²⁷Ịjị ọ kà a ka, “re venee”, ọ́ọ sị zụ̀ ka e vee henyi ịsa ana a mẹ, dị a kụ́ wa kwooze. Dị a hị́ ka ịsa ọnị ọza ò yi zụ henyi, ọ kụkụ yà ịzọọ nị.

²⁸Agụvị avọọ, à vẹ vị yaa kụ́ Ohomorihi avọ, agụvị ka ọ raà sị aha ịjọvaa yị, ana ahịka o yi zụ henyi. À vẹ ya zẹẹ ka Ohomorihi ọ̀ vayị ayị, dị ya zụ hẹkẹ ẹ ini oze ana ahịka óo zé e eyi; dị ya zụụ sị ụbanyịị yọ, dị ya rẹ zụ nyị angwahi anị!

²⁹Ohomorihi ayị vị ana sị mẹẹ anka ịra anaā rị avaba ịsa ịra avọọ.