Read ebira Anihiburu 2 Bible Online

Anihiburu 2 - ebira bible

Anihiburu 2

¹Agụvị avọọ a sị vọrọ ka ya nyayịnẹ sị ụvọ za ịrẹyị ọnị ị wụ́, agụvị asị i ne nyeeyi nị.

²Yée re ka ịrẹyị ana anggẹẹrị nịnị va kà yị aza vị ana jẹẹ. Ọza ana àa jịnẹẹ, dị ọ mẹ akamawụ hi ọọ nị, vị ana aa rị ụya oni o sì.

³Yéé ro ka ẹyị àa sị ụvọ dẹmbẹrẹ sị ịrẹyị ẹdọha ana maanị banyị aanị, ka ya zụ há? Ananyị yị ọnị ụvọta ọ vịdị kà a yị aza nị. Dị aza ana wụ́ ọọ ẹnị rẹ sị zụ̀ yị ka ịzẹyịza ị́rẹyị ọnọọ vị nị.

⁴Ohomorihi ọnị ọ rẹ dọ ivenu tụ́ ọọ ini oze ụkọrọ apọtẹrẹwa ọnịrị ohyozirenu irenyi-irenyi ana aa mẹ; ọ rẹ mẹ ka Ụhwẹ Ọnịnị anị ọ̀ sị ụkata irenyi-irenyi yị ọzọza anka o mè sì ọọ.

⁵Ẹhẹ ana aa vẹ ọnị yaa kà aanị, ẹ́ yị vị anggẹẹrị nịnị Óhomorihi si chire ụvọ.

⁶Ama â kà a aha ọnya ini Iwe Ohomorihi ka, “Ohomorihi, sị ọza vị ana vị da, oni u wee sii ro ịrẹyị anị? Sị ozi ọza vị, dị ụ zẹẹ ka à nyị ịzị ịrẹyị anị gẹ wụ?

⁷Wáa mẹ ka ò weyi huna anggẹẹrị nịnị chee. Wáa sị ụbanyị ohinọyị, wáa sị yọ.

⁸Wa rẹ mẹẹ ka ọ̀ọ mẹ ohinọyịị tụ́ ịrẹsụ avaba ịsa.” Ọ mẹ̀ sị ọọ mẹ ohinọyị avaba ịsa, ọnị ọ vị ka ẹ́ yị nyị ịsa ana vọ ọnị ọ̀yị sị ọọ mẹ ohinọyị anị. Ama yeè yi ve re ka aa mẹ ohinọyịị tụ́ ịrẹsụ avaba ịsa booro aanị.

⁹Ama yée re Ijeesu, ana ahịka â mẹẹ ka ò weyi huna anggẹẹrị nịnị chee, agụvị ini oze ayamva Ohomorihi, dị ò sú yị avaba aza. Agụvị ụya ọnọọ oni Ijeesu vavọọ rị dị o sú, Ohomorihi ọ́ọ sị ụbanyị ohinọyịị yọ.

¹⁰Ohomorihi ọ mẹ avaba ịsa nị, dị ẹ rẹ vị Óhomorihi nị. Agụvị avọọ áa vọrọ ka ọ̀ mẹ ka Ijeesu ọ̀ gụ ini oze ụya ọnị ọ rị, dị aza ọrụrụ-ọrụrụ ẹ̀ zụ nyị tụ́ ini igirima anị. Ijeesu ọ sị oze zụ̀ wa ka ẹ̀ vẹ, dị à va dọ wa há nị.

¹¹Ijeesu ana mẹ ka aza ẹ̀ vị ọnịnị, ọnịrị aza ọnị ọ mẹ ka ẹ̀ vị ọnịnị vi ene dudu nyị Ada ọnya. Agụvị avọọ ụhị ọyị nyị Ijeesu ọyịhị́ wa ẹyịnyara anị.

¹²Ộ kà a ka, “Ohomorihi, mị vaa kà ịrẹyị awụụ yị ẹyịnyara amị; mị vaa jị ahẹ ga wụ ịnị akakana anịragụ awụ.”

¹³Ọ rẹ kà a ka, “Mị vaa sị ayịị tụra Ohomorihi.” Ọ rẹ kà a ka, “Ẹmịrị ezi oni Ohomorihi sị yị mị, yị.”

¹⁴Ezi anị ẹnẹẹ vị aza rị ẹyị ị́rẹsụ. Agụvị avọọ, Ijeesu ọ́ọ vẹ ẹhẹ dị ọ yà anka ẹnịnị gẹdẹ-gẹdẹ nị, ka oni ò sú, di oni ò du ụkata Echu ha. Echu ọ nyị ụkata isu nị.

¹⁵Aza ana ahịka ịnị avaba ẹhẹ ẹnịnị, vị ẹ vịdị yà anka ọrịhị avọọ, e mèe hí angwa isu nị, Ijeesu ộ dọ wa há.

¹⁶Yáa yẹ ka ayị vị anggẹẹrị nịnị ọ sị ịrẹyị anị tụ́ ịnị ayị. Ama ezi Abụrahamị ọ sị ịrẹyị anị tụ́ ịnị ayị nị.

¹⁷Ọnọọ ọ vị ka áa nyị ka ọ̀ yà anka ẹyịnyara anị ini oze tụra oze, dị ọ̀ zụ yà anka ohirẹsụ ọbanyị irehi Ohomorihi ana vaa mẹ ụkọrọọ yị Ohomorihi. A zụ sị ayị tụraa, dị ọ rẹẹ̄ vayị ọza nị, agụvị dị ò zụ sí ụta ịvị aza.

¹⁸Ộ rị ụya, a mẹ̀ zama a re; agụvị avọọ aza ana àaa zama a re, ọ zụ gụ wa ụvọ.