Read ebira Anihiburu 13 Bible Online

Anihiburu 13 - ebira bible

Anihiburu 13

¹Ẹwụ nịnị ana vị ẹyịnyara ini Ikirisiti, wee yii sì ịrẹyị ẹngụ nịnị!

²Tamayị ka áa vọrọ ka wee sì ọzọga nịnị! Aza ẹnyị ệ vavọọ mẹ, e reè sì anggẹẹrị nịnị ọzọga, ẹ yị yẹ.

³Waa tamayị aza ene hi ịnị ẹngwa nịnị, anka òo rere vị ka ẹwụrị wa ọ yà ịnị ẹngwa nịnị nị! Rẹ tamayị aza ana aa rị ụya nịnị, anka òo rere vị ka ẹwụrị wa aa rị ụya nịnị nị!

⁴Ọzọza ọ̀ sị ụbanyị yị oze ana a zịị nyị ọnẹẹ, àa vị ọnọrụ! Ẹvarose è re ka ẹnị ẹ́ẹ nyị ịzẹyịza hi ẹngụ! Aza ana aa mẹ̀ ebira kẹnẹ-kẹnẹ ọnịrị ọsẹrẹka nịnị, Ohomorihi vaa mẹ̀ ọkarẹyị yị wa.

⁵Asị ụ zẹẹ ka wa họ́họ̀ha ẹkẹhị ịnị ẹhẹ awụ nịnị! Ama re ka ịsị ụ wàa nyị, ọ́ọ vavọọ hụ wụ nịnị! Wáa yẹ ka Ohomorihi ọ sị ọọ kà ka ọnị ọ yị vaa navọ wụ nịnị tịtẹ, ọnị ọ yị rẹ vaa sị ayịị hụụnị ịrẹyị awụ nịnị.

⁶Agụvị avọọ ayị ayị ọ zụ vị́, dị yaa kà a ka, “Ananyị yị ọ vị ọnọgụvọ amị nị, me yi vee hí angwa. Sị ọza nyẹngụ mẹ mị?”

⁷Tamayị ọdọvịdị awụ nịnị ana kà ịrẹyị Ohomorihi wụ nịnị! Zama ọdịrẹma ẹhẹ ẹnịnị re, dị ụ wa sị ayị tụra Ohomorihi anka ẹnịnị!

⁸Ijeesu Ikirisiti yị vị ọnyọọnya ẹẹrị ọnịrị ajịnị ne beri pooro zịna-zịna.

⁹Asị ụ zẹẹ ka ịsa ọzọga irenyi-irenyi ana aza aa sịị zụ̀ aza, ẹ̀ kụ́ wụ nịnị nyeeyi! Ayamva Ohomorihi a vọrọ ka ọ̀ sị ụkata yị ayị awụ nịnị nị, ẹ yị vị ịrẹyị ọda ịsọyịrị. Ọda ẹnẹẹ ẹ yị mẹ ọgụvọ yị aza ana aa saasa wa.

¹⁰Ikirisiti ộ mẹ̀ ịsọvọọ yị. Aza ana aa mẹ ahẹkẹ anka ẹngụ ahẹkẹ ịnị ajẹngụ ịyẹẹyẹ, ẹ yị nyị tụ́ ịnị ịsọvọ ọnọọ.

¹¹Ohirẹsụ ọbanyị irehi Ohomorihi vị anaā sịị anya uye ana a sị mẹ ịsọvọọ vẹ Aha Ọnịnị ịnị ajẹngụ Ohomorihi, dị ọ sị va mẹ̀ ịsọvọ agụvị ịvị ana aza mẹ. Dị a rị uye ọnọọ nyẹmba ịra ị́rẹma ẹkụra.

¹²Agụvị avọọ Ijeesu oni o re sú ị́rẹma ẹkụra, agụvị dị ọ̀ sị anya anị nyịna aza, dị ẹ̀ nị hụụnị ịvị ẹnịnị.

¹³À vẹ vi ye ne tù ọ ịrẹma ẹkụra, dị ẹ yà rẹ gà ịnị ụhị anị!

¹⁴Ịnị ẹhẹ ọnọnị, yẹ yị nyị ẹkụra ana vaa yà ịzọọ pooro. Ama yee sì ẹkụra ọnị ị vavọọ vaa nyị ana aa vẹ.

¹⁵Agụvị avọọ ini oze Ijeesu, à vẹ yaa ga Ohomorihi pooro! Ụga ọnị yaa sịị yọ vị ana sị mẹẹ anka ịsọvọ ọnị yaa mẹẹ hi Ohomorihi avọọ. Ọnị ọ vi ka yaa sị irenu ayịị kà a ka aza anị ị vị nị.

¹⁶Tamayị di u we re ka waa mẹ ọyịza nịnị! Ịsị ụ wàa nyị, ẹwụrị ọza ọ̀ọ gàa nịnị! Ẹngụ ẹnẹẹ ọ vị ịsọvọ oni Ohomorihi sì nị.

¹⁷Waa wụ́ ịrẹyị chire ọdọvịdị awụ nịnị, dị ụ wa ká ịrẹsụ hi yị wa nịnị! Wáa yẹ ka ẹnị e sị eyi pe ụhwẹ awụ nịnị nị, agụvị ka ẹnịnị vaa kà enube ụkọrọ ẹnịnị. Waa wụ́ ịrẹyị ẹnịnị, agụvị ayị ẹnịnị è zụ hine ịnị ụkọrọ ẹnịnị. Wẹ̀ yị vavọọ mẹ, ayị ẹnịnị e zụ du, ọnọọ ọ́ yị zụ mẹ ọgụvọ wụ nịnị.

¹⁸Waa mẹ̀ aduwaa yị nịnị! Yáa yẹ ka ayị ayị ẹ yị jị ịvị yị. Iī sì ka ya mẹ̀ ịsa ana vọrọ ịnị ịsa tụra ịsa.

¹⁹Hu keekere, aarịhịnị waa mẹ̀ aduwa nịnị ka me re oze jintu vavẹ ịdị awụ nịnị!

²⁰Ohomorihi ọọ̄ sị ẹngwọọrọ yị ọza nị. Ọ raà mẹ ka Ijeesu Ananyị yị ọ̀ ha hụụnị isu. Ijeesu ọnọọ ọ vị ọza ana sị eyi pe aza anị ẹtẹẹtẹrẹ nị. Ộ sị anya anị sị ụvọ tụ́ ịnị oto ana yà pooro zịna-zịna.

²¹Ohomorihi ọnọọ ọ̀ sị avaba ịsa ozoza yị wụ nịnị, dị ụ wa zụ mẹ̀ ịsa oni o sì ka wa mẹ nịnị! Ohomorihi ọ̀ rẹ mẹ yị ini oze Ijeesu Ikirisiti, dị ya zụ vị ịsị o sì ka ya vị. Ijeesu Ikirisiti ọnọọ ọ vaa nyị ụbanyị pooro zịna-zịna nị. Aamị.

²²Ẹwụ nịnị ẹyịnyara amị, aarịhịnị sị ụtọ pe ịrẹyị ọnị mị sị pe wu nịnị juwe aanị ẹtẹẹtẹrẹ! Iwe ọnị mị chẹrẹ tụ́ hi wu nịnị ọ yị gọdọ.

²³Wáá yẹ ka a raà sị Itimoti ẹnẹbẹnị ayị hụụnị ẹngwa nịnị? Òo jintu vẹ, ẹmịrị ọ, ọ vaa zị vee hee wu nịnị nị.

²⁴Kụ́ avaba ọdọvịdị awụ nịnị, ọnịrị avaba aza Ohomorihi ana vọ! Anda ayị ana hụrẹ Itari vẹ ka ẹnị kụ́ wụ nịnị o.

²⁵Ohomorihi ọ̀ mẹ ọyịza yị avaba awụ nịnị!